“Gibohon Mo an Gibohon nin Sarong Paraebanghelyo”

“Papagdanayon mo an toltol na pag-iisip sa gabos na bagay, . . . gibohon mo an gibohon nin sarong paraebanghelyo.”​—2 TIMOTEO 4:5.

1. Ano an isinugo ni Jesus sa saiyang mga parasunod?

AN NGARAN asin mga katuyohan ni Jehova ipinapahayag sa bilog na daga. Ini huli ta isinapuso kan nagdusay na banwaan nin Dios an isinugo ni Jesu-Cristo sa saiyang mga parasunod kan sabihon nia: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

2. Anong instruksion an inako kan paraataman na si Timoteo, asin ano an sarong paagi tanganing maotob kan Kristianong mga paraataman an saindang ministeryo?

² Sineryoso kan mga disipulo ni Jesus kan enot na siglo an sugo na iyan. Halimbawa, sinadol ni apostol Pablo an saiyang kapwa Kristianong paraataman na si Timoteo: “Gibohon mo an gibohon nin sarong paraebanghelyo, lubos mong otobon an saimong ministeryo.” (2 Timoteo 4:5) Ngonyan, an sarong paagi na inootob nin sarong paraataman an saiyang ministeryo iyo an pagigin maigot na parabalangibog kan Kahadean, na regular na nakikikabtang sa ministeryo sa langtad. Halimbawa, an paraataman sa Pag-adal sa Libro kan Kongregasyon igwa kan nakakokontentong pribilehio nin pangengenot sa paghuhulit asin pagsasanay sa iba. Inotob ni Pablo an saiyang personal na paninimbagan na ipahayag an maogmang bareta, asin nagtabang sia na sanayon an iba para sa ministeryo.​—Gibo 20:20; 1 Corinto 9:​16, 17.

 Maigot na mga Paraebanghelyo kan Nakaagi

3, 4. Ano an mga naeksperyensiahan ni Felipe bilang sarong paraebanghelyo?

³ An enot na mga Kristiano midbid bilang maigot na mga paraebanghelyo. Isipon nindo an paraebanghelyong si Felipe. Saro sia sa “pitong lalaki na marahay an dangog . . . na pano nin espiritu asin kadonongan” na pinili tanganing gibohon an daing ipinapaorog na pagwaras aroaldaw nin kakanon sa Griego asin sa Hebreo an tataramon na Kristianang mga balo sa Jerusalem. (Gibo 6:1-6) Kan matapos an espesyal na paglilingkod na iyan asin kan magkawararak huli sa paglamag an gabos apuera sa mga apostol, nagpa-Samaria si Felipe. Ipinahayag nia duman an maogmang bareta asin tinawan sia nin kapangyarihan kan banal na espiritu na magpaluwas nin mga demonyo asin magpaomay sa mga pilay patin lupog. Dakol na Samaritano an nag-ako kan mensahe kan Kahadean asin nabautismohan. Kan mabaretaan ini, isinugo kan mga apostol sa Jerusalem si apostol Pedro asin Juan na magpa-Samaria tanganing mag-ako nin banal na espiritu an bagong mabautismohan na nagturubod.​—Gibo 8:4-17.

⁴ Sunod, giniyahan kan espiritu nin Dios si Felipe na tagboon an kapon na Etiope sa tinampo pa-Gaza. Pagkatapos na malinaw na ipaliwanag ni Felipe an hula ni Isaias, an “lalaking [ini na] nasa kapangyarihan na sakop ni Candace na reyna kan mga Etiope” nagtubod ki Jesu-Cristo asin nabautismohan. (Gibo 8:26-38) Pakatapos kaiyan si Felipe nagpa-Asdod dangan nagpa-Cesarea, na ‘nagpapahayag kan maogmang bareta sa gabos na siudad’ na inagihan nia. (Gibo 8:​39, 40) Siertong nagtao sia nin marahayon na halimbawa sa paggibo kan gibohon nin sarong paraebanghelyo!

5. Sa ano partikularmenteng midbid an apat na aking babae ni Felipe?

⁵ Aktibo pa man giraray si Felipe sa ministeryo sa Cesarea pakalihis nin mga 20 taon. Kan magdagos sa harong nia si Pablo asin Lucas, sia “igwa nin apat na aking babae, mga daraga, na naghuhurula.” (Gibo 21:8-10) Malinaw na sinda napatuod nin marhay sa espirituwal, maigot sa ministeryo, asin nagkapribilehio pa ngani na magtaram nin mga hula. An kaigotan nin mga magurang sa ministeryo puedeng magkaigwa nin marahayon na epekto sa mga aking lalaki asin babae ngonyan, na pinahihiro sinda na gibohon nindang pambilog na buhay na gibohon an maigot na pag-ebanghelyo.

