Kun Gibohon Na sa Daga an Kabotan nin Dios

KAN tokdoan ni Jesus an saiyang mga disipulo na mamibing, “Gibohon logod an boot mo, kun paano sa langit, siring man sa daga,” sia nagtataram bilang saro na nag-istar na sa langit kaiba kan Ama. (Mateo 6:10; Juan 1:18; 3:13; 8:42) Sa buhay ni Jesus bago sia nagin tawo, naeksperyensiahan na nia an panahon na an gabos na nangyayari sa langit sagkod sa daga kaoyon kan kabotan nin Dios. Idto nakaoogmang marhay na mga panahon nin pagigin may nagibo asin nin satispaksion.​—Talinhaga 8:27-31.

An enot na linalang nin Dios mga espiritung linalang, “mga anghel nia, makakamhan sa kapangyarihan, na nag-ootob kan saiyang tataramon.” Sinda kaidto asin ngonyan mga “ministro nia, na naggigibo kan saiyang kabotan.” (Salmo 103:​20, 21) An lambang saro daw sa sainda may sadiri man na kabotan? Iyo, asin sa pagtugdas kan daga, an mga “aki [na ini] nin Dios nagkururahaw sa pag-omaw.” (Job 38:7) An saindang pag-omaw nagpapaheling kan saindang personal na dakulang kaogmahan sa kabotan nin Dios, asin an kabotan ninda iinayon ninda sa kabotan nia.

Pagkatugdas kan daga, inandam iyan nin Dios para istaran nin tawo asin sa katapustapusi linalang an enot na lalaki asin babae. (Genesis, kapitulo 1) Maninigo man daw ini sa pag-omaw? An ipinasabong na pagkasaysay nagsasabi: “Pakalihis kaiyan naheling nin Dios an gabos niang ginibo asin, uya! idto marahayon,” iyo, daing depekto, sangkap.​—Genesis 1:31.

Ano an kabotan nin Dios para sa enot niatong magurang asin sa mga aki ninda? Oyon sa Genesis 1:​28, iyan marahayon man: “Binendisyonan sinda nin Dios asin sinabihan sinda nin Dios: ‘Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an naglalayog na mga linalang sa kalangitan patin an lambang nabubuhay na linalang na naghihiro sa ibabaw kan daga.’” Tanganing maotob an makangangalas na sugong iyan, kaipuhan na an enot niatong mga magurang padagos na mabuhay​—sagkod lamang—​asin iyo man an saindang mga aki. Mayong nagparisa na magkakaigwa nin trahedya, inhustisya, kamondoan, o kagadanan.

Ini an panahon na an kabotan nin Dios ginigibo kaidto sa langit sagkod sa daga. An mga naggigibo kaidto kan saiyang kabotan nakakanompong nin dakulang kawilihan sa paggibo kaiyan. Ano an nagin problema?

Sarong dai linalaoman na angat manongod sa kabotan nin Dios an luminataw. Dai, bako man iyan na bagay na dai mareresolberan. Pero, iyan an pinonan nin halawig na peryodo nin kamondoan asin kakologan nin boot na magigin dahelan nin grabeng karibarawan manongod sa kabotan nin Dios para sa katawohan. Kita gabos nagin biktima kaini. Ano an angat na iyan?

An Kabotan nin Dios sa Panahon kan Rebelyon

Naheling kan saro sa espiritung “mga aki nin Dios” an posibilidad na mag-entremeter sa kabotan nin Dios para sa tawo, na an saiyang plano iyo na pakinabangon an sadiri nia. Mantang iyan lalong iniisip-isip kan espiritung linalang na ini, mas nagigin garo posible iyan asin mas nagigin nakaeengganyo iyan. (Santiago 1:​14, 15) Tibaad nangatanosan sia na kun maagyat nia an enot na mag-agom na tawo na magdangog sa saiya imbes na sa Dios, kun siring mapipiritan an Dios na togotan an sarong karibal na soberaniya. Tibaad inisip nia na dai sinda gagadanon nin Dios, huli ta  mangangahulogan iyan nin pagkasudya kan katuyohan nin Dios. Imbes, kaipuhan na liwaton ni Jehova Dios an saiyang katuyohan, na inaako an posisyon kan espiritung aki na ini na iyo nang kukuyogon ngonyan kan Saiyang linalang na mga tawo. Angay nanggad, an rebeldeng iyan sa huri inapod na Satanas, an boot sabihon, “Paratumang.”​—Job 1:​6, nota sa ibaba.

