Nag-ooswag an Tunay na Kristianismo

AN MINISTERYO ni Jesu-Cristo nagkaigwa nin mapuersang epekto sa kinaban kan enot na siglo. An saiyang mensahe nakapakokosog, nagtataong liwanag, asin nakaiinspirar sa paagi na ikinangalas nin labi-labi kan mga tawo. Dakol sa nakadangog sa saiyang pagtaram an napahirong marhay kan saiyang mga tataramon.​—Mateo 7:​28, 29.

Daing takot na sinayumahan ni Jesus na maimbuelto sa mapan-aping eklesiastiko asin politikal na sistema kan kaaldawan nia alagad ginibo nia an saiyang sadiri na madaling dolokon kan ordinaryong mga tawo. (Mateo 11:25-30) Hayagan niang rinekonoser an lakop na impluwensia kan maraot na mga espiritu sa daga asin ipinaheling an tao nin Dios na kapangyarihan sa sainda. (Mateo 4:2-11, 24; Juan 14:30) Ekspertong ipinaliwanag ni Jesus an pundamental na koneksion kan pagdusa asin kasalan, asin mamomoton niang itinokdo an Kahadean nin Dios para sa nagdadanay na kaginhawahan. (Marcos 2:1-12; Lucas 11:​2, 17-23) Sararoan na hinale nia an tahob nin kadikloman na haloy nang marhay na nakatahob sa tunay na personalidad kan saiyang Ama, na ipinamimidbid an ngaran nin Dios sa gabos na interesadong magkaigwa nin personal na relasyon sa Saiya.​—Juan 17:​6, 26.

Kun siring, bakong makangangalas na sa ibong kan grabeng paglamag kan relihion asin politika, marikas na pinalakop kan mga disipulo ni Jesus an saiyang mapuersang mensahe. Sa laog sana nin 30 taon o labi pa, nabilog an aktibong Kristianong mga kongregasyon sa Aprika, Asia, asin Europa. (Colosas 1:23) An simpleng katotoohan na itinokdo ni Jesus an nakapaliwanag sa puso kan mapakumbaba asin tama an kamugtakan nin pusong mga tawo sa bilog na Imperyo nin Roma.​—Efeso 1:​17, 18.

Pero paanong an gabos na bagong disipulong ini hale sa siring na laen-laen na kamugtakan sa pagbuhay, kultura, lenguahe, asin relihion magkakasararo sa tunay na “sarong pagtubod,” arog kan apod dian ni apostol Pablo? (Efeso 4:5) Ano an magpapadanay sa sainda na ‘nagtataram na may pagkaoroyon’ tanganing dai sinda magkasuruhaysuhay? (1 Corinto 1:10) Huli sa grabeng kawaran nin pagkasararo sa tahaw kan naghihingakong mga Kristiano ngonyan, marahay na siyasaton niato an itinokdo mismo ni Jesus.

An Basehan Para sa Kristianong Pagkasararo

Kan binibista sa atubangan ni Poncio Pilato, sinabi ni Jesus an basehan para sa Kristianong pagkasararo. Sia nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan. An lambang tawo na nasa lado kan katotoohan naghihinanyog sa sakong tingog.” (Juan 18:37) Kun siring, an pag-ako sa mga katokdoan ni Jesus kaiba kan iba pang laog kan ipinasabong na Tataramon nin Dios, an Biblia, may mapuersa asin nakapasasarong impluwensia  sa tunay na mga disipulo ni Cristo.​—1 Corinto 4:6; 2 Timoteo 3:​16, 17.

