Liberia—Pankahadean na Pag-oswag sa Ibong nin Guerra

AN GUERRA sibil naglakop na daing kontrol sa Liberia sa laog nin labi nang sarong dekada. Pag-abot kan kabangaan kan 2003, an mga rebelde nakipaglaban tanganing makalaog sa kabiserang siudad, an Monrovia. Dakol sa mga Saksi ni Jehova an napiritan na bayaan an saindang mga harong, na kun beses paorootro. Paorootrong hinabon an mga rogaring.

Makamomondo, durante kan paglalaban sa kabisera, rinibong tawo an nagadan. Kaiba sainda an duwang Saksi, sarong tugang na lalaki asin sarong tugang na babae. Paano inatubang kan iba pang mga tugang an kasakitan, asin ano an ginibo tanganing matabangan sinda?

Tabang Para sa mga Nangangaipo

Durante kan krisis, an sangang opisina kan Mga Saksi ni Jehova sa Liberia nag-organisar nin pag-ayuda para sa mga nangangaipo. Nagtao nin kakanon, pundamental na mga gamit sa harong, asin medikal na mga suplay. Durante kan panahon na nasa kontrol kan mga rebelde an lugar nin duongan, duminikit an suplay na kakanon. Naheling na antes pa kan sangang opisina an pangyayaring ini asin nag-andam na sinda nin mga suplay para sa duwang ribong Saksi na nagpaili sa mga Kingdom Hall sa bilog na siudad. Irinasyon kan mga tugang an kakanon kaya an mga suplay nagkaigo sagkod na an duongan mabukasan liwat. Nagpadara an mga sangang opisina sa Belhika asin Sierra Leone nin medikal na mga suplay paagi sa eroplano, asin an mga sangang opisina sa Britania asin Pransia nagpadara nin mga gubing paagi sa barko.

Sa ibong kan desesperadong kamugtakan, an satong mga tugang nagdanay na positibo asin masinggaya. An komento kan saro na duminulag sa saiyang harong nin tolong beses kapareho man kan komento kan dakol. Sia nagsabi: “Ini an mga kamugtakan na ihinuhulit niato; nabubuhay na kita sa huring mga aldaw.”

Reaksion sa Maogmang Bareta

Sa ibong kan grabeng kariribokan sa bilog na nasyon, an mga Saksi padagos na nagkakaigwa nin marahayon na mga resulta sa langtad. Nagkaigwa nin pinakahalangkaw na kabilangan kasuarin pa man na 3,879 parahayag kan Kahadean kan Enero 2003, asin kan Pebrero namayo sinda nin 15,227 pag-adal sa Biblia.

An mga tawo tolos na naghihimate sa maogmang bareta. An halimbawa kaini hale sa sarong baryo sa timog-sirangan na parte kan nasyon. Plinano kan sarong kongregasyon na iselebrar an Memorial kan kagadanan ni Cristo sa dakulang baryo nin Bewahn, mga limang oras na lakawon hale sa lugar na parate nindang pinagtitiriponan. Bago nagduman sa baryo an mga tugang tanganing imbitaran an mga tawo sa Memorial, tinawan nin imbitasyon an alkalde kan Bewahn. Kan maresibi nia iyan, kinua nia an saiyang Biblia, dinumanan an mga taga baryo, asin binasa an sarong teksto na yaon sa imbitasyon, na ineenkaminar sindang umatender sa Memorial. Kaya kan umabot an mga parahayag, naaraman ninda na an saindang gibohon ginibo na para sainda! An alkalde, kaiba an saiyang mga aki asin duwang agom, nag-atender sa Memorial. Beinte siete katawo gabos an nag-atender. Poon kaidto, an alkalde naghale na sa Iglesia  nin Metodista, nagpoon nang makipag-adal sa mga Saksi, asin nag-alok nin daga na totogdokan nin Kingdom Hall.

Pagbago nin Puso

An gawe-gawe kan satong mga tugang nagin epektibo man sa pagpabago sa opinyon manongod sa katotoohan kan nagkapirang nagtutumang. Estudyare an kaso nin sarong lalaki na an ngaran Opoku. Nanuparan sia nin sarong espesyal payunir na ministro sa paglilingkod sa langtad asin inalokan sia nin magasin na Torrengbantayan. Interesado si Opoku sa sarong artikulo sa magasin alagad mayo sia nin kuarta. Ipinaliwanag na mayo iyan nin bayad, iwinalat sa saiya kan payunir an magasin asin iinareglong dumalaw liwat. Kan magdalaw liwat, hinapot ni Opoku an payunir: “Midbid mo ako? Kadaklan sa mga kairiba mo sa banwaan nin Harper midbid ako. Dati pinapahale ko an mga aki nindo sa eskuelahan!” Dangan ipinaliwanag nia na sia an dating prinsipal sa sarong haiskul sa banwaan asin pinaglamag nia an mga aki kan mga Saksi ni Jehova huli sa dai pagsaludo sa bandera.

Minsan siring, tolong halimbawa nin Kristianong pagkamoot na ipinaheling kan mga Saksi ni Jehova an nagpangyari na siyasaton giraray ni Opoku an saiyang aktitud. Enot, naheling nia na inasikaso kan mga Saksi an sarong tugang sa espirituwal na grabe an helang. Iinareglo pa ngani ninda na ipabolong sia sa kataed na nasyon. An paghona ni Opoku an tugang na may helang sarong “dakulang tawo” sa mga Saksi alagad naaraman nia na ini ordinaryo sanang Saksi. Ikaduwa, durante kan mga taon nin 1990, si Opoku sarong dulag sa Côte d’Ivoire. Sarong aldaw kan sia mapaha, buminakal sia nin tubig sa sarong hoben na lalaki. Si Opoku may kuarta sanang papel na dakula an kantidad, asin mayong pang-uli an hoben na lalaki, kaya itinao na sana nia an tubig ki Opoku na daing bayad. Kan itao nia ki Opoku an tubig, an hoben na lalaki naghapot: “Sa paghona daw po nindo maheheling pa niato an panahon na an mga tawong arog niato magpapatinaraotao na dai na naghahagad nin kuarta?” Nagtuod si Opoku na ini saro sa Mga Saksi ni Jehova, asin kinompirmar kan hoben na lalaki na sia Saksi. Naghanga sia sa pagigin buka an palad asin kabootan kan tugang na ini. Sa katapustapusi, an pagigin andam kan espesyal payunir na itao an magasin na daing bayad nakakombensir ki Opoku na an saiyang opinyon sa mga Saksi sala asin na kaipuhan niang magbago. Sia uminoswag sa espirituwal asin saro na ngonyan na dai pa bautisadong parahayag.

Minsan ngani an mga tugang sa Liberia padagos na napapaatubang sa grabe kadepisil na mga kamugtakan, nagtitiwala sinda sa Dios asin fiel na ibinabalangibog an maogmang bareta mapadapit sa mas marahay na mga kamugtakan sa irarom kan matanos na pamamahala kan Kahadean nin Dios. Dai noarin man lilingawan ni Jehova an saindang kahigosan asin pagkamoot na ipinaheheling ninda para sa saiyang ngaran.​—Hebreo 6:10.

[Mga Mapa sa pahina 30]

(Para sa aktuwal na format, helingon an publikasyon)

MONROVIA

[Mga Ritrato sa pahina 31]

Durante nin mga panahon nin krisis, an banwaan ni Jehova nagtatao nin espirituwal asin pisikal na tabang sa mga nangangaipo