Impormal na Paghuhulit sa Langtad nin Mejico na Ingles an Tataramon

INAAPROBETSARAN an panahon sa paghalat sa saiyang mga kaiba sa pagbiahe sa Atenas, si apostol Pablo naggibo nin impormal na paghuhulit. An Biblia nagbabareta: “Sia nagpoon na makipangatanosan . . . aroaldaw sa sadan sa mga nasusumpongan nia.” (Gibo 17:17) Sa saiyang biahe hale sa Judea pasiring sa Galilea, si Jesus naghulit sa impormal na paagi sa sarong Samaritana sa may bubon. (Juan 4:3-26) Inaaprobetsaran daw nindo an lambang oportunidad na magtaram manongod sa maogmang bareta kan Kahadean nin Dios?

An langtad sa Mejico na Ingles an tataramon espesyalmenteng angay sa impormal na paghuhulit. An mga turista nagpapasyar sa mga parigosan, pirmeng may bagong mga estudyante sa unibersidad, asin an nagretiro nang mga dayo sa Mejico parateng nagduduman sa mga parke asin restawran. An dakol na Saksi ni Jehova na tataong mag-Ingles nagin tuodan na sa pagpoon nin mga pakikipag-olay sa mga siring. Sa katunayan, listo nanggad sinda na makipag-olay sa siisay man na garo baga dayo o nagtataram nin Ingles. Helingon niato kun paano ninda iyan ginigibo.

Sa parate an mga naggikan sa ibang nasyon na naglilingkod sa langtad na Ingles an tataramon nagpapamidbid sana kan saindang sadiri sa risang mga dayo asin naghahapot kun saen sinda hale. Rasonable sanang sundan ini kan hapot na ano an ginigibo kan Saksi sa Mejico asin nagtatao sa saiya kan oportunidad na ihiras an Kristianong mga paniniwala. Halimbawa, nanompongan ni Gloria, na naglilingkod kun saen dakula an pangangaipo sa langtad na Ingles an tataramon sa Oaxaca, na nangorognang madaling ponan an mga pag-orolay sa siring na paagi. Mantang papuli hale sa impormal na paghuhulit sa plasa, si Gloria dinolok nin sarong mag-agom na hale sa Inglaterra. Nagkagsing an babae: “Dai ako makapaniwala na makaheling nin negra na naglalakaw sa mga tinampo digdi sa Oaxaca!” Imbes na maanggot, si Gloria nagngisi, asin nagpoon sindang mag-estoryahan kun taano ta yaon sia sa Mejico. Inimbitaran kan babae si Gloria sa harong kaini tanganing magkape. Pakatapos na mag-olay na magtagbuan, nag-alok si Gloria nin mga magasin na Torrengbantayan asin Awake!, alagad nagsayuma an babae, na nagsasabi na ateista sia. Si Gloria nagsimbag na ikinaoogma niang makipag-olay sa mga ateista asin gustong madangog an saiyang opinyon sa artikulong “Mga Lugar nin Pagsamba​—Kaipuhan daw Niato Iyan?” Inako ini kan babae, na sinasabi: “Kun makokombensir mo ako, pambihira nanggad iyan.” Nagkaigwa pa nin nagkapirang interesanteng pag-orolay mantang nagkakape. Sa huri nagpuli na sa Inglaterra an mag-agom, alagad an pag-orolay nagpadagos paagi sa electronic mail.

Si Gloria nagpoon man na makipag-olay ki Saron, sarong estudyante sa Washington, D.C., na nasa Oaxaca para sa boluntaryong gibohon may labot sa tubong mga babae  tanganing makompleto nia an saiyang pagmaster. Pakatapos na komendaran si Saron huli sa saiyang mga paghihingoa, ipinaliwanag ni Gloria kun taano ta yaon sia sa Mejico. Nagresulta ini sa marahayrahay na pag-orolay manongod sa Biblia asin kun ano an gigibohon nin Dios bako sanang para sa mga dukha kundi para sa gabos. Sinabi ni Saron na kabaliktaran ini sa linalaoman nia na minsan ngani mayo pa lamang siang nakaolay na mga Saksi sa Estados Unidos, an saro sa mga tawo na enot niang nakaolay sa Mejico saro sa Mga Saksi ni Jehova! Si Saron nag-ako nin pag-adal sa Biblia asin nagpoon tolos na umatender sa Kristianong mga pagtiripon.

