An Pinakamahalagang Pamana

KAN sia gurang na, si apostol Juan nagsurat: “Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.”​—3 Juan 4.

Mga espirituwal na aki nia an pinapanongdan kan maimbod na apostol. Minsan siring, dakol na magurang an may kaparehong saboot kan apostol. Nagmaigot sinda tanganing padakulaon an saindang mga aki “sa disiplina asin pagtatanos nin isip ni Jehova,” asin ngonyan naggagayagaya sindang maheling an darakula nang mga aki ninda na “naglalakaw sa katotoohan.” (Efeso 6:4) Sa katunayan, an pagtotokdo sa mga aki kan dalan na pasiring sa buhay na daing sagkod nangangahulogan nin pagtao sa sainda kan pinakamahalagang pamana. Iyan huli ta an diosnon na debosyon, na kaiba an pamumuhay sa paagi na gusto ni Jehova para sa mga Kristiano, “may panuga sa buhay ngonyan asin sa madatong.”​—1 Timoteo 4:8.

Halangkaw an pagheling ni Jehova, an sangkap na Ama, sa diosnon na mga magurang na nagmamaigot na marhay na tawan nin espirituwal na pagtotokdo an saindang mga aki. Kun naghihimate an mga aki, nagkakamit sinda nin dakulang kagayagayahan sa pagmamaigot na magibo an tunay na pagsamba kaiba kan saindang mga magurang. Mantang nagdadakula an siring na mga aki, nakakarimpos sinda nin nakakaogmang mga rekuerdo kan siring na mga eksperyensia. May mga naoogmang girumdomon an enot nindang kabtang sa Teokratikong Paadalan sa Pagmiministro. * O tibaad nagigirumdoman ninda an enot nindang pagbasa nin teksto sa Biblia sa ministeryong pagharongharong kaiba kan saro sa mga magurang ninda. Paano ninda malilingawan an pagdangog sa saindang mga magurang na nagbabasa sa My Book of Bible Stories o sa Paghinanyog sa Dakulang Paratokdo?  * Nagigirumdoman ni Gabriel an sarong bagay na gustohon nia: “Kan ako kuatro anyos pa sana, aroaldaw akong kinakantahan kan sakong ina mantang sia nagluluto. Nagigirumdoman ko pa na may hararom na emosyon an sarong awit na pan-Kahadean. Kan huri, nakatabang iyan sa sako na maheling an importansia kan paglilingkod ki Jehova.” Tibaad nagigirumdoman man nindo an magayon na awit na sinasabi ni Gabriel. Iyan an numero 157 sa songbook na Umawit nin mga Pag-omaw ki Jehova, asin may titulo iyan na “Sambahon si Jehova sa Pagkabarobata.”

An awit minapoon sa: “Mga omboy nag-oromaw sa Dios;/Pinamuraway ninda si Jesus.” Tunay nanggad na may mga aking nagkapribilehiong makaiba si Jesus, asin posibleng marhay na napaogma ninda siang marhay huli sa nakakaginhawa asin sinserong gawe ninda. Ginamit pa ngani ni Jesus an pagigin  madaling tokdoan kan mga saradit na aki bilang halimbawa na dapat arogon kan saiyang mga parasunod. (Mateo 18:​3, 4) Kaya igwa nin angay na kabtang an mga aki sa pagsamba ki Jehova. Sa katunayan, an liriko kan awit nagpapadagos: “Maski na sinda manga omboy pa,” pinapamuraway ninda an Dios.

Paagi sa arogan na gawe-gawe ninda​—sa harong, sa eskuelahan, asin sa iba pang lugar​—dakol na aki an nagtao nin onra sa Dios asin sa pamilya ninda. Kanigoan na bendisyon para sa sainda an pagkaigwa nin “manga magurang bilang Kristiano,” na namomoot sa kun ano an totoo. (Deuteronomio 6:7) An diosnon na mga magurang naninindogan para sa Dios, na bilang sarong mamomoton na Ama, tinotokdoan nia an saiyang mga linalang na maglakaw sa dalan na maninigo nindang lakawan. Asin kanigoan na bendisyon an inaako ninda! Mantang tinotokdoan man ninda an mga aki sa pamilya ninda, naoogma nanggad sinda na igwa sinda nin mga aking ‘nagdadangog’ asin nagtatao sa sainda nin dakulang kaogmahan! (Isaias 48:​17, 18) Si Angelica, na sa presente naglilingkod sa sangang opisina kan Mga Saksi ni Jehova sa Mejico, nagsasabi: “An sakong mga magurang pirmeng nagmamaigot na isagibo an mga prinsipyo sa Biblia. Ginibo kaiyan na nakakagayagayang marhay an sakong pagkaniaki. Maogma ako.”

