“Paduman Kamo Asin Gumibo Kamo nin mga Disipulo”

“An gabos na autoridad sa langit asin sa daga itinao na sa sako. Kun siring paduman kamo asin gumibo kamo nin mga disipulo.”​—MATEO 28:​18, 19.

1, 2. (a) Anong asignasyon an itinao ni Jesus sa saiyang mga parasunod? (b) Anong mga hapot mapadapit sa mga pagboot ni Jesus an totokaron?

SARONG aldaw idto kan tigsoli sa Israel kan 33 C.E., asin nagtitiripon an mga disipulo ni Jesus sa sarong bukid sa Galilea. Madali na kaidtong magsakat sa langit an saindang binuhay liwat na Kagurangnan, alagad may sasabihon nguna siang mahalagang bagay sa sainda. May itataong asignasyon si Jesus sa sainda. Ano an ipapagibong iyan? Paano iyan hinimate kan saiyang mga disipulo? Asin paano aplikado sato ngonyan an asignasyon na iyan?

² An sinabi ni Jesus nakasurat sa Mateo 28:18-20: “An gabos na autoridad sa langit asin sa daga itinao na sa sako. Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan sistema nin mga bagay.” Naunabihan ni Jesus an “gabos na autoridad,” “gabos na nasyon,” “gabos na bagay,” asin “gabos na aldaw.” An saiyang mga pagboot may koneksion sa apat na pananaram na idto nagpapalataw nin nagkapirang mahalagang hapot, na puedeng sumaryohon sa mga tataramon na taano? saen? ano? asin noarin? Saro-saro niatong tokaron an mga hapot. *

‘An Gabos na Autoridad Itinao Na sa Sako’

3. Taano ta maninigo niatong kuyogon an pagboot na gumibo nin mga disipulo?

³ Enot, taano ta maninigo niatong kuyogon an pagboot na gumibo nin mga disipulo? Si Jesus nagsabi: “An gabos na autoridad sa langit asin sa daga itinao na sa sako. Kun siring paduman kamo asin gumibo kamo nin mga disipulo.” Itinotokdo kan tataramon na “kun siring” an sarong pangenot na dahelan kun taano ta maninigo niatong kuyogon an pagboot na ini. Iyan huli ta si Jesus, an nagtao kan pagboot, igwa kan “gabos na autoridad.” Gurano kahiwas an saiyang autoridad?

4. (a) Gurano kahiwas an autoridad ni Jesus? (b) Paano maninigong makaapektar sa satong pagmansay sa pagboot na gumibo nin mga disipulo an satong pakasabot sa autoridad ni Jesus?

⁴ Si Jesus may autoridad sa saiyang kongregasyon, asin poon kan 1914 nagkaigwa sia nin autoridad sa bagong establisaron na Kahadean nin Dios. (Colosas 1:13; Kapahayagan 11:15) Sia an arkanghel asin bilang siring nasa irarom kan saiyang autoridad an sarong langitnon na hukbo nin ginatos na milyon na anghel. (1 Tesalonica 4:16; 1 Pedro 3:22; Kapahayagan 19:14-16) Inautorisaran sia kan saiyang  Ama na paraon “an gabos na gobyerno asin gabos na autoridad asin kapangyarihan” na nagkokontra sa matanos na mga prinsipyo. (1 Corinto 15:24-26; Efeso 1:20-23) An kapangyarihan ni Jesus bakong para sana sa mga buhay. Sia “hokom [man] kan mga buhay asin gadan” asin igwa kan kapangyarihan na itinao nin Dios na buhayon liwat an mga nagtorog sa kagadanan. (Gibo 10:42; Juan 5:26-28) Tunay nanggad, an pagboot na itinao kan Saro na tinawan nin siring kahiwas na autoridad maninigong tawan nin pinakahalangkaw na importansia. Kun siring, may paggalang asin gikan sa boot niatong kinukuyog an pagboot ni Cristo na ‘paduman asin gumibo nin mga disipulo.’

