Inoolang daw kan Neutralidad an Kristianong Pagkamoot?

AN KALABOT sa pagigin Kristiano bako sanang pagbasa nin Biblia, pagpamibi, asin pag-awit nin mga himno kun Domingo. May kalabot iyan na mga gibo para sa Dios sagkod para sa mga tawo. An Biblia nagsasabi: “Mamoot kita, bakong sa tataramon ni sa dila, kundi sa gibo asin katotoohan.” (1 Juan 3:18) Si Jesus may sinserong pagmalasakit sa iba, asin gusto kan mga Kristiano na arogon sia. Sinadol ni apostol Pablo an mga kapagtubod na danay na magkaigwa nin ‘dakol na gigibohon sa gibohon kan Kagurangnan.’ (1 Corinto 15:58) Alagad ano an gibohon kan Kagurangnan? Kabale daw dian an pagmamaigot na bagohon an palakaw kan gobyerno para sa kapakinabangan kan mga dukha asin api? Iyan daw an ginibo ni Jesus?

Maski sinadol si Jesus na mag-interbenir sa mga bagay sa politika o makikampi, nagsayuma siang gibohon iyan. Hinaboan nia an alok ni Satanas na kapangyarihan sa gabos na kahadean sa kinaban,  nagsayuma siang makiargumento manongod sa pagbayad nin buhis, asin huminale sia kan gusto siang gibohon na hade nin sarong popular na mobimiento. (Mateo 4:8-10; 22:17-21; Juan 6:15) Alagad an saiyang neutralidad dai nag-olang saiya na gumibo nin mga bagay para sa kapakinabangan kan iba.

Nagkonsentrar si Jesus sa kun ano an matao nin nagdadanay na karahayan sa iba. Minsan ngani an pagpakakan nia sa limang ribo asin pagpaomay sa mga may helang nagtao nin temporaryong pakaginhawa para sa pira sana, an saiyang katokdoan nagpangyari na an gabos sa katawohan magkamit nin daing katapusan na mga bendisyon. Namidbid si Jesus, bakong bilang organisador nin mga kampanya sa pag-ayuda, kundi bilang “Paratokdo” sana. (Mateo 26:18; Marcos 5:35; Juan 11:28) Sia nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.”​—Juan 18:37.

Paghuhulit nin Sarong Bagay na Orog Karahay Kisa Politika

An katotoohan na itinokdo ni Jesus bakong teoriya sa politika. Imbes, nakasentro iyan sa Kahadean na sia mismo an magigin Hade. (Lucas 4:43) An Kahadean na ini sarong langitnon na gobyerno, asin iyan an masalida sa gabos na administrasyon nin tawo asin matao nin permanenteng katoninongan sa katawohan. (Isaias 9:​6, 7; 11:9; Daniel 2:44) Kun siring, iyan an solamenteng tunay na paglaom kan katawohan. Bako daw na mas mamomoton na ipahayag an siring na seguradong paglaom para sa ngapit kisa enkaminaron an mga tawo na magtiwala sa mga tawo na iyong magtao nin tiwasay na ngapit? An Biblia nagsasabi: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan. An saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara. Maogma idtong an saiyang paratabang iyo an Dios ni Jacob, na an paglaom yaon ki Jehova na saiyang Dios.” (Salmo 146:3-5) Kaya imbes na sugoon an saiyang mga disipulo na ihulit an sarong mas marahay na paagi nin pag-organisar nin mga gobyerno, tinokdoan sinda ni Jesus na ihulit an ‘maogmang bareta kan kahadean.’​—Mateo 10:​6, 7; 24:14.

Kun siring, ini an “gibohon kan Kagurangnan” na isinugo sa Kristianong mga parahulit na gibohon. Huling kahagadan sa mga sakop kan Kahadean nin Dios na magkaminorootmootan, magigin mapanggana an Kahadean sa paghale sa kadukhaan paagi sa pagdistribwir kan rekursos nin katawohan sa balanseng paagi. (Salmo 72:​8, 12, 13) Maogmang bareta ini asin tunay nanggad na kaipuhan na ihulit ini.

Ngonyan, an Mga Saksi ni Jehova inorganisar para sa “gibohon [na ini] kan Kagurangnan” sa 235 nasyon. Kaoyon kan pagboot ni Jesus, iginagalang ninda an gabos na gobyerno. (Mateo 22:21) Alagad ta kinukuyog man ninda an mga tataramon na ini sa saiyang mga parasunod: “Kamo bakong kabtang kan kinaban, kundi pinili ko kamo hale sa kinaban.”​—Juan 15:19.

