Asamblea sa “Pusod kan Kinaban”

Nadangog na daw nindo an mga terminong “Te Pito o Te Henua”? Sa Rapa Nui, an orihinal na lenguahe na ginagamit sa Easter Island, iyan nangangahulogan “an Pusod kan Kinaban.” Taano ta nagin espesyal na marhay an sarong asamblea digdi?

NAPAPASUWAY, misteryoso, napapalaen. Nagkapirang termino ini na ginagamit kun ilinaladawan an Easter Island, o Rapa Nui na apod dian kan mga nag-eerok digdi. Iyan sarong napapasuway nanggad na lugar na nasa tahaw kan Kadagatan nin Timog Pasipiko, 3,790 kilometros hale sa Santiago, Chile. Iyan nagin probinsia nin Chile kan Setyembre 9, 1888.

May hiwas na 166 kilometro kuadrado, an triangular na islang ini sa pundamental kompuesto nin tolong gadan na bulkan. Sa katunayan, arog kan dakol na isla sa Pasipiko, iyan kompuesto nin mga alitoktok sana nin dakulaon na mga bukid sa irarom nin tubig. An bilog na isla idineklarar na sarong natural na monumento. Daing duwa-duwa na iyan midbid na marhay huli sa misteryosong mga estatuwang gapo kaiyan, na inaapod na moai. *

Apuera sa kaakit-akit na mga lugar asin historikong mga pasyaran, an Easter Island igwa nin napapalaen na manlaenlaen na piling kakanon. Sa daga yaon an mga prutas na arog baga kan mga pinya, abokado, tapayas, asin siyam na klase nin batag. Asin sa dagat igwa nin dakol na manlaenlaen na klase nin sira asin iba pang kakanon na hale sa dagat.

Suabe an panahon sa Easter Island, na may regular na mga pag-oran asin hablondawani, na nagtatao nin malinig na aire asin pambihirang tanawon sa mga namamasyar. Sa presente, may mga 3,800 na residente. An mga nag-eerok sa presenteng panahon naggikan sa enot na mga dayong nag-istar, na nasalakan nin mga Europeo, Chileano, asin iba pa. Ginatos na turista hale sa Europa asin Asia an nagpapasyar sa isla, na nagpapangyaring magin mahalagang kabtang kan ekonomiya an turismo.

 Mga Banhi kan Kahadean na Enot na Ikinatanom

An 1982 Yearbook of Jehovah’s Witnesses nagreport: “May panahon kaidto na saro sana an samong parahayag sa Easter Island. Natabangan sia sa espirituwal paagi sa pakipagsuratan sa sarong misyonera sa sangang opisina [sa Chile]. Minsan ngani nagbalik na sia sa kontinente, may rekord kita nin mga suskritor nin Torrengbantayan sa isla. Sa pagngalas ming marhay, kan Abril 1980 nakaresibi kami nin long-distance na apod sa telepono hale sa sarong interesado na gustong maaraman kun noarin iseselebrar an Memorial. Dangan paghaloyhaloy kan taon man sanang idto sarong mag-agom na hale sa Valparaiso an nagbalyo duman, asin namamayo na sinda nin mga pag-adal sa Biblia sa mga tawong interesado. Kan Abril 1981 ginibo an sarong pagtiripon para sa Memorial sa islang ini sa kaenot-enoteng pangyayari, na 13 an nag-atender. Kanigoan an kaogmahan niamo na nakakalaog sa napapasuway na lugar na ini an ‘maogmang bareta’!”

Paghaloyhaloy, kan Enero 30, 1991, an sangang opisina nagsugo sa isla nin mag-agom na espesyal payunir, si Dario asin Winny Fernandez. Nagigirumdoman ni Tugang na Fernandez: “Pakalihis nin limang oras na biahe sa eroplano nakaabot kami sa pinakanapapasuway na parte kan planeta, sa sarong kultura na pano nin misteryo.” Naorganisar tolos an mga pagtiripon asin paghuhulit sa tabang nin sarong lokal na tugang na lalaki asin nin sarong tugang na babae na kaaabot pa sana kaiba an saiyang duwang aki. Sa ibong kan pangigipit nin pamilya, relihiosong init nin boot, asin nagkapirang estilo nin pamumuhay na ordinaryo na sana sa kulturang Polinesiano, naheling ninda an bendisyon ni Jehova sa saindang mga paghihingoa. An mag-agom na Fernandez bako nang espesyal payunir, alagad nagdanay sinda sa isla, na duman ninda pinapadakula an saindang aking lalaki, na namundag duman. Ngonyan, igwa na nin 32 na magayagayang parahayag kan Kahadean. Kabilang sa sainda an mga propiong taga Rapa Nui, siring man an mga dayong nag-istar sa isla o nagbalyo duman tanganing maglingkod kun saen mas dakula an pangangaipo nin mga parabalangibog kan Kahadean.

