Pakosoga Nindo an Lambang Saro

“An mga ini mismo nagin tabang na nagpapakosog sa sako.”​—COLOSAS 4:11.

1, 2. Sa ibong kan mga peligro, taano ta si Pablo sinongko sa bilanggoan kan saiyang mga katood?

PUEDENG magin peligroso an magin katood nin saro na nagtitios sa bilanggoan​—dawa kun an katood nindo nabilanggo sa bakong makatanosan na paagi. Tibaad pagsuspetsaran kamo kan mga opisyal sa bilanggoan, na binabantayan an kada hiro nindo tanganing seguradohon na dai kamo makagibo nin krimen. Kun siring, kaipuhan an kosog nin boot tanganing dayaday na makakomunikar an katood nindo asin masongko sia sa bilanggoan.

² Pero, ini mismo an ginibo kan nagkapirang katood ni apostol Pablo mga 1,900 na taon na  an nakaagi. Dai sinda nagduwaduwang songkoon si Pablo sa saiyang bilanggoan tanganing tawan sia nin kinakaipuhan na pagranga asin pagparigon sa boot patin pakosogon sia sa espirituwal. Sairisay an maimbod na mga katood na ini? Asin ano an manonodan niato sa saindang kosog nin boot, kaimbodan, asin pakikikatood?​—Talinhaga 17:17.

“Tabang na Nagpapakosog”

3, 4. (a) Sairisay an lima sa mga katood ni Pablo, asin nagin ano sinda sa saiya? (b) Ano an “tabang na nagpapakosog”?

³ Balikan niato an mga taon 60 C.E. Nakabilanggo si apostol Pablo sa Roma huli sa inimbentong sahot na sedisyon. (Gibo 24:5; 25:​11, 12) Pinili ni Pablo na sambiton an limang Kristiano na nagsuportar sa saiya: Si Tiquico, an saiyang personal na mensahero hale sa distrito nin Asia asin sarong “kapwa oripon sa Kagurangnan”; si Onesimo, sarong “fiel asin namomotan na tugang” hale sa Colosas; si Aristarco, sarong Macedonio hale sa Tesalonica asin sarong beses nagin ‘kapwa bihag’ ni Pablo; si Marcos, an pinsan kan kaibaiba ni Pablo sa pagmimisyonero na si Bernabe asin kagsurat kan Ebanghelyo na inginaran sa saiya; asin si Justo, saro sa mga kapwa trabahador kan apostol “para sa kahadean nin Dios.” Nagsabi si Pablo dapit sa limang iyan: “An mga ini mismo nagin tabang na nagpapakosog sa sako.”​—Colosas 4:7-11.

⁴ May mapuersang sinabi si Pablo manongod sa tabang na itinao sa saiya kan maimbod na mga katood nia. Naggamit sia nin Griegong termino (pa·re·go·riʹa) na trinadusir na “tabang na nagpapakosog,” na sa Biblia digdi sana sa bersikulong ini maheheling. An terminong ini igwa nin dakol na kahulogan asin ginamit espesyalmente sa mga konteksto na may labot sa pagbolong. * Puede iyan na tradusiron na ‘karangahan, pagpaginhawa, pagranga, o pakaginhawa.’ Kinaipuhan ni Pablo an klaseng iyan nin pagpapakosog, asin itinao iyan kan limang lalaking idto.

Kun Taano ta Kinaipuhan ni Pablo an “Tabang na Nagpapakosog”

5. Apisar na sia apostol, ano an kinaipuhan ni Pablo, asin ano an kaipuhan niato gabos sa panapanahon?

⁵ Tibaad ikangalas nin nagkapira na isipon na si Pablo, na sarong apostol, nangaipo nin pagpapakosog. Pero iyo nanggad. Totoo, makosog an pagtubod ni Pablo, asin dakol na pisikal na pangongolog an natagalan nia, ‘mga hampak na labi-labi,’ ‘parate na dikit pang magadan,’ asin iba pang mga kolog. (2 Corinto 11:23-27) Minsan siring, sia tawo, asin an gabos na tawo may panahon na nangangaipong rangahon o pasarigon an saindang pagtubod sa tabang nin iba. Totoo ini dawa ki Jesus. Durante kan ultimong banggi nia, sarong anghel an nagtunga sa saiya sa Getsemani asin “pinakosog sia.”​—Lucas 22:43.

