Resipe Para sa Halawig Asin Maogmang Buhay

“GUSTO kan gabos na magkaedad; alagad mayo nin siisay man na gustong gumurang.” Iyan an sabi kan sarong kasabihan. Inaantisipar kan dakol na madali nang magretiro an pagkaigwa nin mas dakol na panahon asin mas dikit na paninimbagan. Pero, natatakot sindang magin daing direksion asin daing serbi. Takot man sinda sa pagsolo, kamondoan, asin pagluya nin salud.

Kun siring, ano an sekreto sa maogmang buhay? An marahay na mga katood asin sarong mamomoton na pamilya nakakatabang sa pagtao nin kaogmahan pareho sa mga hoben asin gurang. Alagad bakong an ikinakakontribwir kan iba sa buhay nin sarong may edad na an pinakaimportante. An mas importante pa ngani iyo an kun ano an nagigibo nin sarong mas may edad na para sa iba.

Ipinaparisa nin sarong panhaloyan na pag-adal sa 423 na may edad nang mag-agom na an “pagtabang sa buhay nin ibang tawo puedeng magpalawig sa sato mismong buhay.” Si Stephanie Brown, na naggibo kan pag-adal, nagpapaliwanag: “An mga konklusyon na ini nagsusuherir na bakong an nakukua niato sa mga relasyon an kapakipakinabang na marhay; kundi kun ano an itinatao niato.” An siring na pagtatao puedeng kaiba an pagtabang sa iba sa mga gibohon sa harong, pag-asikaso sa mga aki, pagigin nasusugosugo, pagtao nin transportasyon, o paghinanyog sa saro na nangangaipo nin makakaolay.

Mga 2,000 na taon na an nakaagi, si Jesu-Cristo nagsabi: “Igwang orog na kaogmahan sa pagtao kisa pag-ako.” (Gibo 20:35) An resipe para sa halawig asin maogmang buhay bakong dakulang kuarta sa bangko o mga terapi asin dieta na panlaban sa paggurang. Imbes, iyan iyo an pagdadanay na aktibo asin pagtao nin panahon asin kosog nin saro para sa pagpaoswag sa kualidad kan buhay nin iba.

Minsan siring, orog pa sa pagtatao an kaipuhan tanganing maligtas kita sa paggurang, helang, asin kagadanan. An Kahadean nin Dios sana an mahale kan siring na mga bagay. Sa irarom kan pamamahala kaiyan, an helang mawawara na asin dawa an “kagadanan mawawara na.” (Kapahayagan 21:​3, 4; Isaias 33:24) Sa katunayan, an makinuyog na mga tawo mabubuhay sagkod lamang na maogma sa sarong paraisong daga. (Lucas 23:43) An Mga Saksi ni Jehova naoogmang itao sa iba an basado sa Bibliang resipe na ini para sa halawig asin maogmang buhay.