Sarong Selebrasyon na Nakaaapektar Saindo

KAN nasa daga, inestablisar ni Jesu-Cristo an sarong selebrasyon na nagtataong onra sa Dios. Ini sana an relihiosong seremonya na direktang ipinagboot nia na iselebrar kan saiyang mga parasunod. Iyan an Pamanggihan nin Kagurangnan, na midbid man sa apod na Huring Pamanggihan.

Imahinara na ika sarong dai naheheling na nagmamasid kan mga pangyayari na masagkod sa okasyon na iyan. Si Jesus asin an saiyang mga apostol nagkatiripon sa sarong kuarto sa itaas sa Jerusalem tanganing iselebrar an Judiong Paskua. Tapos na sindang magkakan kan pinagkatodan na pamanggihan nin Paskua, na kompuesto nin inasal na kordero, mapait na mga gulay, tinapay na daing lebadura, asin mapulang arak. An bakong maimbod na apostol na si Judas Iscariote pinahale na asin madali nang pasaloiban an saiyang Kagurangnan. (Mateo 26:17-25; Juan 13:​21, 26-30) Si Jesus nagsosolo kaiba an saiyang 11 fiel na apostol. Saro sa sainda si Mateo.

Segun sa salaysay ni Mateo na nakaheling mismo, inestablisar ni Jesus an Pamanggihan nin Kagurangnan sa arog kaining paagi: “Si Jesus nagkua nin tinapay [na daing lebadura] asin, pakapamibi, binaraak nia iyan asin, sa pagtao kaiyan sa mga disipulo, sia nagsabi: ‘Kua, kakan kamo. Ini nangangahulogan kan sakong hawak.’ Siring man, nagkua sia nin sarong kopa [nin arak] asin, pakapagpasalamat, itinao nia iyan sa sainda, na an sabi: ‘Inom kamo kaiyan, kamo gabos; huli ta ini nangangahulogan kan sakong “dugo kan tipan,” na papaboloson manongod sa dakol para sa kapatawadan nin mga kasalan.’”​—Mateo 26:26-28.

Taano ta inestablisar ni Jesus an Pamanggihan nin Kagurangnan? Sa paggibo kaiyan, taano ta naggamit sia nin tinapay na daing lebadura asin mapulang arak? An gabos daw na parasunod ni Cristo dapat na makikabtang sa mga emblemang ini? Gurano kaparateng iseselebrar an pamanggihan na ini? Asin talaga daw na may kahulogan iyan sa saindo?