Pagmamaigot na Magpaheling nin Kabootan sa Sarong Antipatikong Kinaban
Pagmamaigot na Magpaheling nin Kabootan sa Sarong Antipatikong Kinaban
“An makawiwiling bagay sa daganon na tawo iyo an saiyang mamomoton na kabootan.”—TALINHAGA 19:22.
1. Taano ta puedeng magin depisil magpaheling nin kabootan?
IBINIBILANG daw nindo na kamo maboot na tawo? Kun iyo, an pamumuhay sa presenteng kinaban puedeng depisil. Totoo, sinasabi sa Biblia na an kabootan kabtang kan “mga bunga kan espiritu,” alagad taano ta depisilon magpaheling nin kabootan maski sa Kristiano daang kadagaan? (Galacia 5:22) Siring kan napag-olayan niato sa naenot na artikulo, sa sarong kabtang an simbag makukua sa isinurat ni apostol Juan—an bilog na kinaban nasa kontrol nin sarong bakong maboot na espiritung persona, si Satanas na Diablo. (1 Juan 5:19) Ipinamidbid ni Jesu-Cristo si Satanas bilang “an namamahala sa kinaban.” (Juan 14:30) Sa siring, an tendensia kan kinaban na ini magin kapareho kan rebeldeng namamahala kaiyan, na an aktitud mamimidbid sa pagigin maisog.—Efeso 2:2.
2. Anong mga angat an puedeng makaapektar sa pagpaheling niato nin kabootan?
2 Bakong marahay an epekto sa buhay niato kun bakong maboot an pagtratar sa sato nin iba. An daing kabootan puedeng ipahayag nin mapagsudosudo na mga kataed, bakong makikatood na mga dai kamidbid, maski mga katood asin kapamilya na, kun beses, tibaad gumawe sa paagi na dai nag-iisip. An kadepisilan nin pagigin nasa kaibanan nin mga tawong daing modo saka nagsisirilyakan asin nagmumurudahan sa parate nakakadesganar na marhay. An siring na kawaran nin kabootan kan iba puedeng magin dahelan na kita magin antipatiko naman, asin tibaad isipon niato na magbalos nin daing kabootan sa daing kabootan. Tibaad magresulta pa ngani iyan sa mga problema sa espirituwal o pisikal na salud.—Roma 12:17.
3. Anong grabeng mga problema an inaatubang nin mga tawo na nagigin pagbalo sa saindang pagigin gustong magin maboot?
3 Dahelan sa nakakatension na mga kamugtakan sa kinaban tibaad magin depisil man para sa sato na magpaheling nin kabootan. Halimbawa, an katawohan sa pankagabsan nakakamate nin tension huli sa mga huma asin akto nin terorismo, saka sa posibleng paggamit nin biolohiko o nuklear na mga armas kan manlaenlaen na nasyon. Dugang pa, minilyon na tawo an nagtitios, na nabubuhay na sana na tikapo sa kakanon, istaran, gubing, asin medikal na pag-asikaso. An pagmamaigot na magpaheling nin kabootan nagigin angat kun an situwasyon garo baga mayo nang paglaom.—Eclesiastes 7:7.
4. Ano an tibaad salang ikonklusyon nin nagkapira kun iniisip ninda an dapit sa pagpaheling nin kabootan sa iba?
4 An saro puedeng magkonklusyon tolos na an pagpaheling nin kabootan bako nanggad na prioridad asin tibaad ngani tanda nin kaluyahan. Puede siang magsaboot na sia inaaprobetsaran, nangorogna kun an iba mayong konsiderasyon sa saiya. (Salmo 73:2-9) Minsan siring, an Biblia nagtatao nin tamang giya sa sato kan iyan magsabi: “An simbag, kun mahoyo, nakapararayo nin kaanggotan, tara an tataramon na makolog nakapaaanggot.” (Talinhaga 15:1) An kahoyoan asin kabootan duwang aspekto kan mga bunga kan espiritu na magkakonektar na marhay asin epektibo kun napapaatubang sa depisil asin masakit na mga kamugtakan.
