Paggibo kan Marahay sa mga Panahon nin Pangangaipo

“GUMIBO kita kan marahay sa gabos,” an sadol ni apostol Pablo, “alagad orog na sa mga may relasyon sa sato sa pagtubod.” (Galacia 6:10) Maigot na hinihingoa kan Mga Saksi ni Jehova sa bilog na kinaban na iaplikar an prinsipyong iyan sa saindang buhay, an paggibo kan marhay sa gabos, partikularmente sa mga kapagtubod ninda. Paorootrong naheheling ini sa mga panahon nin pangangaipo. Estudyaran niato an nakaagi pa sanang mga halimbawa hale sa tolong nasyon.

Kan Disyembre 2002, tuminama sa Guam an sarong makosog na bagyo, na may doros na labing 300 kilometros por ora. Dakol na harong an naraot, an nagkapira biyong nagaba. Tolos na inorganisar kan lokal na kongregasyon an mga grupong malinig tanganing tumabang sa mga pamilyang Saksi na naapektaran na marhay. An sangang opisina kan Guam nagsuplay nin materyales asin trabahador tanganing hirahayon an naraot na mga harong, asin an sangang opisina kan Hawaii nagtao nin suporta. Sa laog nin pira sanang semana, nag-abot an sarong grupo nin mga karpintero hale sa Hawaii tanganing tumabang sa gibohon na pagtogdok liwat, asin tanganing tumabang sa sainda, an nagkapirang lokal na tugang nagbakasyon sa saindang mga trabaho. An espiritu nin magayagayang kooperasyon sarong patotoo sa bilog na komunidad.

Sa sarong nasa gilid na banwaan kan siudad nin Mandalay, Myanmar, biglang nagkasolo sa may harani sa Kingdom Hall. Yaon sa harani an harong na sadiri nin sarong inaktibong tugang na babae asin kan saiyang pamilya. An doros pasiring sa direksion kan saiyang harong, kaya nagdalagan sia sa tiriponan tanganing humagad nin tabang. Kan panahon na iyan, an tiriponan hinihirahay, kaya dakol na tugang an yaon duman. Nasorpresa sindang maheling an tugang na babae huli ta dai ninda aram na nakaistar ini sa lugar na iyan. Tolos na tuminabang an mga tugang sa pagbalyo kan mga pagsadiri kan pamilya sa ligtas na lugar. Kan maaraman kan agom na lalaki, na bakong Saksi, an manongod sa kasolo, dali-dali siang puminuli asin nanompongan na inaasikaso kan mga tugang an saiyang pamilya. Napahanga asin nagpapasalamat, nakaginhawa man sia huli ta sa parate inaaprobetsaran kan mga parahabon an siring na mga situwasyon. An kapahayagan na ini nin kabootan kan mga tugang nagmotibar sa tugang na babae asin sa aking lalaki kaini na makiasosyar giraray sa Kristianong kongregasyon, asin nag-aatender na sinda ngonyan sa gabos na pagtiripon.

Durante kan nakaaging taon nin paglilingkod, naeksperyensiahan kan dakol sa Mozambique an tiggutom huli sa mga tigmara asin pagkadestroso nin pananom. An lokal na sangang opisina kan Mga Saksi ni Jehova tolos na huminiro paagi sa pagtao nin kakanon sa mga nangangaipo. An pagdistribwir ginibo sa mga Kingdom Hall, kun beses pagkatapos nin mga pagtiripon kan kongregasyon.  An sarong tugang na babae na nagsosolong magurang nagsabi: “Nagpasiring ako sa pagtiripon na nagmomondo nin makuri, huling dai ko aram kun ano an ipapakakan ko sa sakong mga aki pagpuli mi sa harong.” An mamomoton na tabang na itinao kan mga tugang tolos na nagpakosog sa saiya. “Iyan garo pagkabuhay liwat para sa sako!” an sabi nia.

An mga Saksi ‘naggigibo man kan marahay’ sa espirituwal na paagi sa paghiras kan mensahe nin karangahan asin paglaom sa Biblia. Nagtutubod sinda arog kan madonong na tawo kan suanoy: “Kun dapit sa naghihinanyog sa [diosnon na kadonongan], sia mag-eerok na may katiwasayan asin dai mariribok nin takot sa kalamidad.”​—Talinhaga 1:33.

[Mga Ritrato sa pahina 31]

1, 2. Pagdistribwir nin kakanon sa mga nangangaipo sa Mozambique

3, 4. Dakol na harong an dinestroso kan bagyo sa Guam

[Credit Line]

Aki, sa wala: Andrea Booher/FEMA News Photo; babae, sa itaas: AP Photo/Pacific Daily News, Masako Watanabe