Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan? Bueno, helingon kun masisimbag nindo an minasunod na mga hapot:

• Ano an nagpaparisa na si Jesus igwa nin mga tugang na lalaki asin babae?

Sinasabi iyan kan Biblia sa Mateo 13:​55, 56 asin Marcos 6:3. An termino sa Griego (adelphos) na yaon dian ginagamit tanganing iindikar an “sarong klase nin pisikal o legal na relasyon [asin] nangangahulogan sana na mga tugang na lubos o tugang na lalaki sa ina o ama.” (The Catholic Biblical Quarterly, Enero 1992)​—12/15, pahina 3.

• Anong iba nang klase nin guerra an malinaw nang naheheling, asin ano sa parate an mga pinakadahelan?

Kan nakaagi pa sanang mga taon an mga guerra na nagpasakit sa katawohan sa pangenot mga guerra sibil​—mga guerra sa pag-oltanan nin magkakontrang mga grupo nin mga siudadano kan iyo man sanang nasyon. Pagkaongis nin mga grupong etniko asin mga tribo, pagkalaenlaen sa relihion, inhustisya, asin grabeng kariribokan sa politika an dahelan. An saro pang dahelan iyo an kahanaban sa kapangyarihan asin kuarta.​—1/1, pahina 3-4.

• Paano niato naaraman na bakong intension ni Jesus na tuomon kan mga Kristiano an mga termino kan modelong pamibi?

Itinao ni Jesus an halimbawang ini nin pamibi sa saiyang Sermon sa Bukid. Pakalihis nin mga 18 bulan, inotro nia an mahalagang marhay na mga punto kan saiyang mas naenot na instruksion manongod sa pamibi. (Mateo 6:​9-​13; Lucas 11:​1-4) Risang-risa an bagay na dai nia iyan inotro nin termino por termino, na nagpaparisa na dai sia nagtatao nin pamibi sa liturhiya tanganing tuomon.​—2/1, pahina 8.

• Pakatapos kan Baha, saen kinua kan salampati an dahon nin olibo na dinara kaiyan sa dahong?

Dai niato aram an asgad o temperatura kan tubig nin baha. Alagad an mga poon nin olibo midbid na minasupang giraray minsan pakatapos palodon. Kaya posibleng may mga nagdanay na buhay sa tubig nin baha asin nagsupang pakatapos kaiyan.​—2/15, pahina 31.

• Durante kan guerra sibil sa Nigeria, huli sa blokeada nin Biafra, paano nag-ako nin espirituwal na kakanon an Mga Saksi ni Jehova sa lugar na iyan?

Iinasignar an sarong lingkod kan banwaan sa sarong posisyon sa Europa asin an saro pa nagtrabaho sa landingan nin eroplano sa Biafra. Pareho sinda Saksi. Inako ninda an peligrosong gibohon na pagdara nin espirituwal na kakanon sa Biafra, sa siring nakinabang an dakol na tugang sagkod na natapos an guerra kan 1970.​—3/1, pahina 27.

• Ano an nahaman paagi sa Katoninongan nin Westphalia, asin paano kalabot kaidto an relihion?

Huli sa Reporma nagkabaranga sa tolong pagtubod an Banal na Imperyo nin Roma​—Katoliko, Luterano, asin Calvinista. Inorganisar an Unyon nin Protestante asin Liga nin Katoliko kan kapinonan kan ika-17 siglo. Dangan puminutok an sarong labanan nin relihion sa Bohemia asin gruminabe sagkod na nagin internasyonal na pag-inagawan nin kapangyarihan. An mga namamahalang Katoliko asin Protestante nakipagdaogan para sa supremasiya sa politika asin ganansia sa komersio. Sa katapustapusi, ginibo an mga orolay pankatoninongan sa Westphalia na probinsia nin Alemania. Pakalihis nin haros limang taon, pinirmahan kan 1648 an Tratado nin Westphalia, na tinapos an Treintang Taon na Guerra asin tinandaan an pagkamundag kan presenteng panahon na Europa bilang sarong kontinente nin soberanong mga estado.​—3/15, pahina 20-3.

• Ano an kahulogan kan tanda, o ngaran, “kan mabangis na hayop”​—an numerong 666?

An tandang ini nasambitan sa Kapahayagan 13:16-​18. An hayop nanonongod sa pamamahala nin tawo, asin an pagkaigwa kan hayop nin “numero nin tawo” nagpaparisa na an mga gobyerno nagpapabanaag kan makasalan na kamugtakan nin tawo. An 6 na dinagdagan nin 60 na dinagdagan nin 600 nagpapaheling na iyan may grabeng pagkukulang sa pagheling nin Dios. An mga igwa kan tandang ini nagtatao nin may pagsambang onra sa politikal na Estado, o inaasahan ninda iyan na matao nin kaligtasan.​—4/1, pahina 4-7.