Magin Makosog an Boot Arog ki Jeremias

“Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.”​—SALMO 27:14.

1. Anong nagsosopay na bendisyon an nakakamtan kan Mga Saksi ni Jehova?

AN Mga Saksi ni Jehova nag-eerok sa sarong espirituwal na paraiso. (Isaias 11:6-9) Sa tahaw kan maribokon na kinaban na ini, yaon sinda sa sarong daing kaagid na espirituwal na kamugtakan kaiba kan mga kapwa Kristiano, na may pakipagkatoninongan ki Jehova Dios asin sa lambang saro. (Salmo 29:11; Isaias 54:13) Asin naghihiwas an saindang espirituwal na paraiso. An gabos na ‘bilog na kalag na naggigibo kan kabotan nin Dios’ nakakakontribwir sa pagpahiwas kaiyan. (Efeso 6:6) Paano? Paagi sa pamumuhay sono sa mga prinsipyo kan Biblia asin paagi sa pagtotokdo sa iba na gibohon man iyan, na sa siring iniimbitaran sinda na magkaigwa man nin kabtang sa nagsosopay na mga bendisyon kan paraisong iyan.​—Mateo 28:​19, 20; Juan 15:8.

2, 3. Ano an kaipuhan na tagalan nin tunay na mga Kristiano?

² Minsan siring, an pag-erok niato sa sarong espirituwal na paraiso dai nangangahulogan na dai kita magtitios nin mga kasakitan. Kita bako pang sangkap asin namamatean ta an mga kolog nin helang, pagkagurang, asin sa kahurihurihi kagadanan. Dugang pa, naheheling mismo niato an kaotoban kan mga hula may labot sa “huring mga aldaw.” (2 Timoteo 3:1) An bilog na katawohan nasasakitan nin makuri sa mga guerra, krimen, helang, gutom, asin iba pang grabeng kasakitan, asin bakong libre an Mga Saksi ni Jehova.​—Marcos 13:3-10; Lucas 21:​10, 11.

³ Apuera kan gabos na iyan, aram nanggad niato na apisar kan seguridad sa laog kan satong espirituwal na paraiso, yaon an pagtumang sa luwas. Pinatanidan ni Jesus an saiyang mga parasunod: “Huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo. Girumdoma nindo an tataramon na isinabi ko sa saindo, An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda.” (Juan 15:18-21) Iyo man giraray an situwasyon ngonyan. An satong paagi nin pagsamba dai pa man giraray nasasabotan o inaapresyar nin kadaklan na tawo. May mga nagkikritikar, nag-oolog-olog, o​—siring kan ipinatanid ni Jesus​—naoongis pa ngani sa sato. (Mateo 10:22) Sa parate, kita an punteriya nin salang impormasyon asin maraot an intension na propaganda paagi sa media. (Salmo 109:1-3) Iyo, kita gabos napapaatubang sa masakit na mga kamugtakan, asin an nagkapira sa sato tibaad magpoon na panluyahan nin boot. Paano kita makakatagal?

4. Kiisay kita nag-aasa para sa tabang tanganing makatagal?

⁴ Tatabangan kita ni Jehova. Paagi sa pasabong, an salmista nagsurat: “Dakol nanggayod an kalamidad kan matanos, alagad sa gabos na iyan iliniligtas sia ni Jehova.” (Salmo 34:19; 1 Corinto 10:13) Dakol sa sato an makakapatotoo na kun kita lubos na nagkokompiar ki Jehova, tinatawan nia kita kan kosog tanganing matagalan an ano man na kasakitan. An pagkamoot niato sa saiya asin an kagayagayahan na ibinugtak sa atubangan niato an nagtatabang sa sato na labanan an panluluya nin boot asin takot. (Hebreo 12:2) Sa siring, kun napapaatubang sa mga kadepisilan, kita nagpapadagos na marigon.

Pinakosog si Jeremias kan Tataramon nin Dios

5, 6. (a) Siisay an mga halimbawa niato nin tunay na mga parasamba na nakatagal? (b) Ano an reaksion ni Jeremias kan apodon tanganing magin propeta?