Naghihiro kaoyon kan saiyang kamawotan, dinolok ni Satanas an babae. Sinadol nia ini na dai pag-intindihon an kabotan nin Dios asin na magin independiente sa moral, na nagsasabi: “Dai nanggad kamo magagadan. . . . Kamo magigin arog nin Dios, na nakamimidbid kan marahay asin maraot.” (Genesis 3:1-5) Para sa babae, ini garo baga nakapatatalingkas, asin nagtubod sia na iyan magigin mas marahay na klase nin buhay. Sa huri, inagyat nia an saiyang agom na makidamay sa saiya.​—Genesis 3:6.

Bako ini an kabotan nin Dios para sa mag-agom. Kabotan ninda iyan. Asin magbubunga iyan nin kapahapahamak na mga resulta. Sinabi na sainda nin Dios na an siring na paggawe maresulta sa saindang kagadanan. (Genesis 3:3) Dai sinda linalang na magin mapanggana na independiente sa Dios. (Jeremias 10:23) Dugang pa, sinda magigin bakong sangkap, asin an pagkabakong sangkap asin kagadanan mamanahon na ngonyan kan saindang mga aki. (Roma 5:12) Dai kayang remedyohan ni Satanas an mga epektong ini.

Binago daw sagkod lamang kan mga pangyayaring ini an katuyohan, o kabotan nin Dios para sa katawohan asin sa daga? Dai. (Isaias 55:9-11) Alagad nagbangon nanggad iyan nin mga isyu na kaipuhan na resolberan: An katawohan daw “magigin arog nin Dios, na nakamimidbid kan marahay asin maraot,” arog kan hiningako ni Satanas? Sa ibang pagtaram, kun tatawan nin igong panahon, kaya daw niato mismong madeterminaran kun ano an tama asin sala, kapakipakinabang asin nakadadanyar, sa gabos na aspekto nin buhay? Maninigo daw na kuyogon nin lubos an Dios, na an saiyang paagi nin pamamahala an pinakamarahay? Maninigo daw na kuyogon nin lubos an saiyang kabotan? Ano an isisimbag nindo?

May saro sanang paagi tanganing maresolberan an mga isyung ini sa atubangan kan gabos na madonong na linalang: Togotan an mga gustong magin independiente na probaran na gibohon iyan na magin mapanggana. An paggadan sana sa sainda dai maresolber sa mga isyung pinalataw. An pagtogot sa rasa nin tawo na magin independiente sa laog nin supisyenteng panahon an maresolber sa isyu huli ta an resulta kaiyan magigin risang-risa. Ipinarisa nin Dios na ini an paaging gigibohon nia kan sinabihan nia an babae na magkakaaki ini. Sa siring, mapoon an pamilya nin tawo. Huli kaini, kita buhay ngonyan!​—Genesis 3:​16, 20.

Minsan siring, dai ini nangangahulogan na totogotan nin Dios an mga tawo asin an rebeldeng espiritung aki nia na gibohon an gabos na gusto ninda. Dai binutasan nin Dios an saiyang soberaniya, ni tinalikdan nia an saiyang katuyohan. (Salmo 83:18) Lininaw nia ini paagi sa paghula na roronoton sa huri an parasutsut kan pagrebelde asin kakanselaron an gabos na maraot na epekto. (Genesis 3:15) Kun siring, poon sa kapinonan an pamilya nin tawo pinanugaan nin pakaginhawa.

Mientras tanto, isiniblag kan enot niatong mga magurang an saindang sadiri asin an magigin mga aki ninda sa pamamahala nin Dios. Kun oolangon nin Dios an gabos na makamomondong epekto kan saindang desisyon, kaipuhan na iimponer nia an saiyang kabotan sa sainda sa lambang oportunidad. Garo man sana dai nia  itinotogot na maprobaran nindang magin independiente.

Siempre, puedeng pilion nin mga indibiduwal an pamamahala nin Dios. Puede nindang manodan kun ano an kabotan nin Dios para sa mga tawo durante kan peryodong ini asin kuyogon iyan nin maingat sagkod sa mapupuede. (Salmo 143:10) Minsan siring, dai sinda malilibre sa mga problema sagkod na dai nareresolberan an isyu manongod sa lubos na independensia kan katawohan.

An epekto kan personal na pagpili amay na naheling. Ginadan kan panganay na aki sa pamilya nin tawo, si Cain, an saiyang tugang na si Abel huli ta “an saiyang mga gibo maraot, alagad an sa saiyang tugang matanos.” (1 Juan 3:12) Bako ining kabotan nin Dios, huli ta pinatanidan na nin Dios si Cain asin sa huri pinadusahan sia. (Genesis 4:3-12) Pinili ni Cain an independensia sa moral na iinalok ni Satanas; sa siring sia “naggikan sa maraot.” Arog man kaiyan an ginibo kan iba.

