Ginigibo daw an Kabotan nin Dios?

“Gibohon logod an boot mo, kun paano sa langit, siring man sa daga.”—Mateo 6:10.

SI Julio asin Christina grabe an pagkatakot na maheling an apat sa saindang mga aki na masolo sagkod na magadan. An nakaparadang kotse ninda binangga nin sarong burat na nagmamaneho, asin puminutok iyan na nagkakalayo. An ikalimang aki, si Marcos, ikinasalbar sa kalayo, alagad nasolo an saiyang hawak asin permanenteng rinaot an saiyang itsura. Sia nuebe anyos. An saiyang ama nagmomondo nin makuri. Rinanga nia an saiyang sadiri asin an saiyang pamilya paagi sa mga tataramon na: “Kabotan ini nin Dios, kaipuhan na saboton niato iyan, magin marahay, maraot, o ano pa man iyan.”

Sa atubangan nin sarong makaturotristeng pangyayari na arog kaini, dakol an may siring kaiyan na reaksion. ‘Kun an Dios makapangyarihan sa gabos asin may pagmakolog sa sato,’ an pangangatanosan ninda, ‘an nangyari seguradong minsan paano para sa ikakarahay niato, dawa depisil na masabotan iyan.’ Minaoyon daw kamo?

An opinyon na kabotan nin Dios an ano man na nangyayari, marahay man o maraot, sa parate ibinabasar sa mga tataramon ni Jesus sa inaapod na Pamibi kan Kagurangnan, na kinotar sa enotan. An kabotan nin Dios ginigibo na sa langit, bako daw? Sa pagpamibi na ‘Gibohon logod an boot mo digdi sa daga,’ bako daw na minaoyon kita na an nangyayari sa daga kabotan nin Dios?

Dakol an dai segurado sa punto de vistang ini. Para sa sainda, ilinaladawan kaiyan an Dios bilang daing labot sa pagmate kan saiyang linalang na mga tawo. ‘Paano gugustohon nin sarong mamomoton na Dios na mangyari sa inosenteng mga tawo an bagay na makatatakot?’ an hapot ninda. ‘Kun gusto nin Dios na magkaleksion kita, ano bayang leksion an dapat niatong manodan?’ Tibaad iyan man an saboot nindo.

Mapadapit digdi, an tugang sa ina ni Jesus, si disipulo Santiago, nagsurat: “Kun binabalo, dai nin siisay man na magsabi: ‘Binabalo ako nin Dios.’ Huli ta paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Bako an Dios an gikanan nin maraot. Kun siring, malinaw na bakong gabos na nangyayari sa daga ngonyan kabotan nin Dios. An Kasuratan nagtataram man manongod sa kabotan nin tawo, kabotan nin mga nasyon, asin dawa kabotan kan Diablo. (Juan 1:13; 2 Timoteo 2:26; 1 Pedro 4:3) Minaoyon daw kamo na an nangyari sa pamilya ni Julio asin Christina dai puedeng magin kabotan nin sarong mamomoton na langitnon na Ama?

Kaya, ano talaga an gustong sabihon ni Jesus kan tokdoan nia an saiyang mga disipulo na mamibi: ‘Gibohon logod an boot mo’? Iyan daw kahagadan sana sa Dios na mag-interbenir sa partikular na mga kamugtakan, o tinotokdoan daw kita ni Jesus na ipamibi an manongod sa sarong bagay na mas importante asin mas marahay, sarong pagbabago na malalaoman kan gabos? Siyasaton niato nin dugang pa kun ano an sinasabi kan Biblia.

[Picture Credit Lines sa pahina 3]

Kotse: Dominique Faget-STF/​AFP/​Getty Images; aki: Retrato kan FAO/​B. Imevbore