Kun Paano Niato Ipinaheheling an Satong Pagkamoot sa Dios

AN PAGKULTIBAR nin pagkamoot sa Dios bako sanang pag-adal manongod sa Dios. Arog kan puedeng patotoohan kan mga lingkod nin Dios sa bilog na kinaban, an tunay na pagkamoot sa Dios nagtatalubo mantang mas namimidbid nin saro an saiyang personalidad, asin lalo pa nganing minakosog iyan mantang an saro nagigin pamilyar sa kun ano an saiyang namomotan, kun ano an saiyang ikinaoongis, asin kun ano an saiyang nagugustohan saka kun ano an saiyang mga kahagadan.

May pagkamoot na itinao sa sato ni Jehova an saiyang Tataramon, an Biblia, na dian nia ihinahayag an saiyang sadiri. Basado dian, nanonodan niato kun paano tinatawan ni Jehova nin atension an manlaenlaen na situwasyon. Kun paanong an sarong surat hale sa sarong namomotan nagtatao sa sato nin dakulang kaogmahan, an Biblia nagtatao man sa sato nin dakulang kaogmahan mantang naheheling niato an bagong mga aspekto kan personalidad ni Jehova na ihinahayag.

Minsan siring, arog kan naririparo niato kun beses sa satong pampublikong ministeryo, an pag-adal manongod sa Dios dai pirmeng nagpapangyari sa saro na mamotan sia. Sinabihan ni Jesus an nagkapirang daing apresasyon na Judio kan kaaldawan nia: “Sinisiyasat nindo an Kasuratan, huli ta naghohona kamo na paagi kaiyan magkakaigwa kamo nin buhay na daing katapusan; . . . alagad aram kong gayo na mayo kamo kan pagkamoot sa Dios dian sa saindo.” (Juan 5:​39, 42) May nagkapira na dakol na taon nang nag-aadal manongod sa mamomoton na mga gibo ni Jehova alagad ta kadikit an pagkamoot sa saiya. Taano? Dai ninda hinohorophorop an mga implikasyon kan saindang nanonodan. Sa kabaliktaran, naeeksperyensiahan kan minilyon na sinserong tawo na inadalan niato sa Biblia na an saindang pagkamoot sa Dios padagos na nagtatalubo. Taano? Huli ta, arog man kan ginibo niato, sinusunod ninda an halimbawa ni Asaf. Sa anong paagi?

Maghorophorop na May Pag-apresyar

Desidido si Asaf na kultibaron sa saiyang puso an pagkamoot ki Jehova. Sia nagsurat: “Sa sakong  puso mapaheling ako nin pagmakolog . . . Gigirumdomon ko an mga gibo ni Jah; ta gigirumdomon ko an makangangalas na ginibo mong aksion kan suanoy. Asin hohorophoropon ko nanggad an gabos mong aktibidad, asin tatawan ko nin atension an saimong mga ginibo.” (Salmo 77:​6, 11, 12) An pagkamoot sa Dios matalubo sa puso nin saro na nagpepensar sa mga dalan ni Jehova arog kan ginibo kan salmista.

Dugang pa, an paggirumdom sa mga eksperyensiang nakamtan niato mantang naglilingkod ki Jehova nagpapakosog sa satong relasyon sa saiya. Si apostol Pablo nagsabi na kita “mga kapwa trabahador” nin Dios, asin an pagkakatood na puedeng tumalubo sa tahaw nin mga kapwa trabahador espesyal na marhay. (1 Corinto 3:9) Kun ipinapahayag niato an satong pagkamoot ki Jehova, inaapresyar nia iyan, asin pinaoogma kaiyan an saiyang puso. (Talinhaga 27:11) Dangan, kun hinahagad niato an tabang ni Jehova asin ginigiyahan nia kitang malampasan an sarong problema, aram niato na sia nasa sato, asin minararom an satong pagkamoot sa saiya.

