An mga Lingkod nin Dios Siring sa mga Kahoy​—Sa Anong mga Paagi?

NAGTATARAM manongod sa sarong indibiduwal na ikinaoogmang marhay asin iinaaplikar an mga prinsipyo kan Biblia sa saiyang buhay, an salmista nagsasabi: “Sia magigin nanggad siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.” (Salmo 1:1-3) Taano ta angay an pagkokomparar na ini?

An mga kahoy puedeng mabuhay nin halawig na marhay. Halimbawa, may mga poon nin olibo sa rehion nin Mediterraneo na sinasabing poon saro sagkod duwang ribong taon na an edad. Siring man, an mga poon nin baobab sa sentral Aprika halawigon man an buhay, asin an bristlecone pine sa California pinaniniwalaan na mga 4,600 na taon an edad. Sa sarong kadlagan, an gurang nang mga kahoy sa parate kapakipakinabang sa palibot kaiyan. Halimbawa, an haralangkawon na kahoy nagtatao nin nagpoprotehir na limpoy sa lumbod pang mga kahoy, asin an mga dahon na nararakdag hale sa mga kahoy nagpapataba sa daga na yaon sa ibaba.

An pinakaharalangkaw na kahoy sa kinaban sa parate manonompongan na magkairiba sa mga kadlagan, kun saen an indibiduwal na mga kahoy nagsisinuruportaran sa lambang saro. Huling an saindang mga gamot puedeng nagsasarabodan, an nagkapirang kahoy na magkairibanan puedeng mas malalabanan an sarong bagyo kisa kan nagsosolong kahoy na yaon sa kaawagan. An mahiwas na sistema nin mga gamot nagpapangyari man na an sarong kahoy makakua nin supisyenteng tubig asin sustansia hale sa daga. Sa nagkapirang kaso, an kanap kan mga gamot sa daga puedeng mas hararom kisa sa langkaw kan kahoy, o an mga gamot puedeng kumanap nin palakbang na lampas pang marhay sa kalakbangan kan mga sanga asin dahon kan kahoy.

Puedeng poon nin kahoy an pinanonongdan ni apostol Pablo kan ipaliwanag nia na an mga Kristiano maninigong ‘padagos na maglakaw na kasaro nia [ni Cristo], na nakagamot asin itinitindog dian sa saiya patin pinaririgon sa pagtubod.’ (Colosas 2:​6, 7) Tunay nanggad, an mga Kristiano puede sanang magdanay na marigon kun sinda marigon na nakagamot ki Cristo.​—1 Pedro 2:21.

Sa anong iba pang paagi na puedeng iagid an mga lingkod nin Dios sa mga kahoy? Bueno, kun paanong an mga kahoy sa kakahoyan nag-aako nin pagsuportar kan kataed na mga kahoy, an gabos na nagdadanay na dayupot sa Kristianong kongregasyon nag-aako man nin pagsuportar kan mga kapagtubod. (Galacia 6:2) An fiel asin maygurang na mga Kristiano, na may espirituwal na mga gamot na mahiwas an nalalakopan, nagtatabang sa bagong mga nagturubod na magdanay na marigon sa pagtubod, dawa kun napapaatubang sa garo bagyong pagtumang. (Roma 1:​11, 12) An bagohan na mga Kristiano puedeng umoswag sa nagpoprotehir na “limpoy” kan mas eksperyensiadong mga lingkod nin Dios. (Roma 15:1) Asin an gabos na miembro kan pambilog na kinaban na Kristianong kongregasyon nakikinabang sa nagpapasarig na espirituwal na kakanon na itinatao kan “darakulang kahoy nin katanosan,” an linahidan na natatada.​—Isaias 61:3.

Kanigoan kanakapupukaw sa boot na an gabos na lingkod nin Dios igwa nin esperansang maeksperyensiahan an kaotoban kan panuga na yaon sa Isaias 65:​22, na nagsasabi: “Magigin siring sa mga aldaw nin kahoy an mga aldaw kan sakuyang banwaan.”

[Picture Credit Line sa pahina 28]

Godo-Foto