⁵ Sa bilog na kasaysayan, an fiel na mga lingkod ni Jehova nakaeksperyensia nin kagayagayahan sa  ibong nin depisil na mga kamugtakan. An nagkapira nabuhay durante nin mga panahon nin paghokom kan iluwas ni Jehova an saiyang grabeng kaanggotan sa mga bakong fiel. Kabilang sa siring na fiel na mga parasamba si Jeremias asin an nagkapira sa saiyang mga katemporanyo, saka an mga Kristiano kan enot na siglo. An mga halimbawang iyan sa kasaysayan nakasurat sa Biblia para sa ikakarigon kan satong boot, asin dakol kitang manonodan sa pag-adal kaiyan. (Roma 15:4) Halimbawa, horophoropa si Jeremias.

⁶ Minsan ngani hoben pa, si Jeremias inapod tanganing maglingkod bilang propeta sa Juda. Bako ining pasil na asignasyon. Dakol an nagsasamba sa falsong mga dios. Minsan ngani fiel si Josias, na iyo an hade kan ponan ni Jeremias an saiyang ministeryo, an gabos na suminunod na hade bakong fiel, asin an kadaklan kan mga may paninimbagan na magtokdo sa banwaan​—an mga propeta asin mga saserdote​—bakong kampi sa katotoohan. (Jeremias 1:​1, 2; 6:13; 23:11) Kun siring, ano an namatean ni Jeremias kan apodon sia ni Jehova tanganing magin propeta? Natakot! (Jeremias 1:​8, 17) Nagirumdoman ni Jeremias an enot niang reaksion: “Ako nagsabi: ‘Ah, Soberanong Kagurangnan na Jehova! Dai talaga ako tataong magtaram, huli ta aki pa ako.’”​—Jeremias 1:6.

7. Anong reaksion an napaatubang ki Jeremias sa saiyang teritoryo, asin ano an ginibo nia?

⁷ An kadaklan sa teritoryo ni Jeremias dai naghihimate, asin parateng makosog an pagkontra sa saiya. Sarong beses, si Pasur, na sarong saserdote, kinolgan sia asin ipinabugtak sia sa pandog. Ipinaaram ni Jeremias an namatean nia kan panahon na idto: “Ako nagsabi: ‘Dai ko na sia [si Jehova] sasambiton, asin dai na ako noarin man magtataram pa sa saiyang ngaran.’” May beses gayod na namatean na man nindo iyan​—gusto na nindong umontok. Mangnoha kun ano an nakatabang ki Jeremias na magpadagos. Sia nagsabi: “Sa sakong puso iyan [an tataramon, o mensahe nin Dios] nagin siring sa naglalaad na kalayo na tuminaros sa sakong mga tolang; asin ako napagal sa pagpogol kaiyan, asin dai ko na iyan natagalan.” (Jeremias 20:9) Igwa man daw nin arog kaiyan na epekto sa saindo an mga tataramon nin Dios?

An Kairiba ni Jeremias

8, 9. (a) Anong kaluyahan an ipinaheling ni propeta Urias, na may anong resulta? (b) Taano ta nanluya an boot ni Baruc, asin paano sia natabangan?

⁸ Bakong solo si Jeremias sa saiyang gibohon bilang propeta. May kairiba sia, asin siertong nakaparigon iyan sa boot nia. Pero may beses na an kairiba nia dai naghiro nin may kadonongan. Halimbawa, an sarong kapwa propeta na an ngaran Urias sibot sa pagpaabot nin mga patanid tumang sa Jerusalem asin Juda “oyon sa gabos na tataramon ni Jeremias.” Minsan siring, kan ipagboot ni Hadeng Joaquim na gadanon si Urias, an propeta duminulag pa-Egipto huli sa takot. Dai iyan nagligtas sa saiya. Linapag sia kan mga tawohan kan hade, dinakop sia, asin ibinalik sia sa Jerusalem, na duman sia ginadan. Siertong ikinakubhan iyan ni Jeremias!​—Jeremias 26:20-23.