Minatalubo an pagigin magkatood nin duwang tawo mantang ipinapahayag ninda an saindang mga saboot sa lambang saro. Kaagid kaiyan, kun sinasabi niato ki Jehova kun taano ta kita deboto sa saiya, napakokosog an satong pagkamoot sa saiya. Manonompongan niato na hinohorophorop niato an mga tataramon ni Jesus: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:30) Ano an puede niatong gibohon tanganing masegurado na padagos niatong mamomotan si Jehova sa bilog niatong puso, sa bilog niatong kalag, sa bilog niatong isip, asin sa bilog niatong kosog?

Pagkamoot ki Jehova sa Bilog Niatong Puso

An Kasuratan nagtataram manongod sa piguratibong puso, an personang nasa laog​—an satong mga pagmawot, aktitud, asin saboot. Kaya an pagkamoot ki Jehova sa bilog niatong puso nangangahulogan na orog sa ibang bagay, minamawot niatong paogmahon an Dios. (Salmo 86:11) Ipinaheheling niato na igwa kita kan siring na pagkamoot kun ginigibo niato an satong personalidad na magin kawiliwili sa saiya. Nagmamaigot kitang arogon an Dios paagi sa ‘pagkasurang nin makuri sa maraot asin pangangapot sa marahay.’​—Roma 12:9.

An satong pagkamoot sa Dios nakakaapekto sa satong mga saboot manongod sa gabos na bagay. Halimbawa, tibaad manompongan niato na interesante o nakababangkag an satong trabaho, alagad yaon daw dian an satong puso? Dai. Huling namomotan niato si Jehova sa bilog niatong puso, enot sa gabos kita mga ministro nin Dios. Siring man, gusto niatong paogmahon an satong mga magurang, an satong agom, asin an satong among, alagad pinatutunayan niato an satong bilog na pusong pagkamoot ki Jehova paagi sa paghihingoang paogmahon sia nin orog sa gabos. Total, sia an maninigong magin enot sa satong puso.​—Mateo 6:24; 10:37.

Pagkamoot ki Jehova sa Bilog Niatong Kalag

Sa Kasuratan an terminong “kalag” sa pundamental nanonongod sa bilog niatong persona siring man  sa buhay niato. Kaya an pagkamoot ki Jehova sa bilog niatong kalag nangangahulogan na ginagamit niato an satong buhay sa pag-omaw sa saiya asin pagpatunay kan satong pagkamoot sa saiya.

Siempre, tibaad may iba kitang pinagkakainteresan sa buhay, arog baga nin pag-adal nin sarong trabaho, pagpadalagan nin sarong negosyo, o pagpamilya. Alagad kadungan kaiyan, pinatutunayan niato an satong bilog na kalag na pagkamoot ki Jehova paagi sa paggibo nin mga bagay sono sa gusto nia asin paagi sa pagpadanay kan ibang bagay sa tamang lugar kaiyan sa satong buhay, sa siring ‘hinahanap nguna an kahadean asin an saiyang katanosan.’ (Mateo 6:33) An bilog na kalag na pagsamba nangangahulogan man nin pagigin maigot. Ipinaheheling niato ki Jehova na namomotan niato sia paagi sa maigot na paghuhulit kan mensahe kan Kahadean, pagtao nin nakapakokosog na mga komento sa mga pagtiripon, o pagtabang sa satong Kristianong mga tugang na lalaki asin babae. Sa gabos na bagay, padagos niatong “ginigibo an kabotan nin Dios nin bilog na kalag.”​—Efeso 6:6.

Ipinaheling ni Jesus an bilog na kalag na pagkamoot sa Dios paagi sa pagpainda sa saiyang sadiri. Inenot nia an kabotan nin Dios asin ikaduwa na sana an saiyang personal na mga pangangaipo. Inagda kita ni Jesus na arogon an saiyang halimbawa. Sia nagsabi: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na magsunod sa sako.” (Mateo 16:​24, 25) An pagpainda sa satong sadiri nangangahulogan nin pagdusay. Nangangahulogan iyan na namomotan niatong marhay an Dios kaya itinatao niato sa saiya an satong sadiri, arog kun an sarong Israelita kaidtong mga panahon kan Biblia namomotan na marhay an saiyang kagurangnan kaya itinao nia digdi nin permanente an saiyang sadiri bilang oripon. (Deuteronomio 15:​16, 17) An pagdusay kan satong buhay ki Jehova nagtatao nin nakakokombensir na prueba na namomotan niato sia.

