Kamo daw Nakapokus sa Balos?

AN HELANG luway-luway na naglalakop. Sa primero, nagigin hayakpit an pakaheling sa palibot. Kun dai mabolong, iyan puedeng lumakop pasiring sa tahaw kan pakaheling. Sa katapustapusi, iyan puedeng magin dahelan nin biyong pagkawara nin pagheling. Ano iyan? An glaucoma​—sarong pangenot na dahelan nin pagkabuta.

Kun paanong puede kitang mawaran nin literal na pagheling nin luway-luway asin daing gayo risa, puede man kitang mawaran nin orog pa ngani kahalagang klase nin pagheling​—an satong espirituwal na pakaheling. Kun siring, mahalagang marhay na papagdanayon na nasa klarong pokus sa sentro kan satong pagheling an espirituwal na mga bagay.

Pagdadanay na Nakapokus sa Balos

Kabilang sa “mga bagay na dai naheheling” kan satong literal na mga mata iyo an mamuraway na balos na buhay na daing sagkod, na iinaalok ni Jehova sa saiyang mga maimbod. (2 Corinto 4:18) Siempre, an pangenot na dahelan na naglilingkod sa Dios an mga Kristiano iyo na huli ta namomotan ninda sia. (Mateo 22:37) Minsan siring, gusto ni Jehova na galaga niatong antisiparon an satong balos. Gusto nia na mansayon niato sia bilang sarong buka an palad na Ama na iyo “an parabalos sa mga maigot na naghahanap sa saiya.” (Hebreo 11:6) Huli kaini, an mga talagang nakakamidbid sa Dios asin namomoot sa saiya pinakamamahal an saiyang ipinanugang mga bendisyon asin naghihimuyawot sa kaotoban kaiyan.​—Roma 8:​19, 24, 25.

An dakol na parabasa kan magasin na ini asin kan kaiba kaiyan, an Awake!, naoogma sa retrato o drowing na naglaladawan kan maabot na Paraisong daga. Siempre, dai niato aram nin eksakto kun ano an magigin itsura kan Paraisong daga, asin an ipinupublikar na mga retrato artistikong mga ilustrasyon sana na basado sa mga teksto sa Biblia na arog kan Isaias 11:6-9. Minsan siring, an sarong Kristiana nagsabi: “Kun ako nakakaheling nin mga retrato kan madatong na Paraiso sa An Torrengbantayan asin Awake!, pinakasisiyasat ko iyan, kun paanong sinisiyasat nin saro an sarong pampleta nin mga lugar na pinapasyaran nin mga turista. Hinihingoa kong imahinaron na ako yaon duman huli ta duman ko talaga linalaoman na mag-istar sa itinalaan na panahon nin Dios.”

Kaagid kaiyan an namatean ni apostol Pablo manongod sa saiyang “pag-apod sa itaas.” Dai nia ibinilang an saiyang sadiri na nakapangapot na kaiyan, huli ta kaipuhan pa niang patunayan na sia fiel sagkod sa katapusan. Alagad sia nagpadagos na “aboton an mga bagay na nasa enotan.” (Filipos 3:​13, 14) Siring man, tinagalan ni Jesus an kagadanan sa hariging pasakitan “huli kan kagayagayahan na ibinugtak sa atubangan nia.”​—Hebreo 12:2.

Nagduda na daw kamo kun baga makakalaog kamo sa bagong kinaban? Marahay nanggad na dai magin sobra an pagkompiar, mantang an satong pag-ako kan premyong buhay nakadepende sa satong pagdadanay na fiel sagkod sa katapusan. (Mateo 24:13) Minsan siring, kun ginigibo niato an satong pinakamakakaya tanganing aboton an mga kahagadan nin Dios, yaon sato an gabos na dahelan na magin kompiado na akoon an balos. Girumdomon na “dai . . . mawot [ni Jehova] na an siisay man malaglag kundi mawot nia na an gabos makapagsolsol.”  (2 Pedro 3:9) Kun nagtitiwala kita ki Jehova, tatabangan nia kita na maabot an satong pasohan. Tunay nanggad, sarongat sa saiyang naturalesa na hanapan nin dahelan na madiskualipikar an mga sinserong naghihingoa na paogmahon sia.​—Salmo 103:8-11; 130:​3, 4; Ezequiel 18:32.

An pakaaram kun ano an saboot ni Jehova sa saiyang banwaan nagtatao sa sato nin paglaom​—sarong kualidad na kapareho kahalaga nin pagtubod. (1 Corinto 13:13) An termino sa Griego na trinadusir na “paglaom” sa Biblia nagtatao nin ideya nin galagang “pag-antisipar sa marahay.” Nasa isip an siring na paglaom, si apostol Pablo nagsurat: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan biyong kasiertohan kan paglaom sagkod sa katapusan, tanganing dai kamo magin mga hugakon, kundi magin mga paraarog kan mga nagmamana sa mga panuga paagi sa pagtubod asin pasensia.” (Hebreo 6:​11, 12) Mangnoha na kun kita padagos na maglilingkod ki Jehova nin fiel, makakasierto kita na makamit an satong paglaom. Bakong arog kan dakol na kinabanon na ambisyon, an paglaom na ini “dai nagbubunga nin pagkadesganar.” (Roma 5:5) Kaya paano niato mapagdadanay na buhay na marhay asin nakapokus nin klaro an satong paglaom?