Maigot na mga Paraebanghelyo Ngonyan

6. Anong kapangganahan an nakamtan kan mga paraebanghelyo kan enot na siglo?

⁶ Sa saiyang midbid na hula may koneksion sa satong kaaldawan asin sa panahon kan katapusan, si Jesu-Cristo nagsabi: “Sa gabos na nasyon an maogmang bareta kaipuhan na ikahulit nguna.” (Marcos 13:10) An katapusan madatong pagkatapos na ikahulit an maogmang bareta “sa bilog na ineerokan na daga.” (Mateo 24:14) Mantang nagbabalangibog kan maogmang bareta si Pablo asin an iba pang mga paraebanghelyo kan enot na siglo, dakol an nagturubod, asin naestablisar an mga kongregasyon sa sunod-sunod na lugar sa bilog na Imperyo nin Roma. An kamagurangan na ninombrahan na maglingkod sa mga kongregasyon na ini nagpartisipar kaiba kan saindang mga tugang na lalaki asin babae sa pag-ebanghelyo asin pinalakop ninda an paghuhulit sa gabos na lugar. An tataramon ni Jehova padagos na nagtalubo asin nangibabaw kan kaaldawan na idto, kapareho nanggad ngonyan huli ta minilyon na Saksi ni Jehova an naggigibo kan gibohon nin mga paraebanghelyo. (Gibo 19:20) Kabilang na daw kamo sa maogmang mga paraomaw na iyan ki Jehova?

7. Ano an ginigibo ngonyan kan mga parabalangibog kan Kahadean?

⁷ Dakol na parabalangibog kan Kahadean sa presenteng panahon an inaaprobetsaran an mga oportunidad na pahiwason an saindang kabtang sa pag-ebanghelyo. Rinibo an naglaog sa langtad nin pagmimisyonero, asin ginatos na ribo an nakikikabtang sa bilog na panahon na aktibidad nin pag-ebanghelyo bilang mga regular asin auxiliary payunir. Asin abaa karahay kan ginigibo nin mga lalaki, babae, asin aki na naglilingkod bilang maigot na mga parahayag kan Kahadean! Tunay nanggad, nakakamtan kan gabos na kabilang sa banwaan ni Jehova an saiyang mayaman na bendisyon mantang sinda daramay na naglilingkod sa saiya bilang Kristianong mga paraebanghelyo.​—Sofonias 3:9.

8. Anong pagbugtak nin tanda an ginigibo ngonyan, asin niisay?

⁸ Tinawan nin Dios an linahidan na mga parasunod ni Jesus nin paninimbagan na ibalangibog an maogmang bareta sa bilog na daga. Katabang ninda sa pag-ebanghelyong ini an nagdadakol na “ibang karnero” ni Cristo. (Juan 10:16) Sa makahulang paagi, an nagliligtas-buhay na gibohon na ini  iinaagid sa pagbugtak nin tanda sa angog kan mga nag-aaragagha asin nag-aaragrangay huli sa makauuyam nin makuring mga bagay na nangyayari ngonyan. Sa dai na mahahaloy, paparaon na an mga maraot. Mientras tanto, kanigoan na pribilehio na ipaabot sa mga nag-eerok sa daga an nagliligtas-buhay na mga katotoohan!​—Ezequiel 9:4-6, 11.

9. Paano matatabangan sa ministeryo an mga bagohan?

⁹ Kun haloy-haloy na kitang nakikikabtang sa pag-ebanghelyo, posibleng marhay na may magigibo kita tanganing tabangan an mga bagohan sa kongregasyon. Paminsanminsan, puede niato sindang iiba sa ministeryo. Bobooton kan mga naglilingkod bilang kamagurangan na gibohon an gabos nindang makakaya na pakosogon sa espirituwal an mga kapagtubod. Dakula an magigibo kan marahayon na mga paghihingoa nin mapakumbabang mga paraataman tanganing matabangan an iba na magin maigot asin mabungang paraebanghelyo.​—2 Pedro 1:5-8.

