An mga Naggradwar sa Gilead Paduman Bilang Maigot na mga Paraani!

“AN ANIHON mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” (Mateo 9:​37, 38) An mga tataramon na iyan may espesyal na kahulogan para sa mga estudyanteng magradwar sa ika-116 na klase kan Paadalan sa Biblia kan Watchtower sa Gilead mantang nag-aandam sindang dumuman sa mga destino ninda sa pagmimisyonero.

Kan Sabado, Marso 13, 2004, may total na 6,684 katawo an nagtiripon sa Sentro nin Edukasyon kan Watchtower sa Patterson, Nueva York, asin sa mga lugar na nakakonektar paagi sa telebisyon para sa programa sa gradwasyon, na durante kaiyan an klase nag-ako nin panhuring konseho asin pagparigon sa boot. Gabos kita puedeng makinabang sa sadol na itinao, mantang kita nagmamaigot sa espirituwal na pag-ani.

Itinampok kan pambukas na pahayag ni Theodore Jaracz, miembro kan Namamahalang Grupo asin naggradwar sa ikapitong klase sa Gil­ead, an mga tataramon ni Jesus: “Paduman kamo . . . asin gumibo kamo nin mga disipulo sa mga tawo kan gabos na nasyon.” (Mateo 28:​19, 20) Angay nanggad iyan, huling an mga naggradwar isusugo na maglingkod sa 20 manlaenlaen na nasyon! Ipinagirumdom nia sa mga estudyante na kompleto sindang sinangkapan kan instruksion hale sa Tataramon nin Dios na magin maigot na mga paraani sa pinakaimportanteng espirituwal na pag-ani.​—Mateo 5:16.

Kun Paano Magigin Mabungang mga Paraani

An enot na ispiker sa programa iyo si Robert Wallen, na konektadong marhay sa Paadalan sa Gilead sa laog na nin dakol na taon. Nagpapahayag sa temang “An Kagayonan nin Pagkamadinamayon,” sinabihan nia an mga estudyante: “An pagkamadinamayon sarong lenguahe na nadadangog dawa kan mga bungog asin naheheling dawa kan mga buta.” Aram na gayo ni Jesus an kasakitan kan iba asin naghihingoang pagianon iyan. (Mateo 9:36) An mga estudyante makakanompong nin dakol na oportunidad na gibohon man iyan​​—sa paghuhulit, sa kongregasyon, sa erokan nin mga misyonero, asin sa saindang pag-agoman mismo. Sinadol sinda kan ispiker: “Ipaheling sa saindong buhay an kagayonan nin pagkamadinamayon mantang kamo naglilingkod sa iba. An pinakamarahay sana nindong gawe-gawe igo na sa pan-aroaldaw na buhay sa erokan nin mga misyonero. Kun siring, magin determinado na isolog an pagkamadinamayon.”​—Colosas 3:12.

Sunod, detalyadong ipinaliwanag ni Gerrit Lösch, miembro kan Namamahalang Grupo asin naggradwar sa ika-41 klase kan Gilead, an temang “Mga Parahayag nin Kaligtasan.” (Isaias 52:7) Tanganing an mga tawo maligtas sa pisikal na paagi kun laglagon na an presenteng sistema nin mga bagay, kaipuhan nindang ilaog sa isip an tamang kaaraman hale sa Tataramon nin Dios, ipahayag sa publiko an saindang pagtubod, asin magpabautismo. (Roma 10:10; 2 Timoteo 3:15; 1 Pedro 3:21) Minsan siring, an pangenot na dahelan sa pagpahayag nin kaligtasan, bako na tanganing iligtas an mga tawo,  kundi magtao nin kaomawan sa Dios. Kun siring, sinadol ni Tugang na Lösch an magigin mga misyonero: “Darahon nindo an mensahe kan Kahadean sagkod sa kaporoporohi kan daga, asin magin maigot na mga parahayag nin kaligtasan, gabos para sa kaomawan ni Jehova.”​—Roma 10:18.

“Gurano Kamo Kaliwanag?” an ihinapot kan instruktor sa Gilead na si Lawrence Bowen. Sinambit nia an mga tataramon ni Jesus na nakasurat sa Mateo 6:22 asin inenkaminar an magradwar na mga estudyante na papagdanayon na “simple” an saindang mata tanganing “ikapabanaag an espirituwal na kaliwanagan na nagpapamuraway ki Jehova asin nagtatao nin pakinabang sa mga kapwa tawo.” Sa kapinonan kan saiyang ministeryo, si Jesus nagpaheling nin sangkap na halimbawa mapadapit digdi paagi sa pagdadanay na nakakonsentrar sa paggibo kan kabotan nin Dios. An paghorophorop sa marahayon na mga bagay na itinokdo sa saiya sa langit kan saiyang Ama nakatabang ki Jesus na tagalan an mga pagbalo ni Satanas sa kaawagan. (Mateo 3:16; 4:1-11) Ipinaheling ni Jesus an lubos na pagsarig ki Jehova sa pag-otob sa ipinapagibo sa saiya nin Dios. Siring man, tanganing makayang atubangon an mga kadepisilan sa ngapit, an mga misyonero kaipuhan na magpadagos na igwa nin marahay na ugale nin pag-adal sa Biblia asin lubos na magsarig ki Jehova.