Pagkamoot ki Jehova sa Bilog Niatong Isip

An pagkamoot ki Jehova sa bilog niatong isip nangangahulogan na ginigibo niato an gabos na paghihingoang kaipuhan tanganing masabotan an personalidad, mga katuyohan, asin mga kahagadan ni Jehova. (Juan 17:3; Gibo 17:11) Ipinapahayag niato an satong pagkamoot ki Jehova paagi sa paggamit kan gabos niatong mental na abilidad sa pagtabang sa iba na mamotan man si Jehova asin paagi sa pagpaoswag kan satong abilidad nin pagtotokdo. “Pasariga an saindong isip para sa gibohon,” an sadol ni apostol Pedro. (1 Pedro 1:13) Siring man, nagmamaigot kitang magpaheling nin interes sa iba, nangorogna sa mga kapwa lingkod nin Dios. Aram niato an saindang mga kamugtakan asin nag-oobserbar kita kun angay na magtao nin komendasyon o kun kaipuhan nin pagranga.

Ipinaheheling niato ki Jehova na namomotan niato sia sa bilog niatong isip paagi sa pagsunod niato sa saiya sa satong pag-iisip. Pinagmamaigotan niatong helingon an mga bagay segun sa pagmansay nia, girumdomon sia kun naggigibo kita nin mga desisyon, asin magtiwala na an saiyang mga dalan iyo an pinakamarahay. (Talinhaga 3:​5, 6; Isaias 55:9; Filipos 2:3-7) Alagad mantang padagos niatong ipinaheheling an satong pagkamoot sa Dios, paano niato magagamit an satong kosog?

Pagkamoot ki Jehova sa Bilog Niatong Kosog

Ginagamit kan dakol na hoben sa Kristianong kongregasyon an saindang kosog sa pag-omaw ki Jehova. (Talinhaga 20:29; Eclesiastes 12:1) An sarong paagi na ipinaheheling kan balakid na Kristianong hoben na namomotan ninda si Jehova sa bilog nindang kosog iyo an pakikikabtang sa paglilingkod bilang payunir, an bilog na panahon na ministeryo. Dakol na ina an nakikikabtang sa ministeryong ini mantang an saindang mga aki yaon sa eskuelahan. An fiel na kamagurangan na naggigibo nin pagsongko sa pagpastor apuera pa sa pag-ataman sa ikararahay kan sadiri nindang pamilya nagpapaheling na namomotan ninda si Jehova sa bilog nindang kosog. (2 Corinto 12:15) Si Jehova nagtatao nin puersa sa mga naglalaom sa saiya, tanganing ikapaheling ninda an saindang pagkamoot paagi sa pag-omaw sa saiya, na ginagamit an ano man na kosog na yaon sa sainda.​—Isaias 40:29; Hebreo 6:​11, 12.

An pagkamoot matalubo kun kukultibaron nin tama. Kun siring, padagos kitang magtao nin panahon para sa paghorophorop. Ginigirumdom niato kun ano an ginibo ni Jehova para sa sato asin kun taano ta angay sia na mag-ako kan satong debosyon. Bilang bakong sangkap na mga gikan ni Adan, nungka kitang magigin maninigo sa “mga bagay na inandam nin Dios para sa mga namomoot sa saiya,” alagad puede niatong ipaheling na namomotan niato si Jehova sa bilog niatong pagkatawo. Padagos niatong gibohon iyan!​—1 Corinto 2:9.

[Ritrato sa pahina 20]

Ipinapahayag niato an satong pagkamoot sa Dios paagi sa mga gibo