“Tanganing Ipamidbid an Ngaran ni Jehova”

SA BILOG na kinaban, An Torrengbantayan asin an kapadis kaiyan na magasin, an Awake!, inaapresyar huli sa espirituwal na laog asin nakakapagtokdong halaga kaiyan. Pinepensar ini, an sarong nagbabasa sa Pransia nagsurat kasuarin pa sana kan minasunod na surat:

“Ako sarong hoben na babae, sa kapoonpooni taga Aprika, na daing gayo nakapag-adal. Dai pa sana nahahaloy, pinonan kong basahon an saindong mga magasin. Huling naakit sa mga tema, naaraman ko na an halaga nin pagbasa. Sa tabang kan saindong mga magasin, ruminahay an sakong bokabularyo asin nakakasurat na ako nin sarong surat na pipira na sana an sala dian.

“Napangalas ako na an ipinupublikar nindo mga artikulong dapit sa gabos na klase nin tema may labot sa mga tawo, planeta, asin sa Kaglalang. An mga artikulong ini madaling masabotan kaya pinapangyari kaiyan na an saro magin mahilig na magbasa. Mayo na nin siisay man na igwa nin abilidad na magtokdo sa gabos na klase nin tawo nin sarabay.

“Napangalas man ako kan maheling ko na an gabos na ini ginigibo bakong tanganing magnegosyo kundi tangani sanang ipamidbid an ngaran ni Jehova. Aram ko na yaon sa saindo an saiyang pag-oyon, asin nagpapasalamat ako sa saindo. Tabi na ipadagos nindo an pagkua nin kosog sa Kaglalang tanganing makapagtokdo.”

Sa presente ginigibo kan Mga Saksi ni Jehova an saindang pagtotokdo kan Biblia sa 235 kadagaan. Ipinupublikar An Torrengbantayan sa 148 lenguahe asin an Awake! sa 87 lenguahe. An mga magasin na ini dai iniimprenta tanganing omawon an siisay man na tawo. An basado sa Biblia na konseho asin sunod sa panahon na impormasyon na yaon dian dinisenyo tanganing magtaong onra sa Kaglalang, na nagsasabi: “Ako, si Jehova, . . . an Saro na nagtotokdo sa saimo na pakinabangon an saimong sadiri.” (Isaias 48:17) Logod na makinabang kamo paagi sa regular na pagbasa kan Banal na Kasuratan kaiba an mga pantabang na ini sa pag-adal sa Biblia.