An mga May Edad Na​—Mahalagang mga Miembro kan Satong Kristianong Kasararoan nin Magturugang

“An mga nakatanom sa harong ni Jehova . . . mamumurak. Sinda padagos pang magtatalubo sa panahon nin pagkaubanon.”​—SALMO 92:​13, 14.

1. Ano an pagheling nin dakol na tawo sa mga may edad na?

NAMOMOTAN ni Jehova an gabos niang maimbod na lingkod, kabale an mga may edad na. Minsan siring, segun sa sarong nasyonal na pagkalkulo, kada taon haros kabangang milyon na may edad na sa Estados Unidos an minamaltrato o pinapabayaan. An kaagid na mga report hale sa bilog na kinaban nagpapaheling na sarong lakop sa globong problema an pagmaltrato sa mga may edad na. Sinasabi nin sarong organisasyon na an pinakadahelan iyo “an lakop na aktitud nin dakol na tawo . . . na an mga gurang nakalampas na sa saindang pagigin may pakinabang, bako nang produktibo asin nakadepende nang marhay sa iba.”

2. (a) Ano an pagheling ni Jehova sa saiyang maimbod na mga lingkod na may edad na? (b) Anong nakakaogmang paglaladawan an maheheling niato sa Salmo 92:12-15?

² Pinapahalagahan ni Jehova Dios an saiyang maimbod na mga lingkod na may edad na. Nakapokus sia sa ‘satong pagkatawo sa laog’​—sa satong kamugtakan sa espirituwal​—imbes na sa satong pisikal na mga limitasyon. (2 Corinto 4:16) Sa saiyang Tataramon, an Biblia, maheheling niato an minasunod na nakakaogmang pag-asegurar: “An matanos mamumurak arog kan poon nin palma; arog kan sedro sa Libano, sia madakula. An mga nakatanom sa harong ni Jehova, sa mga patyo kan samong Dios, sinda mamumurak. Sinda padagos pang magtatalubo sa panahon nin pagkaubanon, sinda magpapadagos na mataba asin presko, tanganing isaysay na si Jehova tanos.” (Salmo 92:12-15) Ihahayag kan pag-estudyar sa mga bersikulong ini an mga aspekto kan mahalagang bagay na ikakakontribwir nindong mga gurang sa Kristianong kasararoan nin magturugang.

‘Nagtatalubo sa Panahon nin Pagkaubanon’

3. (a) Taano ta iinaagid sa poon nin mga palma an mga matanos? (b) Paano puedeng ‘magtalubo sa panahon nin pagkaubanon’ an mga gurang?

³ An mga matanos iinaagid kan salmista sa mga poon nin palma na ‘nakatanom sa mga patyo kan samong Dios.’ Sinda ‘padagos na nagtatalubo sa panahon nin pagkaubanon.’ An saro pang bersion nagsasabi: “Sa pagkagurang sinda namumunga pa man giraray.” (Tanakh) Bako daw na minaoyon kamo na nakakaparigon sa boot na isipon ini? An magayon asin tanos na mga poon nin palma komun nang maheheling sa mga patyo nin mga taga Sirangan kaidtong mga panahon kan Biblia. Apuera sa halaga kaiyan bilang dekorasyon, pinapahalagahan an mga palma huli sa abundang bunga kaiyan, na an nagkapirang poon kaiyan dagos-dagos na namumunga sa laog nin labing sanggatos na taon. * Paagi sa pagdadanay  na marigon na nakatanom sa tunay na pagsamba, kamo ‘makakapadagos man na namumunga sa lambang marahay na gibo.’​—Colosas 1:10.

4, 5. (a) Kaipuhan na mamunga nin anong mahalagang mga bunga an mga Kristiano? (b) Tumao nin mga halimbawa sa Kasuratan nin mga gurang na namunga kan “bunga nin mga ngabil.”

⁴ Inaasahan ni Jehova an mga Kristiano na mamunga kan “bunga nin mga ngabil”​—mga tataramon na itinataram sa pag-omaw sa saiya asin sa saiyang mga katuyohan. (Hebreo 13:15) Aplikado daw ini sa saindo bilang sarong gurang? Iyo nanggad.

