Naoogma daw Kamong Marhay sa “Ley ni Jehova”?

“Maogma an tawo na . . . [an] pagkaogmang marhay yaon sa ley ni Jehova.”​—SALMO 1:​1, 2.

1. Taano ta maogma kita bilang mga lingkod ni Jehova?

SINUSUPORTARAN asin binebendisyonan kita ni Jehova bilang maimbod na mga lingkod nia. Totoo, napapaatubang kita sa dakol na pagbalo. Minsan siring, nagkakamit man kita nin tunay na kaogmahan. Ini bakong makangangalas, huli ta naglilingkod kita sa “maogmang Dios,” asin an saiyang banal na espiritu nagbubunga nin kagayagayahan sa satong puso. (1 Timoteo 1:11; Galacia 5:22) An kagayagayahan iyo an kamugtakan nin tunay na kaogmahan na resulta kan pag-antisipar o pagkamit nin sarong bagay na marahay. Asin tinatawan nanggad kita kan satong langitnon na Ama nin marahay na mga balaog. (Santiago 1:17) Bakong makangangalas na kita maogma!

2. Arin na salmo an satong totokaron?

² An kaogmahan itinatampok nanggad sa libro nin Salmo. Halimbawa, totoo ini sa Salmo 1 asin 2. Iinatribwir kan enot na mga parasunod ni Jesu-Cristo an ikaduwang salmo ki Hadeng David nin Israel. (Gibo 4:​25, 26) Pinoponan kan dai nginaranan na kompositor kan enot na salmo an saiyang ipinasabong na awit paagi sa mga tataramon na: “Maogma an tawo na dai naglakaw sa hatol kan mga maraot.” (Salmo 1:1) Sa artikulong ini asin sa sunod pa, helingon niato kun paanong an Salmo 1 asin 2 nagtatao sato nin dahelan na maggayagaya.

An Sekreto nin Kaogmahan

3. Segun sa Salmo 1:​1, ano an nagkapirang dahelan kun taano ta maogma an sarong diosnon na tawo?

³ Ipinapaheling kan Salmo 1 kun taano ta maogma an sarong diosnon na tawo. Itinatao an nagkapirang dahelan para sa siring na kaogmahan, an salmista nag-awit: “Maogma an tawo na dai naglakaw sa hatol kan mga maraot, asin sa dalan nin mga parakasala dai nagtindog, patin sa tukawan nin mga paraolog-olog dai nagtukaw.”​—Salmo 1:1.

4. Ano an ginibo ni Zacarias asin Elizabet na maninigo na arogon?

⁴ Tanganing magin maogma talaga, dapat kitang sumunod sa matanos na mga kahagadan ni Jehova. Si Zacarias asin Elizabet, na nagkamit nin magayagayang pribilehio na magin mga magurang ni Juan na Bautisador, “matanos sa atubangan nin Dios huli sa paglakaw na daing katuyawan sono sa gabos na togon asin legal na kahagadan ni Jehova.” (Lucas 1:​5, 6) Puede kitang magin maogma kun iyan man an gigibohon niato asin marigon kitang masayuma na ‘maglakaw sa hatol kan mga maraot’ o magpagiya sa saindang maraot na sadol.

5. Ano an makakatabang sato na likayan an “dalan nin mga parakasala”?

⁵ Kun sinasayumahan ta an kaisipan kan mga maraot, dai kita ‘matindog sa dalan nin mga parakasala.’ Sa katunayan, literal na dai kita maduman sa mga lugar na sa parate dinudumanan ninda​—sa mga lugar nin inmoral na aling-alingan o may maraot na dangog. Kumusta kun masugotan kita na makiayon sa mga parakasala sa saindang paggawe na bakong sono sa Kasuratan? Kun siring mamibi kita na logod tabangan kita nin Dios na makahiro kaoyon kan mga tataramon ni apostol  Pablo: “Dai kamo makipagsakal na bakong timbang sa mga dai nagtutubod. Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom?” (2 Corinto 6:14) Kun kita nagsasarig sa Dios asin “dalisay an puso,” sasayumahan niato an espiritu asin estilo nin pamumuhay kan mga parakasala asin magkakaigwa nin malinig na mga motibo asin pagmawot, patin “pagtubod na mayo nin pagsaginsagin.”​—Mateo 5:8; 1 Timoteo 1:5.

