An Pamanggihan nin Kagurangnan​—Paano Sineselebrar?

SA PAGTAONG liwanag sa pagselebrar kan Pamanggihan nin Kagurangnan, an Kristianong si apostol Pablo nagsurat: “Inako ko hale sa Kagurangnan an itinao ko man sa saindo, na an Kagurangnan na si Jesus kan banggi na sia ipasasaloib nagkua nin tinapay asin, pakapagpasalamat, binaraak nia iyan asin nagsabi: ‘Ini nangangahulogan kan sakong hawak na manongod sa saindo. Padagos nindong gibohon ini sa paggirumdom sa sako.’ Siring man an ginibo nia sa kopa, pakapamanggi nia, na an sabi: ‘An kopang ini nangangahulogan kan bagong tipan sa puersa kan sakong dugo. Padagos nindong gibohon ini, sa gabos na panahon na inomon nindo iyan, sa paggirumdom sa sako.’ Sa gabos na panahon na kumakan kamo kan tinapay na ini asin uminom kan kopang ini, padagos nindong ipinagbabalangibog an pagkagadan kan Kagurangnan, sagkod na sia dumatong.”​—1 Corinto 11:23-26.

Arog kan sabi ni Pablo, inestablisar ni Jesus an Pamanggihan nin Kagurangnan “kan banggi na [si Jesus] ipasasaloib” ni Judas Iscariote sa Judiong mga namomoon sa relihion na nag-impluwensia sa mga Romano na ipako sa harigi si Cristo. Nangyari an pamanggihan na iyan kan matangang banggi nin Huebes, Marso 31, 33 C.E. Nagadan si Jesus sa hariging pasakitan kan Biernes nin hapon, Abril 1. Huling an mga aldaw kan Judiong kalendaryo minapoon sa banggi nin sarong aldaw sagkod sa banggi kan sunod na aldaw, an Pamanggihan nin Kagurangnan sagkod an kagadanan ni Jesu-Cristo nangyari sa iyo man sanang aldaw​—Nisan 14, 33 C.E.

An mga nakikikabtang sa tinapay asin sa arak kaipuhan na ‘padagos na gibohon ini’ sa paggirumdom ki Jesus. Segun sa saro pang traduksion, si Jesus nagsabi: “Gibohon nindo ini bilang girumdoman sa sako.” (1 Corinto 11:​24, The Jerusalem Bible) An Pamanggihan nin Kagurangnan inaapod man na Memorial kan kagadanan ni Cristo.

Taano ta Dapat Iselebrar an Kagadanan ni Jesus?

An simbag yaon sa kun sa ano may koneksion an kagadanan ni Jesus. Si Jesus nagadan bilang an pangenot na parasuportar sa soberaniya ni Jehova. Sa siring pinatunayan nia na si Satanas putikon sa pagsahot na an mga tawo naglilingkod sana sa Dios na may maimot na mga motibo. (Job 2:1-5; Talinhaga 27:11) Paagi sa saiyang kagadanan bilang sangkap na tawo, “[itinao man ni Jesus] an saiyang kalag bilang pantubos na karibay nin dakol.” (Mateo 20:28) Kan magkasala si Adan tumang sa Dios, ipinatunod nia an sangkap na buhay bilang tawo asin an itinataong mga esperansa kaiyan. Alagad  “an Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Tunay nanggad, “an ibinabayad nin kasalan kagadanan, alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.”​—Roma 6:23.

Sa siring, an kagadanan ni Jesu-Cristo may koneksion sa duwang kadarudakulaing kapahayagan nin pagkamoot​—an dakulaon na pagkamoot na ipinaheling ni Jehova para sa katawohan sa pagtao sa saiyang Aki asin an mapagsakripisyong pagkamoot na ipinaheling ni Jesus para sa katawohan paagi sa gikan sa boot na pagtao kan saiyang buhay bilang tawo. Ibinabantog kan Memorial kan kagadanan ni Jesus an kadakulaan kan duwang kapahayagan na ini nin pagkamoot. Huling inako niato an pagkamoot na ini, bako daw na maninigo niatong ipaheling an satong pagpasalamat para dian? An sarong paagi na magibo iyan iyo an pagigin presente sa pagselebrar kan Pamanggihan nin Kagurangnan.