Mga Preparasyon Para sa Sarong Pansirkitong Asamblea

Huli sa harayong distansia kan isla asin kan kontinente, an kongregasyon nakakaresibi tolong beses kada taon nin mga video tape kan mga programa sa espesyal na aldaw nin asamblea, pansirkitong asamblea, asin pandistritong kombension. Alagad kan katapusan kan 2000, an ideya na magkaigwa nin sadiri nindang asamblea, an kaenot-enote duman, inestudyaran kan Komite kan Sangang Opisina sa Chile. Sa katapustapusi, napagdesisyonan na gibohon an sarong pansirkitong asamblea kan Nobyembre 2001, asin ipinaabot an imbitasyon na umatender sa espesyal na okasyon na ini sa limitadong bilang nin mga tugang na lalaki asin babae hale sa manlaenlaen na kabtang kan Chile. Huli sa iskedyul kan eroplano, an asamblea gigibohon nin Domingo asin Lunes.

An 33 na imbitadong delegado ogmahon sa bagay na sinda mabiahe pasiring sa isla tanganing makikabtang sa enot na pansirkitong asamblea na gigibohon sa napapasuway na lugar na idto. Pakatapos nin halawig na biahe sa eroplano sa Dagat Pasipiko, naginhawahan an mga delegado na maogmang akoon kan lokal na mga tugang na naghahalat sa sainda sa aeropuerto. An mga delegado tinaratara paagi sa magagayon na leis (mga kuintas na gibo sa mga petalo nin burak), sarong tipikong regalo sa isla. Dangan ihinatod sinda sa saindang mga dagosan, asin pakatapos nin halipot  na pamamasyar sa isla, an gabos na may kabtang sa programa kan asamblea nagtiripon sa Kingdom Hall.

Publisidad Hale sa Sarong Dai Linalaoman na Tawo

Mantang nasa lunadan pasiring sa asamblea, nabigla an nagkapirang delegado na madangog sa radyo an lokal na padi na nagkokomento manongod sa saindang pagbisita. Nasambitan nia an mga turista hale sa kontinente na madalaw sa mga harong tanganing makipag-olay manongod sa madatong na katapusan kan kinaban. Minsan ngani sinadol nia an mga miembro kan saiyang parokya na dai maghinanyog sa mga bisita, an saiyang anunsio nakatabang sa pagtao nin publisidad sa presensia nin dakulang grupo nin mga Saksi ni Jehova sa isla. Napukaw kaini an pag-antisipar kan mga taga isla. Durante kan suminunod na mga aldaw, mataktikang ihiniras sa sainda kan mga delegado an nakaparirigon sa boot na mensahe kan maogmang bareta.

Nagpoon an Asamblea

Kan Domingong aga, an lokal na mga tugang naghahalat sa puertahan kan Kingdom Hall tanganing taratarahon an mga delegado pagdatong ninda sa enot na aldaw kan asamblea. “Iorana Koe! Iorana Koe!” “Maogma kamong inaako!” An nagkapirang tugang na babae nagsulot nin tradisyonal na gubing asin sinamnohan an saindang buhok nin magagayon na burak sa tunay na estilong Polinesiano.

Pakatapos nin nakaoogmang tugtog nin musika sa kapinonan, ginatos na tingog an nakiayon sa pag-awit kan “Magin Marigon, Dai Natatanyog!” sa paaging dai pa nadangog kasuarin man sa isla. An lokal na mga tugang napaluha kan ipahayag kan tsirman an mainit na pag-ako sa sadiri nindang tataramon, an Rapa Nui. Durante kan intermisyon sa udto, tolong bagong Saksi an sinimbolisaran an saindang pagdusay sa Dios paagi sa bautismo sa tubig. Kan matapos an programa kan enot na aldaw, an gabos nakamateng mas dayupot ki Jehova asin sa bilog na kasararoan nin magturugang.​—1 Pedro 5:9.

