Labanan an Espiritu nin Nagbabagong Kinaban

“Inako niato, bakong an espiritu kan kinaban, kundi an espiritu na gikan sa Dios.”​—1 CORINTO 2:12.

1. Sa anong mga paagi nadaya si Eva?

“AN HALAS​—dinaya ako kaiyan.” (Genesis 3:13) Paagi sa nagkapirang tataramon na iyan, hiningoa kan enot na babae, si Eva, na ipaliwanag kun taano ta nagrebelde sia ki Jehova Dios. Totoo an sinabi nia, baga man dai nia iyan ikakasarahotan sa ginibo niang sala. Kan huri pinasabngan si apostol Pablo na sumurat: “[Si Eva] lubos na nadaya.” (1 Timoteo 2:14) Nadaya sia na maniwala na an sarong akto nin kasumbikalan​—an pagkakan kan ipinangalad na bunga​—mataong pakinabang sa saiya, na sia magigin arog nin Dios. Nadaya man sia manongod sa kun siisay an duminaya sa saiya. Dai nia aram na an halas ginamit sana sa pagtaram ni Satanas na Diablo.​—Genesis 3:1-6.

2. (a) Paano ilinalagalag ni Satanas an mga tawo ngonyan? (b) Ano an “espiritu kan kinaban,” asin anong mga hapot an totokaron niato ngonyan?

² Poon kan panahon ni Adan asin Eva, si Satanas padagos na nandadaya sa mga tawo. Sa katunayan, “ilinalagalag [nia] an bilog na ineerokan na daga.” (Kapahayagan 12:9) Dai nagbago an mga taktika nia. Minsan ngani dai na sia naggagamit nin literal na halas, padagos niang itinatago kun siisay sia. Paagi sa mga kabtang kan industriya nin aling-alingan, media, asin iba pang medyos, ilinalagalag ni Satanas an mga tawo na maniwala na dai ninda kaipuhan an mamomoton na paggiya nin Dios ni may pakinabang sinda dian. An kampanya nin pandadaya kan Diablo nagin dahelan na an mga tawo sa gabos na lugar nagkaigwa nin espiritu nin pagrebelde tumang sa mga ley asin prinsipyo kan Biblia. Inaapod ini kan Biblia na “espiritu kan kinaban.” (1 Corinto 2:12) An espiritung ini makosog an impluwensia sa mga paniniwala, aktitud, asin gawe-gawe kan mga dai nakakamidbid sa Dios. Paano nahahayag an espiritung iyan, asin paano niato malalabanan an nakararaot na impluwensia kaiyan? Helingon niato.

Nagrururong mga Pamantayan sa Moral

3. Taano ta paorog nang paorog na nahahayag “an espiritu kan kinaban” sa presenteng mga panahon?

³ Sa presenteng mga panahon, “an espiritu kan kinaban” paorog nang paorog na nahahayag. (2 Timoteo 3:1-5) Posibleng marhay na nariparo nindong nagrururo an mga pamantayan sa moral. Ipinaliliwanag kan Kasuratan kun taano ta  nangyayari ini. Kasunod kan pagkaestablisar kan Kahadean nin Dios kan taon 1914, nagkaigwa nin ralaban sa langit. Si Satanas asin an demonyong mga anghel nia nadaog asin iinapon sa palibot kan daga. Dahel sa kaanggotan, pinakosog ni Satanas an saiyang kampanya nin pandadaya sa bilog na globo. (Kapahayagan 12:1-9, 12, 17) Sa gabos na paaging mahihimo nia, hinihingoa nia na “ilagalag, kun sukat, minsan an mga pinili.” (Mateo 24:24) Bilang banwaan nin Dios, kita an pangenot na punteriya nia. Pinagmamaigotan niang raoton an satong espirituwalidad tanganing mawara niato an pabor ni Jehova asin an paglaom na buhay na daing katapusan.