⁵ May mga halimbawa sa Biblia nin mga gurang na daing takot na nagpatotoo sa ngaran asin mga katuyohan ni Jehova. Lampas na si Moises sa saiyang “pitong polong taon” kan sugoon sia ni Jehova bilang saiyang propeta asin representante. (Salmo 90:10; Exodo 4:10-17) An pagkagurang dai nakapogol ki propeta Daniel na magtao nin daing takot na patotoo mapadapit sa soberaniya ni Jehova. Si Daniel posibleng labi nang 90 anyos kan ipaapod sia ni Belsasar tanganing interpretaron an misteryosong surat-kamot sa lanob. (Daniel, kapitulo 5) Asin kumusta man an gurang nang si apostol Juan? Sa pagtatapos kan saiyang halawig na karera, sia nabilanggo sa isla nin Patmos “huli sa pagtaram dapit sa Dios asin pagpatotoo ki Jesus.” (Kapahayagan 1:9) Posibleng marhay na matatandaan nindo an dakol na iba pang personahe sa Biblia na namunga kan “bunga nin mga ngabil” kan sinda gurang na.​—1 Samuel 8:​1, 10; 12:2; 1 Hade 14:​4, 5; Lucas 1:​7, 67-79; 2:22-32.

6. Paano ginagamit ni Jehova an “gurang na mga lalaki” tanganing maghula sa huring mga aldaw na ini?

⁶ Kinokotar an Hebreong propeta na si Joel, si apostol Pedro nagpahayag: “‘Sa huring mga aldaw,’ an sabi nin Dios, ‘ibububo ko an iba sa sakong espiritu sa gabos na klase nin laman [kabale an “gurang na mga lalaki”], . . . asin sinda maghuhurula.’” (Gibo 2:​17, 18; Joel 2:28) Huli kaiyan, sa huring mga aldaw na ini, ginagamit ni Jehova an may edad nang mga miembro kan grupong linahidan asin kan “ibang karnero” tanganing ipahayag an saiyang mga katuyohan. (Juan 10:16) An nagkapira kaini maimbod na namumunga nin mga bunga kan Kahadean sa laog nin dakol nang dekada.

7. Ipaheling kun paano an mga gurang nagpapadagos na mamunga nin mga bunga kan Kahadean apisar kan pisikal na mga limitasyon.

⁷ Isipon nindo si Sonia, na nagin bilog na panahon na parahayag kan Kahadean kan 1941. Sa ibong kan haloy nang tinitios na pabalikbalik na helang, sia regular na namayo nin mga pag-adal sa Biblia sa saiyang harong. “Parte na kan buhay ko an paghuhulit kan maogmang bareta,” an paliwanag ni Sonia. “An totoo, iyan na an buhay ko. Habo kong pumondo.” Dai pa sana nahahaloy, ihiniras ni Sonia asin kan saiyang tugang, si Olive, an mensahe nin paglaom kan Biblia ki Janet, sarong pasyente na may helang na ikakagadan, na nakamidbid ninda sa kuartong halatan sa sarong ospital. An ina ni Janet, na debotong Katoliko, naghangang marhay sa mamomoton na interes na ini na ipinaheling sa saiyang aki kaya inako nia an alok na pag-adal sa Biblia asin ngonyan marahayon an pag-oswag sa espirituwal. Puede daw nindong aprobetsaran an kaparehong mga oportunidad tanganing mamunga nin mga bunga kan Kahadean?

8. Paano ipinaheling kan naggugurang nang si Caleb an saiyang pagtitiwala ki Jehova, asin paano maaarog nin may edad nang mga Kristiano an saiyang halimbawa?

