“Makipaglaban Ka kan Marahay na Pakilaban kan Pagtubod”

MAIIMAHINAR daw nindo an siisay man na soldados sa panahon nin guerra na mamomondo sa instruksion na: “Kaipuhan mong mag-uli sa harong asin tawan mo nin panahon na makaiba an saimong agom asin pamilya”?

An sarong soldados kan panahon ni Hadeng David nin Israel nakaresibi nin siring na direktiba. Si Urias na Hiteo ipinaapod kan hade mismo asin inenkaminar na mag-uli sa harong. Pero, si Urias nagsayumang mag-uli sa harong nia. Kan hapoton manongod sa pambihirang iginawe nia, nagsimbag si Urias na an kaban kan tipan, na nagrerepresentar sa presensia nin Dios, asin an hukbo nin mga Israelita yaon sa ralaban. “Asin ako,” an hapot nia, “mapuli daw ako sa sadiri kong harong tanganing magkakan asin mag-inom patin magdorog sa sakong agom?” Para ki Urias, ini dai nia lamang pepensaron sa siring kakritikal na panahon.​—2 Samuel 11:8-11.

An iginawe ni Urias nagpapalataw nin importanteng mga hapot, huli ta kita nabubuhay man sa sarong panahon nin guerra. Sarong guerra an nangyayari sa presente na bakong arog kan arin man na guerra na pinaglabanan kan mga nasyon sa kinaban. Nagigin garo baga sadit an duwang guerra mundial kun ikokomparar dian, asin imbuelto ka sa guerrang ini. Dakulaon an nakataya digdi, an kaiwal masakit daogon. Sa guerrang ini, mayong badil na papuputokon, mayong bombang ihuhulog, alagad kaipuhan pa man giraray an mapuersang estratehiya sa guerra.

 Bago lumaog sa guerrang ini, kaipuhan na aram nindo kun baga tama iyan sa moral asin kun ano an ipinakikipaglaban nindo. Bawi daw an pakikipaglaban? An katuyohan kan napapalaen na pakikilaban na ini linilinaw ni apostol Pablo sa saiyang surat ki Timoteo: “Makipaglaban ka kan marahay na pakilaban kan pagtubod.” Iyo, sa guerrang ini kaipuhan nindong idepensa, bakong an sarong kuta, kundi an “pagtubod”​—an kabilogan kan Kristianong katotoohan na ihinayag sa Biblia. Malinaw nanggad, kaipuhan na lubos nindong tubodon an “pagtubod” tanganing ipakipaglaban iyan asin manggana.​—1 Timoteo 6:12.

An sarong parapakilaban na may marahay na paghusgar nagmamaigot na mamidbid an saiyang kalaban. Sa pakikipaglaban na ini, an kalaban may dakol nang taon na eksperyensia sa estratehiya sa guerra, na may dakulaon na rekurso asin kadakol na armas na magagamit ano man na oras. Nakalalabi man sia sa tawo. Sia maisog, madahas, asin daing konsensia; sia si Satanas. (1 Pedro 5:8) An pisikal na mga armas saka an katusohan asin kadayaan nin tawo daing serbi tumang sa kaiwal na ini. (2 Corinto 10:4) Ano an puede nindong gamiton sa pakikipaglaban na ini?

An pangenot na armas iyo “an espada kan espiritu, arin na baga, an tataramon nin Dios.” (Efeso 6:17) Ipinaheheling ni apostol Pablo kun gurano kaepektibo kaiyan: “An tataramon nin Dios buhay asin mapuersa asin mas matarom kisa arin man na espada na may duwang tarom asin nakalalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakamamansay kan mga kaisipan asin intension kan puso.” (Hebreo 4:​11, 12) An sarong armas na mataromon, eksaktong marhay, na kaya kaiyan na lumagbas sa kalaoglaoging mga kaisipan asin motibo nin sarong indibiduwal dapat na gamiton nanggad nin may pagkaeksperto asin pag-iingat.