4. Paano minamansay kan mga lingkod ni Jehova an Biblia, asin paano iyan minamansay kan kinaban?

⁴ Pinagmamaigotan ni Satanas na ibugtak sa pagduda an Biblia, an mahalagang marhay na libro na nagtotokdo sato manongod sa satong mamomoton na Kaglalang. Namomotan asin pinahahalagahan kan mga lingkod ni Jehova an Biblia. Aram niato na iyan an ipinasabong na Tataramon nin Dios, bakong tataramon nin mga tawo. (1 Tesalonica 2:13; 2 Timoteo 3:16) Minsan siring, gusto kan kinaban ni Satanas na kabaliktaran an isipon niato. Halimbawa, an introduksion nin sarong libro na nag-aatake sa Biblia nagsasabi: “Mayo nin ‘banal’ manongod sa Biblia, ni iyan ‘an tataramon nin Dios.’ An nagsurat kaiyan bakong pinasabngan nin Dios na mga santo, kundi mga padi na gustong magkamit nin kapangyarihan.” An mga napapaniwala sa siring na mga paghihingako puedeng madaling mabiktima kan salang ideya na libre sindang sumamba sa Dios sa ano man na paaging gusto ninda—o na dai na ngani sumamba sa saiya.​—Talinhaga 14:12.

5. (a) Ano an sinabi nin sarong autor mapadapit sa mga relihion na konektado sa Biblia? (b) Paano napapalaen an nagkapirang lakop na kinabanon na ideya kisa sinasabi kan Biblia? (Iiba an kahon sa sunod na pahina.)

⁵ An direkta asin indirektang mga pag-atake sa Biblia, kabale na an relihiosong pagsaginsagin kan mga naghihingakong nagsusuportar dian, nagresulta sa pagdakol kan mga habo na sa relihion, pati na sa relihion na konektado sa Biblia. Sa media nin pagbabareta asin sa mga may halangkaw na inadalan, inaatake an relihion. Sarong autor an nagkomento: “Negatibo an pagheling sa Judaismo asin Kristianismo na lakop sa popular na kultura. Sa pinakamarahay na kamugtakan, an mga iyan ibinibilang na magayon pero lihis na sa uso; sa pinakamaraot na kamugtakan, ibinibilang iyan na suanoy nang mga pananaw na nakakaolang sa intelektuwal na pagtalubo asin balakid sa sientipikong pag-oswag. Sa nakaagi pa sanang mga taon an pagmenos na ini nagin pag-olog-olog asin hayagan na pagkontra.” An pagkontrang ini sa parate naggigikan sa mga nagdedehar sa pag-eksister nin Dios asin nagin nang “daing isip sa saindang pangangatanosan.”​—Roma 1:20-22.

6. Ano an pagmansay kan kinaban dapit sa seksuwal na mga gibo na kinokondenar nin Dios?

⁶ Kun siring, bakong makangangalas na an mga tawo parayo nang parayo sa mga pamantayan nin Dios sa paggawe. Halimbawa, sinasabi kan Biblia na “bastos” an homoseksuwal na relasyon. (Roma 1:​26, 27) Sinasabi man kaiyan na an mga nakikisaro asin nagsasambay dai magmamana kan Kahadean nin Dios. (1 Corinto 6:9) Pero, sa dakol na kadagaan an seksuwal na mga gibong iyan bako sanang inaako kundi pinapagayon pa iyan sa mga libro, magasin,  kanta, pelikula, asin mga pasale sa TV. An mga nagkokontra sa siring na mga gibo ibinibilang na panatiko, mapaghusgar, asin dai naliwanagan an kaisipan. Imbes na mansayon an mga pamantayan nin Dios bilang kapahayagan nin mamomoton na pagmakolog, minamansay iyan kan kinaban bilang olang sa personal na katalingkasan asin satispaksion.​—Talinhaga 17:15; Judas 4.