6, 7. (a) Sa Roma, kiisay nadesganar si Pablo, asin siisay an nagparigon sa boot nia? (b) Anong klaseng mga serbisyo an itinao ki Pablo kan mga tugang niang Kristiano sa Roma, na sa siring nagin “tabang na nagpapakosog”?

⁶ Nangaipo man si Pablo nin pagpapakosog. Kan dumatong sia bilang bilanggo sa Roma, bakong mainit an pag-ako sa saiya kan mga karasa nia. An kadaklan sa mga Judiong ini habong mag-ako kan mensahe kan Kahadean. Pakatapos na songkoon si Pablo kan pangenot na mga lalaki kan mga Judio sa saiyang bilanggoan, an pagkasaysay sa Gibo nagsasabi: “An nagkapira nagpoon na tumubod sa mga bagay na isinabi; an iba habong tumubod. Kaya, huling dai sinda magkaoroyon, sinda nagharale.” (Gibo 28:​17, 24, 25) Sierto nanggad na ikinakolog kan boot ni Pablo an saindang kadaihan nin apresasyon sa dai na kutana maninigong kabootan ni Jehova! An saiyang makosog na saboot dapit sa bagay na ini risang-risa sa isinurat nia mga pirang taon bago kaini sa kongregasyon sa Roma: “Igwa ako nin dakulang kamondoan asin daing ontok na kakologan sa sakong puso. Huli ta mawot ko kutana na ako mismo ibulag sa Cristo bilang an sarong sinumpa dahel sa sakong mga tugang [an mga Judio], an sakong mga paryente segun sa laman.” (Roma 9:​2, 3) Pero, sa Roma nakanompong sia nin maimbod asin tunay na kairibaiba na an kosog nin boot asin kapadangatan nakaginhawa sa saiyang puso. Sinda an saiyang tunay na mga tugang sa espirituwal.

⁷ Paano nagin tabang na nagpapakosog an  limang tugang na lalaking idto? Dai ninda tinogotan an mga gapos nin bilanggoan ni Pablo na magin dahelan tanganing rayoan sia. Imbes, sinda gikan sa boot asin mamomoton na nagtao nin personal na mga serbisyo ki Pablo, na ginigibo an mga trabahong dai nia mismo magigibo huli sa saiyang pagkabilanggo. Halimbawa, sinda nagserbi bilang mensahero asin hinatod sa laen-laen na kongregasyon an mga surat asin berbal na instruksion ni Pablo; nagdara sinda nin nakakaparigon sa boot na mga bareta ki Pablo manongod sa kamugtakan kan mga tugang sa Roma asin iba pang lugar. Posibleng marhay na nagkua sinda kan kinakaipuhan na mga gamit, arog baga kan gubing para sa tiglipot, mga balumbon, asin mga kasangkapan sa pagsurat. (Efeso 6:​21, 22; 2 Timoteo 4:11-13) An gabos na nakakatabang na gibong iyan nagpakosog asin nagparigon sa boot kan nakabilanggong apostol kaya sia man nagin “tabang na nagpapakosog” sa iba, kabale an enterong mga kongregasyon.​—Roma 1:​11, 12.

Kun Paano Magigin “Tabang na Nagpapakosog”

8. Anong leksion an manonodan niato sa mapakumbabang pag-admitir ni Pablo kan saiyang pangangaipo nin “tabang na nagpapakosog”?

⁸ Ano an manonodan niato sa pagkasaysay na ini manongod ki Pablo asin sa saiyang limang kapwa trabahador? Helingon ta an sarong partikular na leksion: Kaipuhan an kosog nin boot asin pagsakripisyo tanganing tabangan an iba sa saindang kasakitan. Dugang pa, kaipuhan an kapakumbabaan tanganing admitiron na puedeng mangaipo kita nin tabang sa mga panahon nin personal na kasakitan. Bako sanang inadmitir ni Pablo na nangangaipo sia nin tabang kundi may kabootan niang inako an tabang na iyan asin tinawan nia nin komendasyon an mga nagtao kaiyan. Dai nia ibinilang na tanda nin kaluyahan o pagkasupog an pag-ako nin tabang hale sa iba, asin maninigo na iyo man kita. Kun sasabihon niato na dai niato noarin man kaipuhan an tabang na nagpapakosog, nangangahulogan iyan na kita may kakayahan na labi sa normal na kakayahan nin tawo. Girumdomon, an halimbawa ni Jesus nagpapaheling na maski an sangkap na tawo puedeng kun beses mangaipong makimaherak na tabangan.​—Hebreo 5:7.