6. Taano ta maninigo kitang mag-ingat mapadapit sa mga paraolog-olog?

⁶ Tanganing mapaogma si Jehova, kita ‘dai nanggad dapat magtukaw sa tukawan nin mga paraolog-olog.’ Inoolog-olog kan nagkapira an pagigin diosnon mismo, alagad sa “huring mga aldaw” na ini, an dating mga Kristiano na nagin mga apostata sa parate nagigin nangorognang mapagtuya sa saindang pag-olog-olog. Pinatanidan ni apostol Pedro an mga kapagtubod: “Mga namomotan, . . . aramon nguna nindo ini, na sa huring mga aldaw an mga paraolog-olog madatong na may pag-olog-olog, na naglalakaw segun sa saindang sadiring mga mawot asin nagsasarabi: ‘Haen man ining ipinanugang presensia nia? Tara, poon kan aldaw na an satong mga apoon magtorog sa kagadanan, an gabos na bagay pareho man sana poon kan kapinonan nin paglalang.’” (2 Pedro 3:1-4) Kun kita dai noarin man ‘minatukaw sa tukawan nin mga paraolog-olog,’ malilikayan niato an grabeng kapahamakan na siertong sasaparon ninda.​—Talinhaga 1:22-27.

7. Taano ta maninigo niatong isapuso an mga tataramon sa Salmo 1:1?

⁷ Kun dai niato isasapuso an enot na mga tataramon kan Salmo 1, puedeng mawara niato an espirituwalidad na nakua niato paagi sa pag-adal kan Kasuratan. Sa katunayan, puede pa ngani kun siring na grumabe an kamugtakan niato. Tibaad magpoon nang mawara an satong espirituwalidad kun susunodon niato an hatol kan mga maraot. Dangan tibaad regular na kitang makiasosyar sa sainda. Pag-abot nin panahon, tibaad ngani kita magin apostatang mga paraolog-olog na daing pagtubod. Malinaw nanggad, an pakikikatood sa mga maraot puedeng magpatalubo nin maraot na espiritu sa sato asin puedeng makaraot sa relasyon niato ki Jehova Dios. (1 Corinto 15:33; Santiago 4:4) Dai man logod niato noarin man pagtogotan na mangyari iyan sa sato!

8. Ano an makakatabang sato na ipokus an satong isip sa espirituwal na mga bagay?

⁸ An pamibi makakatabang sato na ipokus an satong isip sa espirituwal na mga bagay asin likayan an pakikiiba sa mga maraot. “Dai kamo maghadit sa ano man na bagay,” an isinurat ni Pablo, “kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an  katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” Inenkaminar kan apostol an paghorophorop sa mga bagay na totoo, seryoso, matanos, malinig, madaling kamotan, marahay an dangog, may pakinabang, asin inoomaw. (Filipos 4:6-8) Humiro kita kaoyon kan konseho ni Pablo asin dai niato noarin man pababaon an pagkatawo niato na kapareho kan mga maraot.

9. Minsan ngani linilikayan niato an maraot na mga gibo, paano niato hinihingoang tabangan an gabos na klase nin tawo?

⁹ Minsan ngani sinasayumahan ta an maraot na mga gibo, nagtatao nanggad kita nin mataktikang patotoo sa iba, kun paanong si apostol Pablo nagtaram ki Gobernador Felix nin Roma “manongod sa katanosan asin pagpopogol sa sadiri patin paghokom na madatong.” (Gibo 24:​24, 25; Colosas 4:6) Ihinuhulit niato an maogmang bareta kan Kahadean sa gabos na klase nin tawo, asin tinatratar niato sinda sa maboot na paagi. Kompiado kita na an mga “may tamang tendensia sa buhay na daing katapusan” magigin na man may pagtubod asin maoogmang marhay sa ley nin Dios.​—Gibo 13:48.

Naoogma Siang Marhay sa Ley ni Jehova

10. Ano an makakatabang sa pagpatadom nin permanente sa satong isip asin puso sa mga panahon nin personal na pag-adal?

¹⁰ Mapadapit sa tawong maogma, idinagdag pa kan salmista: “An saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi.” (Salmo 1:2) Bilang mga lingkod nin Dios, kita ‘naoogmang marhay sa ley ni Jehova.’ Kun posible, sa mga panahon kan satong personal na pag-adal asin paghorophorop, puede kitang magbasa “nin pahinghing,” na sinasayod an mga tataramon. An paggibo kaini kun binabasa an arin man na kabtang kan Kasuratan makakatabang sa pagpatadom nin permanente sa satong isip asin puso.