Pagpatotoo sa Harong-Harong

10. Anong halimbawa sa ministeryo an itinao ni Cristo asin kan saiyang enot na mga parasunod?

¹⁰ Si Jesu-Cristo nagtao sa saiyang mga parasunod nin marahayon na halimbawa bilang paraebanghelyo. Mapadapit sa ministeryo ni Cristo asin kan saiyang mga apostol, an Tataramon nin Dios nagsasabi: “Sia naglibot sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean nin Dios. Asin an kagduwa kaibanan nia.” (Lucas 8:1) Kumusta man an mga apostol mismo? Pagkatapos na ibubo an banal na espiritu kan Pentecostes nin 33 C.E., “aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.”​—Gibo 5:42.

11. Segun sa Gibo 20:​20, 21, ano an ginibo ni apostol Pablo sa saiyang ministeryo?

¹¹ Huli sa saiyang maigot na pag-ebanghelyo, makakasabi si apostol Pablo sa Kristianong kamagurangan sa Efeso: “Dai ako nagpogol sa pagsabi sa saindo kan ano man na bagay na kapakipakinabang ni sa pagtokdo sa saindo sa publiko asin sa pagharongharong.” Kan si Pablo ‘nagtotokdo sa harong-harong,’ nagdadalaw daw sia sa mga harong kan mga kapwa parasamba ki Jehova, na nagsosongko sa pagpastor sa mga may pagtubod? Dai, huli ta padagos niang ipinaliwanag: “Lubos akong nagpatotoo sa mga Judio sagkod sa mga Griego manongod sa pagsolsol sa Dios asin pagtubod sa satong Kagurangnan na si Jesus.” (Gibo 20:​20, 21) Sa pankagabsan, an mga nagdusay na ki Jehova dai na nangangaipong tokdoan manongod sa “pagsolsol sa Dios asin pagtubod sa satong Kagurangnan na si Jesus.” An Kristianong kamagurangan sa Efeso sinanay ni Pablo sa ministeryong pagharongharong mantang an mga daing pagtubod tinokdoan nia manongod sa pagsolsol asin pagtubod. Sa paggibo kaini, inaarog ni Pablo an pamamaaging inestablisar ni Jesus.

12, 13. Kaoyon kan Filipos 1:​7, ano an ginibo kan banwaan ni Jehova manongod sa saindang deretsong maghulit?

¹² Puedeng magin depisil an ministeryong pagharongharong. Halimbawa, an nagkapira naaanggot kun kita minadolok sa pinto ninda dara an mensahe kan Biblia. Dai niato mawot na paanggoton an mga tawo. Pero, sono sa Kasuratan an ministeryong pagharongharong, asin an pagkamoot sa Dios asin sa kapwa an nagmomotibar sa sato na magpatotoo sa arog kaining paagi. (Marcos 12:28-31) Tanganing ‘idepensa asin legal na patunayan’ an satong deretsong maghulit sa harong-harong, nagsangat kita nin mga kaso sa mga korte, kabale an Korte Suprema sa Estados Unidos. (Filipos 1:7) An mga desisyon kan korteng iyan haros gabos pabor sa sato. Halimbawa kaiyan an minasunod na desisyon:

¹³ “An pagpasakamot nin relihiosong mga pulyeto sarong suanoy nang porma nin misyonaryong pag-ebanghelyo​—siring kasuanoy kan kasaysayan nin mga pag-imprenta. Iyan nagin sarong epektibong puersa sa laen-laen na mobimientong relihioso sa bilog na nag-aging mga taon. Ginagamit ngonyan an pormang ini nin pag-ebanghelyo, sa dakulang sokol nin laen-laen na sekta nin relihion na an mga colporteur nagpapaabot kan Ebanghelyo sa rinibong harong asin naghihingoa paagi sa personal na mga pagsongko na makakua nin mga parasunod sa saindang pagtubod. . . . An pormang ini nin relihiosong aktibidad igwa nin halangkaw na importansia sa irarom kan Enot na Enmienda [sa Konstitusyon kan Estados Unidos] na kapareho kan pagsamba sa mga simbahan asin pagsermon sa mga pulpito.”​—Murdock v. Pennsylvania, 1943.

 Taano ta Padagos na Maghulit?

14. Ano an puedeng magin progresibong epekto kan satong ministeryo?

¹⁴ Dakol an dahelan na maghulit sa harong-harong. Kada magdalaw kita sa sarong kagharong, naghihingoa kitang magtanom nin banhi nin katotoohan na sono sa Kasuratan. Paagi sa mga pagdalaw liwat, naghihingoa kitang baribion iyan. Asin puede iyan na magkaigwa nin marahayon na progresibong epekto, ta si Pablo nagsurat: “Ako an nagtanom, si Apolos an nagbaribi, alagad an Dios iyo an padagos na nagpapatubo kaiyan.” (1 Corinto 3:6) Kaya padagos kitang ‘magtanom asin magbaribi,’ na nagkokompiar na ‘patutuboon iyan’ ni Jehova.