May mga dating naghuhulit nin politika na nagbago pagkatapos nin maingat na pag-adal sa Biblia. An sarong Italianong politiko na miembro kan Aksion Katolika, sarong organisasyon na kontrolado nin iglesia, nagsabi: “Nakilabot ako sa politika, na nagsasaboot na an sarong tawo maninigo na aktibong magkontribwir sa politikal asin sosyal na pag-oswag kan sosyedad.” Pagkatapos na magdemitir bilang alkalde kan siudad tanganing maghulit kan Kahadean nin Dios bilang saro sa Mga Saksi ni Jehova, ipinaliwanag nia kun taano ta dai nagigin mapanggana an mga paghihingoa  kan sinserong mga tawo sa politika. “An kamugtakan kan kinaban arog kaiyan, bakong huli ta an mga tawong disente dai naghingoa na pakarhayon an mga kamugtakan sa sosyedad, kundi, imbes, huli ta an sinserong mga paghihingoa kan pira sana nadaog kan karatan kan dakol.”

An dai pagpartisipar sa politika tanganing ihulit an solamenteng tunay na paglaom para sa katawohan dai nag-oolang sa tunay na mga Kristiano sa pagtabang sa iba sa praktikal na mga paagi. An mga tinatabangan ninda na magin mga sakop kan Kahadean nin Dios nakakanood na bagohon an kapahapahamak na mga aktitud, na igalang an autoridad, pakarhayon an saindang buhay pampamilya, asin magkaigwa nin timbang na pagmansay sa materyal na kayamanan. Mas mahalaga pa ngani, tinatabangan kan Mga Saksi ni Jehova an mga tawo na makamit an dayupot na relasyon sa Dios.

Nakikinabang an sosyedad na iniistaran kan mga parahulit kan Kahadean nin Dios. Alagad orog pa dian, ginigiyahan ninda an mga tawo na magsarig sa sarong gobyerno na tunay asin matao nin permanenteng katoninongan sa gabos na namomoot sa Dios. Bilang resulta kan saindang neutralidad, libre an mga Kristianong ini na magtao kan pinakanagdadanay asin praktikal na tabang na makukua ngonyan.

[Kahon/Ritrato sa pahina 7]

Hale sa Politika Pasiring sa Paghuhulit kan Kahadean nin Dios

Kan aki pa, nanodan ni Atila an manongod sa teolohiya liberasyon sa mga padi sa parokya nia sa Belem, Brazil. Ikinaogma niang madangog na pag-abot nin panahon an katawohan magigin talingkas sa pan-aapi asin uminayon sia sa sarong komunidad nin mga aktibista, kun saen sia nakanood na mag-organisar nin mga pagmartsa sa pagprotesta asin mga kampanya sa pakisuway sibil.

Alagad ikinaogma man ni Atila an pagtotokdo sa mga aki kan mga kagrupo nia, na ginagamit an librong itinao sa saiya, an Paghinanyog sa Dakulang Paratokdo. * Itinotokdo kaiyan an manongod sa marahay na gawe-gawe asin pagkuyog sa mga autoridad. Pinapag-isip kaini si Atila kun taano an mga nagsusuportar sa teolohiya liberasyon ta dai nagsusunod sa halangkaw na mga pamantayan ni Jesus sa moral asin kun taano ta may nagkapira na kun sinda nagkakaigwa na nin kapangyarihan nalilingawan na an mga tawong api. Dai na sia nagpartisipar sa mga aktibidad kan komunidad. Paghaloyhaloy, tuminuktok an mga Saksi ni Jehova sa saiyang pinto asin nakipag-olay sa saiya manongod sa Kahadean nin Dios. Dai nahaloy nag-aadal na sia sa Biblia asin nakakanood manongod sa tunay na remedyo sa pan-aapi sa katawohan.

Kan panahon man na idto, si Atila nag-atender sa sarong Katolikong seminar manongod sa pagtubod asin politika. “An pagtubod asin politika duwang magkalaen na paagi nin pagmansay sa iyo man sanang situwasyon,” an paliwanag kan paratokdo. Nag-atender man sia sa sarong pagtiripon sa Kingdom Hall. Dakulaon nanggad an pagkakalaen! Sarong bagay, mayong nagsisigarilyo, nag-iinom nin arak, o malaswang surubahan. Nagdesisyon siang umiba sa saindang paghuhulit, asin dai nahaloy sia nabautismohan. Nasabotan na nia ngonyan kun taano ta an teolohiya liberasyon bakong an tunay na solusyon sa mga problema kan mga dukha.

[Nota sa Ibaba]

[Mga Ritrato sa pahina 6]

An neutralidad kan Kristianong mga ministro dai nag-oolang sa sainda sa pagtabang sa iba