9, 10. Ano an marahay na puedeng magin resulta kun inaadmitir nin saro an saiyang pangangaipo nin tabang, asin ano an puedeng magin epekto kaini sa ibang miembro kan pamilya asin kan kongregasyon?

⁹ May marahay na ibubunga kun inaadmitir kan mga nasa responsableng katongdan na sinda igwa nin mga limitasyon asin na sinda nagdedepende sa pagsuportar kan iba. (Santiago 3:2) An siring na pag-admitir nagpapakosog sa relasyon kan mga igwa nin autoridad asin kan mga sakop kan autoridad na iyan, na nagpapaoswag sa maogma asin bukas na komunikasyon. An kapakumbabaan kan mga andam na umako nin tabang nagseserbing praktikal na halimbawa para sa iba na nasa kaparehong situwasyon. Ipinapaheling kaiyan na an mga nangengenot tawo man asin madaling dolokon.​—Eclesiastes 7:20.

¹⁰ Halimbawa, puedeng mas pasil para sa mga aki na akoon an tabang kan saindang mga magurang sa pag-atubang sa mga problema asin sugot kun aram ninda na an saindang mga magurang napaatubang man sa kaagid na mga problema kan sinda aki pa. (Colosas 3:21) Sa siring mabubuksan an linya nin komunikasyon sa pag-oltanan nin magurang asin aki. An sono sa Kasuratan na mga solusyon ikakatao nin mas epektibo asin mas pasil na akoon. (Efeso 6:4) Kaagid kaiyan, mas magigin andam na akoon kan mga miembro kan kongregasyon an tabang nin kamagurangan kun aram ninda na an kamagurangan may inaatubang man na mga problema, takot, asin kapurisawan. (Roma 12:3; 1 Pedro 5:3) Sa giraray, puedeng magkaigwa nin marahay na komunikasyon, puedeng makatao nin sono sa Kasuratan na konseho, asin puedeng magbunga nin pagpapakosog sa pagtubod. Girumdomon, an satong mga tugang na lalaki asin babae nangangaipo nin pagpapakosog ngonyan kisa kasuarin man.​—2 Timoteo 3:1.

11. Taano ta kadakol ngonyan an nangangaipo nin “tabang na nagpapakosog”?

¹¹ Saen man kita nag-eerok, siisay man kita, o ano man an edad niato, kita gabos may panahon na mapapaatubang sa mga tension sa buhay. Kabtang ini kan presenteng kinaban. (Kapahayagan 12:12) An kualidad kan satong pagtubod nababalo dahelan sa siring na mga kamugtakan na nakakaaburido sa pisikal o emosyon. Puedeng lumataw an masakit na mga situwasyon sa trabaho, sa eskuelahan, sa laog kan pamilya, o sa kongregasyon. Grabeng  helang o nakaaging trauma an puedeng magin dahelan. Kun an agom, sarong magurang sa kongregasyon, o sarong katood maboot na magtao nin pagparigon sa boot paagi sa makonsiderasyon na mga tataramon asin nakakatabang na mga gibo​—ay, makagiginhawa nanggad iyan! Tara, iyan siring sa panhaplas sa sarong mahaldat na parte nin kublit! Huli kaini, kun mariparo nindo na an saro sa saindong mga tugang nasa siring na kamugtakan, kamo an magin tabang na nagpapakosog sa saiya. O kun kamo nagagabatan sa sarong nangorognang nakakapurisaw na problema, humagad nin tabang sa mga may kualipikasyon sa espirituwal.​—Santiago 5:​14, 15.

Kun Paano Makakatabang an Kongregasyon

12. Ano an magigibo kan balang saro sa kongregasyon tanganing pakosogon an saiyang mga tugang?

¹² An gabos sa kongregasyon, kabale an mga hoben, may magigibo tanganing pakosogon an iba. Halimbawa, an saindong pagigin regular sa mga pagtiripon asin sa paglilingkod sa langtad dakula an nagigibo tanganing pasarigon an pagtubod kan iba. (Hebreo 10:​24, 25) An saindong pagigin dayaday sa sagradong paglilingkod ebidensia kan saindong kaimbodan ki Jehova asin nagpapaheling na kamo nagdadanay na puka sa espirituwal sa ibong nin mga kasakitan na tibaad kinakaya nindong atubangon. (Efeso 6:18) An pagigin dayaday na iyan puedeng magkaigwa nin nakakapakosog na epekto sa iba.​—Santiago 2:18.