⁸ Paagi sa pagpapadagos na may kosog nin boot sa paghuhulit kan Kahadean apisar kan mga limitasyon nin pagkagurang, sinusundan kan gurang nang mga Kristiano an mga gira kan maimbod na Israelitang si Caleb, na uminiba ki Moises sa kaawagan sa laog nin apat na dekada. Si Caleb 79 anyos kan bumalyo sia sa Salog nin Jordan pasiring sa Dagang Panuga. Pakatapos na makipaglaban kaiba kan mapangganang hukbo nin Israel sa laog nin anom na taon, kontento na sana kutana sia sa  mga naginibo nia. Alagad dai, may kosog nin boot na hinagad niang itao sa saiya an masakit na asignasyon na bihagon an “darakulang siudad na nakukutaan” sa mabukid na rehion nin Juda, sarong lugar na ineerokan kan mga Anaquin, mga lalaking pambihira kadarakula. Sa tabang ni Jehova, ‘pinalayas nanggad sinda ni Caleb, siring man sana kan ipinanuga ni Jehova.’ (Josue 14:9-14; 15:​13, 14) Makakasierto kamo na nasa kaibahan nindo si Jehova, kun paanong kaidto nasa kaibahan sia ni Caleb, mantang padagos kamong namumunga nin mga bunga kan Kahadean maski gurang na. Asin kun kamo magdadanay na maimbod, tatawan nia kamo nin lugar sa saiyang ipinanugang bagong kinaban.​—Isaias 40:29-31; 2 Pedro 3:13.

“Sinda Magpapadagos na Mataba Asin Presko”

9, 10. Paano nagdadanay na makosog sa pagtubod an gurang nang mga Kristiano asin paano ninda napagdadanay an saindang espirituwal na kaigotan? (Helingon an kahon sa pahina 13.)

⁹ Itinotokdo an atension sa pagigin mabunga kan may edad nang mga lingkod ni Jehova, an salmista nag-awit: “An matanos mamumurak arog kan poon nin palma; arog kan sedro sa Libano, sia madakula. Sinda padagos pang magtatalubo sa panahon nin pagkaubanon, sinda magpapadagos na mataba asin presko.”​—Salmo 92:12, 14.

¹⁰ Paano nindo mapagdadanay an saindong espirituwal na kaigotan minsan ngani naggugurang na? An sekreto sa nagpapadagos na gayon kan poon nin palma iyo an dai nauubos na suplay nin preskong tubig. Kaagid kaiyan, puede kamong kumua nin pansustenir sa mga tubig nin katotoohan sa Biblia paagi sa saindong pag-adal sa Tataramon nin Dios asin paagi sa pakikiasosyar sa saiyang organisasyon. (Salmo 1:1-3; Jeremias 17:​7, 8) An saindong espirituwal na kakosogan an minagibo sa saindo na mahalagang marhay sa mga kapagtubod. Helinga nindo kun paano ini nagin totoo sa kaso kan may edad nang Halangkaw na Saserdoteng si Joiada.

11, 12. (a) Ano an mahalagang marhay na nagin papel ni Joiada sa kasaysayan kan kahadean nin Juda? (b) Paano ginamit ni Joiada an saiyang impluwensia tanganing paoswagon an tunay na pagsamba?

¹¹ Si Joiada posibleng labi nang sanggatos anyos kan agawon kan ambisyosang si Reyna Atalia an pamamahala sa Juda paagi sa paggadan sa sadiri niang mga makoapo. Ano an puedeng gibohon kan may edad nang si Joiada? Anom na taon na itinago nindang mag-agom sa templo an solamenteng natatadang buhay na magmamana kan pagkahade, si Joas. Dangan, sa sarong pambihirang paghiro, iprinoklamar ni Joiada bilang hade an siete anyos na si Joas asin ipinagadan si Atalia.​—2 Cronica 22:10-12; 23:1-3, 15, 21.

¹² Bilang nag-aataman sa hade, ginamit ni Joiada an saiyang impluwensia tanganing paoswagon an tunay na pagsamba. “Nakipaghaman [sia] nin tipan sa pag-oltanan nia asin kan bilog na banwaan saka kan hade na sinda magdadanay bilang banwaan ni Jehova.” Sa pagboot ni Joiada, tinumpag kan banwaan an harong kan falsong dios na si Baal asin hinale an mga altar, imahen, asin saserdote kaiyan. Sa paggiya man ni Joiada ibinalik ni Joas an mga serbisyo sa templo asin ginibo an dakol na kinakaipuhan na paghirahay sa templo. “Si Joas padagos na naggibo kan tama sa pagheling ni Jehova sa gabos niang aldaw na tinotokdoan sia ni Joiada na saserdote.” (2 Cronica 23:​11, 16-19; 24:11-14; 2 Hade 12:2) Kan magadan sia sa edad na 130, si Joiada tinawan kan pambihirang onra na ilobong sa kaibahan kan mga hade huli ta “naggibo sia nin marahay sa Israel asin sa tunay na Dios patin sa Saiyang harong.”​—2 Cronica 24:​15, 16.