An Kahulogan kan Tinapay Asin kan Arak

Kan ineestablisar an Pamanggihan nin Kagurangnan, naggamit si Jesus nin tinapay asin kopa nin mapulang arak bilang mga emblema, o simbolo. Nagkua si Jesus nin tinapay, asin “pakapagpasalamat, binaraak nia iyan asin nagsabi: ‘[An tinapay na] ini nangangahulogan kan sakong hawak na manongod sa saindo.’ ” (1 Corinto 11:24) An tinapay kaipuhan na baakon tanganing ikadistribwir asin makakan huli ta iyan medyo maragmong tinapay na gibo sa harina asin tubig na mayo nin lebadura. Sa Kasuratan, an lebadura nagsisimbolisar sa kasalan. (Mateo 16:​11, 12; 1 Corinto 5:​6, 7) Si Jesus bakong makasalan. An saiyang sangkap na hawak bilang tawo kun siring nagserbing angay na atang na pantubos para sa katawohan. (1 Juan 2:​1, 2) Angay nanggad na daing lebadura an tinapay na ginamit tanganing magrepresentar sa daing kasalan na hawak na laman ni Cristo!

Nagpasalamat man si Jesus para sa kopa nin daing salak na mapulang arak asin nagsabi: “An kopang ini nangangahulogan kan bagong tipan sa puersa kan sakong dugo.” (1 Corinto 11:25) An mapulang arak sa kopa nagrerepresentar sa dugo ni Jesus. Kun paanong an dugo nin iinatang na mga toro asin kanding an nagpagin balido kan tipan nin Ley sa pag-oltanan nin Dios asin kan nasyon nin Israel kan 1513 B.C.E., sa siring an dugo ni Jesus na pinabolos paagi sa kagadanan an nagpagin balido kan bagong tipan.

Sairisay an Dapat na Makikabtang?

Tanganing maaraman kun siisay an angay na makikabtang sa mga emblema kan Memorial, kaipuhan na masabotan niato kun ano an bagong tipan asin sairisay an partisipante dian. An Biblia nagsasabi: “‘Uya! May maabot na mga aldaw,’ an sabi ni Jehova, ‘asin magibo ako nin bagong tipan sa harong ni Israel asin sa harong ni Juda . . . Ibubugtak ko an sakong ley sa sainda, . . . sa saindang puso iyan isusurat ko. Asin ako magigin saindang Dios, asin sinda magigin sakong banwaan. . . . Ipatatawad ko an saindang sala, asin an saindang kasalan dai ko na gigirumdomon.’”​—Jeremias 31:31-34.

An bagong tipan nagpapagin posible sa sarong espesyal na klaseng relasyon ki Jehova Dios. Paagi sa tipan na ini, an sarong grupo nin mga indibiduwal nagigin saiyang banwaan asin sia nagigin Dios ninda. An ley ni Jehova nakasurat sa sainda, sa puso ninda, asin dawa an mga Judio na dai tinuri sa laman puedeng lumaog sa bagong pakipagtipan sa Dios. (Roma 2:29) An kagsurat sa Biblia na si Lucas nagtataram manongod sa katuyohan nin Dios na ‘itao an Saiyang atension sa mga nasyon tanganing kumua hale sa sainda nin sarong banwaan para sa saiyang ngaran.’ (Gibo 15:14) Oyon sa 1 Pedro 2:​10, sinda “kaidto bakong banwaan, alagad ngonyan banwaan na nin Dios.” An Kasuratan inaapod sindang “Israel nin Dios,” an boot sabihon, espirituwal na Israel. (Galacia 6:16; 2 Corinto  1:21) Kun siring, an bagong tipan sarong tipan sa pag-oltanan ni Jehova Dios asin kan espirituwal na Israel.