13. Taano ta tibaad magin inaktibo an nagkapira, asin ano an magigibo tanganing tabangan sinda?

¹³ Kun beses, an mga sakit sa buhay o iba pang mga problema puedeng magin dahelan na an iba lumuya o magin inaktibo sa paglilingkod sa langtad. (Marcos 4:​18, 19) Tibaad dai niato naheheling sa mga pagtiripon kan kongregasyon an mga inaktibo. Pero, posibleng may pagkamoot pa sinda sa Dios sa saindang puso. Ano an magigibo tanganing pakosogon an saindang pagtubod? An kamagurangan puedeng tumao nin maboot na tabang paagi sa pagsongko sa sainda. (Gibo 20:35) An ibang miembro kan kongregasyon puedeng hagadan na tumabang man. An siring na mamomoton na mga pagsongko tibaad iyo nanggad an tamang bolong, sabi ngani, tanganing mapakosog giraray an mga maluya an pagtubod.

14, 15. Anong konseho an itinao ni Pablo manongod sa pagpakosog sa iba? Tumao nin halimbawa nin sarong kongregasyon na nag-aplikar kan saiyang konseho.

¹⁴ Sinasadol kita kan Biblia na “magtaram na may pagranga sa mga kalag na nagmomondo nin makuri, suportaran an mga maluya.” (1 Tesalonica 5:14) Tibaad an pagmate kan “mga kalag [na iyan] na nagmomondo nin makuri” nawawara na an saindang kosog nin boot asin dai ninda kayang mapangganahan an mga kaolangan na napapaatubang sa sainda kun mayo nin tabang. Puede daw nindong itao an tabang na iyan? An pananaram na “suportaran an mga maluya” trinadusir na “pangaptan nin higot” o “kapotan” an mga maluya. Pinahahalagahan asin namomotan ni Jehova an gabos niang karnero. Dai nia sinda ibinibilang na sadit an halaga, asin habo nia na an siisay man maparayo. Puede daw nindong tabangan an kongregasyon na “pangaptan nin higot” an mga maluya sa espirituwal sagkod na sinda mas makosog na?​—Hebreo 2:1.

¹⁵ Sinongko nin sarong magurang sa kongregasyon an sarong mag-agom na anom na taon nang inaktibo. An magurang nagsurat: “An maboot asin mamomoton na pagmakolog na ipinaheling sa sainda kan bilog na kongregasyon nagkaigwa nin dakulaon na epekto kaya napahiro sinda kaiyan na  bumalik sa aripompon.” Ano an nagin saboot kan dating inaktibong tugang na babae manongod sa pagsongko kan mga miembro kan kongregasyon? Sinasabi nia ngonyan: “An nakatabang sa samo na magin aktibo giraray iyo na an mga tugang na lalaki na nagsongko samo o an mga tugang na babae na nag-iba sa sainda dai kasuarin man nagin mapaghusgar o mapagkritika sa samo. Imbes, sinda mapagsabot asin nagtao nin pagparigon sa boot gikan sa Kasuratan.”

16. Siisay an pirmeng andam na tumabang sa mga nangangaipo nin pagpapakosog?

¹⁶ Iyo, an sarong sinserong Kristiano naoogmang marhay na magin tabang na nagpapakosog sa iba. Asin mantang nagbabago an mga kamugtakan sa satong buhay, kita mismo tibaad mag-ako man nin nagpapakosog na mga gibo kan satong mga tugang. Pero sa totoo sana, posible na sa sarong panahon nin pangangaipo, mayo kitang makukuang tabang nin tawo. Minsan siring, igwa nin sarong Gikanan nin kosog na pirmeng yaon, saro na pirmeng andam na tumabang​—si Jehova Dios.​—Salmo 27:10.

Si Jehova​—An Pinakagikanan nin Kosog

17, 18. Sa anong mga paagi pinakosog ni Jehova an saiyang Aki, si Jesu-Cristo?