Paghuhulit sa Aga

Huli sa espesyal na kamugtakan sa isla, an programa kan ikaduwang aldaw kan pansirkitong asamblea nagpoon pakatapos nin pangudtohan. Kun siring, inaprobetsaran kan mga delegado an situwasyon asin ginamit an aga tanganing makikabtang sa ministeryo sa langtad. Anong mga eksperyensia an naghahalat sa sainda?

An sarong may edad nang babae na may walong aking lalaki asin babae nagsabi sa mga Saksi na dai sia puedeng makipag-olay sa sainda huli ta sia Katoliko. Pakatapos nindang sabihon sa saiya na gusto nindang makipag-olay manongod sa mga problema na napapaatubang sa gabos, siring baga kan pagdodroga asin mga problema nin pamilya, nag-oyon siang maghinanyog.

An sarong taga duman na may edad nang babae may pagkaantipatikong inatubang an sarong mag-agom na Saksi. Sinabihan nia sinda na dumuman asin makipag-olay sa mga tawo sa kontinente na maringison sa iba. Sinabi sa saiya kan mag-agom na an mensahe kan ‘maogmang bareta kan kahadean’ iinaalok sa gabos asin na an saindang katuyohan sa pagsongko sa isla iyo an pag-atender sa sarong asamblea na matabang sa gabos na tumalubo sa pagkamoot sa Dios. (Mateo 24:14) Hinapot ninda sia kun magugustohan nia an sarong halawig na buhay sa paraisong mga kamugtakan, na kaagid kan sa isla alagad mayo nin helang asin kagadanan. Pakatapos nindang makipangatanosan sa saiya manongod sa kun pirang taon nang nag-eeksister an mga bunganga kan  bulkan sa isla, napaghorophorop nia an kahalipotan nin buhay asin naghapot: “Taano ta nabubuhay kita nin halipoton sanang panahon?” Sia nagngalas kan mabasa nia an Salmo 90:10.

Sa mismong oras na iyan, biglang nadangog kan mga Saksi na may nagkukurahaw sa ibong na pinto. Minsan ngani dai ninda nasasabotan kun ano an ibinubulyaw, sinabi sa sainda kan babae na an mga kataed nagkukurahaw nin mga pan-insulto asin linilinaw ninda na habo nindang magpadalaw sa mga Saksi. Minsan siring, an babaeng ini an nua, o an pinakamatuang aking babae kan pamilya. Huling nagadan na an saiyang ama, katongdan niang magdesisyon kun ano an pinakaikararahay kan pamilya. Sa atubangan kan saiyang mga paryente, idinepensa nia an mga tugang sa sadiri niang tataramon asin maboot na inako an mga publikasyon na iinalok sa saiya. Kan huri sa semanang idto, kan maagihan an mga Saksi mantang nasa lunadan, sinabihan nia an saiyang tugang na lalaki na ipara an kotse. Sa ibong kan risang-risang kaanggotan kan tugang kaini, sia nagpaaram sa mga tugang asin ipinahayag an pagmawot na sinda magin logod mapanggana sa saindang ministeryo.

Minsan ngani sa primero an nagkapirang taga isla garo baga hinahaboan an mensahe na ihinuhulit kan mga Saksi na hale sa kontinente, nagin risang-risa para sa mga bisita na an mga taga Rapa Nui natural na maboot asin makikatood. An kadaklan sa sainda maogmang naghinanyog sa maogmang bareta. Sa katunayan, 6 sa 20 Saksi na nabautismohan sa isla an lokal na mga residente. An saro sa sainda enot na nanodan an katotoohan sa Biblia paagi sa paghinanyog sa pag-adal sa Biblia sa saiyang agom na babae mantang sia nasa kaharaning kuarto. Sia asin an saiyang agom na babae bautisadong mga Saksi na ngonyan, asin sia saro nang ministeryal na lingkod sa kongregasyon.

Nagpapadagos an Espirituwal na Programa

Pakatapos kan pangudtohan, nagpoon an programa kan ikaduwang aldaw. Sa giraray, an 32 na lokal na tugang na lalaki asin babae asin an 33 na delegado inibanan nin dakol na tawong interesado. Magsasanggatos katawo an naghinanyog sa programa, na kaiba an pampublikong pahayag na “Kun Paano Dinadaog kan Pagkamoot Asin Pagtubod an Kinaban.” Sa katunayan, naheling kan mga presente an buhay na patunay kan pagkamoot na yaon sa tahaw kan banwaan ni Jehova, dawa sa tahaw kan mga magkalaen an kultura.​—Juan 13:35.