5. Ano an nagkapirang kabtang nin buhay na kaipuhan an kabootan?
5 Huling mahalagang marhay sa sato bilang mga Kristiano an pagpaheling kan mga bunga kan banal na espiritu nin Dios, marahay na estudyaran niato kun paano niato ikapaheheling an saro sa mga kualidad na iyan—an kabootan. Posible daw na makapagmaigot na magpaheling nin kabootan sa sarong antipatikong kinaban? Kun iyo, ano an nagkapirang kabtang kun saen ikakapaheling niato an ebidensia na dai niato tinotogotan an impluwensia ni Satanas na pogolon an satong kabootan, nangorogna sa nakakatension na mga situwasyon? Pag-olayan niato an pagmamaigot na magpaheling nin kabootan sa pamilya, sa pinagtatrabawohan, sa eskuelahan, sa satong mga kataed, sa satong ministeryo, asin sa mga kapagtubod.
Kabootan sa Laog kan Pamilya
6. Taano ta mahalagang marhay sa laog nin pamilya an kabootan, asin paano iyan ikapaheheling?
6 Tanganing kamtan an bendisyon asin paggiya ni Jehova, an mga bunga kan espiritu mahalagang marhay asin kaipuhan na kultibaron nin lubos. (Efeso 4:32) Magkonsentrar kita sa partikular na pangangaipo nin mga miembro nin pamilya na magpahayag nin kabootan sa lambang saro. Sa relasyon sa aroaldaw, an mag-agom maninigo na magpaheling nin espiritu nin kabootan asin pagmalasakit sa lambang saro asin sa saindang mga aki. (Efeso 5:28-33; 6:1, 2) An siring na kabootan kaipuhan na magin risang-risa sa paagi nin pagtaram sa lambang saro kan mga miembro nin pamilya, na an mga aki nagtatao nin onra asin iginagalang an saindang mga magurang asin an mga magurang tinatratar nin tama an saindang mga aki. Magin marikas sa pagkomendar, maluway sa pagkondenar.
7, 8. (a) Anong klaseng paggawe an kaipuhan niatong likayan tanganing ikapaheling niato an tunay na kabootan sa pamilya? (b) Paano nakakokontribwir sa makosog na bogkos nin pamilya an marahay na komunikasyon? (c) Paano nindo ikapaheheling an kabootan sa saindong pamilya?
7 Kalabot sa pagigin maboot sa satong mga kapamilya an pagsunod sa sadol ni apostol Pablo: “Irayo nanggad nindo an gabos na iyan sa saindo, an kabangisan, kaanggotan, karatan, mapanlibak na pagtaram, asin malaswang orolay hale sa saindong ngoso.” Kada aldaw, an Kristianong mga pamilya maninigong magkomunikar sa lambang saro sa magalang na paagi. Taano? Huli ta an marahay na komunikasyon an pinakabuhay nin marigon asin makosog na mga pamilya. Kun maglataw an mga dai pagkakaoyon, tanganing maresolberan an iriwal, hingoahon na husayon an problema imbes na manggana sa argumento. An maogmang mga miembro nin pamilya odok na naghihingoa na paoswagon an kabootan asin konsiderasyon sa lambang saro.—Colosas 3:8, 12-14.
8 Positibo an kabootan asin nagpapangyari iyan sa sato na magin gustong gumibo nin marahay sa iba. Sa siring, naghihingoa kita na magin kapakipakinabang, makonsiderasyon, asin matinabang sa paagi na inooyonan kan ibang miembro nin pamilya. Kaipuhan an indibiduwal sagkod iribang paghihingoa tanganing ikapaheling an klase nin kabootan na nagtatao nin marahay na impresyon sa sarong pamilya. Bilang resulta, sinda bako sanang magkakamit kan bendisyon nin Dios kundi, sa kongregasyon asin sa komunidad, magtatao sinda nin onra sa Dios nin kabootan, si Jehova.—1 Pedro 2:12.
Kabootan sa Pinagtatrabawohan
9, 10. Sabihon an nagkapirang problema na puedeng maglataw sa pinagtatrabawohan, asin komentohan kun paano iyan puedeng atubangon na may kabootan.