11. Taano ta maninigo niatong basahon an Biblia “aldaw asin banggi”?

¹¹ Ineenkaminar kita kan “maimbod asin mapagmansay na oripon” na basahon an Biblia aroaldaw. (Mateo 24:45) Huli sa makosog na pagmawot na orog na magin pamilyar sa mensahe ni Jehova sa katawohan, marahay na basahon niato an Biblia “aldaw asin banggi”​—iyo, dawa kun dai kita napapatorog huli sa ano man na dahelan. Sinadol kita ni Pedro: “Bilang mga omboy na bagong mamundag, magkaigwa kamo nin pagmawot sa daing halong gatas kan tataramon, tanganing paagi kaiyan magtalubo kamo sa kaligtasan.” (1 Pedro 2:​1, 2) Naoogma daw kamong marhay sa pagbasa kan Biblia aroaldaw asin paghorophorop sa Tataramon asin mga katuyohan nin Dios sa banggi? Iyan an namatean kan salmista.​—Salmo 63:6.

12. Ano an gigibohon niato kun naoogma kitang marhay sa ley ni Jehova?

¹² An satong daing sagkod na kaogmahan nakadepende sa satong pagkaogmang marhay sa ley nin Dios. Sangkap asin matanos iyan, asin dakula an balos sa pag-otob kaiyan. (Salmo 19:7-11) An disipulong si Santiago nagsurat: “An nagtuturuhok sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.” (Santiago 1:25) Kun talagang naoogma kitang marhay sa ley ni Jehova, dai malihis an sarong aldaw na dai kita naghohorophorop sa espirituwal na mga bagay. Tunay nanggad, mamomotibar kitang ‘siyasaton an hararom na mga bagay nin Dios’ asin enoton  an intereses kan Kahadean sa satong buhay.​—1 Corinto 2:10-13; Mateo 6:33.

Sia Nagigin Siring sa Kahoy

13-15. Sa anong sentido na kita puedeng magin siring sa sarong kahoy na nakatanom sa kataed nin abundang gikanan nin tubig?

¹³ Sa paglaladawan pa kan tawong tanos, an salmista nagsasabi: “Sia magigin nanggad siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.” (Salmo 1:3) Kapareho kan gabos na iba pang tawo na bakong sangkap, kita na naglilingkod ki Jehova nakakaeksperyensia nin mga problema sa buhay. (Job 14:1) Tibaad mag-agi kita nin paglamag asin manlaenlaen na iba pang pagbalo na konektado sa satong pagtubod. (Mateo 5:10-12) Minsan siring, sa tabang nin Dios, mapanggana niatong natatagalan an mga pagbalong ini, kun paanong nakakayanan nin pusog na kahoy an medyo makosog na mga doros.

¹⁴ An kahoy na nakatanom sa kataed nin dai nauubosan na gikanan nin tubig dai naaalang kun mainit an panahon o kun tigmara. Kun kita mga tawong matatakton sa Dios, an satong kosog naghahale sa dai nauubosan na Gikanan​—si Jehova Dios. Si Pablo nag-asa sa Dios para sa tabang asin nakapagsabi: “Igwa ako kan kosog para sa gabos na bagay huli sa saiya [ki Jehova] na nagtatao nin puersa sa sako.” (Filipos 4:13) Kun kita ginigiyahan asin sinususteniran sa espirituwal kan banal na espiritu ni Jehova, dai kita naaalang, na nagigin bakong mabunga o gadan sa espirituwal. Kita mabunga sa paglilingkod sa Dios asin nagpapaheling man kan mga bunga kan saiyang espiritu.​—Jeremias 17:​7, 8; Galacia 5:​22, 23.

