Pakamidbid sa Mabangis na Hayop Asin sa Tanda Kaiyan

GUSTO daw nindo an pagresolber sa sarong misteryo? Tanganing magibo iyan, naghahanap kamo nin mga giya na matabang saindo na makua an solusyon. Sa saiyang ipinasabong na Tataramon, itinao nin Dios an kinakaipuhan na mga giya mapadapit sa numerong 666, an ngaran, o tanda, kan mabangis na hayop sa Kapahayagan kapitulo 13.

Sa artikulong ini, sisiyasaton niato an apat na pangenot na pangangatanosan​—mahalagang marhay na mga giya​—na mahayag kan kahulogan kan tanda kan hayop. Eestudyaran niato (1) kun paano pinipili kun beses an mga ngaran sa Biblia, (2) an midbidan kan mabangis na hayop, (3) kun ano an kahulogan kan 666 bilang “numero nin tawo,” asin (4) an kahulogan kan numerong 6 asin kun taano ta isinurat iyan nin tolong beses, iyo na ngani, an 600 na dinagdagan nin 60 na dinagdagan nin 6, o 666.​—Kapahayagan 13:18.

Mga Ngaran sa Biblia​—Bakong Basta mga Apod Sana

An mga ngaran sa Biblia parateng may espesyal na kahulogan, partikularmente kun itinao iyan nin Dios. Halimbawa, huli ta si Abram an magigin ama nin mga nasyon, sinanglian nin Dios an ngaran kan patriarka na magin Abraham, na nangangahulogan “Ama nin Kaburunyogan.” (Genesis 17:​5, nota sa ibaba) Sinabihan nin Dios si Jose asin Maria na apodon na Jesus an magigin aki ni Maria, na nangangahulogan “Si Jehova an Kaligtasan.” (Mateo 1:​21, nota sa ibaba; Lucas 1:31) Kaoyon kan makahulogan na ngaran na iyan, paagi sa ministeryo asin kagadanan ni Jesus bilang atang, ginibong posible ni Jehova an satong kaligtasan.​—Juan 3:16.

Huli kaiyan, an itinao nin Dios na numerong ngaran na 666 seguradong nagsisimbolisar sa ibinibilang nin Dios na nagpapamidbid na mga karakteristiko kan hayop. Naturalmente, tanganing masabotan an mga karakteristikong iyan, kaipuhan niatong mamidbid an hayop mismo asin aramon an mga aktibidad kaiyan.

Namidbid an Hayop

An libro sa Biblia na Daniel nagtatao nin dakol na impormasyon manongod sa kahulogan kan simbolikong mga hayop. An kapitulo 7 may malinaw na deskripsion kan “apat na darakulaon na hayop”​—sarong leon, sarong oso, sarong leopardo, asin sarong makatatakot na hayop na may darakulang ngipon na batbat. (Daniel 7:2-7) Sinasabi sa sato ni Daniel na an mga hayop na ini nagrerepresentar sa mga “hade,” o politikal na mga kahadean, na namahala nin magkakasunod sa mahiwason na mga imperyo.​—Daniel 7:​17, 23.

Mapadapit sa hayop sa Kapahayagan 13:​1, 2, an The Interpreter’s Dictionary of the Bible nagsasabi na iyan “igwa kan pinagsararong mga karakteristiko kan apat na hayop sa bisyon ni Daniel . . . Huli kaiyan, an enot na hayop na ini [kan Kapahayagan] nagrerepresentar sa pinagsararong mga puersa kan gabos na politikal na pamamahala na tumang sa Dios sa kinaban.” An komentong ini kinompirmar kan Kapahayagan 13:​7, na nagsasabi manongod sa hayop: “Itinao dian an autoridad sa lambang tribo asin banwaan asin tataramon patin nasyon.” *