An dakol na taga ibang nasyon nagbalyo sa mga parigosan na baybayon sa Mejico, sa pagmawot nin paraisong kamugtakan. Ini an ginagamit ni Laurel tanganing ponan an mga pag-orolay sa Acapulco, na hinahapot an mga tawo kun an Acapulco mas garo paraiso kisa lugar na pinaghalean ninda asin kun ano an nagugustohan ninda manongod dian. Dangan ipinaliliwanag nia na sa dai na mahahaloy an bilog na daga magigin tunay na paraiso. An paaging ini na ginamit nia sa sarong babaeng taga Canada na nakanuparan nia sa sarong opisina nin beterinaryo nagbunga nin sarong pag-adal sa Biblia. Puede daw na magin epektibo sa lugar na ineerokan nindo an kaagid na paagi?

‘Sa mga Lansangan Asin Plasa’

Sa parate an pakikipag-olay napoponan sa mga tinampo asin plasa paagi sa paghapot: “Nakakataram kamo nin Ingles?” An dakol na Mejicano nagtataram nin Ingles huli sa saindang propesyon o huli ta nakaistar na sinda sa Estados Unidos.

Dinolok nin mag-agom na Saksi an sarong may edad nang babae na nasa silyang de rueda na binubusol nin sarong nars. Hinapot ninda an babae kun ini nakakataram nin Ingles. Nagsimbag ini nin iyo huli ta sia nag-istar kaidto nin dakol na taon sa Estados Unidos. Inako nia An Torrengbantayan asin Awake!, na dai pa nia nabasa kasuarin man, asin sinabi nia sa sainda an saiyang ngaran, Consuelo, asin an saiyang adres. Kan sumongko sa saiyang adres pakalihis nin apat na aldaw, naaraman ninda na idto palan klinika sa pag-ataman sa mga gurang asin may helang na pinamamahalaan nin mga madreng Katoliko. Kan primero, masakit kontakon si Consuelo huli ta suspetsoso an mga madre asin sinabi na dai sinda puedeng estimaron ni Consuelo. Nakiolay an mag-agom na paaramon si Consuelo na yaon sinda duman asin gusto siang kumustahon. Pinadagos ni Consuelo an mag-agom. Poon kaidto, an 86 anyos na babaeng ini nagkaigwa nin regular na pag-adal sa Biblia, sa ibong kan negatibong mga komento kan mga madre. Nakaatender na man sia sa nagkapirang Kristianong pagtiripon.

An Talinhaga 1:20 nagsasabi: “An tunay na kadonongan mismo padagos na nagkukurahaw sa lansangan. Sa mga plasa iyan padagos na nagpapaluwas kan tingog kaiyan.” Mangnoha kun paano iyan nangyari sa plasa kan San Miguel de Allende. Sarong amay na aga, dinolok ni Ralph an sarong medyo may edad nang lalaki na nagtutukaw sa sarong bangko. Nasorpresang marhay an lalaki na inalokan ini nin An Torrengbantayan asin Awake! asin iinestorya ki Ralph an saiyang buhay-buhay.

Sia beterano sa Vietnam na bilang resulta kan emosyonal na tension huli sa pakaheling nin kadakol na nagagadan nagka-nervous breakdown durante kan saiyang serbisyo militar. Ibinalyo sia hale sa prontera pasiring sa kampo. Duman, inasignaran siang maghugas kan bangkay kan mga soldados bilang preparasyon sa pagpadara sa sainda sa Estados Unidos. Ngonyan, pakalihis nin 30 taon, pirme pa man giraray siang nagkakaigwa nin  pangum-um asin grabeng takot. Kan agang idto, mantang nagtutukaw sa plasa, sia silensiong namimibi para sa tabang.

Inako kan beterano an babasahon saka an imbitasyon sa Kingdom Hall. Pakatapos na atenderan an pagtiripon, sinabi nia na durante kan duwang oras na idto sa Kingdom Hall, naeksperyensiahan nia sa kaenot-enote an katoninongan sa laog nin 30 taon. An lalaking ini duwang semana sana sa San Miguel de Allende, alagad naogma sia na magkaigwa nin nagkapirang pag-adal sa Biblia asin inatenderan an gabos na pagtiripon sagkod na puminuli sia. Naggibo nin mga areglo tanganing ikapadagos an saiyang pag-adal.