9 Para sa sarong Kristiano, an aroaldaw na rutina nin trabaho tibaad magin angat sa pagpaheling nin kabootan sa mga kapwa trabahador. Dahelan sa korompetensiahan nin mga empleyado, an trabaho nin saro tibaad isapeligro nin sarong kapwa empleyado na naggigibo nin panloloko o katusohan, na sa siring rinaraot an reputasyon nia sa among. (Eclesiastes 4:4) Bakong pasil magpaheling nin kabootan sa siring na mga situwasyon. Minsan siring, ginigirumdom na an pagigin maboot an parateng tama na gibohon, an sarong lingkod ni Jehova maninigong magmaigot sagkod sa mapupuede na makombensir an mga bakong marahay an ugale. An pagpaheling nin pagigin may pagmalasakit tibaad makatabang digdi. Puede gayod kamong magpaheling nin pagmakolog kun an kapwa empleyadong iyan may helang o igwa nin mga kapamilya na may helang. Maski an pagkumusta puedeng magkaigwa nin positibong epekto sa saiya. Iyo, an mga Kristiano dapat na maghingoang paoswagon an pagkaoroyon asin katoninongan sagkod na iyan nasa sainda. Kun minsan an sarong maboot na tataramon na nagpapaheling nin malasakit asin pagmakolog makakatabang sa situwasyon.
10 Sa ibang mga kamugtakan, tibaad ipirit nin sarong among an saiyang mga opinyon sa mga empleyado nia asin tibaad gusto nia na an gabos magpartisipar sa sarong nasyonalistikong aktibidad o sa sarong selebrasyon na bakong sono sa Kasuratan. Kun an konsensia nin sarong Kristiano dai nagtotogot sa saiya na magpartisipar, tibaad magresulta ini sa sarong komprontasyon. Sa situwasyon na iyan tibaad bakong madonong na sabihon nin detalyado na sala nanggad na sumunod sa kagustohan kan among. Total, para sa mga bako niatong kapareho an Kristianong mga paniniwala, an pagpartisipar tibaad garo baga iyo an tamang gibohon. (1 Pedro 2:21-23) Puede gayod nindong ipaliwanag sa maboot na paagi an saindong mga rason sa dai nindo personal na pagpartisipar. Dai magbalos nin pagtuya sa pagtuya. Marahay na sunodon nin sarong Kristiano an marahayon na sadol sa Roma 12:18: “Kun mahihimo, sagkod na iyan nasa saindo, makipagkatoninongan sa gabos na tawo.”
Kabootan sa Eskuelahan
11. Anong mga angat an napapaatubang sa mga hoben sa pagpaheling nin kabootan sa mga kaeskuela?
11 Puedeng magin tunay na angat para sa mga hoben an pagpaheling nin kabootan sa mga kapwa estudyante. An mga hoben parateng nagmamawot na akoon kan mga kaklase. An nagkapirang aking lalaki nag-aaktong matso tanganing hangaan nin ibang estudyante, na nandadaogdaog pa ngani sa iba sa eskuelahan. (Mateo 20:25) An ibang hoben gustong magpasikat sa akademiko, sa isport, o sa iba pang aktibidad. Tanganing ipagpasikat an saindang tibay, sa parate tinatratar ninda na daing kabootan an mga kaklase asin ibang estudyante, na salang naghohona na ini mismo minsan paano ginigibo sinda na mas matibay. An sarong hoben na Kristiano dapat na mag-ingat na dai nia pag-arogon an mga indibiduwal na iyan. (Mateo 20:26, 27) Si apostol Pablo nagsabi na “an pagkamoot matinios asin maboot” asin na an pagkamoot “dai nananagsag, dai nagpapaabhaw.” Huli kaini, an sarong Kristiano igwa nin obligasyon na, bakong arogon an maraot na halimbawa kan mga minagawe na daing kabootan, kundi sunodon an konseho kan Kasuratan sa saiyang pagtratar sa mga kaeskuela.—1 Corinto 13:4.
12. (a) Taano ta tibaad sarong angat para sa mga hoben an magin maboot sa saindang mga maestra? (b) Kiisay makakaasa an mga hoben para sa tabang kun naiimpluwensiahan sinda na magin bakong maboot?