5. (a) Paano kinuyog ni Pedro an mga tataramon ni Jesus? (b) An pagkuyog ni Pedro sa mga instruksion ni Jesus nagbunga nin anong bendisyon?

⁵ Sa kapinonan kan saiyang ministeryo sa daga, sa pambihirang paagi itinokdo ni Jesus sa saiyang mga disipulo na an pagrekonoser sa saiyang autoridad asin an pagkuyog sa saiyang mga pagboot magbubunga nin mga bendisyon. Sarong beses sinabihan nia si Pedro, na sarong parasira: “Magduman ka sa hararom, asin taktakan nindo an saindong mga hikot para sa pagdakop.” Segurado ni Pedro na mayo nin sira, kaya sinabi nia ki Jesus: “Paratokdo, bilog na banggi kaming nagpagal asin mayong nakuang ano man.” Minsan siring, si Pedro mapakumbabang nagsabi: “Alagad huli ta sinabi mo itataktak ko an mga hikot.” Pakatapos kuyogon ni Pedro an pagboot ni Cristo, nakadakop sia nin “dakolon na sira.” Huling nabigla, si Pedro “naglaob sa may tuhod ni Jesus, na sinasabi: ‘Rumayo ka sako, huli ta ako makasalan na tawo, Kagurangnan.’” Alagad si Jesus suminimbag: “Dai ka na matakot. Poon ngonyan an dadakopon mo mga tawong buhay.” (Lucas 5:1-10; Mateo 4:18) Ano an manonodan niato sa pagkasaysay na iyan?

6. (a) Ano an ipinapaheling kan pagkasaysay manongod sa milagrosong pakadakop nin mga sira kun dapit sa klase nin pagkuyog na hinahagad ni Jesus? (b) Paano niato maaarog si Jesus?

⁶ Tinawan ni Jesus si Pedro, Andres, asin an iba pang apostol kan asignasyon na magin “mga parasira nin mga tawo,” bakong bago, kundi pakatapos kan saindang makangangalas na pakadakop na ini nin mga sira. (Marcos 1:​16, 17) Malinaw nanggad, an hinagad ni Jesus bakong basta sana pagkuyog. Tinawan nia an mga tawong ini nin nakakakombensir na dahelan kun taano ta maninigo sindang kumuyog sa saiya. Kun paanong an pagkuyog sa pagboot ni Jesus na itaktak an saindang mga hikot nagbunga nin nakakabiglang mga resulta, an pagkuyog sa pagboot ni Jesus na ‘magdakop nin mga tawo’ magbubunga man nin dakulang mga bendisyon. Bilog an pagtubod, naghimate an mga apostol. An pagkasaysay nagtatapos: “Idinuong ninda an mga baroto, saka binayaan an gabos na bagay asin nagsunod sa saiya.” (Lucas 5:11) Ngonyan, mantang dinadagka niato an iba na makikabtang sa paggibo nin mga disipulo, inaarog niato si Jesus. Dai niato hinahagad sa mga tawo na gibohon sana an sinasabi ta sainda, kundi tinatawan niato sinda nin nakakakombensir na mga dahelan na kuyogon an pagboot ni Cristo.

Nakakakombensir na mga Dahelan Asin Tamang mga Motibo

7, 8. (a) Ano an nagkapirang sono sa Kasuratan na dahelan na ihulit an Kahadean asin gumibo nin mga disipulo? (b) Anong teksto an nangorognang nagmomotibar saindo na padagos na maghulit? (Helingon man an nota sa ibaba.)

⁷ Huling rinerekonoser niato an autoridad ni Cristo, nakikikabtang kita sa paghuhulit kan Kahadean asin paggibo nin mga disipulo. Ano pang sono sa Kasuratan na mga dahelan sa paggibo kan gibohon na iyan an ikakatao niato sa mga gusto niatong mapahiro sa marahay na mga gibo? Estudyare an minasunod na mga komento kan nagkapirang maimbod na Saksi hale sa manlaenlaen na kadagaan, asin mangnohon kun paano sinusuportaran kan sitadong mga teksto an saindang mga komento.