⁹ An saro pang kaiba ni Jeremias iyo an saiyang sekretaryo, si Baruc. Si Baruc marahayon na suporta para ki Jeremias, alagad sarong beses nawaran man ini nin espirituwal na pagmansay. Nagpoon siang magreklamo, na nagsasabi: “Herak man sa sakuya ngonyan ta dinugangan ni Jehova nin kamondoan an sakuyang kakologan! Napagal ako huli sa sakuyang pag-agagha, asin dai  ako nakanompong nin pahingaloan.” Si Baruc, na nanluluya an boot, nagpoon na mawaran nin apresasyon sa espirituwal na mga bagay. Pero, maboot na tinawan ni Jehova nin madonong na hatol si Baruc, asin naulian sia. Dangan inasegurar sia na maliligtas sia sa pagkalaglag kan Jerusalem. (Jeremias 45:1-5) Sierto nanggad na naparigon an boot ni Jeremias kan makabalik an espirituwal na pagkatimbang ni Baruc!

Sinuportaran ni Jehova an Saiyang Propeta

10. Anong mga panuga nin suporta an itinao ni Jehova ki Jeremias?

¹⁰ An pinakamahalaga, dai binayaan ni Jehova si Jeremias. Nasabotan nia an namatean kan saiyang propeta asin tinawan nia sia kan kosog asin suporta na kaipuhan nia. Halimbawa, sa kapinonan kan ministeryo ni Jeremias kan ipahayag nia an saiyang mga pagduda manongod sa saiyang mga kualipikasyon, sinabihan sia ni Jehova: “Dai ka matakot huli sa saindang lalauogon, huli ta ‘ako nasa saimo tanganing iligtas ka,’ an sabi ni Jehova.” Dangan, pakatapos na itao sa saiyang propeta an impormasyon manongod sa asignasyon nia, si Jehova nagsabi: “Sierto na sinda makikilaban tumang sa saimo, alagad ta dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’” (Jeremias 1:​8, 19) Nakakaranga nanggad! Asin inotob ni Jehova an saiyang sinabi.

11. Paano niato naaaraman na inotob ni Jehova an saiyang panuga na susuportaran si Jeremias?

¹¹ Sa siring, pakatapos na pandogan asin ipaheling tanganing pag-olog-ologon kan publiko, si Jeremias may kompiansang nagsabi: “Si Jehova kaibanan ko siring sa makangingirhat na makakamhan. Kaya an mismong mga naglalamag sako magkakasiringkog asin dai manggagana. Magkakasurupog sinda nin makuri.” (Jeremias 20:11) Kan suminunod na mga taon kan magprobar na gadanon si Jeremias, si Jehova padagos na nasa kaibanan  nia, asin arog ki Baruc, si Jeremias nakaligtas sa pagkalaglag kan Jerusalem bilang talingkas na tawo, mantang an mga naglamag sa saiya asin an mga dai nag-intindi sa mga patanid nia magsalang nagadan o dinarang bihag sa Babilonya.

12. Sa ibong kan mga dahelan nin panluluya nin boot, ano an maninigo niatong tandaan?

¹² Arog ki Jeremias, an dakol na Saksi ni Jehova ngonyan nagtitios nin makuring mga sakit. Siring kan nasambitan kasubago, an nagkapira kaini dahelan sa sato mismong pagkabakong sangkap, an iba dahelan sa kariribokan sa kinaban, asin an iba pa dahelan sa mga nagkokontra sa satong gibohon. An siring na makuring mga sakit puedeng makapanluya sa boot. Arog ki Jeremias, tibaad magpoon kitang mag-isip-isip kun baga makakapagpadagos kita. Tunay nanggad, maaasahan niato na panluluyahan kita nin boot paminsanminsan. Nababalo kan panluluya nin boot an rarom kan satong pagkamoot ki Jehova. Kaya magin determinado kita na dai pagtogotan an panluluya nin boot na magin dahelan nin pagsibog niato sa paglilingkod ki Jehova arog kan ginibo ni Urias. Imbes, arogon niato si Jeremias asin manarig sa suporta ni Jehova.