Taano ta ginagamit kan Biblia an mga hayop bilang mga simbolo kan pamamahala nin tawo? Huli sa kisuerra duwang dahelan. Enot, huli sa garo sa hayop na rekord nin pagpabolos nin dugo na nakomiter kan mga gobyerno sa nag-aging mga siglo.  “An guerra saro sa mga dai nahahale sa kasaysayan,” an isinurat kan mga historyador na si Will asin Ariel Durant, “asin dai nainaan kan pagkaigwa nin sibilisasyon o demokrasya.” Totoo nanggad na “an tawo nagsakop sa tawo sa saiyang ikararaot”! (Eclesiastes 8:9) An ikaduwang dahelan iyo na “an dragon [si Satanas] nagtao sa hayop kan kapangyarihan kaiyan asin kan trono kaiyan patin dakulang autoridad.” (Kapahayagan 12:9; 13:2) Oyon dian, an pamamahala nin tawo gibo kan Diablo, sa siring nagpapabanaag kan saiyang garo sa hayop asin garo sa dragon na ugale.​—Juan 8:44; Efeso 6:12.

Minsan siring, dai ini nangangahulogan na an lambang namamahalang tawo direktang instrumento ni Satanas. Sa katunayan, sa sarong parte, an mga gobyerno nin tawo naglilingkod bilang “ministro nin Dios,” na nagtatao nin estabilidad sa sosyedad nin tawo, na kun mayo iyan mangingibabaw an kariribokan. Asin may mga namomoon na prinotehiran an pundamental na mga deretso nin tawo, kaiba an deretsong isagibo an tunay na pagsamba​—na sarong bagay na habo ni Satanas. (Roma 13:​3, 4; Esdras 7:11-27; Gibo 13:7) Pero, huli sa impluwensia kan Diablo, mayo nin tawo o institusyon nin tawo na nakapagtao noarin man nin nagdadanay na katoninongan asin katiwasayan sa mga tawo. *​—Juan 12:31.

“Numero nin Tawo”

An ikatolong giya sa kahulogan kan 666 iyo an bagay na iyan inaapod na “numero nin tawo.” An pananaram na ini dai puedeng nanonongod sa sarong indibiduwal na tawo, huli ta si Satanas​—bakong siisay man na tawo​—an may autoridad sa hayop. (Lucas 4:​5, 6; 1 Juan 5:19; Kapahayagan 13:​2, 18) Imbes, an pagkaigwa kan hayop nin “numero [o tanda] nin tawo” nagsusuherir nin pagigin tawo kaiyan, bakong espiritu o demonyo, asin kun siring nagpapaheling iyan nin nagkapirang karakteristiko nin tawo. Ano daw an mga karakteristikong iyan? An Biblia minasimbag, na nagsasabi: “An gabos [na tawo] nagkasala asin nagkulang sa kamurawayan nin Dios.” (Roma 3:23) Kun siring, an pagkaigwa kan hayop nin “numero nin tawo” nagpaparisa na an mga gobyerno nagpapabanaag kan makasalan na kamugtakan nin tawo, an tanda nin kasalan asin pagkabakong sangkap.

Pinatutunayan ini kan kasaysayan. “An lambang sibilisasyon na nag-eksister buminagsak sa katapustapusi,” an sabi kan dating Sekretaryo nin Estado kan E.U. na si Henry Kissinger. “An kasaysayan sarong estorya nin mga paghihingoa na nasudya, nin mga kamawotan na dai naotob . . . Kaya, bilang sarong historyador, kaipuhan na akoon nin saro an pagigin dai malilikayan nin trahedya.” Pinatototoohan kan onestong ebalwasyon ni Kissinger an pundamental na katotoohan na ini sa Biblia: “Bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.”​—Jeremias 10:23.

Ngonyan na namidbid na niato an hayop asin  namansayan kun ano an pagheling dian nin Dios, yaon na kita sa kamugtakan na siyasaton an pangultimong kabtang kan satong misteryo​—an numerong anom asin kun taano ta isinurat iyan nin tolong beses​—an boot sabihon, 666, o 600 na dinagdagan nin 60 na dinagdagan nin 6.

Anom na Inotro nin Tolong Beses​—Taano?

