An Relihion daw an Pinakadahelan kan mga Problema nin Katawohan?

“KUN an relihion dai nag-eenkaminar nin mapait na paglalaban iyan garo droga na nagpapabagol sa konsensia nin tawo asin pinapano nin pantasia an isip nin tawo. . . . Ginigibo [kaiyan] an mga tawo na magin hayakpit an isip, superstisyoso, pano nin pagkaongis asin takot.” An dating Metodistang misyonero na nagsurat kaiyan nagsabi pa: “An mga akusasyon na ini totoo. Igwa nin maraot asin marahay na relihion.”​—Start Your Own Religion.

‘Daing duwa-duwa na bakong makatanosan na pagkritikar iyan,’ an tibaad sabihon nin nagkapira. Pero, siisay an makadedehar sa pagigin totoo kan kasaysayan? Sa dakulang kabtang, an relihion​—na tinatawan nin kahulogan na “an paglilingkod asin pagsamba sa Dios o sa bagay na lihis sa natural”—​igwa nin labi-labi karaot na rekord. Maninigo iyan na magtao nin kaliwanagan asin mag-inspirar sa sato. Minsan siring, sa parate an ginigibo kaiyan iyo an pataluboon an mapait na paglalaban, pagkapanatiko, asin pagkaongis. Taano ta arog kaiyan?

Sarong Nanlalagalag na “Anghel nin Liwanag”

Oyon sa Biblia, may simpleng marhay na simbag. Nagsasaginsagin na “anghel nin liwanag,”  minilyon an ilinagalag ni Satanas na Diablo na sumunod sa saiyang mga katokdoan imbes na sa Dios. (2 Corinto 11:14) Ipinaheling ni apostol Juan na mahiwas na marhay an impluwensia ni Satanas kaya “an bilog na kinaban namumugtak sa kapangyarihan kan maraot.” (1 Juan 5:19) Aram ni Juan na “ilinalagalag [ni Satanas] an bilog na ineerokan na daga.”​—Kapahayagan 12:9.

Ano an nagin mga epekto kaini? Pinalakop ni Satanas an mga sistema nin relihion na sa luwas garo banal. Igwa sinda nin “itsura nin ‘relihion,’ ” alagad an tunay na kamugtakan kaiyan nahahayag huli sa maraot na bunga kaiyan. (2 Timoteo 3:​5, J. B. Phillips; Mateo 7:15-20) Imbes na magtabang sa pagresolber sa mga problema nin katawohan, an relihion sa katunayan nagigin kabtang kan problema.

Dai tolos nindo pagsabihon na an ideyang iyan harayong mangyari o bakong rasonable. Girumdomon, an pinakangkahulogan kan pandadaya iyo na an saro na dinadaya daing pakaaram kaiyan. Si apostol Pablo nagtao nin halimbawa kaini kan sia magsurat: “An mga bagay na iinaatang kan mga nasyon iinaatang ninda sa mga demonyo, asin bakong sa Dios.” (1 Corinto 10:20) An mga tawong iyan posibleng marhay na mabibigla na isipon na sinda nagsasamba sa mga demonyo. An paghona ninda nagsasamba sinda sa sarong klase nin marahay na dios, o mga dios. Pero, sa katunayan sinda nadaya kan “maraot na mga puersang espiritu sa langitnon na mga lugar,” na nagsusuportar ki Satanas sa saiyang mga paghihingoa na ilagalag an katawohan.​—Efeso 6:12.

Halimbawa, estudyaran niato kun paano nagibo ni Satanas na dayaon asin ilagalag an dakol na naghihingakong Kristiano na gustong ignorohon an patanid ni apostol Juan manongod sa maraot na impluwensia.​—1 Corinto 10:12.

An Itinokdo ni Jesus Hale sa Dios

“An sakong itinotokdo,” an sabi ni Jesu-Cristo, “bako ko, kundi kaidtong nagsugo sa sako.” (Juan 7:16) Iyo, an saiyang itinokdo hale sa Makakamhan sa Gabos na Dios. Kaya an mga katokdoan ni Jesus may mapuersa, nakapakokosog na epekto sa mga nagdadangog sa saiya. Dai kaiyan ‘ginibong bagol an konsensia nin tawo o pinano nin pantasia an isip nin tawo.’ Al kontraryo, an mga katokdoan ni Jesus pinatatalingkas an mga tawo sa sala nin relihion asin mga pilosopiya nin tawo na hale sa sarong kinaban na “nasa kadikloman sa isip” huli sa pandadaya kan Diablo.​—Efeso 4:18; Mateo 15:14; Juan 8:​31, 32.