Kun Paano Mapaooswag an Satong Espirituwal na Pokus

An satong pisikal na mga mata dai puedeng magpokus sa duwang bagay nin dungan. Totoo man iyan sa satong espirituwal na pakaheling. An pagpokus sa mga bagay sa presenteng sistema seguradong sa paano man mapangyaring mawara sa pokus sa satong isip an ipinanugang bagong kinaban nin Dios. Pag-abot nin panahon, an malibog asin mayo sa sentro na ladawan na ini tibaad magin bako nang kaakit-akit asin basta mawara na sana sa pagheling. Kanigoan na trahedya iyan! (Lucas 21:34) Kun siring, mahalaga nanggad na papagdanayon niato an ‘simpleng mata’​—matang pirmeng nakapokus sa Kahadean nin Dios asin sa balos na buhay na daing katapusan!​—Mateo 6:22.

An pagpadanay nin simpleng mata bakong pirmeng pasil. Puedeng lumataw an mga problema sa aroaldaw na mangangaipo kan satong atension, asin puedeng magkaigwa nin mga disturbo​—mga sugot pa ngani​—sa satong buhay. Sa siring kaining mga kamugtakan, paano kita makapagdadanay na nakapokus sa Kahadean asin sa panuga nin Dios na bagong kinaban na dai pinababayaan an ibang kaipuhan na mga aktibidad? Estudyaran niato an tolong paagi.

Pag-adalan an Tataramon nin Dios aroaldaw. An regular na pagbasa nin Biblia asin pag-adal sa mga publikasyon na basado sa Biblia nagtatabang sa sato na pagdanayon an satong isip na nakasentro sa espirituwal na mga bagay. Totoo, tibaad haloy na kitang nag-aadal sa Tataramon nin Dios, alagad dapat na padagos na pag-adalan niato iyan, kun paanong kaipuhan niatong padagos na kumakan nin pisikal na kakanon tanganing susteniran an satong buhay. Dai kita nagpopondo sa pagkakan huli sana ta rinibong beses na kitang nagkakan kan nakaagi. Kaya gurano man kita kapamilyar sa Biblia, kaipuhan niato an nagpapadagos asin regular na pagkakan nin espirituwal na kakanon hale dian tanganing papagdanayon na maliwanag an satong paglaom asin makosog an satong pagtubod asin pagkamoot.​—Salmo 1:1-3.

Horophoropon na may pag-apresyar an Tataramon nin Dios. Taano ta mahalagang marhay an paghorophorop? Huli sa  duwang dahelan. Enot, an paghorophorop nagpapangyaring masabotan niato an satong binabasa asin magkaigwa nin odok sa pusong pag-apresyar dian. Ikaduwa, an paghorophorop inoolang kitang malingawan si Jehova, an saiyang makangangalas na mga gibo, asin an paglaom na ibinugtak nia sa atubangan niato. Sa pag-ilustrar: An mga Israelita na naghale sa Egipto kaiba ni Moises nakaheling mismo kan makangingirhat na kapangyarihan ni Jehova. Namatean man ninda an saiyang mamomoton na proteksion mantang ginigiyahan nia sinda pasiring sa saindang mana. Pero nasa kaawagan pa sana ngani sinda sa pagpasiring sa Dagang Panuga nagpoon na sindang magreklamo, na naghahayag nin grabeng kadaihan nin pagtubod. (Salmo 78:11-17) Ano an saindang problema?

Hinale kan banwaan an saindang pokus ki Jehova asin sa makangangalas na paglaom na ibinugtak nia sa atubangan ninda dangan ibinaling iyan sa saindang presenteng mga kaginhawahan asin makalaman na intereses. Apisar kan milagrosong mga tanda asin ngangalasan na naheling ninda mismo, an dakol na Israelita nagin daing pagtubod na reklamador. “Madali nindang nalingawan an . . . mga gibo” ni Jehova, an sabi kan Salmo 106:13. An siring na daing sarahotan na kapabayaan nagin dahelan na an kapag-arakian na iyan dai nakalaog sa Dagang Panuga.