⁸ Si Roy, nabautismohan kan 1951: “Kan idusay ko an sakong sadiri ki Jehova, nanuga ako na pirme ko siang paglilingkodan. Gusto kong otobon an sakong sinabi.” (Salmo 50:14; Mateo 5:37) Si Heather, nabautismohan kan 1962: “Kun iniisip ko an gabos na ginibo ni Jehova para sako, gusto kong ipaheling saiya an sakong pagpasalamat paagi sa maimbod na paglilingkod saiya.” (Salmo 9:​1, 9-11; Colosas 3:15) Si Hannelore, nabautismohan kan 1954: “Sa lambang pagluwas niato sa ministeryo, sinusuportaran kita kan mga anghel​—kanigoan na pribilehio iyan!” (Gibo 10:30-33; Kapahayagan 14:​6, 7) Si Honor, nabautismohan kan 1969: “Kun dumatong na  an panahon nin paghokom ni Jehova, habo ko na may siisay man sa sakong pagtaraed na makakasahot ki Jehova asin sa saiyang mga Saksi nin kapabayaan saka magsasabing, ‘Dai ako noarin man pinatanidan!’” (Ezequiel 2:5; 3:17-19; Roma 10:​16, 18) Si Claudio, nabautismohan kan 1974: “Kun kita naghuhulit, ‘naheheling kita nin Dios’ asin ‘kaiba kita ni Cristo.’ Isipon nindo iyan! Mantang nasa ministeryo kita, kaibaiba niato an satong pinakadayupot na mga Katood.”​—2 Corinto 2:17. *

9. (a) Manongod sa tamang motibo sa pagkuyog ki Cristo, ano an ihinahayag kan pagkasaysay dapit sa eksperyensia sa paninira ni Pedro asin kan iba pang apostol? (b) Ano an tamang motibo sa pagkuyog sa Dios asin ki Cristo ngonyan, asin taano?

⁹ An pagkasaysay manongod sa pambihirang pakadakop nin mga sira nagpapaheling man kan kahalagahan nin pagkaigwa nin tamang motibo sa pagkuyog ki Cristo​—an pagkamoot. Kan sabihon ni Pedro, “Rumayo ka sako, huli ta ako makasalan na tawo,” si Jesus dai ruminayo, ni kinondenar man nia si Pedro huli sa ano man na kasalan. (Lucas 5:8) Dai ngani tinuyaw ni Jesus si Pedro huli sa pakikiolay sa saiya na humale. Imbes, si Jesus maboot na suminimbag: “Dai ka na matakot.” Salang motibo sa pagkuyog ki Cristo an bakong marahay na takot. Imbes, sinabi ni Jesus ki Pedro na sia asin an saiyang kairiba magagamit bilang parasira nin mga tawo. Ngonyan, dai ta man ginagamit an takot o kaagid na negatibong mga emosyon, arog baga nin pagkakonsensia asin pagkasupog, tanganing piriton an iba na kuyogon si Cristo. Solamente an bilog na kalag na pagkuyog na basado sa pagkamoot sa Dios asin ki Cristo an nagpapaogma sa puso ni Jehova.​—Mateo 22:37.

“Gumibo Kamo nin mga Disipulo sa mga Tawo kan Gabos na Nasyon”

10. (a) Anong detalye manongod sa pagboot ni Jesus na gumibo nin mga disipulo an nag-atubang nin dakulang angat para sa saiyang mga disipulo? (b) Paano naghimate sa pagboot ni Jesus an mga disipulo?