Kun Paano Lalabanan an Panluluya nin Boot

13. Paano niato maaarog an halimbawa ni Jeremias asin ni David?

¹³ Si Jeremias regular na nakikipagkomunikar ki Jehova Dios, na isinasabi sa saiya an kairairaroming mga saboot nia asin nakikimaherak na logod tawan nin kosog. Marahayon na halimbawa iyan na dapat arogon. Si David kan suanoy, na nag-asa sa iyo man sanang Gikanan nin kosog, nagsurat: “Dangogon mo an mga sinasabi ko, O Jehova; saboton mo an sakong pag-agagha. Maghinanyog ka sa tingog kan sakuyang pag-arang nin tabang, O sakuyang Hade asin sakuyang Dios, huli ta sa saimo ako namimibi.” (Salmo 5:​1, 2) An ipinasabong na estorya kan buhay ni David nagpapaheling na paorootrong sinimbag ni Jehova an mga pamibi ni David para sa tabang. (Salmo 18:​1, 2; 21:1-5) Sa kaagid na paagi, kun magabat an pasan na mga sakit o garo dai mapapangganahan an satong mga problema, nakakarangang marhay na dumolok ki Jehova sa pamibi asin ipahayag sa saiya an nasa satong puso. (Filipos 4:​6, 7; 1 Tesalonica 5:16-18) Si Jehova dai nagsasayumang hinanyogon kita. Imbes, inaasegurar nia kita na ‘sia may pagmakolog sa sato.’ (1 Pedro 5:​6, 7) Minsan siring, bakong rasonable na mamibi ki Jehova dangan dai niato hinihinanyog an saiyang sinasabi, bako daw?

14. Ano an nagin epekto ki Jeremias kan mga tataramon ni Jehova?

¹⁴ Paano nagtataram sa sato si Jehova? Horophoropa giraray si Jeremias. Huling propeta si Jeremias, si Jehova direktang nakikomunikar sa saiya. Ilinadawan ni Jeremias an epekto sa saiyang puso kan mga tataramon nin Dios: “An saimong mga tataramon nakua, asin iyan sakuyang kinakan; asin an saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova Dios nin mga hukbo.” (Jeremias 15:16) Iyo, ikinaogmang marhay ni Jeremias an bagay na inapod sia sa ngaran nin Dios, asin an Saiyang mga tataramon mahalagang marhay para sa propeta. Huli kaini, arog ki apostol Pablo, galaga si Jeremias na ipahayag an mensaheng ipinagkatiwala sa saiya.​—Roma 1:​15, 16.

15. Paano niato ikakatadom sa satong puso an mga tataramon ni Jehova, asin anong mga bagay na dapat isipon an magibo sa sato na determinadong dai magsilensio?

¹⁵ Si Jehova dai direktang nakikikomunikar sa siisay man ngonyan. Minsan siring, yaon sa sato an mga tataramon nin Dios sa mga pahina kan Biblia. Huli kaini, kun sineseryoso niato an satong pag-adal sa Biblia asin odok na hinohorophorop an satong nanonodan, an mga tataramon nin Dios magigin “labi-labing kaogmahan asin kagayagayahan” man kan satong puso. Asin maoogma kitang marhay na dara niato an ngaran ni Jehova kun ihinihiras niato sa iba an mga tataramon na iyan. Nungka niatong paglingawan an bagay na mayo nin ibang mga tawo sa kinaban ngonyan an nagpapahayag kan ngaran ni Jehova. Solamente an saiyang mga Saksi an nagpapaisi kan maogmang bareta kan naestablisar nang Kahadean nin Dios asin nagtotokdo sa mga mahoyo na magin mga disipulo ni Jesu-Cristo. (Mateo 28:​19, 20) Kanigoan na bendisyon sa sato! Kun iisipon an mamomoton na ipinagkatiwala sa sato ni Jehova, paano niato magigibong sumilensio?

 Magmaan Kita sa Satong Pag-iriba

16, 17. Ano an pagmansay ni Jeremias dapit sa pag-iriba, asin paano niato sia maaarog?

¹⁶ May iba pang ibinareta si Jeremias na nakatabang sa saiya na magin makosog an boot. Sia nagsabi: “Dai ako nagtukaw sa dayupot na kasararoan nin mga nagsusurubahan asin ako nagpoon na mag-ogma. Dahel sa saimong kamot ako tuminukaw nin solo, huli ta pinano mo ako nin pagdenunsiar.” (Jeremias 15:17) Mas ginusto pa ni Jeremias na magsolo kisa maolakitan nin maraot na kairiba. Arog man kaiyan an pagmansay niato ngonyan. Nungka niatong linilingawan an patanid ni apostol Pablo na “an maraot na pag-iriba nakararaot sa marahay na mga ugale,” dawa an marahay na mga ugale niato sa laog nin dakol nang taon.​—1 Corinto 15:33.