7. Ano an mga maninigong ihapot niato sa satong sadiri?

⁷ Sa tahaw nin kinaban na pakosog nang pakosog an pagtumang sa Dios, madonong na siyasaton niato an satong sadiring aktitud asin mga pamantayan. Sa panapanahon, maninigo na mapagngayongayo asin sadiosan na siyasaton niato an satong sadiri tanganing seguradohon na kita dai luway-luway na nagrarayo sa kaisipan asin mga pamantayan ni Jehova. Halimbawa, puede niatong ihapot sa satong sadiri: ‘Nalilibang daw ako sa mga pinag-oolayan na linilikayan ko kaidtong nagkapirang taon na an nakaagi? Kinokonsinte ko na daw ngonyan an mga gibo na kinokondenar nin Dios? May tendensia daw ako na dai nang gayo pinakaseseryoso an espirituwal na mga bagay kisa kaidtong nakaagi? Ipinaheheling daw kan sakong pamumuhay na ineenot ko sa sakong buhay an intereses kan Kahadean?’ (Mateo 6:33) An siring na mga paghorophorop matabang sa sato na labanan an espiritu kan kinaban.

‘Dai Noarin Man Ianod’

8. Paano an saro puedeng maanod parayo ki Jehova?

⁸ Sa mga kapwa Kristiano, si apostol Pablo nagsurat: “Kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.” (Hebreo 2:1) An inaanod na barko dai makakaabot sa destinasyon kaiyan. Kun an kapitan bakong atento sa pagmangno sa doros asin sulog kan tubig, an saiyang barko tibaad pasil sanang makalampas sa ligtas na duongan asin sumadsad sa magapong gilid nin dagat. Kaagid kaiyan, kun bako kitang atento sa mahalagang marhay na mga katotoohan sa Tataramon nin Dios, tibaad pasil sana kitang ianod parayo ki Jehova asin sumadsad sa espirituwal. An pagsapar nin siring na kapahamakan dai man pirmeng nangangaipo nin biyong paghabo niato sa katotoohan. Sa katunayan, pipira sana an bigla asin tuyong minahabo ki Jehova. Mas parate, sinda luway-luway na napapalabot sa sarong bagay na nagpaparayo kan saindang atension sa Tataramon nin Dios. Haros dai naririsa na inaanod na sinda pasiring sa kasalan. Arog nin sarong kapitan na torog, huri nang marhay kun magimata an siring na mga indibiduwal.

9. Sa anong mga paagi biniyayaan ni Jehova si Salomon?

⁹ Isip-isipa an nagin buhay ni Salomon. Ipinaniwala sa saiya ni Jehova an paghade sa Israel. Tinogotan nin Dios si Salomon na itogdok an templo asin giniyahan sia na sumurat nin mga kabtang kan Biblia. Duwang beses na nakipag-olay sa saiya si Jehova asin tinawan sia nin kayamanan, kabantogan, asin matoninong na pagreynar. Orog sa gabos, biniyayaan ni Jehova si Salomon nin dakulang kadonongan. An Biblia nagsasabi: “An Dios padagos na nagtao ki Salomon nin dakulaon na kadonongan asin pakasabot asin kahiwasan nin puso, arog kan baybay na yaon sa baybayon. Asin an kadonongan ni Salomon orog na dakula kisa kadonongan kan gabos na taga Subangan asin kisa bilog na kadonongan nin Egipto.” (1 Hade 4:​21, 29, 30; 11:9) Segurado, tibaad isipon nin saro, kun may siisay man na posibleng marhay na magdadanay na fiel sa Dios, daing iba kundi si Salomon. Pero, si  Salomon inanod pasiring sa apostasiya. Paano iyan nangyari?