¹⁰ An ikaduwang hapot na minalataw may koneksion sa pagboot ni Cristo iyo an, Saen maninigong isagibo an paggibong ini nin mga disipulo? Sinabi ni Jesus sa saiyang mga parasunod: “Gumibo kamo nin mga disipulo sa mga tawo kan gabos na nasyon.” Bago kan panahon kan ministeryo ni  Jesus, an mga tawo kan mga nasyon maogmang inaako kun sinda minaduman sa Israel tanganing maglingkod ki Jehova. (1 Hade 8:41-43) Si Jesus mismo sa pangenot naghulit sa propiong mga Judio, alagad ngonyan sinabihan nia an saiyang mga parasunod na dumanan an mga tawo kan gabos na nasyon. An mga pinagdadakopan nin mga sira, o hinuhulitan na teritoryo, kan saiyang mga disipulo garo man sana kaidto yaon sana sa sarong sadit na “danaw-danaw”​—an natural na mga Judio—​alagad dai nahaloy nagin kabale dian an bilog na “dagat” nin katawohan. Minsan ngani an pagbabagong ini nag-atubang nin angat para sa mga disipulo, daing pag-alangan na kinuyog ninda an instruksion ni Jesus. Mayo pang 30 taon pagkagadan ni Jesus, nakasurat si apostol Pablo na an maogmang bareta ikinahulit na bako sanang sa mga Judio kundi sa “gabos na linalang sa sirong nin langit.”​—Colosas 1:23.

11. Anong paghiwas kan ‘mga pinagdadakopan nin mga sira’ an nangyari poon kan enot na mga taon kan ika-20 siglo?

¹¹ Mas dai pa sana nahahaloy, nangyari an sarong kaagid na paghiwas nin hinuhulitan na teritoryo. Sa kapinonan kan ika-20 siglo, an ‘mga pinagdadakopan nin mga sira’ yaon sana sa nagkapirang kadagaan. Pero, inarog kan mga parasunod ni Cristo kan panahon na idto an halimbawa kan mga Kristiano kan enot na siglo asin galagang pinahiwas an teritoryo na hinuhulitan ninda. (Roma 15:20) Kaidtong enot na mga taon nin 1930, naggigibo sinda nin mga disipulo sa mga sanggatos na kadagaan. Ngonyan, an satong ‘mga pinagdadakopan nin mga sira’ pinahiwas na sa 235 kadagaan.​—Marcos 13:10.

“Hale sa Gabos na Tataramon”

12. Anong angat an itinatampok kan hula na manonompongan sa Zacarias 8:23?

¹² An paggibo nin mga disipulo sa gabos na nasyon sarong angat bako sanang huli sa hiwas kan teritoryo kundi huli man sa manlaenlaen na tataramon. Paagi ki propeta Zacarias, ihinula ni Jehova: “Mangyayari sa mga aldaw na iyan na an sampulong tawo hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: ‘Maiba kami sa saindo, huli ta nabaretaan niamo na an Dios yaon dian sa saindo.’” (Zacarias 8:23) Sa mas dakulang kaotoban kan hulang ini, an “sarong tawo na Judio” naglaladawan sa natatada kan linahidan na mga Kristiano, mantang an “sampulong tawo” naglaladawan sa “dakulang kadaklan.” * (Kapahayagan 7:​9, 10; Galacia 6:16) An dakulang kadaklan na ini nin mga disipulo ni Cristo manonompongan sa dakol na nasyon, asin siring kan sinabi ni Zacarias, sinda magtataram nin balakid na tataramon. Ipinapaheling daw kan kasaysayan kan banwaan nin Dios sa presenteng aldaw an aspektong iyan nin pagkadisipulo? Iyo.

13. (a) Anong pagbabago mapadapit sa mga tataramon an nangyayari sa tahaw kan banwaan nin Dios sa presenteng aldaw? (b) Ano an ginibo kan grupong maimbod na oripon dapit sa nagdadakulang pangangaipo nin espirituwal na kakanon sa manlaenlaen na tataramon? (Iiba an kahon na “Mga Publikasyon Para sa mga Buta.”)