Sa huring banggi nia kaiba an saiyang mga disipulo, si Jesus mismo naggibo man nin sarong laen na pakipagtipan sa sainda. “Ako nakikipagtipan sa saindo,” an sabi nia sainda, “kun paanong an sakong Ama nakipagtipan sa sako, para sa sarong kahadean.” (Lucas 22:29) Ini an tipan para sa Kahadean. An kabilangan kan bakong sangkap na mga tawo na dinara sa tipan para sa Kahadean 144,000. Pakabuhaya liwat sa langit, mamamahala sinda kaiba ni Cristo bilang mga hade asin saserdote. (Kapahayagan 5:​9, 10; 14:1-4) Sa siring, an mga yaon sa bagong pakipagtipan ki Jehova Dios yaon man sa pakipagtipan ki Jesu-Cristo para sa Kahadean. Sinda sana an angay na makikabtang sa mga emblema kan Pamanggihan nin Kagurangnan.

Paano naaaraman kan mga tinawan nin deretsong makikabtang sa mga emblema sa Memorial na sinda may daing kaagid na relasyon sa Dios asin sinda kairibang paramana ni Cristo? Ipinaliwanag ni Pablo: “An [banal na] espiritu man sana nagpapatotoo kaiba kan satong espiritu [an satong disposisyon nin isip] na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magdusa tangani man kitang iribang mapamuraway.”​—Roma 8:​16, 17.

Paagi sa saiyang banal na espiritu, o puersa aktiba, ninonombrahan nin Dios an kairibang paramana ni Cristo. Ini an nagpapangyaring masierto ninda na sinda mga paramana kan Kahadean. Pinapamate kaiyan sa boot nin linahidan na mga Kristiano an sarong langitnon na paglaom. Iinaaplikar ninda sa saindang sadiri an gabos na sinasabi kan Biblia manongod sa langitnon na buhay. Dugang pa, andam sindang isakripisyo an gabos na bagay na may koneksion sa buhay digdi sa daga, kabale an buhay sa daga asin an gabos na relasyon sa mga tawo. Maski aram kan linahidan nin espiritung mga Kristiano na an buhay sa daganon na Paraiso magigin marahayon, bako ini an saindang paglaom. (Lucas 23:43) Bako huli sa salang mga pagmansay sa relihion kundi bilang resulta kan paghiro kan espiritu nin Dios, igwa sinda nin dai nababagong langitnon na paglaom asin kun siring angay na makikabtang sa mga emblema sa Memorial.

Ipamugtak ta baga na an saro dai lubos na nakasisierto na sia kaiba sa bagong tipan asin tipan para sa Kahadean. Paano kun mayo man sa saiya an patotoo kan espiritu nin Dios na sia kaibang paramana ni Cristo? Kun siring, magigin sala na makikabtang sia sa mga emblema kan Memorial. Tunay nanggad, ikaaanggot nin Dios kun an saro tuyong irinepresentar an sadiri nia bilang saro na inapod na magin langitnon na hade asin saserdote mantang an totoo mayo man sia kan siring na pag-apod.​—Roma 9:16; Kapahayagan 22:5.

Gurano Kaparate na Iseselebrar Iyan?

Maninigo daw na selebraron an kagadanan ni Jesus nin serosemana o tibaad ngani aroaldaw? Bueno, an Pamanggihan nin Kagurangnan inestablisar ni Cristo kan Aldaw nin Paskua asin sia daing katanosan na ginadan kan aldaw man na iyan. Ginigibo nin sarong beses sana kada taon, sa Nisan 14, sineselebrar kan Paskua an pagkakalda nin Israel sa kaoripnan sa Egipto. (Exodo 12:​6, 14; Levitico 23:5) Kaya an kagadanan ni “Cristo na satuyang paskua” maninigo na selebraron sana nin sarong beses kada taon, bakong serosemana o aroaldaw. (1 Corinto 5:7) Sa pagselebrar kan Pamanggihan nin Kagurangnan, sinusunod kan mga Kristiano an iyo man sanang prosedimiento na ginibo ni Jesus kan establisaron nia iyan.

Ano, kun siring, an kahulogan kan mga tataramon ni Pablo: “Sa gabos na panahon na kumakan kamo kan tinapay na ini asin uminom kan kopang ini, padagos nindong ipinagbabalangibog an pagkagadan kan Kagurangnan, sagkod na sia dumatong”? (1 Corinto 11:26) Sa tekstong ini ginamit ni Pablo an termino na nangangahulogan “kada panahon na,” o “noarin man.” Sa siring, sinasabi nia na noarin man makikabtang sa mga emblema an  linahidan na mga Kristiano, ibinabalangibog ninda an saindang pagtubod sa atang na pantubos ni Jesus.