12 Maninigo man na trataron nin maboot kan mga hoben an saindang mga maestra. Dakol na estudyante an naoogmang paanggoton an saindang mga maestra. Naghohona sinda na sinda madonong kun pinaluluya ninda an paggalang sa saindang mga maestra paagi sa paggibo nin mga aktibidad na nagbabalga sa mga reglamento kan eskuelahan. Paagi sa pananakot, tibaad enganyaron ninda an iba na umayon sa sainda. Kun an sarong hoben na Kristiano habong makiayon, tibaad sia pag-olog-ologon o insultohon. An pakaatubang sa siring na mga situwasyon durante kan taon nin pag-eskuela nagigin pagbalo sa desisyon nin sarong Kristiano na magpaheling nin kabootan. Pero tandaan nindo kun gurano kaimportante an magin sarong maimbod na lingkod ni Jehova. Makasisierto kamo na aalalayan nia kamo paagi sa saiyang espiritu sa masakit na mga panahon na ini sa buhay.—Salmo 37:28.
Kabootan sa mga Kataed
13-15. Ano an puedeng makaolang sa pagpaheling nin kabootan sa mga kataed, asin paano puedeng atubangon an mga angat na ini?
13 Baga man kamo nag-iistar sa harong, sa apartment, sa lugar para sa mga harong na de rueda, o saen man, makakaisip kamo nin mga paagi na magpaheling nin kabootan asin magpahayag nin pagmakolog sa ikararahay nin mga kataed. Sa giraray, bako ining pirmeng pasil.
14 Kumusta kun an saindong mga kataed may prehuwisyo tumang sa saindo huli sa saindong rasa, nasyonalidad, o relihion? Paano kun sinda daing modo kun minsan o dai lamang kamo iniintindi? Bilang lingkod ni Jehova, kapakipakinabang an magpahayag nin kabootan sagkod sa mapupuede. Magigin lataw an nakagiginhawang kalaenan nindo, na tunay nanggad na sarong kaomawan ki Jehova—an arogan sa kabootan. Dai nindo aram kun noarin tibaad magbago an aktitud kan kataed nindo bilang resulta kan saindong kabootan. Tibaad magin paraomaw pa ngani sia ki Jehova.—1 Pedro 2:12.
15 Paano puedeng ipaheling an kabootan? An saro, paagi sa paggawe sa laog kan pamilya mantang an gabos na miembro nagpapaheling kan mga bunga kan espiritu. Tibaad marisa ini kan mga kataed. Kun beses, tibaad magibohan nindo nin pabor an saindong kataed. Girumdomon na an kabootan nangangahulogan nin pagkaigwa nin aktibong interes sa ikararahay nin iba.—1 Pedro 3:8-12.
Kabootan sa Satong Ministeryo
16, 17. (a) Taano ta mahalaga an kabootan sa satong pampublikong ministeryo? (b) Paano ikapaheheling an kabootan sa laen-laen na kabtang kan satong ministeryo sa langtad?
16 An kabootan maninigo na magin karakteristiko kan satong Kristianong ministeryo mantang kita sararong naghihingoa na makaolay an mga tawo sa saindang harong, sa pinagtatrabawohan ninda, asin sa pampublikong mga lugar. Maninigo niatong girumdomon na irinerepresentar niato si Jehova, na maboot pirme.—Exodo 34:6.
17 Ano an kabale sa saindong mga paghihingoa na magpaheling nin kabootan sa saindong ministeryo? Bilang halimbawa, mantang kamo naghuhulit sa tinampo, puede nindong ipaheling an kabootan paagi sa halipot na pakikipag-olay asin pagigin makonsiderasyon kun dinodolok nindo an mga tawo. An mga bangketa sa parate dakol na tawo an nag-aaragi, kaya mag-ingat na dai kamo makaolang sa mga bangketa. Siring man, kun kamo naghuhulit sa komersial na teritoryo, ipaheling an saindong kabootan paagi sa halipot na pakikipag-olay, na ginigirumdom na an mga tindero may mga parokyano na kaipuhan na asikasohon.