¹³ Kan 1950 Ingles an propiong tataramon nin mga 3 sa kada 5 Saksi ni Jehova sa bilog na kinaban. Kan 1980 an proporsion na iyan nagin mga 2 sa 5,  asin ngonyan Ingles an propiong tataramon nin 1 na sana sa kada 5 Saksi. Ano an ginibo kan grupong maimbod asin mapagmansay na oripon dapit sa pagbabagong ini sa tataramon? Paagi sa pagtao nin espirituwal na kakanon sa padakol pang padakol na tataramon. (Mateo 24:45) Halimbawa, kan 1950 an satong mga babasahon ipinupublikar sa 90 tataramon, alagad ngonyan an kabilangan na iyan luminangkaw sagkod sa mga 400. Nagbunga daw an itinaong dugang na atension na ini sa mga tawo na manlaenlaen an tataramon? Iyo! May promedyong mga 5,000 katawo “hale sa gabos na tataramon” an nagigin mga disipulo ni Cristo kada semana kan taon! (Kapahayagan 7:9) Asin nagpapadagos an pagdakol. Sa nagkapirang kadagaan kadakol an nadadakop kan “mga hikot”!​—Lucas 5:6; Juan 21:6.

Sarong Nakakakontentong Ministeryo​—Puede daw Kamong Makikabtang Dian?

14. Paano ta matatabangan an mga nasa teritoryo niato na iba an tataramon? (Iiba an kahon na “Pagtaram sa Senyas Asin Paggibo nin mga Disipulo.”)

¹⁴ Sa dakol na kadagaan sa Solnopan, an pag-arabot nin mga dayo nagin angat sa paggibo nin mga disipulo sa mga tawo kan ‘lambang tataramon’ sa sadiring lugar. (Kapahayagan 14:6) Paano ta matatabangan an mga nasa teritoryo niato na bako niatong kapareho an tataramon? (1 Timoteo 2:4) Puede tang gamiton an tamang kasangkapan sa paninira, sabi ngani. Alokan an siring na mga indibiduwal nin literatura sa tataramon ninda. Kun mapupuede, ipadalaw sinda sa Saksi na tataong magtaram kan saindang lenguahe. (Gibo 22:2) An paggibo kan mga areglong ini mas pasil na ngonyan, huling dakol na Saksi an nag-adal na magtaram nin ibang lenguahe tanganing tabangan an mga dayo na magin mga disipulo ni Cristo. Ipinapaheling nin mga bareta na sarong nakakakontentong eksperyensia an pagtabang sa paaging ini.

15, 16. (a) Anong mga halimbawa an nagpapaheling na nakakakontento an pagtabang sa mga iba an lenguahe? (b) Anong mga hapot mapadapit sa paglilingkod sa langtad na iba an tataramon an puede niatong pag-isipan?

¹⁵ Estudyare nindo an duwang halimbawa gikan sa Netherlands, na duman ginigibo an organisadong paghuhulit kan Kahadean sa 34 tataramon. Nagboluntaryo an mag-agom na Saksi na magduman asin gumibo nin mga disipulo sa mga dayo na Polaco an tataramon. Makangangalas na marhay an reaksion sa saindang mga paghihingoa kaya an agom na lalaki napahirong inaan an saiyang sekular na trabaho tanganing magkaigwa nin saro pang libreng aldaw sa laog kan semana para sa pamamayo  nin pag-adal sa Biblia sa mga nagpapaheling nin interes. Dai nahaloy, an mag-agom namamayo na nin labing 20 pag-adal sa Biblia kada semana. Nagkomento sinda: “An samong ministeryo nagpapaogmang marhay samo.” An mga naggigibo nin disipulo nangorognang naoogma kun an mga nakakadangog kan mga katotoohan sa Biblia sa sadiri nindang tataramon napapahirong magpahayag nin pag-apresyar. Halimbawa, durante nin sarong pagtiripon na ginibo sa tataramon na Vietnames, an sarong may edad nang lalaki nagtindog asin naghagad na togotan siang magtaram. May luha sa saiyang mata, sinabi nia sa mga Saksi: “Salamat sa saindong mga paghihingoa na pag-adalan an sakong depisil na tataramon. Nagpapasalamat akong marhay na manodan an dakol na makangangalas na bagay hale sa Biblia mantang ako gurang na.”