Tinapos ni Mark Noumair, sarong instruktor sa Gilead asin naggradwar sa ika-77 klase kan Gilead,  an seryeng ini nin mga pahayag, paagi sa pagpahayag sa temang “Uya Kami sa Saimong Kamot.” (Josue 9:25) Inenkaminar nia an mga estudyante na arogon an aktitud kan mga Gabaonita kan suanoy. Minsan ngani an Gabaon kaidto “dakulang siudad . . . asin an gabos na lalaki kaiyan makokosog,” an mga Gabaonita dai naghagad nin pagrekonoser o naghagad na magkaigwa nin mga bagay na kaipuhan ninda. (Josue 10:2) Gikan sa boot sindang naglingkod bilang “mga parakua nin kahoy asin parasakdo nin tubig” na sakop kan mga Levita bilang pagsuportar sa pagsamba ki Jehova. (Josue 9:27) Garo man sana sinabi kan mga miembro kan magradwar na klase sa Josue na Orog na Dakula, si Jesu-Cristo, “Uya kami sa saimong kamot.” Ngonyan na poponan na ninda an mga asignasyon ninda sa ibang nasyon, kaipuhan nindang akoon an ano man na gibohon na ipinapagibo sa sainda kan Josue na Orog na Dakula.

Mga Eksperyensia Asin Interbio

“Lubos na Buksan an Kasuratan” an temang tinokar ni Wallace Liverance, naggradwar sa ika-61 klase kan Gilead asin saro sa mga instruktor, kaiba nin sarong grupo nin mga estudyante. Isinaysay asin isinaaksion ninda an mga naeksperyensiahan ninda sa ministeryo sa langtad durante kan kurso sa paadalan. Risang-risa na an konsentradong marhay na pag-adal ninda kan Kasuratan sa laog nin limang bulan na pagsasanay ninda nakataros sa saindang puso asin nagmotibar sa sainda na sabihon sa iba an nanodan ninda. (Lucas 24:32) Sa laog nin limang bulan na kurso, nahimo kan saro sa mga estudyante na sabihon sa saiya mismong tugang sa laman kun ano an nanonodan nia. Nakaenkaminar ini sa saiyang tugang na lalaki na hanapon an lokal na kongregasyon asin ponan an saiyang sadiring pag-adal sa Biblia. Nakualipikar na sia ngonyan bilang dai pa bautisadong parahayag.

Suminunod sa mga eksperyensiang ini, pinamayohan ni Richard Ashe asin John Gibbard an pag-interbio sa nagkapirang haloy nang maimbod na mga lingkod ni Jehova, kaiba an mga nagbibiaheng paraataman na nag-aako nin espesyal na pagsasanay sa Sentro nin Edukasyon kan Watchtower. Naggradwar man sinda sa mas naenot na mga klase kan Paadalan sa Gilead. Nagirumdoman kan saro na sinabi ini ni Tugang na Knorr durante kan klase: “Sa Gilead dakol na oras kamong mag-aadal. Alagad kun madakula an saindong payo, dai kami nagin mapanggana. Gusto mi na dumakula an saindong puso.” Sinadol kan nagbibiaheng mga tugang an presenteng klase na magin interesado sa mga tawo, na trataron an iba siring kan pagtratar ni Cristo, asin mapakumbabang akoon an ano man na asignasyon na itao sa sainda. An pag-aplikar kan hatol na ini daing duda na matabang sa bagong mga misyonero na magin mabunga sa saindang mga destino.

Paduman Kamo Bilang Maigot na mga Paraani!

An mga presente nagkaigwa nin oportunidad na magdangog ki Stephen Lett, saro pang miembro kan Namamahalang Grupo. Itinao nia an pangenot na pahayag sa programa, na may titulong “Paduman Kamo Bilang Maigot na mga Paraani!” (Mateo 9:38) Sa literal na pag-ani, an panahon sa pag-ani limitado. Kaipuhan na an mga paraani mahigos na magtrabaho. Lalo nang importante nanggad iyan durante kan pagtatapos kan sistemang ini nin mga bagay! Sa orog kadakulang espirituwal na pag-ani, buhay an nakataya. (Mateo 13:39) Inenkaminar ni Tugang na Lett an mga magradwar, na dai ‘maghinugak sa saindang gibohon,’ kundi magin “malaad sa espiritu” asin “maglingkod ki Jehova” sa dai na noarin man maootrong pag-aning ini. (Roma 12:11) Kinotar kan ispiker an mga tataramon ni Jesus: “Tingagan an saindong mga mata asin helinga an kaomahan, ta sinda maputi na para sa pag-ani.” (Juan 4:35) Dangan sinadol nia an mga magradwar na ipaheling an saindang kaigotan sa pag-ani paagi sa tunay na paghihingoa na maabot an mga tawo kun noarin asin kun saen sinda puedeng manompongan saka paagi sa pag-aprobetsar sa gabos na oportunidad na maghulit nin impormal. An pagigin listo na gumibo nin mga oportunidad magpapagin pasil sa pagtao nin epektibong patotoo. Si Jehova maigot na Dios, asin inaasahan nia na sia aarogon niato gabos asin na kita magmamahigos sa espirituwal na pag-ani.​—2 Hade 19:31; Juan 5:17.

Sa pagtapos kan programa, ipinaabot kan tsirman na si Tugang na Jaracz an mga pataratara hale sa dakol na sangang opisina asin iprinesentar sa mga estudyante an saindang mga diploma. Binasa kan saro sa mga naggradwar an sarong surat hale sa klase, na nagpapahayag nin odok na pag-apresyar sa pagsasanay na inako ninda. Malinaw nanggad, an programa sa gradwasyon kan ika-116 na klase nagpangyari na an gabos na nag-atender magin orog na determinado sa pagduman bilang maigot na mga parani.

[Kahon sa pahina 25]

ESTADISTIKA KAN KLASE

Bilang nin mga nasyon na irinepresentar: 6

Bilang nin mga nasyon na inasignaran: 20

Bilang nin mga estudyante: 46

Promedyong edad: 34.2

Promedyong taon sa katotoohan: 17.2

Promedyong taon sa bilog na panahon na ministeryo: 13.9

[Ritrato sa pahina 26]

An Ika-116 na Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.