Mga Hapot Hale sa mga Parabasa
Mga Hapot Hale sa mga Parabasa
Huling an mga Levita mayo nin mana sa suanoy na Israel, paanong an Levitang si Hanamel nagpabakal nin oma sa saiyang Levitang pinsan na si Jeremias, siring kan sinasabi sa Jeremias 32:7?
Mapadapit sa mga Levita, sinabihan ni Jehova si Aaron: “Dai ka magkakaigwa nin mana, asin dai ka magkakaigwa nin kahirasan sa tahaw ninda [kan Israel].” (Bilang 18:20) Minsan siring, an mga Levita tinawan nin 48 siudad kaiba an mga pasabsaban kaiyan, na nakawarak sa bilog na Dagang Panuga. An ginikanan na banwaan ni Jeremias iyo an Anatot, saro sa mga siudad na itinao sa “mga aki ni Aaron, an mga saserdote.”—Josue 21:13-19; Bilang 35:1-8; 1 Cronica 6:54, 60.
Sa Levitico 25:32-34, manonompongan niato na si Jehova nagtao nin espesipikong mga instruksion mapadapit sa “deretso na bumalukat” nin propiedad na sadiri kan mga Levita. Minalataw na an mga pamilyang Levita may mga deretso sa mana mapadapit sa pagsadiri, paggamit, asin pagpabakal nin espesipikong mga kahirasan. Naturalmente, kaiba dian an pagpabakal asin pagbalukat nin propiedad. * Sa dakol na bagay, an mga Levita nakasadiri asin naggamit nin mga propiedad sa mga paaging kapareho kan sa mga Israelita na iba an tribo.
Puede gayod na an pagsasadiri nin siring na propiedad nin Levita ibinabalyo paagi sa eredasyon nin pamilya. Minsan siring, may labot sa “deretso na bumalukat,” an mga transaksion itinotogot sa pag-oltanan nin mga Levita sana. Siring man, minalataw na an pagpabakal asin pagbalukat nin daga aplikado sana sa propiedad na nasa laog kan mga siudad, huling “an pasabsaban na oma kan saindang mga siudad” dai dapat ipabakal huli ta iyan “sarong rogaring sa panahon na daing talaan para sa sainda.”—Levitico 25:32, 34.
Kaya minalataw na arog kaiyan an kamugtakan kan oma na binalukat ni Jeremias ki Hanamel na puedeng ibalyo an pagsasadiri paagi sa pagbalukat. Iyan puedeng nasa laog pa kan siudad. Kinompirmar mismo ni Jehova na “an oma” na pinag-oolayan digdi sadiri ni Hanamel asin na si Jeremias may “deretso na bumalukat.” (Jeremias 32:6, 7) Ginamit ni Jehova an transaksion na ini sa simbolikong paagi tanganing pasarigon an saiyang panuga na an mga Israelita mabalik tanganing bawion an saindang dagang minana pakatapos nin sarong peryodo nin pagkadistiero sa Babilonya.—Jeremias 32:13-15.
Mayo nin nagpaparisa na nagin pagsasadiri ni Hanamel an propiedad sa Anatot sa salang paagi. Mayo nin nag-iindikar na linapas nia an ley ni Jehova sa pagtangro ki Jeremias na bakalon an omang ini sa Anatot o na ginamit man ni Jeremias sa bakong maninigong paagi an saiyang deretso na bumalukat sa pagbakal kan oma.—Jeremias 32:8-15.
[Nota sa Ibaba]
^ par. 4 Kan enot na siglo C.E., an Levitang si Bernabe nagpabakal nin sadiri niang daga asin idinonar an kabaklan tanganing tabangan an daing sukat na mga parasunod ni Cristo sa Jerusalem. An propiedad tibaad magsalang nasa Palestina o nasa Chipre. O may posibilidad na lolobngan na lote sana ini na nagin sadiri ni Bernabe sa Jerusalem.—Gibo 4:34-37.