¹⁶ Kun siring, bakong makangangalas na an mga naglilingkod sa mga kongregasyon na iba an tataramon nakakamate na sinda tinatawan nin dakulang balos. Sinabi nin sarong mag-agom na taga Britania: “An ministeryo sa langtad na iba an tataramon saro sa pinakamaogmang naeksperyensiahan niamo durante kan samong 40 taon na paglilingkod sa Kahadean.” Puede daw nindong areglaron an saindong mga kamugtakan tanganing makapakikabtang sa nakakapakosog na ministeryong ini? Kun kamo nag-eeskuela pa, puede daw kamong mag-adal nin ibang tataramon bilang pag-andam sa arog kaining klase nin ministeryo? An paggibo kaiyan puedeng magbunga nin nakakakontentong buhay na pano nin mga bendisyon. (Talinhaga 10:22) Taano ta dai ini ipakipag-olay sa saindong mga magurang?

Paggamit Niato nin Laen-Laen na Paagi

17. Paano niato puedeng makaolay an mas dakol na tawo sa teritoryo kan satong kongregasyon?

¹⁷ Siempre, an kamugtakan kan kadaklan sato dai minatogot sato na itaktak an satong “mga hikot” sa mga teritoryo na iba an tataramon. Minsan siring, puede niatong makaolay an mas dakol na tawo kisa nagigibo niato sa presente sa teritoryo mismo kan satong kongregasyon. Paano? Bakong paagi sa pagbago kan satong mensahe, kundi kan satong mga paagi. Sa dakol na lugar nagdadakol an mga tawo na nag-eerok sa guardiadong marhay na mga edipisyo. An dakol na iba pa mayo sa harong kun kita minasongko durante kan satong ministeryo sa harong-harong. Kaya tibaad kaipuhan niatong itaktak an satong “mga hikot” sa laen-laen na panahon asin sa laen-laen na lugar. Sa siring inaarog niato si Jesus. Naghanap sia nin mga paagi na makaolay an mga tawo sa manlaenlaen na kamugtakan.​—Mateo 9:9; Lucas 19:1-10; Juan 4:6-15.

18. Paano nagin epektibo an paghuhulit sa manlaenlaen na kamugtakan? (Iiba an kahon na “Paggibo nin mga Disipulo sa mga Tawo sa Lugar nin Negosyo.”)

¹⁸ Sa nagkapirang parte kan kinaban, an paghuhulit saen man may mga tawo sarong mahalagang paagi nin paggibo nin mga disipulo. Tinatawan nin orog na atension kan eksperyensiadong mga paragibo nin disipulo an paghuhulit sa manlaenlaen na lugar. Apuera sa pakikikabtang sa ministeryo sa harong-harong, an mga parahayag ngonyan naghuhulit sa mga aeropuerto, sa mga opisina, sa mga tindahan, sa mga paradahan, sa mga pondohan nin auto, sa mga tinampo, sa mga parke, sa mga baybayon, asin sa iba pang lugar. An dakol sa nabautismohan pa sanang mga Saksi sa Hawaii enot na natagboan sa siring na mga lugar. An paggamit niato nin laen-laen na paagi nakakatabang sato na otobon nin lubos an pagboot ni Jesus na gumibo nin mga disipulo.​—1 Corinto 9:​22, 23.

19. Anong mga aspekto kan sugo ni Jesus sa sato an ipapaliwanag sa sunod na artikulo?

¹⁹ An asignasyon ni Jesus na gumibo nin mga disipulo may kaibang mga detalye bako sanang manongod sa kun taano asin kun saen maninigo niatong gibohon iyan kundi manongod man sa kun ano an maninigo tang ihulit asin kun sagkod noarin niato maninigong ipagpadagos an paggibo kaiyan. An duwang aspektong ini kan sugo ni Jesus sa sato ipapaliwanag sa sunod na artikulo.

[Mga Nota sa Ibaba]

Nagigirumdoman daw Nindo?

• Huli sa anong mga dahelan asin sa anong motibo kita nakikikabtang sa paghuhulit kan Kahadean asin paggibo nin mga disipulo?

• Sagkod saen inootob kan mga lingkod ni Jehova ngonyan an sugo ni Jesus na gumibo nin mga disipulo sa mga tawo kan gabos na nasyon?

• Paano kita puedeng gumamit nin laen-laen na ‘paagi nin paninira,’ asin taano ta maninigo niatong gibohon iyan?