13. Paano ‘makakagibo nin marahay sa tunay na Dios patin sa saiyang harong’ an gurang nang mga Kristiano?

¹³ Tibaad dahel sa saindong maluyang salud o iba pang kamugtakan limitado an magigibo nindo tanganing paoswagon an tunay na pagsamba. Dawa siring, mahihimo pa man giraray nindo na ‘gumibo nin marahay sa tunay na Dios patin sa saiyang harong.’ Puede nindong ipaheling an kaigotan sa espirituwal na harong ni Jehova paagi sa pag-atender asin pagpartisipar sa mga pagtiripon kan kongregasyon patin paagi sa pakikikabtang sa ministeryo sa langtad sagkod na posible. An saindong andam na pag-ako kan hatol sa Biblia asin an saindong maimbod na pagsuportar sa “maimbod asin mapagmansay na oripon” patin sa kongregasyon magkakaigwa nin nakakapakosog na epekto sa Kristianong kasararoan nin magturugang. (Mateo 24:45-47) Puede man nindong dagkahon an mga  kapwa parasamba “sa pagkamoot asin sa marahay na mga gibo.” (Hebreo 10:​24, 25; Filemon 8, 9) Asin kamo magigin bendisyon sa iba kun magawe kamo kaoyon kan hatol ni apostol Pablo: “An mga gurang na lalaki magin tamang-tama sana sa mga pag-uugale, pormal, toltol an isip, makosog sa pagtubod, sa pagkamoot, sa pakatagal. An mga gurang na babae magin man magalang sa hiro, bakong mga parapakaraot, ni oripon nin dakol na arak, mga paratokdo nin karahayan.”​—Tito 2:2-4.

14. Ano an puedeng gibohon nin haloy nang Kristianong mga paraataman tanganing paoswagon an tunay na pagsamba?

¹⁴ Dakol na taon na daw kamong naglilingkod bilang magurang sa kongregasyon? “Gamiton nindo nin daing kaimotan an kadonongan na nakua nindo sa paggurang,” an sadol nin sarong haloy nang magurang sa kongregasyon. “Magdelegar nin paninimbagan, asin ihiras an saindong eksperyensia sa iba na gustong makanood . . . Aramon nindo an potensial nin iba. Pataluboon asin kultibaron nindo iyan. Magplano para sa ngapit.” (Deuteronomio 3:​27, 28) An saindong tunay na interes sa padagos an pag-oswag na gibohon pan-Kahadean magbubunga nin dakol na bendisyon para sa iba sa satong Kristianong kasararoan nin magturugang.

“Isaysay na si Jehova Tanos”

15. Paano ‘isinasaysay kan may edad nang mga Kristiano na si Jehova tanos’?

¹⁵ Magayagayang inootob kan gurang nang mga lingkod nin Dios an saindang paninimbagan na “isaysay na si Jehova tanos.” Kun kamo may edad nang Kristiano, an saindong mga tataramon asin gibo puedeng magpaheling sa iba na ‘si Jehova an saindong Gapo, na sa saiya mayo nin pagkabakong matanos.’ (Salmo 92:15) An poon nin palma nagtatao nin silensiong patotoo sa daing kabaing na mga kualidad kan Kaglalang kaiyan. Alagad tinawan kamo ni Jehova kan pribilehio na magpatotoo manongod sa saiya sa mga nag-aako ngonyan sa tunay na pagsamba. (Deuteronomio 32:7; Salmo 71:​17, 18; Joel 1:​2, 3) Taano ta mahalaga ini?