Posibleng marhay na aram nindo na an sarong hukbo tibaad may pinakamodernong mga armas, alagad an mga armas na iyan daing serbi kun an mga soldados kaiyan bakong eksperto sa paggamit sa mga iyan. Kaipuhan man nindo nin instruksion tanganing magamit an saindong espada sa epektibong paagi. Marahay sana ta puede kamong tawan nin pagsasanay kan pinakaeksperyensiadong mga parapakilaban. Inapod ni Jesus an parapakilaban na mga paratokdo na ini na “fiel asin may diskresion na oripon,” na pinaniwalaan kan paninimbagan na magtao nin napapanahon na espirituwal na kakanon, o instruksion, sa mga parasunod nia. (Mateo 24:45) Puede nindong mamidbid an grupong oripon na ini paagi sa pagsiyasat sa mahigos na pagtotokdo asin napapanahon na mga patanid kaiyan manongod sa mga taktika kan kalaban. An prueba nagpapatunay na ini iyo an linahidan nin espiritung mga miembro kan Kristianong kongregasyon kan Mga Saksi ni Jehova.​—Kapahayagan 14:1.

An grupong oripon na ini bako sanang pagtotokdo an ginigibo. Ipinaheling man kaiyan an aktitud ni apostol Pablo, na nagsurat sa kongregasyon sa Tesalonica: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:​7, 8) Nasa lambang Kristianong soldados na gamiton an itinataong mamomoton na pagsasanay.

An Bilog na Pangalasag

An bilog na piguratibong pangalasag itinatao para sa proteksion nindo. Puede nindong makua an lista kan pangalasag na ini sa Efeso 6:13-18. An sarong mapagmaan na soldados dai maluwas kun an sarong kabtang kan saiyang espirituwal na pangalasag mayo o nangangaipong hirahayon.

Kaipuhan nin sarong Kristiano an gabos na nagpoprotehir na pangalasag nia, alagad partikularmenteng mahalaga an dakulang kalasag nin pagtubod. Iyan an dahelan kaya nagsurat si Pablo: “Orog sa gabos, gamiton an dakulang kalasag nin pagtubod, na huli kaiyan masisigbo nindo an gabos na naglalaad na mga bosog kan maraot.”​—Efeso 6:16.

An dakulang kalasag, na puedeng tahoban an bilog na hawak, nagrerepresentar sa kualidad nin  pagtubod. Kaipuhan na magkaigwa kamo nin makosog na pagtubod sa paggiya ni Jehova, na inaako na mayong pagduwaduwa na an gabos na panuga nia magkakatotoo. Maninigong mamatean nindo na an mga panugang iyan garo baga naotob na. Dai noarin man magduwaduwa na an bilog na sistema nin kinaban ni Satanas madali nang laglagon, na an daga liliwaton na magin sarong paraiso, asin na an mga tawong maimbod sa Dios ibabalik sa pagkasangkap.​—Isaias 33:24; 35:​1, 2; Kapahayagan 19:17-21.

Minsan siring, sa ekstraordinaryong pakikipaglaban sa presente, igwa pa kamong kaipuhan​—sarong katood. Kun may guerra, nagkakaigwa nin dayupot na pagkakatood mantang an kapwa mga parapakilaban nagtatao nin pamparigon sa boot asin pagprotehir sa lambang saro, na may beses na iliniligtas pa ngani an lambang saro sa kagadanan. Minsan ngani pinahahalagahan an mga kaibaiba, tanganing makaligtas sa ralaban na ini, kaipuhan nindo an pakikikatood ni Jehova mismo. Kaya ngani tinapos ni Pablo an saiyang lista kan minakompuesto sa pangalasag paagi sa mga tataramon na ini: “Mantang kaiba an gabos na porma nin pamibi asin pagngayongayo padagos kamong mamibi sa gabos na panahon sa espiritu.”​—Efeso 6:18.

Gustong-gusto niatong makaibaiba an sarong dayupot na katood. Nagtatao kita nin panahon na makaibahan sia. Paagi sa regular na pakikipag-olay ki Jehova sa pamibi, sia nagigin totoo sa sato, sarong mapagtitiwalaan na katood. Ineenkaminar kita kan disipulong si Santiago: “Rumani kamo sa Dios, asin sia marani sa saindo.”​—Santiago 4:8.