Siempre, kun beses an mga disipulo ni Jesus may sinserong mga hapot o dai pagkakaoyon sa tahaw ninda. Ano kun siring? Nagpaliwanag si Jesus: “Kun an sarong iyan dumatong na, an espiritu kan katotoohan, gigiyahan nia kamo sa gabos na katotoohan, huli ta dai sia magtataram sa sadiri niang boot, kundi an madangog nia iyo an ipagtataram nia, asin ipahahayag nia saindo an mga bagay na madatong.” (Juan 16:​12, 13) Sa siring, an banal na espiritu nin Dios an mapangyaring masabotan kan tunay na mga disipulo ni Jesus an katotoohan mantang iyan gradwal na ihinahayag nin Dios. Siring man, an espiritung iyan mapaluwas nin bunga, arog kan pagkamoot, kagayagayahan, asin katoninongan, na mapaoswag man kan pagkasararo sa tahaw ninda.​—Gibo 15:28; Galacia 5:​22, 23.

Dai itinogot ni Jesus an dai pagkaoroyon o mga paksion sa tahaw kan saiyang mga disipulo; ni inautorisaran man nia sinda na interpretaron giraray an mga katotoohan nin Dios tanganing tawan nin lugar an kultural o relihiosong mga tradisyon kan mga manunuparan ninda. Imbes, sa saiyang huring banggi kaiba ninda, sia odok na namibi: “Ako nakikimaherak, bako sanang para sa sainda, kundi kaidto man na nagtutubod sa sako paagi sa saindang tataramon; tanganing sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niato, tanganing an kinaban magtubod na ako isinugo mo.” (Juan 17:​20, 21) Kun siring, an tunay na pagkasararo sa espiritu asin katotoohan an magigin nagpapamidbid na tanda kan mga disipulo ni Cristo poon sa kapinonan sagkod sa panahon niato. (Juan 4:​23, 24) Minsan siring, an mga iglesia ngonyan, dai nagkakasararo, kundi nagkakabaranga. Taano ta arog kaiyan?

Kun Taano ta Nagkakabaranga an mga Iglesia

An prangkang paliwanag kan pagkaigwa nin kadakol na laen-laen na paniniwala asin kaugalean sa tahaw kan naghihingakong mga Kristiano ngonyan iyo na dai ninda sinususog an mga katokdoan ni Jesus. An sarong parasurat nagkomento: “Arog kan nakaagi, an bagong mga Kristiano ngonyan may tendensiang akoon sana an ano man na katokdoan sa Biblia na nakakasono sa mga pangangaipo ninda​—asin dai intindihon an ano man na dai nakakasono sa sadiri nindang kinatodan na relihiosong mga tradisyon.” Ini an eksaktong ihinula ni Jesus asin kan saiyang mga apostol na mangyayari.

Halimbawa, sa irarom nin pasabong si apostol Pablo nagsurat sa kapwa nia paraataman na si Timoteo: “Madatong an panahon na dai na sinda matagal sa ikararahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan, mantang sinda makiling sa falsong mga estorya.” Malalagalag daw an gabos na Kristiano? Dai. Si Pablo nagpadagos: “Pero ika, papagdanayon mo an toltol na pag-iisip sa gabos na bagay, tioson mo an karatan, gibohon mo an gibohon nin sarong paraebanghelyo, lubos mong otobon an saimong ministeryo.” (2 Timoteo 4:3-5; Lucas 21:8; Gibo 20:​29, 30; 2 Pedro 2:1-3) Si Timoteo asin an iba pang fiel na Kristiano namuhay kaoyon kan ipinasabong na hatol na iyan.

An Tunay na mga Kristiano Nagkakasararo Pa Man Giraray

Arog ni Timoteo, pinapagdadanay kan tunay na mga Kristiano ngonyan an toltol na pag-iisip paagi sa pagsayuma sa pangangatanosan nin tawo asin paagi sa pag-ako sana kan autoridad kan Kasuratan para sa mga tinutubod nindang doktrina. (Colosas 2:8; 1 Juan 4:1) Bilang pag-arog sa mga Kristiano kan enot na siglo, ginigibo kan Mga Saksi ni Jehova an saindang ministeryo sa labing 230 nasyon, na dinadara an orihinal na mensahe ni Jesus, an maogmang bareta kan Kahadean, sa mga tawo sa gabos na lugar. Estudyare an apat na mahalagang paagi na may pagkasararo nindang inaarog si Jesus asin inootob an tunay na Kristianismo saen man sinda nag-iistar.