16. Anong halimbawa sa Biblia an nagpapaheling kan halaga nin ‘pagsaysay na si Jehova tanos’?

¹⁶ Kan an Israelitang namomoon na si Josue “gurang na asin haloy na sa mga aldaw,” “inapod [nia] an bilog na Israel, an gurang na mga lalaki kaiyan asin an mga namamayo kaiyan asin an mga hokom kaiyan patin an mga opisyal kaiyan,” asin ipinagirumdom nia sa sainda an tanos na mga ginibo nin Dios. Sinabi nia: “Mayo ni sarong tataramon sa gabos na marahay na tataramon na  isinabi sa saindo ni Jehova na saindong Dios an nasudya. Iyan gabos naotob para sa saindo.” (Josue 23:​1, 2, 14) Sa laog nin kadikit na panahon, pinakosog kan mga tataramon na ini an desisyon kan banwaan na magdanay na maimbod. Minsan siring, pagkagadan ni Josue, “saro naman na kapag-arakian an nagpoon na lumataw . . . na dai nakakamidbid ki Jehova o nakakaaram kan ginibo nia para sa Israel. Asin an mga aki ni Israel naggiribo kan maraot sa mga mata ni Jehova asin nagrilingkod sa mga Baal.”​—Hokom 2:8-11.

17. Ano an mga ginibo ni Jehova para sa saiyang banwaan sa presenteng mga panahon?

¹⁷ An integridad kan Kristianong kongregasyon sa presenteng panahon dai nakadepende sa berbal na patotoo nin gurang nang mga lingkod nin Dios. Pero, an satong pagtubod ki Jehova asin sa saiyang mga panuga napapakosog kun nadadangog mismo niato an mga pagkasaysay kan “dakulang gibo” na ginibo nia para sa saiyang banwaan sa huring mga aldaw na ini. (Hokom 2:7; 2 Pedro 1:16-19) Kun kamo dakol nang taon na asosyado sa organisasyon ni Jehova, tibaad nagigirumdoman nindo an panahon kaidto na kadikiton pa an mga parabalangibog kan Kahadean sa saindong lugar o nasyon o kaidtong grabe an pagtumang sa paghuhulit. Sa pag-agi nin panahon, naheling nindo na hinale ni Jehova an nagkapirang olang asin ‘pinarikas’ an pag-oswag kan Kahadean. (Isaias 54:17; 60:22) Naobserbaran nindo an ginibong paglinaw sa mga katotoohan sa Biblia asin naheling mismo nindo an progresibong pagbabago sa naheheling na kabtang kan organisasyon nin Dios. (Talinhaga 4:18; Isaias 60:17) Hinihingoa daw nindo na pakosogon an iba paagi sa pag-estorya sa sainda kan saindong eksperyensia may koneksion sa tanos na mga ginibo ni Jehova? Magkakaigwa nanggad ini nin positibo asin nakakapakosog na epekto sa Kristianong kasararoan nin magturugang!

18. (a) Ipaheling an panhaloyan na epekto nin ‘pagsaysay sa iba na si Jehova tanos.’ (b) Paano nindo personal na naeksperyensiahan an pagigin tanos ni Jehova?

¹⁸ Kumusta man an mga pangyayari na naeksperyensiahan nindo an mamomoton na pagmalasakit asin paggiya ni Jehova sa saindong personal na buhay? (Salmo 37:25; Mateo 6:33; 1 Pedro 5:7) An sarong may edad nang tugang na babae na an ngaran Martha pirmeng nagpaparigon sa boot nin iba paagi sa pagsabing: “Ano man an mangyari, nungka nindong bayaan si Jehova. Sia an masustenir sa saindo.” An sadol na ini nagkaigwa nin hararom na epekto ki Tolmina, saro sa mga inaadalan sa Biblia ni Martha na nabautismohan kaidtong kapinonan kan mga taon nin 1960. “Kan magadan an agom ko,” an nagigirumdoman ni Tolmina, “nanluyang marhay an boot ko, alagad an mga tataramon na iyan nagpangyari sa sako na magin determinado na dai pagpaltahan dawa sarong pagtiripon. Asin talagang pinakosog ako ni Jehova na magpadagos.” An sadol man na iyan an itinatao ni Tolmina sa dakol niang inaadalan sa Biblia sa nag-aging mga taon. Tunay nanggad, paagi sa pagtao nin pamparigon sa boot asin pag-estorya kan tanos na mga ginibo ni Jehova, dakula an magigibo nindo tanganing pakosogon an pagtubod nin mga kapagtubod.

