Napapakosog daw Kamo kan Tataramon nin Dios?

KUN napapaatubang sa mga kadepisilan, ano an ginigibo nindo tanganing mapangganahan iyan? Sa kamugtakan ni Jesus, an paggirumdom sa sarong angay na teksto nakatabang sa saiya na atubangon an mga angat ni Satanas. (Mateo 4:1-11) Siring man, kan napaatubang si Hadeng David sa personal na mga pagbalo, napakosog sia kan Tataramon nin Dios. Sia nagsabi: “Kan an sakuyang nakariribok na mga kaisipan duminakol sa sakong boot, an saimong mga panranga nakaranga sa sakong kalag.”​—Salmo 94:19.

Sa kaagid na paagi, an paggirumdom sa sarong paboritong teksto puedeng makaranga sa sato o magtao sa sato nin kosog kun napapaatubang kita sa mga kadepisilan. Halimbawa, si Rex, na ngonyan 89 anyos na, sarong bilog na panahon na paraebanghelyo poon pa kan 1931. Pero, sia nagsasabi: “Sa parate nakakamate ako nin kakulangan nin kakayahan kun tinatawan ako nin espesyal na asignasyon sa ministeryo.” Paano nia napangganahan iyan? “Ginirumdom ko an paborito kong teksto, an Talinhaga 3:​5, na nagsasabi: ‘Magtiwala ka ki Jehova sa bilog mong puso asin dai ka manarig sa saimong sadiring pakasabot.’ An paggirumdom asin pag-aplikar kan tekstong ini nakatabang sa sako na mapangganang isagibo an sakong mga asignasyon.”

Dawa an mga aki nakikinabang sa pagkaigwa nin paboritong teksto. An sais anyos na si Jack nagsasabi na an saiyang paboritong teksto iyo an Mateo 24:14. An tekstong ini an nagmomotibar sa saiya na maghulit kaiba kan saiyang mga magurang. An sabi nia: “Gusto kong maghulit kada Sabado kaiba ni nanay, tatay, asin tugang kong babae.”

Arog ni Jesus, napapaatubang daw kamo kun beses sa direktang mga angat sa saindong pagtubod? Kun siring, tibaad magin saro sa paborito nindong teksto an Filipos 4:13. Arog ni Hadeng David, igwa daw kamo nin “nakariribok na mga kaisipan”? Kun siring an paggirumdom sa Filipos 4:​6, 7 puedeng makatabang saindo na mapangganahan iyan. Naghahadit daw kamo kun beses na an saindong paglilingkod sa Dios bakong mabunga? Kun siring matao saindo nin kosog an paggirumdom sa 1 Corinto 15:58.

Paagi sa pagtuom nin angay na mga teksto, tinotogotan niato an Tataramon nin Dios na magkaigwa nin puersa sa satong buhay. (Hebreo 4:12) An siring na paboritong mga teksto puedeng magtao sa sato nin kosog sagkod karangahan.​—Roma 15:4.