¹⁵ Paagi sa paggamit kan termino sa Hebreo na trinadusir na “siring,” an salmista naggagamit nin simile. Pinagkokomparar nia an duwang bagay na magkalaen, minsan ngani may sarong partikular na kualidad sinda na magkapareho. An mga tawo asin kahoy magkalaen, alagad an pagigin marambong nin sarong kahoy na nakatanom sa kataed nin abundang gikanan nin tubig minalataw na nagpagirumdom sa salmista kan espirituwal na prosperidad kan mga an “pagkaogmang marhay yaon sa ley ni Jehova.” Kun naoogma kitang marhay sa ley nin Dios, an satong mga aldaw puedeng magin siring kan sa kahoy. An totoo, puede kitang mabuhay sagkod lamang.​—Juan 17:3.

16. Taano ta asin paanong ‘an gabos niatong ginigibo napapakarhay’?

¹⁶ Mantang kita nagmamaigot na mamuhay nin tanos, tinatabangan kita ni Jehova na kayanon an sakit nin mga pagbalo asin problema. Kita magayagaya asin mabunga sa paglilingkod sa Dios. (Mateo 13:23; Lucas 8:15) ‘An gabos niatong ginigibo mapapakarhay’ huli ta an satong pangenot na obheto gibohon an kabotan ni Jehova. Huling an saiyang mga katuyohan pirmeng nagigin mapanggana asin naoogma kitang marhay sa saiyang mga togon, napapakarhay kita sa espirituwal. (Genesis 39:23; Josue 1:​7, 8; Isaias 55:11) Totoo ini dawa kun kita napapaatubang sa mga problema.​—Salmo 112:1-3; 3 Juan 2.

An mga Maraot Garo Baga Nag-aasenso

17, 18. (a) Sa ano iinagid kan salmista an mga maraot? (b) Dawa kun umasenso sa materyal an mga maraot, taano ta mayo sinda nin nagdadanay na seguridad?

¹⁷ Laen nanggad an kamugtakan kan mga maraot kisa mga matanos! An mga maraot tibaad garo baga nag-aasenso sa materyal sa kadikit na panahon, alagad dai sinda nag-aasenso sa espirituwal. Risang-risa ini sa dugang pang mga tataramon kan salmista: “An mga maraot bakong siring kaiyan, kundi siring sa apa na ipinapadpad parayo nin doros. Kaya an mga maraot dai makakatindog sa paghokom, ni an mga parakasala sa katiriponan nin mga matanos.” (Salmo 1:​4, 5) Mangnoha na sinasabi kan salmista, “an mga maraot bakong siring kaiyan.” An boot niang sabihon bako sindang siring kan diosnon na mga tawo, na iinagid pa sana sa mabunga asin matagal na mga kahoy.

¹⁸ Dawa kun umasenso sa materyal an mga maraot, mayo sinda nin nagdadanay na seguridad. (Salmo 37:16; 73:​3, 12) Kapareho ninda an lolong na tawong mayaman na nasambitan ni Jesus sa sarong ilustrasyon kan ipaareglo sa saiya an sarong kuestion may koneksion sa mana. Sinabi ni Jesus sa mga presente: “Magpuka kamo asin lumikay kamo sa gabos na klase nin kaaraan, huli ta dawa kun an sarong tawo abunda an saiyang buhay dai minagikan sa mga bagay na saiyang nasasadirihan.” Iinilustrar ni Jesus an puntong ini paagi sa pagsabi na an daga nin sarong tawong mayaman marahay an produkto kaya nagplano siang gabaon an saiyang mga tambobong asin magtogdok nin mas  darakulang tambobong tanganing ikalaog an gabos niang marahay na bagay. Dangan nagplano an tawo na kumakan, uminom, asin magpasiramsiram. Alagad sinabi nin Dios: “Ika na lolong, ngonyan na banggi hinahagad ninda sa saimo an saimong kalag. Kun siring, siisay an magkakamit kan mga bagay na saimong tinipon?” Tanganing idoon an saiyang punto, idinagdag ni Jesus: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.”​—Lucas 12:13-21.

19, 20. (a) Iladawan an suanoy na proseso nin pagginik asin pagpahimalid. (b) Taano ta iinagid sa apa an mga maraot?