15, 16. Taano ta paorootro kitang nagdadalaw sa harong kan mga tawo?

¹⁵ Ginigibo niato an gibohon nin mga paraebanghelyo huli ta buhay an nakataya. Paagi sa paghuhulit ikaliligtas niato an satong sadiri asin an mga naghihinanyog sa sato. (1 Timoteo 4:16) Kun aram niato na namemeligro an buhay nin sarong tawo, maluwayluway sana daw kita na tabangan sia? Dai nanggad! Huling kaligtasan an kalabot, paorootro kitang nagdadalaw sa mga harong nin mga tawo. Pirmeng nagbabago an mga kamugtakan. An saro na sibot-sibot kaya daing panahon na magdangog kaidto tibaad andam nang magdangog sa mensahe kan Biblia sa masunod. Tibaad iba nang miembro kan pamilya an magbukas kan pinto, asin iyan puedeng magbunga nin pag-orolay na sono sa Kasuratan.

¹⁶ Puedeng magbago bako sana an saindang mga kamugtakan kundi pati an aktitud kan mga kagharong. Halimbawa, an makolog na pagkagadan nin sarong namomotan tibaad magpahiro sa sarong indibiduwal na maghinanyog sa mensahe kan Kahadean. Naglalaom kita na maranga an tawo, ikapamate sa saiya an saiyang espirituwal na pangangaipo, asin ipaheling kun paano iyan mapaninigoan.​—Mateo 5:​3, 4.

17. Ano an pangenot na dahelan niato na maghulit?

¹⁷ An pangenot sa mga dahelan niato na maghulit sa harong-harong o magpartisipar sa iba pang kabtang nin Kristianong ministeryo iyo an pagmawot na magkaigwa nin kabtang sa pagpamidbid kan ngaran ni Jehova. (Exodo 9:16; Salmo 83:18) Nakakokontento nanggad kun an satong pag-ebanghelyo nakakatabang sa mga namomoot sa katotoohan asin katanosan na magin mga paraomaw ki Jehova! “Kamong hoben na mga lalaki asin kamo man na mga daraga, kamong gurang na mga lalaki kaibanan nin mga aking lalaki,” an inawit kan salmista. “Pag-omawon logod ninda an ngaran ni Jehova, huli ta an saiyang ngaran sana an halangkaw na dai maaabot. An saiyang dignidad halangkaw kisa daga asin langit.”​—Salmo 148:​12, 13.

An Pag-ebanghelyo Nagtatao sa Sato nin Personal na Pakinabang

18. Paano kita nakikinabang sa pag-ebanghelyo?

¹⁸ An paggibo kan gibohon nin paraebanghelyo nagtatao sa sato nin personal na pakinabang sa laen-laen na paagi. An pagharongharong dara an maogmang bareta nagtatabang sa sato na kultibaron an kapakumbabaan, partikular na kun bakong maboot an pag-ako sa sato. Tanganing magin epektibong mga paraebanghelyo, kaipuhan kitang magin arog ki Pablo, na ‘nagin gabos na bagay sa gabos na klase nin tawo tanganing ikaligtas nia an nagkapira.’ (1 Corinto 9:19-23) An eksperyensia sa ministeryo nagtatabang sa sato na magin mataktika. Paagi sa pagsarig ki Jehova asin pagpili nin tamang mga tataramon niato, ikaaaplikar niato an konseho ni Pablo: “An saindo logod na pagtaram danay na igwa nin pagkamaugayon, na tinimplahan nin asin, tanganing maaraman nindo kun paano kamo dapat na sumimbag sa lambang saro.”​—Colosas 4:6.

19. Paano tinatabangan kan banal na espiritu an mga paraebanghelyo?

¹⁹ An pag-ebanghelyo nagpapahiro man sa sato na magsarig sa banal na espiritu nin Dios. (Zacarias 4:6) An bunga kaiyan​—“pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri”—​magigin risang-risa na man sa satong ministeryo. (Galacia 5:​22, 23) May epekto iyan sa satong pagtratar sa mga tawo, huli ta an pagsunod sa paggiya kan espiritu nagtatabang sa sato na magpaheling nin pagkamoot, magin magayagaya asin mapagpatoninong, magin matinios asin maboot, magpaheling nin karahayan asin pagtubod, saka magpaheling nin kahoyoan asin pagpopogol sa sadiri mantang nagpapahayag kan maogmang bareta.