Minaoyon an siring na mga Kristiano na may halaga an pag-asikaso sa espirituwal na mana nindo. Tibaad kamo sarong hoben na pinapadakula sa sarong pamilya na igwa nin tunay na Kristianong mga prinsipyo sa buhay. Kun iyo, an iyo man sanang awit nagsasadol sa saindo: “Manga kaakian na Kristiano,” magmaigot na papagdanayon na malinig an saindong dalan. Maabot an panahon na kamo an magibo kan sadiri nindong mga desisyon, kaya ngonyan mantang hoben pa makanood na “ki Jehova magtiwala kamo./Magin bantog dai ka magmawot.”

Kun mapasala kamong enoton sa saindong buhay an pagigin popular, puedeng masayang an gabos na pagsasanay na inaako nindo asin mararaot nindo an saindong mga oportunidad para sa ngapit. An pagmawot na magin popular puedeng sumagkod sa pagpapabaya nindo. Nagresulta iyan sa pakikiasosyar nin nagkapira sa mga, minsan garo baga dai man nakakaraot, nakakaakit pa ngani, mayo nin interes sa Kristianong mga pamantayan. Ipinaheling iyan sa nangyari ki Tara, an pangenot na tawohan sa video na Young People Ask​—How Can I Make Real Friends? Arog ni Tara, maaaraman nin siisay man na Kristianong hoben na nakikiibaiba sa mga dai nagpapahalaga sa tunay na pagsamba na maabot an panahon “an ugaleng mar’hay mararaot” huli sa maraot na mga kaibaiba, arog kan sabi sa awit. Kaipuhan nin dakol na taon nin pagmamaigot tanganing makapatalubo nin marahay na mga ugale, alagad puede iyan na maraot nin bigla.

Totoo, an pamumuhay na may diosnon na pagkatakot bakong pasil. Pero, arog kan sinasabi pa sa awit, “rumdoma an Dios kun hoben ka  pa,/Maglingkod na nanggad ki Jehova” sa espiritu asin katotoohan, tanganing kamo makapatalubo nin masarig na pundasyon para sa tunay na kapangganahan. Asin “sa paggurang magin mas maogma.” Orog pa ngani nindong maaapresyar na sa irarom kan mamomoton na pag-asikaso ni Jehova, mayo nin makakapapondo sa saindo sa paggibo nin tama sa atubangan nia. Iyan an paagi tanganing magin maygurang asin diosnon na nasa edad na. Dugang pa dian, an madonong na pag-aprobetsar sa pagpadakula saindo bilang Kristiano nagtatao sa saindo nin oportunidad na dahel kaiyan an “puso nin Dios maggagayagaya.” May maorog pa daw sa pribilehiong ini na puedeng makamtan nin sarong tawo?​—Talinhaga 27:11.

Kun siring, mga hoben, pirmeng girumdomon kun gurano kahalaga kan pagsasanay hale ki Jehova asin hale sa saindong Kristianong mga magurang. Logod na an saindang dakulang pagkamoot sa saindo magmotibar sa saindo na gibohon an nakakapaogma sa pagheling ni Jehova. Arog ni Jesu-Cristo asin kan maimbod na hoben na si Timoteo, mapapaogma nindo an saindong langitnon na Ama asin an saindong mga magurang digdi sa daga. Asin kun kamo mismo magin magurang na man, tibaad maoyon kamo ki Angelica, na nasambitan sa enotan, na nagsabing: “Kun magkaaki na man ako, poon sa pagkaomboy pagmamaigotan ko nanggad na itadom sa saiyang puso an pagkamoot ki Jehova, na gibohon iyan na magin giya nia.” Tunay nanggad na an tanos na dalan na minagiya sa buhay na daing sagkod an pinakamahalagang pamana!

[Mga Nota sa Ibaba]