¹⁹ An mga maraot “bakong mayaman sa Dios.” Huli kaini, mayo na sinda nin seguridad asin karigonan na malabi pa sa apa, an mahimpis na ubak nin tipasi. Pakatapos anihon an mga tipasi kaidtong suanoy na mga panahon, iyan dinadara sa pinaggiginikan, sarong patag na lugar na sa parate halangkaw. Duman an pangginik na mga paragos na may matarom na gapo o batbat na mga ngipon sa irarom kaiyan ginuguyod nin mga hayop sa ibabaw kan mga tipasi tanganing ronoton an mga poon kan tipasi asin paluwason sa apa an mga laman kan tipasi. Sunod, sarong panhimalid na pala an ginagamit sa pagpala kan gabos na saralak na tambak asin sa pagpahimalid kaiyan sa doros. (Isaias 30:24) An mga laman kan tipasi nahuhulog pabalik sa pinaggiginikan, mantang pinapadpad kan doros pasiring sa gilid an ohot asin pinapalid an apa. (Rut 3:2) Pakatapos na saligsigon an mga tipasi tanganing haleon an mga batiris asin iba pang dai kaipuhan, andam na iyan tanganing isaray o ipagiling. (Lucas 22:31) Alagad mayo na an apa.

²⁰ Kun paanong an mga laman kan tipasi nahuhulog sa daga asin pinepreserbar mantang an apa pinapalid, siring man kaiyan na an mga matanos magdadanay asin an mga maraot hahaleon. Pero, daing duwa-duwa na naoogma kita na an siring na mga paragibo nin maraot sa dai na mahahaloy mawawara na sagkod lamang. Kun sinda napara na, an mga tawo na naoogmang marhay sa ley ni Jehova magkakamit nin dakol na bendisyon. Tunay nanggad, an makinuyog na mga tawo sa kahurihurihi maako kan balaog nin Dios na buhay na daing katapusan.​—Mateo 25:34-46; Roma 6:23.

An Maogmang “Dalan kan mga Matanos”

21. Paanong ‘inaaram ni Jehova an mga matanos’?

²¹ An enot na salmo nagtatapos sa mga tataramon na ini: “Inaaram ni Jehova an dalan kan mga matanos, alagad an dalan kan mga maraot mapapara.” (Salmo 1:6) Paano ‘inaaram nin Dios an mga matanos’? Bueno, kun kita nagmamaigot na mamuhay nin tanos, makakasierto kita na rinerekonoser kan satong langitnon na Ama an satong diosnon na pamumuhay asin minamansay kita bilang  inooyonan na mga lingkod nia. Dangan, puede asin maninigo niatong ibugtak an gabos niatong kahaditan sa saiya na may marigon na pagtubod na sia may pagmakolog sa sato.​—Ezequiel 34:11; 1 Pedro 5:​6, 7.

22, 23. Ano an mangyayari sa mga maraot asin sa mga matanos?

²² “An dalan kan mga matanos” magdadanay sagkod lamang, alagad an maraot na mga tawong habong magpatanos malalaglag huli sa paghokom ni Jehova na bakong paborable. Asin an saindang “dalan,” o pamumuhay, matatapos kasabay ninda. Makakakompiar kita sa kaotoban kan mga tataramon ni David: “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.”​—Salmo 37:​10, 11, 29.

²³ Kanigoan na kaogmahan an maeeksperyensiahan niato kun kita magkapribilehiong mabuhay sa sarong paraisong daga na mayo na an mga maraot! Dangan an mga mahoyo asin matanos magkakamit nin tunay na katoninongan huli ta pirme sindang maoogmang marhay sa “ley ni Jehova.” Minsan siring, bago kaiyan, dapat ngunang ipaotob “an pagboot ni Jehova.” (Salmo 2:7a) Tatabangan kita kan sunod na artikulo na masabotan kun anong pagboot iyan asin kun ano an magigin kahulogan kaiyan para sa sato asin para sa bilog na pamilya nin tawo.

Ano an Isisimbag Nindo?

• Taano ta maogma an diosnon na tawo?

• Ano an nagpapaheling na naoogma kitang marhay sa ley ni Jehova?

• Paano puedeng magin siring sa sarong kahoy sa may matubig na lugar an sarong indibiduwal?

• Paano napapalaen an dalan kan mga matanos kisa dalan nin mga maraot?

[Mga Hapot Para sa Pag-adal]

[Ritrato sa pahina 11]

An pamibi makakatabang sato na likayan an pakikiiba sa mga maraot

[Ritrato sa pahina 12]

Taano ta siring sa sarong kahoy an matanos na tawo?