Mga Taktika kan Kalaban

An pakikipaglaban sa kinaban na ini kun beses garo paglakaw sa sarong kapatagan na may nakatalbong na mga bomba. An pagsalakay puedeng maghale sa arin man na direksion, asin an kalaban nagmamaigot na biglaon kamo mantang dai kamo nag-aaram. Pero makaseseguro kamo na itinatao ni Jehova an gabos na proteksion na kaipuhan nindo.​—1 Corinto 10:13.

Tibaad sumalakay an kalaban paagi sa pagkritikar sa mga katotoohan sa Biblia na kaipuhan sa saindong pagtubod. An mga apostata tibaad gumamit nin magagayon na pananaram, putik na pag-omaw, asin biribid na pangangatanosan sa pagmamaigot na daogon kamo. Alagad an mga apostata mayong pagmakolog sa ikakarahay nindo. An Talinhaga 11:9 nagsasabi: “Paagi sa saiyang ngoso an tawong apostata ipinahahamak an saiyang kapwa, alagad ta paagi sa kaaraman na an matanos naliligtas.”

Sala na magsaboot na kaipuhan nindong magdangog sa mga apostata o magbasa kan mga isinurat ninda tangani na patunayan na sala an saindang mga argumento. An saindang biribid asin mararang pangangatanosan puedeng makadanyar sa espirituwal asin puedeng makaraot sa saindong pagtubod arog kan marikas maglakop na gangrena. (2 Timoteo 2:​16, 17) Imbes, arogon an reaksion nin Dios sa mga apostata. Sinabi ni Job manongod ki Jehova: “Sa saiya mayo nin apostatang makakaatubang.”​—Job 13:16.

An kalaban tibaad magprobar nin ibang taktika, saro na nagin medyo mapanggana. Kun an sarong nagmamartsang hukbo puedeng akiton na sumuway sa grupo tanganing gibohon an sobra kainmoral na paggawe, puedeng magin dahelan ini nin pagkadesareglado.

Epektibong paon an kinabanon na aling-alingan, arog nin inmoral na mga pelikula asin pasale sa telebisyon patin daing kontrol na musika. May mga naghihingako na puede sindang magdalan nin inmoral na mga eksena o magbasa nin inmoral na  mga babasahon na dai naaapektaran. Alagad an saro na regular na nagdadalan nin bulgar na seksuwal na mga pelikula prangkang nag-admitir: “Nungka mong malilingawan an mga eksenang iyan, mantang mas iniisip-isip mo iyan mas gusto mong gibohon an naheling mo . . . Pinapaisip ka kan pelikula na talagang may nalilipasan ka.” Bawi daw an pagsapeligro na madanyaran kan tusong pag-atakeng ini?

An saro pang paagi nin pag-atake hale sa arsenal kan kalaban iyo an pan-akit nin materyalismo. An peligro depisil na marisa huli ta gabos kita igwa nin materyal na mga pangangaipo. Kaipuhan niato nin harong, kakanon, asin gubing, asin bakong sala na magkaigwa nin magayon na mga bagay. An peligro yaon sa pagmansay nin saro. An kuarta tibaad magin mas mahalaga kisa espirituwal na mga bagay. Puedeng magin mamomoton kita sa kuarta. Maninigong ipagirumdom niato sa satong sadiri an mga limitasyon kan kayamanan. Temporaryo sana iyan, mantang an espirituwal na kayamanan nagdadanay sagkod lamang.​—Mateo 6:​19, 20.

Kun an sarong hukbo maluya an sarig nin boot, minadikit an posibilidad na manggana. “Ika daw nanluya an boot sa aldaw nin kasakitan? An saimong kosog magigin kadikit.” (Talinhaga 24:10) An pagkadesganar sarong armas na epektibong ginagamit ni Satanas. Makakatabang na malabanan nindo an pagkadesganar kun isusulot nindo “bilang takop sa payo an paglaom sa kaligtasan.” (1 Tesalonica 5:8) Pagmaigotan na papagdanayon an saindong paglaom na kapareho kakosog kan ki Abraham. Kan hagadon na idolot bilang atang an solo niang aki, si Isaac, si Abraham dai nagduwaduwa. Nagtutubod sia na ootobon nin Dios an Saiyang panuga na bebendisyonan an gabos na nasyon paagi sa saiyang aki asin na puedeng buhayon nin Dios si Isaac hale sa mga gadan kun kaipuhan tanganing maotob an panugang iyan.​—Hebreo 11:17-19.