Pakalihis nin 1,500 na taon sa kasaysayan nin tawo, “an daga nagin raot sa pagheling kan tunay na Dios asin an daga napano nin kadahasan.” (Genesis 6:11) Kinaipuhan an desididong aksion tanganing maingatan an daga sa pagkalaglag. Naghiro an Dios paagi sa pagpaabot nin lakop sa globong delubyo asin pagprotehir sa solamenteng matanos na pamilya na nabubuhay pa—si Noe, an saiyang agom, an saiyang mga aking lalaki, asin an mga agom kaini. (Genesis 7:1) Gabos kita gikan ninda.

Sa panahon kan kasaysayan nin tawo poon kaidto, nagtao an Dios nin giya para sa mga sinserong nagmamawot na makaaram kan saiyang kabotan. Pinasabngan nia an maimbod na mga lalaki tanganing isurat an saiyang mga mensahe para sa siisay man na nag-aasa sa paggiya nia. An mga mensaheng ini nakasurat sa Biblia. (2 Timoteo 3:16) Mamomoton niang itinogot na magkaigwa nin relasyon sa saiya an fiel na mga tawo, na magin mga katood ngani nia. (Isaias 41:8) Asin tinawan nia sinda nin kosog na kaipuhan ninda tanganing matagalan an depisil na mga kasakitan na naeksperyensiahan nin katawohan durante kan rinibong taon na ini nin independensia. (Salmo 46:1; Filipos 4:13) Dakulaon nanggad an satong pagpasalamat para sa gabos na ini!

‘Gibohon an Boot Mo’​—Nin Lubos

An nagibo na nin Dios sagkod ngonyan bakong iyo an kabilogan kan saiyang kabotan para sa katawohan. An Kristianong apostol na si Pedro nagsurat: “Igwa nin bagong kalangitan asin sarong bagong daga na satong hinahalat segun sa saiyang panuga, asin sa mga ini magdadanay an katanosan.” (2 Pedro 3:13) An simbolikong pananaram na ini nanonongod sa sarong bagong namamahalang autoridad sa katawohan asin sa sarong bagong sosyedad nin tawo sa irarom kan gobyernong iyan.

Naggagamit nin malinaw na pananaram, an propetang si Daniel nagsurat: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. . . . Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” (Daniel 2:44) Sinasabi kan hulang ini an katapusan kan dai na mapapakarhay na sistema nin mga bagay ngonyan asin kan pagsalida dian kan Kahadean, o gobyerno, nin Dios. Abaa kaogmang bareta kaini! An mga iriwal asin kaimotan na minapano sa kinaban ngonyan nin kadahasan asin isinasapeligro giraray na malaglag an daga malilingawan na sa maabot na aldaw.

Noarin mangyayari an mga bagay na ini? An mga disipulo ni Jesus naghapot: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan sistema nin mga bagay?” Bilang kabtang kan saiyang simbag, si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”​—Mateo 24:​3, 14.

Hayag sa gabos na an paghuhulit na ini ginigibo na ngonyan sa bilog na kinaban. Posibleng naheheling na nindo iyan sa pagtaraed mismo nindo. Sa saiyang librong These Also Believe, si Propesor Charles S. Braden nagsurat: “An Mga Saksi ni Jehova literal na kinobrehan an daga paagi kan saindang paghuhulit. . . . Mayo ni sarong grupong relihioso sa kinaban na nagpaheling nin orog na kaigotan asin pagkadesidido sa pagprobar na palakopon an maogmang bareta kan Kahadean kisa Mga Saksi ni Jehova.” Aktibong ibinabalangibog kan mga Saksi an maogmang baretang ini  sa labing 230 nasyon asin sa haros 400 na lenguahe. An ihinulang gibohon na ini dai noarin man nagibo kaidto na arog kaiyan kalakop sa bilog na globo. Saro iyan sa dakol na prueba na nagdadangadang na ngonyan an panahon tanganing salidahan kan Kahadean na iyan an mga gobyerno nin tawo.

An Kahadean na sinabi ni Jesus na ihuhulit iyo an mismong itinokdo nia sa sato na ipamibi sa saiyang modelong pamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) Iyo, an Kahadean na iyan iyo an instrumento na gagamiton nin Dios tanganing otobon an saiyang katuyohan, an saiyang kabotan, para sa katawohan asin sa daga.

Ano an kahulogan kaiyan? Pasimbagon niato an Kapahayagan 21:​3, 4: “Nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’” Dangan an kabotan nin Dios tunay nanggad na gigibohon na sa daga asin sa langit​—nin lubos. * Bako daw na gusto nindong magin kabtang kaiyan?

[Mga Nota sa Ibaba]

[Ritrato sa pahina 5]

An independensia sa kabotan nin Dios nagbunga nin trahedya