An tunay na mga Kristiano namidbid, bakong paagi sa paghingako sana nin kabanalan, kundi paagi sa pagtubod na nagpapabanaag kan magagayon na kualidad na ibinubunga kan banal na espiritu nin Dios. (Galacia 5:​22, 23; Santiago 1:22; 2:26) An lataw sa mga kualidad na ini​—asin an nagpapamidbid na tanda kan tunay na Kristianismo​—iyo an halangkawon na kualidad nin pagkamoot.​—Juan 13:​34, 35.

Minsan siring, mangnoha an importanteng puntong ini: Dai linaoman ni Jesus ni kan saiyang mga apostol na an Kristianong kongregasyon mapadagos sa orihinal na porma kan pagkaestablisar kaiyan. Aram ninda na matalubo an apostasiya asin na an tunay na relihion matatahoban sa laog nin kadikit na panahon.

An Tunay na Relihion Natahoban sa Laog nin Kadikit na Panahon

Sa sarong ilustrasyon manongod sa trigo asin mga doot, ihinula ni Jesus na an tunay na relihion haros matatahoban sa laog nin kadikit na panahon. Basahon mismo nindo an pagkasaysay sa Mateo 13:24-30, 36-43. Sarong oma an sinabwagan ni Jesus nin trigo, kan “marahay na banhi,” na naglaladawan sa saiyang fiel na mga disipulo na makompuesto kan orihinal na Kristianong kongregasyon. Nagpatanid sia na pag-abot nin panahon an “sarong kaiwal,” si Satanas na Diablo, masabwag sa oma nin trigo nin “mga doot”​—mga tawo na naghihingakong nagsusunod ki Jesu-Cristo alagad an totoo hinahaboan an saiyang mga katokdoan.

 Dai nahaloy pagkagadan tolos kan mga apostol ni Jesus, naglataw an mga indibiduwal na nagin “mga doot,” na mas gusto an biribid na mga katokdoan nin tawo kisa “mismong tataramon ni Jehova.” (Jeremias 8:​8, 9; Gibo 20:​29, 30) Bilang resulta, sarong biribid asin palsipikadong Kristianismo an luminataw sa kinaban. Dinominar iyan kan inaapod sa Biblia na “an tampalasan”​—sarong maraot na grupong klero na mismong sagom sa “lambang bikong pandadaya.” (2 Tesalonica 2:6-10) Ihinula ni Jesus na an kamugtakan na ini mababago “sa pagtatapos kan sistema nin mga bagay.” An arog-trigong mga Kristiano titiriponon sa pagkasararo asin an “mga doot” sa kahurihurihi lalaglagon.

An palsipikadong Kristianismong ini an may paninimbagan sa “dakol na siglo nin biyong barbarismo” asin sa espirituwal na kadikloman na nakatahob sa Kakristianohan sa suminunod na dakol na siglo. Huling nahehelingheling na ini asin an gabos na iba pang biko asin madahas na mga gibo poon pa kaidto sa ngaran nin relihion, tamang ihinula ni apostol Pedro na “huli kan mga ini [an naghihingakong mga Kristiano] an dalan kan katotoohan pagtataraman na may panlilibak.”​—2 Pedro 2:​1, 2.

“Sarong Teolohiya nin Kabangisan Asin Pagkaongis”

Bako sana nanggad an Kakristianohan an nagtao sa relihion nin mandatang reputasyon. Halimbawa, isip-isipon nindo an pundamentalistang mga porma nin “militanteng kabanalan” na an sabi kan dating madreng si Karen Armstrong naggikan sa “lambang mayor na tradisyon nin relihion.” Oyon ki Armstrong, an saro sa nagdedeterminar na pagbalo sa arin man na relihion iyo na iyan maninigong magbunga nin “naheheling sa gibo na pagkaludok.” Ano an nagin rekord kan pundamentalistang mga relihion mapadapit digdi? “An pundamentalistang pagtubod,” an isinurat nia, “baga man iyan Judio, Kristiano, o Muslim, bakong pasado sa nagdedeterminar na pagbalong ini kun iyan nagigin teolohiya nin kabangisan asin pagkaongis.” (The Battle for God​—Fundamentalism in Judaism, Christianity and Islam) Alagad an “pundamentalistang” klase nin relihion sana daw an dai nakapasar sa pagbalong ini asin nagin “teolohiya nin kabangisan asin pagkaongis”? Ipinaheheling kan kasaysayan na bako.

Sa katunayan, si Satanas naggibo nin sarong pambilog na kinaban na imperyo nin falsong relihion, na mamimidbid paagi sa kabangisan, pagkaongis, asin haros daing katapusan na pagpabolos nin dugo. Inaapod kan Biblia an imperyong ini na “Dakulang Babilonya, an ina . . . kan makababaldeng mga bagay kan daga,” asin ilinaladawan iyan bilang sarong patotot na nakasakay sa likod nin sarong garo hayop na sistema nin politika. Mahalagang mangnohon na sia an maninimbag sa “dugo . . . kan gabos na ginadan sa daga.”​—Kapahayagan 17:4-6; 18:24.

