Puede daw na Maomayan an May Helang Huli sa Pagtubod?

KUN naghehelang, naghahanap kita nin ginhawa asin kaomayan. Posibleng marhay na aram nindo sa Biblia na paorootrong nagpaomay si Jesu-Cristo nin gabos na klaseng helang, na nagtatao nin kaginhawahan sa dakol na nagsasakit nin makuri. Paano nangyari an mga pagpaomay na iyan? Paagi sa “kapangyarihan nin Dios,” an sabi kan Biblia. (Lucas 9:​42, 43; Gibo 19:​11, 12) Huli kaini, an banal na espiritu hale sa Dios an nagpaomay, bakong an pagtubod sana kan indibiduwal. (Gibo 28:7-9) Iyan an dahelan kun taano ta dai hinagad ni Jesus sa mga may helang na ipahayag an saindang pagtubod sa saiya tanganing maomayan.

Tibaad isip-isipon nindo: ‘Nakaagi na daw an milagrosong mga pagpaomay, o mangyayari pa daw liwat an mga pagpaomay na arog kan ginibo ni Jesus? Ano an paglaom para sa mga igwa nin makolog o dai na mabobolong na helang?’

Ipinaliliwanag kan Biblia na sa bagong kinaban nin Dios nin katanosan, an kapangyarihan nin Dios an mapangyari giraray sa klase nin milagrosong mga pagpaomay na ginibo ni Jesus mantang yaon digdi sa daga. An mga Saksi ni Jehova sa saindong lugar maoogmang ipaheling sa saindo kun paano asin noarin gigibohon nin Dios an dai magigibo noarin man nin sarong espiritista​—haleon an gabos na helang, siring man an kagadanan. Iyo, “totoong hahalonon [nin Dios] an kagadanan sagkod lamang.”​—Isaias 25:8.