Sa Tabang kan Biblia, Napaglabanan Nia an Sugot

An mga sugot lakop sa kinaban ngonyan. An pagsuportar sa mga pamantayan kan Biblia bakong pasil. Halimbawa, tibaad sarong angat an paghimate sa hatol kan Biblia: “Dumulag kamo sa pakikisaro.”​—1 Corinto 6:18.

An saro sa Mga Saksi ni Jehova, na aapodon tang Sebastian, nagtatrabaho sa sarong Escandinavong kompanya sa Polandia. Kinaipuhan niang makipaglaban nin maigot tanganing mapagdanay an saiyang integridad.

Namidbid si Sebastian bilang saro sa Mga Saksi ni Jehova. An saiyang mga superbisor, huling inaapresyar an saiyang kahigosan asin marahay na ugale, binalosan sia nin manlaenlaen na pribilehio. Minsan siring, nadiskobre nia sa huri na kaiba sa mga pribilehiong ini an mga miting sa negosyo kun saen imbuelto an kuestionableng aling-alingan.

Dai nahaloy nagpoon nang magduda si Sebastian. “Aram kan sakong superbisor na saro ako sa Mga Saksi ni Jehova. Iyan an dahelan kaya may tiwala sia sa sako asin nag-aasa sia sako. Kun masayuma akong magpartisipar, mawawaran ako nin trabaho, na depisil na marhay na makua. Ano daw kun maobserbar sana ako?”

Dangan naaraman ni Sebastian kun ano pa an inaasahan sa saiya. Inaasahan sia na “asikasohon” an mga parokyanong taga ibang nasyon paagi sa pagdara nia nin “mga babae” para sa inmoral na katuyohan tanganing ibanan an mga ini sa banggi. Ano an gigibohon nia?

Nagdesisyon si Sebastian na ipagirumdom sa superbisor an manongod sa saiyang aktitud na basado sa Biblia mapadapit sa inmoralidad. Dai nahaloy nagin malinaw na dai bagay si Sebastian sa trabahong iyan asin maabot an panahon na kakaipuhanon niang bayaan an trabaho nia. Nakakua sia nin bagong trabaho na mas hababa an sueldo alagad mayo kan siring na mga sugot. Ngonyan malinig na an saiyang konsensia.

Ano an gigibohon nindo kun may mag-impluwensia saindo na makikabtang sa o konsintehon an inmoralidad? Magigin andam daw kamong gumibo nin listong pagbabago? Iyan an ginibo ni Jose kan suanoy, arog kan ibinareta sa Genesis 39:7-12.