Sa panahon kan pansirkitong asamblea, an paraataman sa sirkito asin distrito naggibo nin sarong espesyal na pakipagmiting sa mga ministrong payunir. An tolong regular payunir sa isla inibanan kan mga delegadong regular o espesyal payunir. An gabos naparigon na marhay an boot.

Kan suminunod na aldaw, an nagkapirang lokal  na tugang na nagtatrabaho bilang mga giya nin mga turista ipinasyar sa bilog na isla an mga delegado. Pinasyaran ninda an sarong tipakan nin gapo na duman inuukit an moai, mga bulkan na duman ginibo an suanoy na mga kompetisyon asin, siempre, an magayon na may garo bulawan na baybayon nin Anakena, na duman naglusad an enot na mga dayong nag-istar sa isla. *

An ultimong oportunidad na makaiba an lokal na mga tugang iyo an Pag-adal sa Libro kan Kongregasyon. Pagkatapos kan pagtiripon, sinorpresa kan lokal na mga Saksi an saindang mga bisita paagi sa sarong tipikong karakanan. Kan huri, sa nagpapamidbid nindang kostium, ipinaheling ninda an sarong magayonon na presentasyon nin tradisyonal na bayle. An mga delegado, siring man an mga tugang na lalaki asin babae na taga Rapa Nui, nakasisierto na bawi nanggad an mga paghihingoa sa pag-andam kan asamblea.

An gabos na nagsongko bilang delegado nakamate nin hararom na kadayupotan sa saindang napapasuway na mga tugang na lalaki asin babae, na nakaibahan ninda sa laog nin sarong nakaoogmang semana. Masakit sa boot an paghale sa isla. Pirme nindang pakamamahalon an bagong mga katood na nakamidbid ninda siring man an inakong espirituwal na pagparigon sa boot. Sa aeropuerto, sinulotan kan lokal na mga tugang an mga delegado nin buskay na mga kuintas na sinda an naggibo.

Kan pahale na an mga delegado, nanuga sinda: “Iorana! Iau he hoki mai e Rapa Nui ee,” na nangangahulogan: “Paaram! Mabalik ako sa saimo, Rapa Nui.” Iyo, hinihimuyawot ninda na makadalaw liwat sa saindang bagong manompongan na mga katood asin espirituwal na mga kapamilya sa napapalaen, napapasuway, misteryoso, asin makikatood na Easter Island!

[Mga Nota sa Ibaba]

[Kahon sa pahina 24]

Paghuhulit sa Easter Island

Mga duwang taon bago an dai malilingawan na asambleang ini, an sarong paraataman sa sirkito asin an saiyang agom nagsongko sa isla asin nagkamit nin dakol na nakaoogmang eksperyensia. Halimbawa, imahinara an saindang pagkabigla kan an tugang na babae na naghatod sa sainda sa saindang dagosan ipinagirumdom sa sainda na inadalan ninda sia sa Biblia sa timog na Chile kan sia tinedyer pa mga 16 na taon bago kaidto. Kan huri an banhi na iyan nagkabunga sa Rapa Nui.

Nagkaigwa man sinda kan makangingising eksperyensiang ini: An kagsadiri nin sarong tindahan nin mga subenir nag-ako kan New World Translation of the Holy Scriptures asin pantabang sa pag-adal kan Biblia na Kaaraman na Minagiya Pasiring sa Buhay na Daing Katapusan, na parehong ipinublikar kan Mga Saksi ni Jehova. Kan bumalik sinda tanganing dalawon sia, sinabi nia sa sainda na dai nia mabasa an Bibliang iyan. An ikinatao nindang Biblia sa saiya sa Pranses, bakong sa Kastila! Naresolberan tolos an problema, asin nadiskobre nia sa tabang nin lokal na mga Saksi asin, siempre, nin sarong Biblia sa sadiri niang tataramon na an Biblia bako man palan masakit na marhay na saboton.

[Mapa sa pahina 22]

(Para sa aktuwal na format, helingon an publikasyon)

EASTER ISLAND

CHILE

[Mga Ritrato sa pahina 23]

Duwa sa mga nabautismohan sa pansirkitong asamblea

[Mga Ritrato sa pahina 25]

Bakilid kan bulkan nin Rano Raraku; retrato sa laog: An kadlaganon na prutas na inaapod na guayaba nagtutubo sa isla