An saindang mga tinutubod nakabasar sa Tataramon nin Dios. (Juan 17:17) An sarong padi sa Belhika nagsurat manongod sainda: “An sarong bagay na manonodan niato sainda [Mga Saksi ni Jehova] iyo an pagigin andam nindang maghinanyog sa Tataramon nin Dios asin an saindang kosog nin boot na magpatotoo manongod dian.”

Nag-aasa sinda sa Kahadean nin Dios na iyong matao nin pakaginhawa sa lakop sa globong mga problema. (Lucas 8:1) Sa Barranquilla, Colombia, sarong Saksi an nakipag-olay ki Antonio,  sarong maigot na parasuportar sa politikal na mobimiento. An Saksi dai kuminampi sa saiya, ni may sinuportaran siang ibang politikal na ideolohiya. Imbes, nag-alok sia nin libreng pag-adal sa Biblia ki Antonio asin sa saiyang mga tugang na babae. Dai nahaloy nasabotan ni Antonio na an Kahadean nin Dios sana talaga an paglaom kan dukhang mga tawo sa Colombia asin sa ibang parte kan kinaban.

Tinatawan ninda nin onra an ngaran nin Dios. (Mateo 6:9) Kan enot na manuparan kan mga Saksi ni Jehova si Maria, sarong sinserong Katoliko na nag-iistar sa Australia, tinogotan nia an mga Saksi na ipaheling sa saiya sa Biblia an ngaran nin Dios. Ano an nagin reaksion nia? “Kan enot kong maheling an ngaran nin Dios sa Biblia, huminibi ako. Napukaw na marhay an sakong boot kan maaraman ko na talagang puede kong maaraman asin gamiton an personal na ngaran nin Dios.” Nagpadagos si Maria sa pag-adal kan Biblia, asin sa kaenot-enote sa buhay nia, namidbid nia si Jehova bilang sarong persona asin nakapatalubo nin nagdadanay na relasyon sa saiya.

Nagkakasararo sinda huli sa pagkamoot. (Juan 13:​34, 35) An editoryal sa The Ladysmith-Chemainus Chronicle, sa Canada, nagkomento: “Ano man an saindong relihiosong paniniwala, o mayo kaiyan, maninigo nindong tawan nin komendasyon an 4,500 na Saksi ni Jehova na aldaw-bangging nagtrabaho durante kan nakaaging sarong semana may kabanga tanganing magtogdok nin sarong 2,300 metro kuadradong Assembly Hall sa Cassidy . . . An paggibo kaini nin masinggaya na mayo nin diriskutiran, mayo nin dai pagkaoroyon o pag-inagawan nin onra sarong tanda nin tunay na Kristianismo.”

Kaya estudyare an prueba. Mantang an mga teologo, misyonero, asin parasimba sa Kakristianohan padagos na nakikipagtusayan sa nabibilog na kontrobersia sa mga iglesia ninda, an tunay na Kristianismo nag-ooswag sa bilog na kinaban. Sa katunayan, isinasagibo kan tunay na mga Kristiano an iinasignar sainda na ministeryo na paghuhulit asin pagtotokdo kan Tataramon nin Dios. (Mateo 24:14; 28:​19, 20) Kun kabilang kamo sa mga “nag-aaragagha asin nag-aaragrangay” huli sa makauuyam nin makuring mga bagay na nangyayari ngonyan asin napupurisaw huli sa dai pagkasararo sa tahaw nin mga relihion sa Kakristianohan, inaagda mi kamo na makiiba sa Mga Saksi ni Jehova sa nagkakasararong Kristianong pagsamba sa iyo sanang tunay na Dios, si Jehova.​—Ezequiel 9:4; Isaias 2:2-4.