 Pinapahalagahan ni Jehova an Maimbod na mga Gurang

19, 20. (a) Paano minamansay ni Jehova an mga aktibidad kan saiyang mga lingkod na may edad na? (b) Ano an totokaron sa sunod na artikulo?

¹⁹ An presenteng kinaban, na midbid sa kadaihan nin pagpasalamat, mayo nin panahon para sa mga may edad na. (2 Timoteo 3:​1, 2) Kun sinda nagigirumdoman, iyan parateng huli sa saindang nakaaging mga naginibo​—kun ano sinda kaidto, imbes na kun ano sinda ngonyan. Sa kabaliktaran, an Biblia nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.” (Hebreo 6:10) Siempre, ginigirumdom ni Jehova Dios an saindong nakaaging rekord nin maimbod na mga gibo. Alagad pinapahalagahan man nia kamo sa kun ano an padagos nindong ginigibo sa paglilingkod sa saiya. Iyo, minamansay nia an maimbod na mga gurang bilang produktibo, makosog sa espirituwal, asin maigot na mga Kristiano​—sarong buhay na patotoo sa saiyang kapangyarihan.​—Filipos 4:13.

²⁰ Kapareho daw kan pagheling ni Jehova an pagheling nindo sa gurang nang mga miembro kan satong Kristianong kasararoan nin magturugang? Kun iyo, mapapahiro kamo na ipaheling an saindong pagkamoot sa sainda. (1 Juan 3:18) Totokaron kan sunod na artikulo an nagkapirang praktikal na paagi nin pagpaheling kan siring na pagkamoot sa pag-asikaso sa saindang mga pangangaipo.

[Nota sa Ibaba]

Ano an Isisimbag Nindo?

• Paano “namumunga” an mga may edad na?

• Taano ta sarong mahalagang bagay an espirituwal na kakosogan kan gurang nang mga Kristiano?

• Paano ‘ikakasaysay kan mga gurang na si Jehova tanos’?

• Taano ta pinapahalagahan ni Jehova an saiyang haloy nang mga lingkod?

[Mga Hapot Para sa Pag-adal]

[Kahon sa pahina 13]

Kun Paano Sinda Nagdanay na Makosog sa Pagtubod

Ano an nakatabang sa haloy nang mga Kristiano na magdanay na makosog sa pagtubod asin mapagdanay an saindang espirituwal na kaigotan? Uya an sinabi nin nagkapira:

“Mahalagang marhay an pagbasa sa mga teksto na nakapokus sa satong relasyon ki Jehova. Sa kadaklan na banggi, binabasa ko nin makosog an Salmo 23 asin 91.”​—Olive, nabautismohan kan 1930.

“Sinesegurado ko na magin presente sa kada pahayag sa bautismo asin maghinanyog na marhay, na garo baga bautismo ko mismo iyan. Nagin mahalagang lakdang sa pagdadanay na maimbod an pagpapadanay na malinaw sa isip an sakong pagdusay.”​—Harry, nabautismohan kan 1946.

“Mahalagang marhay an pamimibi aroaldaw​—na pirmeng hinahagad an tabang, proteksion, asin bendisyon ni Jehova, na ‘ginigirumdom sia sa gabos niatong dalan.’” (Talinhaga 3:​5, 6)​—Antonio, nabautismohan kan 1951.

“Napapakosog giraray an sakong determinasyon na magdanay na maimbod sa saiya kun dinadangog ko an mga eksperyensia kan mga haloyon nang naglilingkod nin maimbod ki Jehova sagkod ngonyan.”​—Joan, nabautismohan kan 1954.

“Mahalaga na dai magin halangkaw an pagheling sa sadiri. An gabos na yaon sa sato dahel sa dai na kutana maninigong kabootan nin Dios. An pagkaigwa kan punto de vistang ini nagpapadanay sa sato na nakaturuhok sa tamang direksion para sa espirituwal na kakanon na kaipuhan tanganing makatagal sagkod sa katapusan.”​—Arlene, nabautismohan kan 1954.

[Ritrato sa pahina 11]

Namumunga nin mahalagang mga bunga kan Kahadean an mga may edad na

[Ritrato sa pahina 14]

Mahalagang bagay an espirituwal na kakosogan kan mga may edad na