Sa Kasuratan, an nagkapirang numero may simbolikong kahulogan. Halimbawa, an numerong pito sa parate ginagamit tanganing magsimbolisar sa sarong bagay na lubos, o sangkap, sa pagheling nin Dios. Halimbawa, an semana nin paglalang nin Dios kompuesto nin pitong ‘aldaw,’ o ekstendidong mga peryodo nin panahon, na durante kaiyan lubos na tinapos nin Dios an saiyang katuyohan nin paglalang kun dapit sa daga. (Genesis 1:3–​2:3) An “mga tataramon” nin Dios siring sa pirak na “pinalinaw nin makapitong beses,” na sa siring sangkap an pagkadalisay. (Salmo 12:6; Talinhaga 30:​5, 6) Sinabihan an daoton na si Naaman na magkarigos nin pitong beses sa Salog nin Jordan, na pagkatapos kaiyan sia lubos na naomayan.​—2 Hade 5:​10, 14.

An anom kulang nin saro tanganing magin pito. Bako daw na angay iyan na magin simbolo nin sarong bagay na bakong sangkap, o may depekto, sa pagheling nin Dios? Iyo nanggad! (1 Cronica 20:​6, 7) Apuera dian, an anom na inotro nin tolong beses, na 666, mapuersang nagdodoon kan pagkabakong sangkap na iyan. An nagpapatunay na ini an tamang pakasabot iyo an bagay na an 666 “numero nin tawo,” siring kan tinokar na niato. Huli kaini, an rekord kan hayop, an “numero nin tawo” kaiyan, asin an numerong 666 mismo gabos nagtotokdo sa sasarong malinaw na konklusyon​—grabeng pagkukulang asin pagkasudya sa pagheling ni Jehova.

An paglaladawan sa mga pagkukulang kan hayop nagpapagirumdom kan sinabi manongod ki Hadeng Belsasar kan suanoy na Babilonya. Paagi ki Daniel, sinabi ni Jehova sa namamahalang iyan: “Tinimbang ka sa timbangan asin nakua kang kulang.” Kan banggi mismong idto ginadan si Belsasar, asin an poderosong Imperyo nin Babilonya buminagsak. (Daniel 5:​27, 30) Kaagid kaiyan, an paghokom nin Dios sa politikal na hayop asin sa mga may tanda kaiyan nangangahulogan kan katapusan kan hayop na iyan asin kan mga parasuportar dian. Minsan siring, sa pangyayaring ini an popohoon nin Dios bako sanang sarong politikal na sistema kundi gabos na gira kan pamamahala nin tawo. (Daniel 2:44; Kapahayagan 19:​19, 20) Kun siring, mahalaga nanggad na likayan niato na magkaigwa kan nakagagadan na tanda kan hayop!

Namidbid an Tanda

Tolos-tolos pagkatapos na ihayag an numerong 666, sinambit kan Kapahayagan an 144,000 na parasunod kan Kordero, si Jesu-Cristo, na igwa kan saiyang ngaran asin kan ngaran kan saiyang Ama, si Jehova, na nasusurat sa saindang angog. An mga ngaran na ini nagpapamidbid sa mga igwa kaiyan na sinda rogaring ni Jehova asin kan saiyang Aki, na manongod sa sainda sinda may pag-orgolyong nagpapatotoo. Siring man, ipinapahayag kan mga igwa kan tanda kan hayop na sinda oripon  kan hayop. Huli kaini, an tanda, baga man sa toong kamot o sa angog, sa piguratibong pagtaram, sarong simbolo na nagpapamidbid sa igwa kaiyan bilang saro na nagtatao nin may pagsambang pagsuportar sa garo hayop na politikal na mga sistema kan kinaban. An mga igwa kan tanda nagtatao ki “Cesar” kan angay sanang itao sa Dios. (Lucas 20:25; Kapahayagan 13:​4, 8; 14:1) Paano? Paagi sa pagtao nin may pagsambang onra sa politikal na estado, sa mga simbolo kaiyan, asin sa puersa militar kaiyan, na iyong inaasahan ninda na matao nin paglaom asin kaligtasan. An ano man na pagsambang itinatao ninda sa tunay na Dios sagkod sana sa tataramon.

Sa kabaliktaran, an Biblia nagsasadol sa sato: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan. An saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.” (Salmo 146:​3, 4) An mga naghihimate sa madonong na hatol na iyan dai nadedesganar kun dai naootob kan mga gobyerno an saindang mga panuga o kun an may karismang mga namomoon mawara sa prominenteng posisyon.​—Talinhaga 1:33.