Bakong Gabos Nadaya

Minsan siring, pinatutunayan kan kasaysayan na bakong gabos nadaya. Dawa sa pinakamadiklom na mga panahon, an sabi ni Melvyn Bragg, “dakol na marahayon na kalag an naggibo nin marahay mantang an kadaklan sa palibot ninda maraot.” An tunay na mga Kristiano padagos na ‘nagsamba sa [Dios] sa espiritu asin katotoohan.’ (Juan 4:21-24) Suminiblag sinda sa pambilog na kinaban na sistema nin relihion na nagpatotot bilang “sarong parasuportar sa kapangyarihan militar.” Nagsayuma sindang magin imbuelto sa Iglesia asin Estado na ihinahayag kan kasaysayan na “masasabi sanang sarong kontrata na ginibo ni Satanas asin bakong nin siisay man na Jesus nin Nazaret.”​—Two Thousand Years​—The Second Millennium: From Medieval Christendom to Global Christianity.

Mas dai pa sana nahahaloy, an Mga Saksi ni Jehova namidbid huli sa impluwensia ninda para sa ikakarahay. Tanganing dai madigtaan kan falsong relihion, ibinasar ninda an saindang mga tinutubod asin gawe-gawe solamente sa ipinasabong na Tataramon nin Dios, an Biblia. (2 Timoteo 3:​16, 17) Asin arog kan mga Kristiano kan enot na siglo, sinunod ninda an pagboot ni Jesus na magin “bakong kabtang kan kinaban.” (Juan 15:17-19; 17:14-16) Halimbawa, sa Nazi Alemania nagsayuma sindang ikompromiso an Kristianong mga prinsipyo asin kun siring dai sinda maaako segun sa ideolohiyang Nazi. Ikinaongis sinda ni Hitler huli kaiyan. An sabi nin sarong pinag-aadalan na libro sa eskuelahan: “An Mga Saksi ni Jehova . . .  nagsunod sa katokdoan kan Biblia na dai magkapot nin mga armas sa ano man na dahelan. Kaya nagsayuma sindang magserbisyo sa militar o magin imbuelto sa mga Nazi. Bilang balos, ibinilanggo kan SS an bilog na mga pamilya nin mga Saksi ni Jehova. Mga un-tersio kan gabos na Saksi ni Jehova [sa Alemania] an ginadan sa mga kampo de konsentrasyon.”​—Germany​—1918-​45.

Iyo, an ibang makosog an boot na mga indibiduwal sa manlaenlaen na relihion nagdusa man huli sa mga paniniwala ninda. Alagad ginibo ini kan Mga Saksi ni Jehova bilang nagkakasararo na grupong relihioso. An mayoriya nanggad marigon na nangapot sa pundamental na prinsipyo kan Kasuratan: ‘Kuyogon an Dios bilang namamahala imbes na mga tawo.’​—Gibo 5:29; Marcos 12:17.

An Pinakadahelan kan Problema

Kaya totoo sana sa sarong kabtang na an relihion an pinakadahelan kan gabos na problema nin katawohan. An falsong relihion an pinakadahelan. Pero, intension nin Dios na haleon an gabos na falsong relihion sa dai na nanggad mahahaloy. (Kapahayagan 17:​16, 17; 18:21) An pagboot nia sa siisay man na namomoot sa hustisya asin katanosan iyo na: “Lumuwas kamo sa saiya [an boot sabihon, an Dakulang Babilonya, an pambilog na kinaban na imperyo nin falsong relihion], banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat. Huli ta an saiyang mga kasalan nakaabot na sagkod sa langit, asin ginirumdom na nin Dios an saiyang mga gibo nin inhustisya.” (Kapahayagan 18:​4, 5) Iyo, an Dios mismo anggot na marhay sa relihion na ‘nag-eenkaminar nin mapait na paglalaban, nagpapabagol sa konsensia nin tawo, pinapano nin pantasia an isip nin tawo, asin ginigibo an mga tawo na magin hayakpit an isip, superstisyoso, asin pano nin pagkaongis patin takot’!

Mientras tanto, tinitipon nin Dios sa dalisay na relihion an mga namomoot sa katotoohan. Iyan an relihion na nagsususog sa mga prinsipyo asin katokdoan nin sarong mamomoton, makatanosan, asin maheherakon na Kaglalang. (Miqueas 4:​1, 2; Sofonias 3:​8, 9; Mateo 13:30) Puede kamong magin kabtang kaiyan. Kun gusto nindo nin dugang na impormasyon kun paano mamimidbid an dalisay na relihion, dai mag-alangan na sumurat sa mga kagpublikar kan magasin na ini, o magpatabang sa siisay man sa mga Saksi ni Jehova.

[Ritrato sa pahina 7]

An mga tawo hale sa gabos na pinaghalean nakanompong nin kagayagayahan sa dalisay na relihion