10. Anong instruksion an dai nasunod ni Salomon, asin ano an nagin resulta?

¹⁰ Aram asin nasabotan nin lubos ni Salomon an Ley nin Dios. Daing duwa-duwa na tinawan nia nin espesyal na interes an mga instruksion na itinao para sa mga nagin hade sa Israel. Kabilang sa mga instruksion na iyan an saro na nagsabi: “[An hade] dai man . . . maninigong magpadakol sa saiya nin agom na babae, tanganing an saiyang puso dai sumuhay.” (Deuteronomio 17:​14, 17) Apisar kan malinaw na instruksion na iyan, si Salomon nagkaigwa nin siete sientos na agom asin tres sientos na kasaroan. An dakol sa mga babaeng ini nagsasamba sa ibang mga dios. Dai niato aram kun taano ta nag-agom nin kadakol si Salomon, ni aram niato kun paano nia ipinangatanosan iyan. An aram nanggad niato iyo na dai nia nasunod an malinaw na instruksion nin Dios. An resulta iyo mismo an ipinatanid ni Jehova na mangyayari. Mababasa niato: ‘An mga agom na babae ni Salomon luway-luway na ikiniling an saiyang puso na sumunod sa ibang mga dios.’ (1 Hade 11:​3, 4) “Luway-luway”​—alagad segurado​—nawara an saiyang diosnon na kadonongan. Inanod sia. Pag-abot nin panahon, an pagmawot ni Salomon na kuyogon asin paogmahon an Dios nasalidahan kan saiyang pagmawot na paoyonan an saiyang mga agom na pagano. Kanigoan kamakamomondo, ta si Salomon an nagsurat kaidto kan mga tataramon na: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”​—Talinhaga 27:11.

Mapuersa an Espiritu kan Kinaban

11. Paano nakakaapektar sa satong kaisipan an ilinalaog niato sa satong isip?

¹¹ An halimbawa ni Salomon nagtotokdo sa sato na peligroso an mangatanosan na miling aram niato an katotoohan, dai na maaapektaran kan kinabanon na mga impluwensia an satong kaisipan. Kun paanong an pisikal na pagkakan nakakaapektar sa satong hawak, an ipinapakakan sa isip nakakaapektar man sa satong isip. An ilinalaog niato sa satong isip nakakaimpluwensia sa satong kaisipan asin aktitud. Rinerekonoser ini, an mga korporasyon naggagastos nin binilyon na dolyar taon-taon tanganing ianunsio an saindang mga produkto. An mapangganang mga anunsio naggagamit nin nakaaakit na mga tataramon asin retrato tanganing pukawon an paghimuyawot asin kapritso kan konsumidor. Aram man kan mga paraanunsio na an saro o duwang beses na pakaheling sa sarong anunsio dai parateng makakokombensir sa mga tawo na maghidaling bumakal kan produkto. Minsan siring, huli ta paorootrong naheheling iyan sa pag-agi nin panahon, sa parate nagugustohan na kan mga konsumidor an sarong produkto. Nag-aaser an pag-anunsio​—ta kun dai, mayo nin mabutas nin kuarta dian. Mapuersa an impluwensia kaiyan sa kaisipan asin aktitud kan publiko.

12. (a) Paano iniimpluwensiahan ni Satanas an kaisipan nin mga tawo? (b) Ano an nagpapaheling na puedeng maimpluwensiahan an mga Kristiano?

¹² Siring sa sarong paraanunsio, pinalalakop ni Satanas an saiyang mga ideya paagi sa pagpaluwas kaiyan na nakaaakit, sa pakaaram na sa pag-agi nin panahon madadara nia an mga tawo na umayon sa saiyang kaisipan. Paagi sa aling-alingan asin iba pang medyos, dinadaya ni Satanas an mga tawo na maniwala na an marahay maraot asin an maraot marahay. (Isaias 5:20) Maski tunay na mga Kristiano  nabiktima kan kampanya ni Satanas na pagpalakop nin salang impormasyon. An Biblia nagpapatanid: “An ipinasabong na tataramon talagang nagsasabi na sa huring mga panahon an nagkapira masuhay sa pagtubod, na nagtatao nin atension sa nakalalagalag na ipinasabong na mga tataramon asin katokdoan nin mga demonyo, paagi sa pagsaginsagin nin mga tawo na nagtataram nin putik, na tinatakan sa saindang konsensia na garo nin batbat na pantatak.”​—1 Timoteo 4:​1, 2; Jeremias 6:15.