Impormal na Paghuhulit sa Trabaho Asin sa Eskuelahan

Ipinamimidbid daw nindo an saindong sadiri sa saindong pinagtatrabawohan bilang saro sa Mga Saksi ni Jehova? Ginigibo iyan ni Adrian, na nagpapabakal nin mga apartment na bakasyonan sa Cape San Lucas. Bilang resulta, isinaysay kan saiyang katrabaho na si Judy: “Kaidto sanang tolong taon an nakaagi, kun may magsabi sa sako na ako magigin saro sa Mga Saksi ni Jehova, sinabi ko kutana, ‘Nungka!’ Alagad nagdesisyon ako na gusto kong basahon an Biblia. Sa isip ko, ‘Madali sana iyan, ta mahilig akong magbasa?’ Bueno, mga anom na pahina pa sana ngani idto narealisar ko na kaipuhan ko nin tabang. An naiisip ko sana kaidto iyo an sarong katrabaho na Adrian an ngaran. Gusto kong kaolayon sia huli ta sia sana an tawo na talagang disente duman.” Nag-alok tolos si Adrian na dumalaw kaiba an saiyang nobya, si Katie, asin simbagon an gabos na hapot ni Judy. Pinonan ni Katie an sarong pag-adal sa Biblia sa saiya, asin dai nahaloy si Judy nagin sarong bautisadong Saksi.

Kumusta man an impormal na paghuhulit sa eskuelahan? Duwang Saksi an naglalaog sa klase sa Kastila sa unibersidad alagad sarong aldaw nagpalta sinda tanganing atenderan an sarong Kristianong asamblea. Kan sinda bumalik sa klase, hinagad sa sainda na isaysay sa Kastila an ginibo ninda. Inaprobetsaran ninda an oportunidad na magpatotoo sa pinakamarahay na magigibo ninda sa Kastila. An maestra, si Silvia, interesadong marhay sa hula sa Biblia. Nag-ako sia nin pag-adal sa Biblia sa Ingles asin ngonyan saro nang parahayag kan maogmang bareta. An nagkapirang miembro kan saiyang pamilya nag-aadal na man. Si Silvia nagsasabi: “Nanompongan ko an sakong hinahanap sa bilog kong buhay.” Iyo, an impormal na paghuhulit puedeng magbunga nin marahay na mga resulta.

Pag-aprobetsar sa Iba Pang mga Oportunidad

An pagigin mapag-istimar puedeng magresulta sa pagpapatotoo. Nanompongan ni Jim asin Gail, na naglilingkod sa San Carlos, Sonora, na totoo iyan. Sarong babae na ipinapasyar an saiyang mga ayam kan alas 6:00 n.a. an nagpondo tanganing pagmasdan na may paghanga an saindang natad. Inimbitaran sia ni Jim asin Gail na magdagos para magkape. Sa kaenot-enote sa laog nin 60 taon, nakadangog sia manongod ki Jehova asin sa esperansang mabuhay na daing katapusan. Naponan an sarong pag-adal sa Biblia.

Si Adrienne maboot man na tinatratar an mga estranghero. Nagkakakan sia kaidto sa sarong restawran sa Cancún kan may nagdolok na solterito  asin naghapot kun sia hale sa Canada. Kan sabihon niang iyo, ipinaliwanag kan solterito na sia asin an saiyang ina naghihingoang tabangan an saiyang tugang na babae sa pag-andam nin report sa eskuelahan manongod sa mga taga Canada. An ina, na nagtataram nin Ingles, nagrani. Pakatapos na mapasensiang simbagon an saiyang mga hapot manongod sa mga taga Canada, si Adrienne nagsabi: “Alagad may mahalagang dahelan nanggad kun taano ta nagdigdi ako hale sa Canada​—tanganing tabangan an mga tawo na makanood manongod sa Biblia. Interesado daw kamo dian?” Nagsimbag an babae na interesado sia. Binayaan nia an saiyang iglesia sampulong taon na an nakaagi asin naghingoang pag-adalan an Biblia nin solo. Itinao nia ki Adrienne an saiyang adres asin numero nin telepono, asin naponan an sarong nakakokontentong pag-adal sa Biblia.