Sa siring, kun binabasa an Kasuratan o mga pantabang sa pag-adal sa Biblia, magtao nin panahon sa paghorophorop sa saindong binabasa. An siring na pagpensar mahalagang marhay sa saindong espirituwal na salud asin pagtalubo. Halimbawa, kun binabasa an Awit 106, na an sarong kabtang kaiyan kinotar sa enotan, horophoropon an mga kualidad ni Jehova. Helingon nindo kun gurano sia kamapasensia asin kamaheherakon sa mga Israelita. Helingon nindo kun paano nia ginibo an gabos niang magigibo tanganing tabangan sinda na makaabot sa Dagang Panuga. Risahon nindo kun paano sinda padagos na nagrebelde sa saiya. Mateon nindo an labi-labing kamondoan asin kolog nin boot ni Jehova kan sumagad na an saiyang pagkaherak asin pasensia huli sa sarong banwaan na bagol asin daing apresasyon. Dugang pa, paagi sa paghorophorop sa bersikulo 30 asin 31, na naglaladawan sa marigon asin may kosog nin boot na paninindogan ni Fineas para sa katanosan, kita makasisierto na dai linilingawan ni Jehova an saiyang mga maimbod asin na binabalosan nia sinda nin abunda.

Iaplikar an mga prinsipyo sa Biblia sa saindong buhay. Mantang sinusunod niato an mga prinsipyo sa Biblia, naheheling ta mismo na epektibo an mga konseho ni Jehova. An Talinhaga 3:​5, 6 nagsasabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Isip-isipa kun paano an inmoral na mga paggawe nin dakol na tawo nagbunga nin mga problema sa isip, emosyon, asin pisikal. Paagi sa pagpadara sa madali sanang mga kasiraman, an siring na mga tawo nag-aani nin grabeng sakit nin dakol na taon​—sa bilog na buhay pa ngani. Sa kabaliktaran na marhay, an mga naglalakaw sa ‘hayakpit na dalan’ nanamitan na an buhay sa bagong sistema, asin pinaririgon an boot ninda kaini na magpadagos sa dana nin buhay.​—Mateo 7:​13, 14; Salmo 34:8.

An pag-aplikar kan mga prinsipyo kan Biblia puedeng magin sarong angat. Kun beses, an bakong sono sa Kasuratan na solusyon tibaad garo baga nanunuga nin ensegidang pakaginhawa sa sarong masakit na situwasyon. Halimbawa, sa panahon na may problema sa pinansial, tibaad nakatetentar na gibohon na segunda na sana an intereses  kan Kahadean. Minsan siring, an mga minahiro na may pagtubod asin pinagdadanay an saindang espirituwal na pokus nakaseseguro na sa katapustapusi “marahay an mangyayari sa mga natatakot sa tunay na Dios.” (Eclesiastes 8:12) An sarong Kristiano tibaad may beses na mag-obertaim, alagad sia dai noarin man magigin siring ki Esau, na pinagmenos an espirituwal na mga bagay, na ibinilang iyan na daing halaga.​—Genesis 25:34; Hebreo 12:16.

Ipinaliwanag nin malinaw ni Jesus an satong mga paninimbagan bilang mga Kristiano. Dapat niatong ‘padagos na hanapon nguna an kahadean asin an katanosan nin Dios.’ (Mateo 6:33) Kun gigibohon niato iyan, ipaheheling ni Jehova an saiyang garo sa amang pagkamoot sa sato paagi sa pagsegurado na igwa kita kan kaipuhan niato sa materyal. Habo nia nanggad na pagabatan ta an satong sadiri nin kahaditan sa mga bagay na sinasabi niang sia na an bahala. An siring na labi-labing kahaditan puedeng magin siring sa espirituwal na glaucoma​—na kun mapabayaan, luway-luway na pahahayakpiton kaiyan an satong pakaheling sa materyal na sanang mga intereses asin sa katapustapusi gigibohon kitang buta sa espirituwal. Kun kita magdadanay sa siring na kamugtakan, an aldaw ni Jehova madatong sa sato na “siring sa sarong siod.” Abaang trahedya iyan!​—Lucas 21:34-36.

Magdanay na Nakapokus Arog ni Josue

Papagdanayon niato an satong mamuraway na paglaom sa Kahadean na nakapokus nin klaro, na ibinubugtak an ibang mga paninimbagan sa tamang lugar kaiyan. Paagi sa pagprosegir sa rutina nin pag-adal, paghorophorop, asin pag-aplikar kan mga prinsipyo sa Biblia, danay kitang makakokompiar sa satong paglaom arog ki Josue. Pakatapos giyahan an Israel sa Dagang Panuga, sia nagsabi: “Aram nindong gayo sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.”​—Josue 23:14.

Magpabagsik logod sa saindo an paglaom sa Kahadean, asin paliwanagon logod kaiyan an saindong mga aldaw mantang iyan nababanaag sa saindong mga iniisip, saboot, desisyon, asin aktibidad.​—Talinhaga 15:15; Roma 12:12.

[Ritrato sa pahina 21]

Nagduda na daw kamo kun baga makakalaog kamo sa bagong kinaban?

[Ritrato sa pahina 22]

An paghorophorop sarong mahalagang marhay na kabtang nin pag-adal sa Biblia

[Mga Ritrato sa pahina 23]

Magdanay na nakapokus sa intereses kan Kahadean