¹⁷ Mantang nakapako sa harigi, si Jesus nag-agrangay: “Ama, sa saimong mga kamot ipinagkakatiwala ko an sakong espiritu.” (Lucas 23:46) Dangan nagadan sia. Pirang oras sana bago kaiyan, sia inarestar asin an pinakadayupot niang mga katood binayaan sia asin nagdurulag huli sa takot. (Mateo 26:56) Nawalat si Jesus na nagsosolo apuera sa sarong Gikanan nin kosog​—an saiyang langitnon na Ama. Pero, an saiyang pagtitiwala ki Jehova bakong sayang. An kaimbodan ni Jesus sa saiyang Ama binalosan paagi sa maimbod na pagsuportar sa saiya ni Jehova mismo.​—Salmo 18:25; Hebreo 7:26.

¹⁸ Durante kan ministeryo ni Jesus sa daga, itinao ni Jehova sa saiyang Aki an kaipuhan nia tanganing mapagdanay an integridad sagkod sa saiyang kagadanan. Halimbawa, pakatapos mismo na bautismohan si Jesus, na nagin tanda kan kapinonan kan saiyang ministeryo, nadangog nia an tingog kan saiyang Ama na nagpapahayag nin pag-oyon asin pagkompirmar kan pagkamoot Nia sa saiya. Kan kaipuhan ni Jesus an suporta, nagsugo si Jehova nin mga anghel tanganing pakosogon sia. Kan atubangon ni Jesus an pinakamasakit na pagbalo sa saiya sa katapusan kan saiyang daganon na buhay, may pag-oyon na dinangog ni Jehova an saiyang mga pagngayongayo asin pakimaherak. Segurado na an gabos na ini nagin tabang na nagpakosog ki Jesus.​—Marcos 1:​11, 13; Lucas 22:43.

19, 20. Paano kita makakaseguro na papakosogon kita ni Jehova sa panahon nin satong pangangaipo?

¹⁹ Boot ni Jehova na magin man satong pangenot na Gikanan nin kosog. (2 Cronica 16:9) An tunay na Gikanan nin gabos na dinamikong enerhiya asin makosog na kapangyarihan puedeng magin tabang na nagpapakosog para sa sato sa oras nin satong pangangaipo. (Isaias 40:26) An guerra, kadukhaan, helang, kagadanan, o an sato mismong mga pagkabakong sangkap puedeng magtao sa sato nin grabeng sakit. Kun an mga kasakitan sa buhay garo baga nakakalunos siring sa ‘makosog na kaiwal,’ si Jehova puedeng magin satong kosog asin puersa. (Salmo 18:17; Exodo 15:2) Igwa sia nin mapuersang tabang para sa sato​—an saiyang banal na espiritu. Paagi sa saiyang espiritu, si Jehova puedeng magtao nin “puersa sa napapagal” tanganing sia ‘makalayog na may mga pakpak na siring sa agila.’​—Isaias 40:​29, 31.

²⁰ An espiritu nin Dios an pinakamakosog na puersa sa uniberso. Sinabi ni Pablo: “Igwa ako kan kosog para sa gabos na bagay huli sa saiya na nagtatao nin puersa sa sako.” Iyo, an satong mamomoton na langitnon na Ama puedeng tawan kita nin “puersa na labi sa ordinaryo” tanganing matagalan niato an gabos na makolog na problema sagkod na gibohon na niang “bago an gabos na bagay” sa saiyang ipinanugang Paraiso na haranihon na.​—Filipos 4:13; 2 Corinto 4:7; Kapahayagan 21:​4, 5.

[Nota sa Ibaba]

Natatandaan daw Nindo?

• Paano nagin “tabang na nagpapakosog” ki Pablo an mga tugang sa Roma?

• Sa anong mga paagi kita puedeng magin “tabang na nagpapakosog” sa kongregasyon?

• Paanong si Jehova an satuyang Pinakagikanan nin kosog?

[Mga Hapot Para sa Pag-adal]

[Ritrato sa pahina 18]

An mga tugang nagin “tabang na nagpapakosog” ki Pablo paagi sa pagtao sa saiya kan saindang maimbod na suporta, pagparigon sa boot, asin personal na mga serbisyo

[Ritrato sa pahina 21]

An kamagurangan nangengenot sa pagpakosog sa aripompon