Bareta kan mga Parabalangibog kan Kahadean

‘Bumalyo Ka Asin Tabangi Kami’

KAN Hulyo 2000, may pangagdang ginibo sa Austria, Alemania, asin Switzerland na an mga Saksing nagtataram nin Aleman bumalyo sa Bolivia. Taano? Huli ta sa napapasuway na mga kolonya nin mga paraoma sa palibot kan Santa Cruz, Bolivia, sagkod sa distansiang 300 kilometros, an mga Menonitang nagtataram nin Aleman nagpapaheling nin makosog na interes sa Biblia.

Mga 140 Saksi an naghimate sa pangagda. An nagkapira nagduman sa laog nin pira sanang semana, an iba sa laog nin sangtaon o labi pa. Sa paggibo kaiyan, ipinaheling ninda an aktitud na kapareho kan sa mga misyonero kan enot na siglo na naghimate sa pangagda na: “Bumalyo ka pasiring sa Macedonia asin tabangi kami.”​—Gibo 16:​9, 10.

Kumusta an paghuhulit sa teritoryong iyan? Nagpapaliwanag an sarong magurang sa lokal na kongregasyon: “An pagbiahe pasiring sa saro kan 43 na kolonya nin mga Menonita puedeng umabot nin walong oras sa mga tinampong daga sakay nin sasakyan na duwa an kambio. An pagdalaw sa mas hararayong lugar sa parate nangangaipo nin apat na aldaw asin nin pagtorog sa mga tolda nin nagkapirang banggi. Alagad bawi man an paghihingoa, huli ta dai pa noarin man nakadangog kan maogmang bareta an siisay man sa mga tawong ini.”

Sa primero, dakol sa mga Menonita an habo sa mga pagdalaw na ini. Alagad an paorootrong mga paghihingoa nakatabang sa sainda na marealisar an iinaalok kan mga Saksi. Halimbawa, an sarong paraoma nagsabi na sangtaon na siang nagbabasa kan magasin na Awake! Dangan idinugang nia: “Aram ko na dakol na tawo digdi an dai oyon sa sinasabi nindo, alagad nagtutubod ako na iyan an katotoohan.” Sa saro pang kolonya, nagsabi an sarong lalaki: “An nagkapira sa sakong kataraed nagsasabi na kamo falsong mga propeta, an iba man nagsasabi na yaon saindo an katotoohan. Gusto kong aramon ko mismo iyan.”

Igwa na ngonyan nin sarong Aleman na kongregasyon sa Bolivia, na may 35 parahayag, kaiba an 14 bilog na panahon na mga paraebanghelyo. Sa presente, 14 dating Menonita an nagin mga parabalangibog kan Kahadean, asin 9 na iba pa an regular na nag-aatender sa mga pagtiripon. An sarong gurang na lalaki na nabautismohan pa sana nagsabi: “Malinaw na naheheling niamo an paggiya ni Jehova. Nagsugo sia nin eksperyensiado asin nagtataram nin Aleman na mga tugang na lalaki asin babae tanganing tabangan kami. Nagpapasalamat kaming marhay.” An 17 anyos na aking babae kan lalaking iyan, na bautisado na man, nagsabi pa: “Nakakaolakit an entusiasmo kan hoben na mga tugang na lalaki asin babae na minapasiring digdi. An kadaklan sa sainda payunir, na ginagamit an saindang panahon asin kuarta sa pagtabang sa iba. Iyan nagpapahiro sa sako na gibohon an arog man kaiyan.”

Totoo nanggad, an mga naghingoang “bumalyo” tanganing tumabang nag-aani nin dakulang kagayagayahan asin satispaksion.