Seselebraron kan linahidan na mga Kristiano an kagadanan ni Cristo “sagkod na sia dumatong.” An selebrasyon na ini magpapadagos sagkod na dumatong si Jesus tanganing akoon sa langit an saiyang linahidan na mga parasunod paagi sa pagkabuhay liwat sa espiritung buhay durante kan saiyang “presensia.” (1 Tesalonica 4:14-17) Kaoyon ini kan mga tataramon ni Cristo sa 11 fiel na apostol: “Kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”​—Juan 14:3.

Ano an Kahulogan sa Saindo?

Kaipuhan daw na makikabtang sa mga emblema sa Memorial tanganing makinabang sa atang ni Jesus asin mag-ako nin buhay na daing katapusan sa daga? Dai. Mayong sinasabi an Biblia na nagsusuherir na pakabuhaya liwat sa sainda sa daga, an matatakton sa Dios na mga tawo arog ni Noe, Abraham, Sara, Isaac, Rebeca, Jose, Moises, asin David makikikabtang man lamang sa mga emblemang ini. Pero, sinda asin an gabos na iba pa na nagmamawot nin daing katapusan na buhay sa daga kinakaipuhan na magtubod sa Dios asin ki Cristo saka sa probisyon ni Jehova na atang na pantubos ni Jesus. (Juan 3:36; 14:1) Tanganing magkaigwa nin buhay na daing katapusan, kaipuhan man nindong magkaigwa kan arog kaiyan na pagtubod. An presensia nindo sa taonan na selebrasyon kan pagkagadan ni Cristo nagseserbing pagirumdom sa dakulaon na atang na iyan asin maninigong magpararom kan saindong pagpasalamat para dian.

Idinoon ni apostol Juan an importansia kan atang ni Jesus kan sia magsabing: “Isinusurat ko sa saindo [kapwa mga linahidan] an mga bagay na ini tanganing dai kamo makaginibo nin kasalan. Pero, kun an siisay man makaginibo nin kasalan, igwa kita nin paratabang sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan, pero bako sanang kan sa sato kundi siring man kan sa bilog na kinaban.” (1 Juan 2:​1, 2) Masasabi kan mga linahidan na an atang ni Jesus sarong pampagian nin boot na pantakop sa saindang mga kasalan. Alagad iyan atang man para sa kasalan kan bilog na kinaban, na ginigibong posible an buhay na daing katapusan para sa makinuyog na katawohan!

Kamo daw magigin presente sa Abril 4, 2004, tanganing selebraron an kagadanan ni Jesus? An selebrasyon na ini gigibohon sa bilog na kinaban kan Mga Saksi ni Jehova sa saindang mga lugar nin pagtiripon. Kun mag-atender kamo, makikinabang kamo sa paghinanyog sa importanteng marhay na diskurso sa Biblia. Ipapagirumdom sa saindo kun gurano kadakula kan ginibo ni Jehova Dios asin ni Jesu-Cristo para sa sato. Magigin kapakipakinabang man sa espirituwal na makipagtipon sa mga may hararom na pagpahalaga sa Dios asin ki Cristo saka sa atang na pantubos ni Jesus. An okasyon puedeng makapakosog nanggad sa pagmawot nindong mag-ako kan dai na kutana maninigong kabootan nin Dios, na magiya sa buhay na daing katapusan. Dai pagtogotan an ano man na makaolang sa saindo. Magin presente sa nakaoogmang selebrasyon na ini na nagtatao nin onra asin nagpapaogma sa satong langitnon na Ama, si Jehova Dios.

[Ritrato sa pahina 5]

An kagadanan ni Jesus may koneksion sa duwang kadarudakulaing kapahayagan nin pagkamoot

[Ritrato sa pahina 6]

An tinapay na daing lebadura asin an arak angay na mga simbolo kan daing kasalan na hawak ni Jesus asin kan saiyang pinabolos na dugo