An Paghingoa kan Katawohan na Paogmahon an Dios

“DAI noarin man nagkaigwa nin arin man na sosyedad nin tawo na dai nagin kabtang an Dios, na sa parate bilang nagkokontrol asin kaglalang. Totoo iyan dawa sa naghihingakong sekular na mga sosyedad.” Iyan an sabi ni John Bowker sa saiyang librong God​—A Brief History. Minsan paano, an paghingoang manompongan an Dios asin akoon an saiyang pag-oyon pirme nang pundamental na kabtang nin gawe-gawe nin tawo. Sa bilog na kinaban, dakol an may sinserong pagmawot na paogmahon an Dios. Siempre, nagkakalaenlaen kun paano ninda pinagmamaigotan na gibohon ini oyon sa mga paniniwala ninda.

May mga naniniwala na kaipuhan sanang mamuhay nin tanos tanganing maako an pag-oyon nin Dios. An iba nagsasaboot na nakukua ninda an pag-oyon nin Dios paagi sa pag-abuloy sa mga dukha. Dugang pa, an relihiosong mga seremonya asin ritual importante sa dakol na tawo.

Sa ibong na lado, may mga naniniwala na an Dios dai ninda kayang maabot​—harayong marhay o sibot na marhay sa ibang bagay tanganing tawan nin atension an ordinaryong mga tawo. An pilosopong si Epicuro kan suanoy na Grecia naniniwala daa na ‘an mga dios harayong marhay tanganing makagibo nin maraot o marahay sa saindo.’ Minsan siring, relihioso an dakol na may arog kaiyan na saboot. An nagkapira tibaad magdolot pa ngani nin mga atang asin maggibo nin mga ritual tanganing sirosiroon an gadan nang mga apoon ninda.

Ano sa paghona nindo? Talaga daw na naririsa nin Dios an satong mga paghihingoa na maako an saiyang pag-oyon? Posible daw na mapahiro niato an boot nin Dios asin mapaogma sia?

 [Picture Credit Line sa pahina 2]

COVER: Courtesy of ROE/Anglo-Australian Observatory, photograph by David Malin