13. Ano an maraot na pag-iriba, asin paano nakakaapektar sa sato an satong pag-iriba?

¹³ Mayo nin siisay man sa sato an bakong apektado kan espiritu kan kinaban. Mapuersa an doros asin sulog kan sistema ni Satanas. An Biblia madonong na nagsasadol sa sato: “Dai kamo palagalag. An maraot na pag-iriba nakararaot sa marahay na mga ugale.” (1 Corinto 15:33) An maraot na pag-iriba puedeng kalabot an ano man o siisay man​—dawa sa laog kan kongregasyon​—na nagpapabanaag kan espiritu kan kinaban. Kun ipapangatanosan niato na an maraot na pag-iriba dai makakadanyar sa sato, bako daw na ikokonklusyon man niato na an marahay na pag-iriba dai makatatabang sa sato? Sala nanggad iyan! Linilinaw iyan kan Biblia sa pagsabing: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.”​—Talinhaga 13:20.

14. Sa anong mga paagi niato malalabanan an espiritu kan kinaban?

¹⁴ Tanganing malabanan an espiritu kan kinaban, dapat kitang makiibaiba sa mga tawong madonong​—idtong mga naglilingkod ki Jehova. Dapat niatong panoon an satong isip nin mga bagay na nagpapakosog sa satong pagtubod. Si apostol Pablo nagsurat: “Ano man na totoo, ano man na seryosong bagay, ano man na matanos, ano man na malinig, ano man na madaling kamotan, ano man na marahay an dangog, ano man na birtud asin ano man na inoomaw, padagos na horophoropon an mga bagay na ini.” (Filipos 4:8) Bilang mga libre ahente moral, puede niatong pilion an mga bagay na hohorophoropon niato. Pirme logod niatong pilion na horophoropon an mga bagay na orog na maparani sa sato ki Jehova.

Mas Mapuersa an Espiritu nin Dios

15. Paano napalaen an mga Kristiano sa suanoy na Corinto kisa ibang mga nag-eerok sa siudad na iyan?

¹⁵ Bakong arog kan mga nalalagalag kan espiritu kan kinaban, an tunay na mga Kristiano ginigiyahan kan banal na espiritu nin Dios. Sinuratan ni Pablo an kongregasyon sa Corinto: “Inako niato, bakong an espiritu kan kinaban, kundi an espiritu na gikan sa Dios, tanganing maaraman niato an mga bagay na mabooton na itinao sa sato nin Dios.” (1 Corinto 2:12) An suanoy na Corinto sarong siudad na nasasangkuban kan espiritu kan kinaban. Sobra kainmoral an kadaklan na nag-eerok dian kaya an pananaram na “mag-ugaleng taga Corinto” nagkaigwa nin kahulogan na “maggibo nin inmoralidad.” Binuta ni Satanas an isip kan mga tawo. Bilang resulta, kakadikit an o mayo sinda nin aram manongod sa tunay na Dios. (2 Corinto 4:4) Pero, paagi sa saiyang banal na espiritu, binuksan ni Jehova an mga mata nin nagkapirang taga Corinto, na nagpangyari sa sainda na magkaigwa nin kaaraman sa katotoohan. Pinahiro asin giniyahan sinda kan saiyang espiritu na gumibo nin dakulang mga pagbabago sa saindang buhay tanganing akoon ninda an saiyang pag-oyon asin bendisyon. (1 Corinto 6:9-11) Minsan ngani makosog an espiritu kan kinaban, an espiritu ni Jehova mas makosog.

16. Paano niato maaako asin mapagdadanay an espiritu nin Dios?

¹⁶ Totoo man iyan ngonyan. An banal na espiritu ni Jehova an pinakamakosog na puersa sa uniberso, asin itinatao nia iyan nin bulaos sa gabos na naghahagad kaiyan na may pagtubod. (Lucas 11:13) Minsan siring, tanganing kamtan an espiritu nin Dios, an dapat na gibohon niato bako sanang labanan an espiritu kan kinaban. Dapat man niatong regular na pag-adalan asin iaplikar an Tataramon nin Dios sa satong buhay  tanganing an satong espiritu​—an disposisyon nin satong isip​—magin kaoyon kan saiyang kaisipan. Kun gigibohon niato iyan, paririgonon kita ni Jehova na labanan an ano man na taktika na tibaad gamiton ni Satanas tanganing raoton an satong espirituwalidad.

