May Epekto daw an Saindong mga Pamibi?
May Epekto daw an Saindong mga Pamibi?
SIISAY sa sato an dai napaatubang sa sarong seryosong situwasyon na dai niato kontrolado? Ipinapaheling kan Biblia na aram ni apostol Pablo na an pamibi puedeng makaapekto sa resulta kan arog kaiyan na mga krisis.
Kan si Pablo bakong makatanosan na ibinilanggo sa Roma, hinagad nia sa saiyang mga kapagtubod na ipamibi sia, na sinasabi pa: “Pinakasasadol ko kamo na mas nangorognang gibohon ini, tanganing ako ikabalik sa saindo sa mas madaling panahon.” (Hebreo 13:18, 19) Sa saro pang pangyayari, si Pablo nagpahayag nin kompiansa na sisimbagon nin Dios an mga pamibi para sa saiyang amay na pakabutas. (Filemon 22) Dai nahaloy pinaluwas si Pablo asin sa giraray ipinadagos an saiyang pagmimisyonero.
Alagad mababago daw talaga kan pamibi an resulta kan saindong mga problema? Tibaad. Pero, girumdomon na an pamibi bako sanang relihiosong pormalidad. Iyan aktuwal na pakikikomunikar sa satong mamomoton asin makapangyarihan na Ama sa kalangitan. Maninigo na dai kita mag-alangan na magin espesipikong marhay sa satong mga pamibi alagad mapasensiang maghalat tanganing maheling kun paano masimbag si Jehova.
Tibaad dai direktang simbagon nin Dios an kada pamibi, ni pirme siang masimbag sa paagi o sa panahon na linalaoman niato. Si Pablo, halimbawa, paorootrong namibi manongod sa saiyang “tonok sa laman.” Dai hinale nin Dios an problema ni Pablo, ano man iyan, alagad rinanga nia si Pablo paagi sa nakakapakosog na mga tataramon: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.”—2 Corinto 12:7-9.
Makakakompiar man kita na dawa dai haleon nin Dios an sarong partikular na problema, puede siang ‘magtao nin luluwasan tanganing iyan matagalan niato.’ (1 Corinto 10:13) Madali nang dumatong an aldaw na hahaleon nin Dios an gabos na pagdusa nin katawohan. Mientras tanto, igwa nin epekto an pagdolok sa “Paradangog nin pamibi.”—Salmo 65:2.