Dai Mag-ontok sa Pakilaban

An nagkapira na pusoan na nakilaban sa halawig na panahon tibaad nakakapoy na asin kun siring dai na nakikipaglaban na arog kadesidido kan dati. An halimbawa ni Urias, na nasambitan sa kapinonan kan artikulong ini, puedeng makatabang sa gabos na nakikipaglaban na mapagdanay an tamang pagmansay. Dakol sa satong mga kapwa Kristianong parapakilaban an nagtagal nin kakulangan sa ikabubuhay, nameligro, o nagtios nin lipot asin gutom. Arog ni Urias, habo niatong isipon an manongod sa gabos na kaginhawahan na puede niatong kamtan ngonyan o magpadaog sa pagmawot na magkaigwa nin maginhawang buhay. Gusto niatong magdanay na kaiba kan lakop sa globong hukbo ni Jehova nin maimbod na mga parapakilaban asin ipadagos an pakikilaban sagkod na puede na niatong kamtan an marahayon na mga bendisyon na nakatagama sa sato.​—Hebreo 10:32-34.

Magigin peligroso kun magpabaya kita, na tibaad nag-iisip kita na an pangultimong pagsalakay harayo pang marhay. Idinodoon kan halimbawa ni Hadeng David an peligro. Sa dai maaraman na dahelan dai sia kaiba kan saiyang mga soldados sa ralaban. Bilang resulta, nakakomiter si David nin  grabeng kasalan na nagbunga sa saiya nin labi-labing kamondoan asin pagdusa sa bilog niang buhay.​—2 Samuel 12:10-14.

Bawi daw na magpartisipar sa ralaban na ini, atubangon an kasakitan sa ralaban, tagalan an pag-olog-olog, asin talikdan an kuestionableng kinabanon na mga kasingawan? An mga mapangganang nakikilaban minaoyon na an iinaalok kan kinaban puedeng nakakaakit, arog nin nagkikilyab na pakintab, alagad kun sisiyasaton na marhay, mayo iyan nin halaga. (Filipos 3:8) Dugang pa, sa parate an mga kasingawan na iyan minaresulta sa kakologan asin pagkadesganar.

An Kristiano na nasa espirituwal na ralaban na ini nagkakamit nin dayupot na pakiibaiba sa tunay na mga katood, malinig na konsensia, asin makangangalas na paglaom. Inaantisipar kan linahidan nin espiritung mga Kristiano an inmortal na langitnon na buhay kaiba ni Cristo Jesus. (1 Corinto 15:54) An mayoriya kan Kristianong mga parapakilaban may paglaom na magkamit nin sangkap na buhay bilang tawo sa sarong daganon na paraiso. Daing duwa-duwa na an siring na premyo bawi na marhay sa ano man na pagsakripisyo. Asin bakong arog nin kinabanon na mga guerra, segurado kitang manggagana sa ralaban na ini sagkod na kita nagdadanay na fiel. (Hebreo 11:1) Minsan siring, an sistemang ini na kontrolado ni Satanas biyong malalaglag.​—2 Pedro 3:10.

Mantang nagpapadagos kamo sa pakikilaban na ini, girumdomon an mga tataramon ni Jesus: “Kosogan nindo an boot! Nadaog ko an kinaban.” (Juan 16:33) Nanggana sia paagi sa pagdanay na alerto asin pagdanay na may integridad sa irarom nin pagbalo. Magigibo man niato iyan.

[Blurb sa pahina 27]

Mayong badil na papuputokon, mayong bombang ihuhulog, alagad kaipuhan pa man giraray an mapuersang estratehiya sa guerra

[Blurb sa pahina 30]

Segurado kitang manggagana sa ralaban na ini sagkod na kita nagdadanay na fiel

[Ritrato sa pahina 26]

An takop sa payo nin kaligtasan matabang sa sato na labanan an pagkadesganar

Gamiton an dakulang kalasag nin pagtubod tanganing sagangon an “naglalaad na mga bosog” ni Satanas

[Ritrato sa pahina 28]

“Rumani kamo sa Dios, asin sia marani sa saindo”

[Ritrato sa pahina 29]

Maninigo na magtubod kita sa kaotoban kan mga panuga nin Dios