Dai ini nangangahulogan na an tunay na mga Kristiano nagheheling na sana na daing ginigibo manongod sa mamondong kamugtakan nin katawohan. Sa kabaliktaran, aktibo nindang ibinabalangibog an sarong gobyerno na maresolber sa mga problema nin katawohan​—an Kahadean nin Dios, na irinerepresentar ninda.​—Mateo 24:14.

An Kahadean nin Dios​—An Solamenteng Paglaom nin Katawohan

Kan yaon sa daga, ginibo ni Jesus na pangenot na tema kan saiyang paghuhulit an Kahadean nin Dios. (Lucas 4:43) Sa saiyang modelong pamibi, na kun beses inaapod na Pamibi kan Kagurangnan, tinokdoan ni Jesus an saiyang mga parasunod na ipamibi na dumatong logod an Kahadean na iyan asin na gibohon logod an boot nin Dios digdi sa daga. (Mateo 6:​9, 10) An Kahadean sarong gobyerno na mamamahala sa bilog na daga, bakong hale sa sarong daganon na kabisera, kundi gikan sa langit. Huli kaini, inapod iyan ni Jesus na “an kahadean kan kalangitan.”​—Mateo 11:12.

Siisay pa an mas angay na magin Hade kan Kahadean na iyan kisa ki Jesu-Cristo, an saro na nagadan para sa magigin mga sakop nia? (Isaias 9:​6, 7; Juan 3:16) Dai mahahaloy an sangkap na Namamahalang ini, na sarong makakamhan na espiritung persona na ngonyan, iaapon an hayop, an mga hade kaiyan, asin an mga hukbo kaiyan sa “danaw nin kalayo na naglalaad nin asupre,” sarong simbolo nin lubos na pagkalaglag. Alagad bako sana iyan. Hahaleon man ni Jesus si Satanas, bagay na dai noarin man magigibo nin siisay man na tawo.​—Kapahayagan 11:15; 19:​16, 19-21; 20:2, 10.

An Kahadean nin Dios matao nin katoninongan sa gabos na makinuyog na sakop kaiyan. (Salmo 37:​11, 29; 46:​8, 9) Pati an pagmondo, kolog, asin kagadanan mawawara na. Abaa kamamuraway na esperansa para sa nagdadanay na mayong tanda kan hayop!​—Kapahayagan 21:​3, 4.

[Mga Nota sa Ibaba]

[Kahon sa pahina 5]

Mga Giya sa Kahulogan kan 666

1. An mga ngaran sa Biblia sa parate may sinasabi manongod sa mga karakteristiko o buhay kan may ngaran kaiyan, arog sa kaso ni Abraham, Jesus, asin dakol pang iba. Kaagid kaiyan, an numerong ngaran kan hayop nagsisimbolisar sa mga karakteristiko kaiyan.

2. Sa libro sa Biblia na Daniel, an manlaenlaen na hayop nagrerepresentar sa magkakasunod na mga kahadean, o imperyo, nin tawo. An hayop na kompuesto nin laen-laen na kabtang sa Kapahayagan 13:​1, 2 nagsisimbolisar sa pambilog na kinaban na politikal na sistema, na tinawan nin kapangyarihan asin kontrolado ni Satanas.

3. An pagkaigwa kan hayop nin “numero nin tawo” nagpaparisa nin pagigin tawo kaiyan, bakong demonyo. Huli kaini, ipinababanaag kaiyan an mga depekto nin tawo na resulta nin kasalan asin pagkabakong sangkap.

4. Sa pagheling nin Dios, an numerong anom, na kulang sa lubos, o sangkap, na pito segun sa Biblia, nangangahulogan nin pagkabakong sangkap. An tanda na 666 idinodoon an kakulangan na iyan paagi sa tolong beses na pag-otro kan numero.

[Mga Ritrato sa pahina 6]

An pamamahala nin tawo dai nagin mapanggana, na angay na isinisimbolo kan numerong 666

[Credit Line]

Nagugutom na aki: UNITED NATIONS/​Rinetrato ni F. GRIFFING

[Mga Ritrato sa pahina 7]

Si Jesu-Cristo matao nin sangkap na pamamahala sa daga