¹⁷ Dahel sa maraot na pag-iriba puedeng maatian kan espiritu kan kinaban an satong kaisipan. (1 Corinto 2:12; Efeso 2:2; Santiago 4:4) Kun siring, sanayon niato an satong kakayahan nin pakamansay na mamidbid an nakakaraot na pag-iriba asin biyong rayoan sinda. (Hebreo 5:14) Kun si Pablo buhay pa sa daga ngonyan, ano daw sa paghona nindo an sasabihon nia sa sarong Kristiano na nagdadalan nin inmoral o madahas na mga pelikula o madahas na mga isport? Paano daw nia hahatolan an sarong tugang na lalaki na nakikikatood sa mga tawong dai nia lamang kamidbid sa Internet? Ano daw an iisipon nia sa sarong Kristiano na kadakol na oras na nagpaparakawat nin video o nagpaparadalan nin telebisyon alagad mayo nin marahay na ugale nin personal na pag-adal?​—2 Corinto 6:14b; Efeso 5:3-5, 15, 16.

Magdanay sa Espirituwal na Paraiso

18. Ano an matabang sa sato na magdanay na makosog sa espirituwal?

¹⁸ Pinahahalagahan niatong marhay an satong espirituwal na paraiso. Mayo lamang iyan nin kaagid sa kinaban ngonyan. Maski an mga daing pagtubod nagkokomento dapit sa pagkamoot, konsiderasyon, asin kabootan kan mga Kristiano sa lambang saro. (Efeso 4:​31, 32) Pero, orog kisa kasuarin man ngonyan, kaipuhan niatong labanan an panluluya nin boot. An marahay na pag-iriba, pamibi, asin marahay na ugale nin pag-adal makakatabang sa sato na magdanay na makosog sa espirituwal. Iyan an mapakosog sa sato tanganing maatubang an ano man na pagbalo na may lubos na kompiansa ki Jehova.​—2 Corinto 4:​7, 8.

19, 20. (a) Ano an makakatabang sa sato na makatagal? (b) Kiisay ipinapanongod an minasunod na artikulo, asin interesante man iyan para kiisay?

¹⁹ Nungka niatong pagtogotan an mga naoongis sa satong mensahe sa Biblia na takoton kita asin ikompromiso an satong pagtubod. Arog kan mga kaiwal na naglamag ki Jeremias, an mga minalaban sa sato minalaban sa Dios. Dai sinda manggagana. Si Jehova, na orog nanggad kakosog kisa mga kalaban niato, nagsasabi sa sato: “Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.” (Salmo 27:14) May paglaom ki Jehova na hararom na nakagamot sa satong puso, logod na magin desidido kita na dai pumondo sa paggibo nin marahay. Logod na magin kompiado kita na, arog ki Jeremias asin Baruc, mag-aani kita kun kita dai mapagal.​—Galacia 6:9.

²⁰ An paglaban sa panluluya nin boot pirepirmeng pinaglalabanan nin dakol na Kristiano. Pero an mga hoben may inaatubang na partikular na mga angat. Alagad igwa man sinda nin marahayon na mga oportunidad. An minasunod na artikulo direktang ipinapanongod sa mga hoben na kabilang sa sato. Magigin interesante man iyan para sa mga magurang asin sa gabos na nagdusay na nasa edad na sa kongregasyon na nasa kamugtakan na makatabang sa mga hoben sa kongregasyon paagi sa tataramon, paagi sa halimbawa, asin paagi sa direktang suporta.

Ano an Isisimbag Nindo?

• Taano ta maaasahan niato na magkakaigwa nin nakapanluluya sa boot na mga kamugtakan, asin kiisay kita maninigong umasa para sa tabang?

• Paano dinaog ni Jeremias an panluluya nin boot minsan ngani depisil an asignasyon?

• Ano an mapangyari sa satong puso na ‘maogma nin labi-labi asin maggayagaya’ dawa may mga kadepisilan?

[Mga Hapot Para sa Pag-adal]

[Ritrato sa pahina 9]

Inisip ni Jeremias na sia hobenon pa asin daing eksperyensia tanganing magin propeta

[Ritrato sa pahina 10]

Dawa kan pinaglalamag, aram ni Jeremias na si Jehova nasa kaibanan nia “siring sa makangingirhat na makakamhan”