Sarong Surat ki Noe

“MAHAL na Noe, nagkapirang beses ko na po na nabasa sa Biblia an manongod sa saimo asin kun paano ka nagtogdok nin dahong na paagi kaiyan nakaligtas ka asin an saimong pamilya sa Baha.”

Iyan an kapinonan kan surat na isinumitir nin sarong 15 anyos na daragita na an ngaran Minnamaria sa sarong kompetisyon sa pagsurat para sa mga estudyanteng may edad na 14 sagkod 21. An kompetisyon inorganisar kan serbisyo sa koreo sa Finlandia, kan Federation for Finnish Mother Tongue Teachers, asin kan Finnish Literature Society. An mga partisipante kaipuhan na sumurat nin sarong surat basado sa sarong libro. Puedeng iadres iyan sa autor kan libro o sa sarong personahe sa libro. Nagpili an mga maestra nin labing 1,400 hale sa mga surat kan mga estudyante ninda asin ipinadara an mga iyan sa hurado kan kompetisyon. Dangan an hurado nagpili nin saro na pinakamarahay, sampulo na panduwang pinakamarahay, asin sampulo na ikatolong pinakamarahay na komposisyon. Naogmang marhay si Minnamaria na an surat nia nakabale sa ikatolong grupo.

Taano ta nagsurat si Minnamaria, sarong tinedyer na estudyante, ki Noe, sarong tawong nabuhay nin mga 5,000 na taon na an nakaagi? Sia nagsabi: “An Biblia an enot na suminabong sa isip ko. An mga personahe sa Biblia nagin pamilyar nang marhay sa sako. Dakol na akong nabasa manongod sa sainda kaya sinda garo baga haros buhay para sa sako. Napili ko si Noe huli ta nakakaogma an saiyang buhay asin laen sa buhay ko.”

An surat ni Minnamaria ki Noe nagtatapos sa mga tataramon na: “Ika halimbawa pa man giraray nin pagtubod asin pagkuyog. An saimong pamumuhay nakakaenkaminar sa gabos na nagbabasa kan Biblia na humiro oyon sa saindang pagtubod.”

An surat na ini nin sarong hoben na parabasa kan Biblia malinaw na nagpapaheling na an Biblia totoong “buhay asin mapuersa” sa mga tawo, hoben sagkod gurang.​—Hebreo 4:12.