20, 21. Ano an nagkapirang bendisyon asin pakinabang nin pagdadanay na sibot bilang mga paraebanghelyo?

²⁰ An saro pang bendisyon na nakakamtan niato  bilang mga paraebanghelyo iyo na kita nagigin mas may simpatiya. Kun sinasabi kan mga tawo an saindang mga problema​—helang, kadaihan nin trabaho, mga kasakitan sa laog kan pamilya​—dai kita minaakto bilang mga parakonseho, kundi nagtatao kita sa sainda nin mga teksto na nakaparirigon sa boot asin nakararanga. Interesado kita sa mga tawo na nabuta sa espirituwal alagad garo baga may pagkamoot sa katanosan. (2 Corinto 4:4) Asin kanigoan na bendisyon an magtao nin espirituwal na tabang sa mga “may tamang tendensia sa buhay na daing katapusan”!​—Gibo 13:48.

²¹ An regular na pagpartisipar sa pag-ebanghelyo nagtatabang sa sato na ikonsentrar an satong isip sa espirituwal na mga bagay. (Lucas 11:34) Siertong kapakipakinabang iyan, huli ta kun dai tibaad madaog kita kan mga sugot nin materyalismo na lakop na marhay sa kinaban na ini. Si apostol Juan nagsadol sa mga Kristiano: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​—an mawot kan laman asin an mawot kan mga mata asin an pagpaabaw-abaw kan kaya sa buhay​—bakong gikan sa Ama, kundi gikan sa kinaban. Apuera kaini, an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:15-17) An pagdadanay na sibot bilang mga paraebanghelyo na kadakol kan gigibohon sa gibohon kan Kagurangnan nagtatabang sa sato na dai mamoot sa kinaban.​—1 Corinto 15:58.

Magtipon nin mga Kayamanan sa Langit

22, 23. (a) Anong mga kayamanan an tinitipon kan Kristianong mga paraebanghelyo? (b) Paano kita tatabangan kan masunod na artikulo?

²² An maigot na paghuhulit kan Kahadean nagtatao nin nagdadanay na mga pakinabang. Ipinaheling ini ni Jesus kan sia magsabi: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Imbes, magtipon kamo nin mga kayamanan sa langit, na duman an polilya o takla dai nakararaot, asin an mga parahabon dai nananalakat asin dai naghahabon. Huli ta kun saen an saindong kayamanan, dian man an saindong puso.”​—Mateo 6:19-21.

²³ Logod na padagos kitang magtipon nin mga kayamanan sa langit, sa pakaaram na mayo nang maorog pang pribilehio sa pagrepresentar sa Soberanong Kagurangnan na Jehova bilang saiyang mga Saksi. (Isaias 43:10-12) Mantang ginigibo niato an sugo sa sato bilang mga ministro nin Dios, posibleng marhay na makamate kita nin arog kan sarong labi nang 90 anyos na Kristiana na nagsabi nin arog kaini manongod sa saiyang halawig na buhay nin paglilingkod sa Dios: “Sa gabos na iyan nagpapasalamat ako ki Jehova sa pagpasensia nia sa sako sa nag-aging mga taon, asin ipinamimibi ko nin odok na sia an magigin sakong mamomoton na Ama sagkod lamang.” Kun pinahahalagahan man niato an satong relasyon sa Dios, sierto na gusto niatong gibohon nin lubos an gibohon nin sarong paraebanghelyo. Tatabangan kita kan sunod na artikulo na masabotan kun paano niato lubos na maootob an satong ministeryo.

Ano an Isisimbag Nindo?

• Taano ta maninigo niatong gibohon an gibohon nin sarong paraebanghelyo?

• Ano an masasabi nindo manongod sa gibohon kan mga paraebanghelyo kan nakaagi asin sa presente?

• Taano ta naghuhulit kita sa harong-harong?

• Paano kamo personal na nakikinabang sa paggibo kan gibohon nin sarong paraebanghelyo?

[Mga Hapot Para sa Pag-adal]

[Mga Ritrato sa pahina 10]

An mga paraebanghelyo na arog ki Felipe asin kan saiyang mga aking babae igwa nin magayagayang mga katimbang sa presenteng aldaw

[Ritrato sa pahina 14]

Paano kamo personal na nakikinabang mantang ihinihiras nindo sa iba an maogmang bareta?