‘Idaklag Mo an Saimong Tinapay sa Ibabaw kan Katubigan’

An pagtaram manongod sa katotoohan sa Biblia sa gabos na panahon sa parate minaresulta sa pagtao nin patotoo sa mga tawo na kadikit an o mayo nin oportunidad na madangog an mensahe kan Kahadean. Sa sarong sibot na kapehan sa banwaan na may duongan nin Zihuatanejo, inimbitaran nin sarong Saksi an duwang dayo na tumaed sa saiya sa saiyang lamesa, mantang pano an kapehan. An mag-agom na ini pitong taon nang naglalayag sa laen-laen na lugar. Nagpahayag sinda nin negatibong saboot manongod sa Mga Saksi ni Jehova. Pakatapos kan pagkanuparan sa kapehan, dinalaw kan Saksi an mag-agom sa saindang baroto asin inimbitaran sinda sa saiyang harong. Inako ninda an labing 20 magasin asin 5 libro patin nanuga na kokontakon ninda an mga Saksi sa sunod nindang duduongan.

Nariparo ni Jeff asin Deb an sarong pamilya na may magayon na omboy na babae sa sarong pampublikong kakanan sa sarong sentrong pamakalan sa Cancún. Kan sinda nagkomento manongod sa omboy, inimbitaran sinda kan mga magurang kaini na ibanan sinda sa pagkakan nin pizza. Taga India palan an pamilyang ini. Dai pa ninda nadangog kasuarin man an manongod sa Mga Saksi ni Jehova, ni nakaheling man kan satong babasahon. Naghale sinda sa sentrong pamakalan na dara an nagkapirang publikasyon kan mga Saksi.

Kaagid kaiyan an nangyari sa sarong isla sa may baybayon nin Yucatan. An sarong bagong kasalon na Intsik nakiolay ki Jeff na kuanan sinda nin retrato, na maogma niang ginibo. Naaraman nia na minsan ngani nag-erok sinda sa Estados Unidos sa nakaaging 12 taon, mayo pa lamang sindang naheling na o nadangog manongod sa Mga Saksi ni Jehova! Nagkaigwa nin maogmang pag-orolay. Inenkaminar sinda ni Jeff na kontakon an mga Saksi pagpuli ninda.

Tibaad may espesyal na pangyayari sa saindong lugar na puedeng magtao nin oportunidad na impormal na makapaghulit. Kan an presidente kan Estados Unidos nagdatong tanganing bisitahon an presidente kan Mejico sa saiyang rantso na harani sa Guanajuato, an mga reporter hale sa laen-laen na kabtang kan kinaban nagreport kan pangyayari. Nagdesisyon an sarong pamilyang Saksi na aprobetsaran an oportunidad na ini na maghulit sa Ingles. Nagkaigwa nin paborableng reaksion. Halimbawa, an sarong reporter nagreport kan nagkapirang guerra, siring kan sa Kosovo asin Kuwait. An sarong kaiba sa trabaho nagadan sa saiyang mga takyag pakatapos na badilon nin nakatagong parabadil. Kan madangog an manongod sa pagkabuhay liwat, an reporter nagluluhang nagpasalamat sa Dios na ipinaaram sa saiya na may katuyohan an buhay. Sinabi nia na minsan ngani dai na nia maheheling liwat an mag-agom na Saksi, ririmposon nia sa saiyang puso an maogmang bareta na ini hale sa Biblia.

Arog kan naheheling niato, sa parate dai niato aram an pangultimong resulta kan siring na paghuhulit. Minsan siring, an madonong na si Hadeng Salomon nagsabi: “Iapon mo an saimong tinapay sa ibabaw kan katubigan, huli ta pakaagi nin dakol na aldaw makukua mo giraray iyan.” Sinabi man nia: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa pareho magigin marahay.” (Eclesiastes 11:​1, 6) Iyo, maigot na “iapon mo an saimong tinapay” sa dakol na katubigan asin “isabwag mo an saimong banhi” nin abunda, arog kan ginibo ni Pablo asin ni Jesus saka arog kan ginigibo kan mga Saksing ini sa presenteng panahon sa langtad nin Mejico na Ingles an tataramon.