[Mga Hapot Para sa Pag-adal]

[Kahon/Mga Ritrato sa pahina 10]

Mga Publikasyon Para sa mga Buta

Si Albert sarong Kristianong magurang sa kongregasyon asin bilog na panahon na ministro na nag-eerok sa Estados Unidos. Sia buta. An paggamit nin mga babasahon sa Biblia sa Braille nakakatabang sa saiya na magin mas epektibo sa saiyang ministeryo, pati sa saiyang mga aktibidad bilang paraataman sa paglilingkod. Paano nia inaasikaso an saiyang mga asignasyon sa kongregasyon?

“Si Albert epektibong marhay bilang paraataman sa paglilingkod sa samong kongregasyon,” an sabi ni James, an nangengenot na paraataman. Si Albert saro sa mga 5,000 na buta sa Estados Unidos na, sa bilog na nag-aging mga taon, nag-ako nin mga publikasyon sa Biblia sa Braille na Ingles asin Kastila. Sa katunayan, poon 1912, an grupong maimbod na oripon nakatao na nin labing sanggatos na manlaenlaen na publikasyon sa Braille. Paagi sa paggamit nin modernong mga metodo, an mga imprentahan kan Mga Saksi ni Jehova nagpoprodusir sa presente nin minilyon na pahina nin Braille kada taon sa labing sampulong lenguahe asin idinidistribwir an mga ini sa labing 70 nasyon. May midbid daw kamo na tibaad makikinabang sa mga publikasyon sa Biblia na inandam para sa mga buta?

[Kahon/Ritrato sa pahina 11]

Pagtaram sa Senyas Asin Paggibo nin mga Disipulo

Rinibong Saksi sa bilog na kinaban, kaiba an dakol na maigot na hoben, an nag-adal nin pagtaram sa senyas tanganing tabangan an mga bungog na magin mga disipulo ni Cristo. Bilang resulta, sa Brazil sana, 63 na bungog an nabautismohan sa sarong nakaagi pa sanang taon asin 35 bungog na Saksi duman an naglilingkod ngonyan bilang bilog na panahon na mga ebanghelisador. Sa bilog na kinaban, igwa nin labing 1,200 na kongregasyon asin grupo sa pagtaram sa senyas. An solamenteng sirkito sa pagtaram sa senyas sa Rusya, kun an hiwas nin teritoryo an babasaran, iyo an pinakadakulang sirkito sa bilog na kinaban, na sakop an bilog na Rusya!

[Kahon sa pahina 12]

Paggibo nin mga Disipulo sa mga Tawo sa Lugar nin Negosyo

Mantang dinadalaw an mga tawo sa lugar nin negosyo sa mga opisina na pinagtatrabawohan ninda, nanuparan nin sarong Saksi sa Hawaii an sarong ehekutibo nin sarong kompanya nin transportasyon. Minsan ngani sibot, uminoyon an lalaki na mag-adal sa Biblia sa laog nin 30 minutos kada semana sa saiyang opisina. Kada Mierkoles na aga, sinasabihan nia an saiyang mga tawohan na dai nguna sia maako nin mga apod sa telepono dangan tinatawan nia nin bilog na atension an pag-adal. An saro pang Saksi sa Hawaii namamayo nin pag-adal sa Biblia sarong beses kada semana sa kagsadiri nin sarong pahirahayan nin sapatos. An pag-adal ginigibo sa mismong counter kan pahirahayan. Kun may minalaog na parokyano, minagilid an Saksi. Paghale kan parokyano, ipinapadagos ninda an pag-adal.

An ehekutibo asin an kagsadiri nin pahirahayan natagboan huli ta an mga Saksi naggibo nin inisyatiba na itaktak an saindang “mga hikot” sa laen-laen na lugar. May maiisip daw kamong lugar sa teritoryo kan saindong kongregasyon na puede nindong makaolay an mga tawo na masakit maabotan sa saindang harong?

[Ritrato sa pahina 12]

Puede daw kamong maglingkod sa langtad na iba an tataramon?