18. Ano an papel nin pakamansay sa pagpaheling nin kabootan sa satong ministeryo?
18 Sa ministeryong pagharongharong, magkaigwa kamo nin diskresion. Dai pakahaloy sa harong, lalo na kun bakong marahay an kamugtakan nin panahon. Namamansayan daw nindo kun nalalangkag na an tawo o naiiritar pa ngani sa presensia nindo? Tibaad sa lugar nindo, an mga Saksi ni Jehova parateng marhay na nagdadalaw. Kun iyan an kamugtakan, magpaheling kamo nin espesyal na konsiderasyon, na pirmeng maboot asin nakaoogma. (Talinhaga 17:14) Hingoahon na intindihon an rason nin sarong kagharong kun taano ta habo niang magdangog sa aldaw na iyan. Girumdomon, an saro sa Kristianong mga tugang nindo posibleng marhay na madalaw sa harong na iyan sa dai mahahaloy. Kun may manuparan kamo na daing modo, espesyalmenteng hingoahon nindo na magpaheling nin kabootan. Dai kamo maglangkaw nin boses o magmurusdot, kundi magtaram nin kalmado. Habo nin maboot na Kristiano na agyaton an kagharong sa diskutiran. (Mateo 10:11-14) Tibaad umabot an aldaw na an tawong iyan mahinanyog sa maogmang bareta.
Kabootan sa mga Pagtiripon kan Kongregasyon
19, 20. Taano ta kaipuhan sa kongregasyon an kabootan, asin paano iyan ikapaheheling?
19 Mahalaga man na magpaheling nin kabootan sa mga kapagtubod. (Hebreo 13:1) Huling kabtang kita nin sarong pambilog na kinaban na kasararoan nin magturugang, kaipuhan an kabootan sa satong relasyon sa lambang saro.
20 Kun saro, duwa, o labi pang kongregasyon an naggagamit sa sarong Kingdom Hall, mahalaga na magin maboot sa mga tugang sa ibong na mga kongregasyon, na tinatratar sinda na may dignidad. An korompetensiahan dai nakakatabang sa kooperasyon pag-abot sa pag-areglo nin mga oras nin pagtiripon asin sa kinakaipuhan na mga bagay na arog nin paglinig o paghirahay. Magin maboot asin makonsiderasyon minsan ngani tibaad may mga pagkakalaen nin opinyon. Sa paaging ini, mangingibabaw an kabootan, asin bebendisyonan nanggad ni Jehova an interes na ipinaheheling nindo para sa ikararahay nin iba.
Padagos na Magpaheling nin Kabootan
21, 22. Kaoyon kan Colosas 3:12, ano an maninigo na magin desisyon niato?
21 An kabootan mahiwas na gayong kualidad kaya nakakaapektar iyan sa gabos na aspekto kan satong buhay. Kun siring, maninigo niatong gibohon iyan na mahalagang kabtang kan satong Kristianong personalidad. An pagpaheling nin kabootan sa iba dapat na magin ugale niato.
22 Logod na kita gabos magin maboot sa iba sa kada aldaw asin bilang indibiduwal iaplikar niato kun siring an mga tataramon ni apostol Pablo: “Bilang mga pinili nin Dios, banal asin namomotan, isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios.”—Colosas 3:12.
Nagigirumdoman daw Nindo?
• Ano an nagpapagin depisil sa sarong Kristiano na magpaheling nin kabootan?
• Taano ta importante na magpaheling nin kabootan sa pamilya?
• Ano an nagkapirang angat sa pagpaheling nin kabootan sa eskuelahan, sa trabaho, asin sa mga kataed?
• Ipaliwanag kun paano ikakapaheling nin mga Kristiano an kabootan sa saindang pampublikong ministeryo.
[Mga Hapot Para sa Pag-adal]
[Ritrato sa pahina 18]
An kabootan na ipinaheheling kan gabos na miembro nin pamilya nagpapaoswag sa pagkasararo asin kooperasyon
[Ritrato sa pahina 19]
Puede kamong magpaheling nin kabootan kun magkahelang an sarong katrabaho o an saiyang pamilya
[Ritrato sa pahina 20]
Inaalalayan ni Jehova an mga maimbod na nagpapaheling nin kabootan baga man inoolog-olog
[Ritrato sa pahina 21]
Sarong akto nin kabootan an pag-alok nin tabang sa sarong kataed na nangangaipo