An Dios daw an Responsable sa Satong mga Problema?

KAN an nasa edad nang aking babae ni Marion magkaigwa nin grabeng danyos sa hotok, ginibo ni Marion kun ano an gigibohon kan dakol sa sato. * Namibi sia sa Dios para sa tabang. “Dai ko nagigirumdoman kaidto na ako nakamate na nin grabeng kadaihan nin maginibo asin nagsosolo,” an sabi ni Marion. Sa huri, naggrabe an kamugtakan kan saiyang aki, asin nagpoon na kuestionon ni Marion an Dios. “Taano ta nangyayari ini?” an hapot nia. Dai nia masabotan kun paano magigibo nin sarong mamomoton asin may pagmakolog na Dios na bayaan sia.

An eksperyensia ni Marion bakong daing kapareho. Dai mabilang na tawo sa bilog na kinaban an nagsaboot na pinabayaan sinda nin Dios sa mga panahon nin pangangaipo. “Dai pa man giraray nawawara sako an ‘mga hapot na taano DIOS KO,’” an sabi ni Lisa pagkatapos na gadanon an saiyang makoapong lalaki. “Dai pa man biyong nawawara an sakong pagtubod sa Dios, alagad seguradong nagbago na iyan.” Kaagid kaiyan, pakatapos na maeksperyensiahan an sarong daing saysay na trahedya kan saiyang omboy na aking lalaki, an sarong babae nagsabi: “Dai ako rinanga nin Dios sa nangyari. Dai nia lamang ako pinahelingan nin pagmakolog o pagkaherak.” Idinugang pa nia: “Dai ko noarin man mapapatawad an Dios.”

An iba naaanggot na marhay sa Dios kun minamasdan ninda an kinaban sa palibot ninda. Naheheling ninda an mga sosyedad na nalulunosan huli sa kadukhaan asin makuring gutom, desesperadong mga dulag sa guerra, dai mabilang na aki na nailo huli sa AIDS, asin minilyon katawo na pinapasakitan nin iba pang helang. Kun napapaatubang sa mga ini asin sa kaagid na mga trahedya, binabasol kan dakol an Dios sa saiyang garo baga pagkadaing labot.

Minsan siring, an totoo bakong an Dios an dapat na basolon sa mga problema na nagpapasakit sa katawohan. Sa katunayan, may balidong mga rason na maniwala na dai na mahahaloy hahaleon nin Dios an epekto kan danyos na dinara sa pamilya nin tawo. Inaagda niamo kamo na basahon an masunod na artikulo asin helingon na an Dios talagang may pagmakolog sa sato.

[Nota sa Ibaba]