17. Sa anong mga paagi kita mararanga kan eksperyensia ni Lot?

¹⁷ Minsan ngani an mga Kristiano bakong kabtang kan kinaban, sinda yaon sa kinaban. (Juan 17:​11, 16) Mayo nin siisay man sa sato an makalilikay nin biyo sa espiritu kan kinaban, ta tibaad katrabaho o kaibanan pa ngani niato sa harong an mga mayo nin pagkamoot sa Dios o sa saiyang mga dalan. An pagmate daw niato arog kan ki Lot, na ‘napurisaw na gayo,’ nagsakit pa ngani, huli sa mga katampalasanan kan mga taga Sodoma na kairiba niang nag-eerok duman? (2 Pedro 2:​7, 8) Kun iyo, puede kitang maranga. Iningatan asin ilinigtas ni Jehova si Lot, asin magigibo man nia iyan sa sato. Naheheling asin naaaraman kan satong mamomoton na Ama an satong mga kamugtakan, asin puede niang itao sa sato an tabang asin kosog na kaipuhan niato tanganing mapagdanay an satong espirituwalidad. (Salmo 33:​18, 19) Kun kita magsasarig sa saiya, magtitiwala sa saiya, asin mag-aarang sa saiya, tatabangan nia kitang labanan an espiritu kan kinaban, gurano man tibaad kadepisil an satong situwasyon.​—Isaias 41:10.

18. Taano ta maninigo niatong pakamahalon an satong relasyon ki Jehova?

¹⁸ Sa sarong kinaban na siblag sa Dios, asin nadaya ni Satanas, kita bilang banwaan ni Jehova biniyayaan nin kaaraman sa katotoohan. Sa siring nakaeeksperyensia kita nin kagayagayahan asin katoninongan na mayo sa kinaban. (Isaias 57:​20, 21; Galacia 5:22) Mahal niato an makangangalas na paglaom na buhay na daing katapusan sa Paraiso, na duman mawawara na an espiritu kan naghihingagdan na kinaban na ini. Kun siring, pahalagahan logod niato an satong mahal na marhay na relasyon sa Dios asin magin alerto na itanos an ano man na tendensia na ianod sa espirituwal. Rumani kita nin orog pa ki Jehova, asin tatabangan nia kitang labanan an espiritu kan kinaban.​—Santiago 4:​7, 8.

Ikapaliliwanag daw Nindo?

• Sa anong mga paagi dinadaya asin ilinalagalag ni Satanas an mga tawo?

• Paano kita makalilikay na ianod parayo ki Jehova?

• Ano an nagpapaheling na mapuersa an espiritu kan kinaban?

• Paano niato maaako asin mapagdadanay an espiritu na gikan sa Dios?

[Mga Hapot Para sa Pag-adal]

[Tsart sa pahina 11]

KINABANON NA KADONONGAN KONTRA SA DIOSNON NA KADONONGAN

Relatibo an katotoohan​—an mga tawo an naggigibo kan sadiri nindang katotoohan.

‘An tataramon [nin Dios] katotoohan.’​—Juan 17:17.

Tanganing madeterminaran an tama asin sala, magtiwala ka sa saimong emosyon.

“Madaya an puso nin labi sa ano pa man na bagay asin desesperado.”​—Jeremias 17:9.

Gibohon mo an gusto mo.

“Bakong kapot nin tawong naglalakaw dawa an paggiya sa saiyang lakad.”​—Jeremias 10:23.

Kayamanan an liabe sa kaogmahan.

“An pagkamoot sa kuarta gamot nin gabos na klase nin nakadadanyar na bagay.”​—1 Timoteo 6:10.

[Ritrato sa pahina 10]

Inanod si Salomon parayo sa tunay na pagsamba asin suminunod sa falsong mga dios

[Ritrato sa pahina 12]

Siring sa sarong paraanunsio, pinalalakop ni Satanas an espiritu kan kinaban. Linalabanan daw nindo iyan?