Ano an Nagtatao nin Tunay na Kahulogan sa Buhay?

KAN hapoton si Jesse, sarong 17 anyos na estudyante sa haiskul, manongod sa kahulogan nin buhay, sia nagsimbag, “Magpasiramsiram kamo sagkod na magigibo nindo, sagkod na kamo nabubuhay.” Si Suzie may iba man na punto de vista. “Sa totoo, naniniwala ako na an kahulogan nin buhay iyo an kun ano an ginigibo nindong magin kahulogan kaiyan,” an sabi nia.

Napag-isip-isip na daw nindo an manongod sa kahulogan nin buhay? Igwa daw nin saro sanang pankagabsan na katuyohan para sa katawohan? O tama daw si Suzie​—na sa pundamental an buhay iyo an kun ano an ginigibo dian kan lambang saro sa sato? Gurano man kaoswag sa teknolohiya an satong sosyedad, may sarong bagay sa laog niato na garo baga naghihimuyawot nin kahulogan. Sa sarong panahon sa satong buhay, an kadaklan sa sato nag-iisip-isip, ‘Taano ta yaon kita digdi?’

Nagmamaigot na marhay an siensia sa presenteng panahon na masimbag an hapot na iyan. Na ano an resulta? “An mismong pagigin buhay mayo nin ano man na kahulogan sa proseso nin ebolusyon,” an sabi ni David P. Barash, sarong propesor sa sikolohiya asin zoolohiya. Para sa mga biologo sa ebolusyon, an buhay na mga bagay may saro sanang katuyohan: magdanay na buhay asin magreprodusir. Sa siring, si Propesor Barash nagsusuherir: “Sa sarong dakulaon na uniberso na mayo nin katuyohan asin daing pagmakolog sa mga tawo, paninimbagan na kan mga tawo na tawan nin kahulogan an satong buhay paagi sa libre, mapagrisa, tuyong mga pagpili na ginigibo niato.”

An Gikanan nin Kahulogan Asin Katuyohan

Kun siring, iyan sana daw an kahulogan nin buhay​—an paggibo kan lambang saro sa sato kan gusto niang gibohon? Imbes na pabayaan sana kita na daing direksion sa sarong uniberso na mayong katuyohan o kahulogan, haloy nang ihinayag kan Biblia na may dahelan kaya yaon kita digdi. An pag-eksister niato bakong resulta nin sarong kosmikong aksidente. Sinasabi sa sato na sa laog nin haloyon na panahon inandam kan Kaglalang an daga para sa pagdatong nin tawo. Iyan dai nagkanorongod sana. Sinegurado nia na an gabos magin “marahayon.” (Genesis 1:31; Isaias 45:18) Taano? Huli ta an Dios may katuyohan para sa tawo.

Pero, interesante nanggad na dai nin Dios itinalaga antes pa an ngapit kan lambang indibiduwal, magsalang paagi sa pag-interbenir nin Dios o paagi sa sarong biolohikong proseso. Minsan ngani naaapektaran kita kan satong namanang kodigo henetiko, sa kadaklan kita an nagkokontrol kan satong mga gawe-gawe. Talingkas kita gabos na pumili kan sadiri niatong paggawe sa buhay.

Minsan ngani nasa lambang saro na sa sato na pumili kun ano an gigibohon niato sa satong buhay, sala na ipuera an Kaglalang sa satong mga pagplano. Sa katunayan, nadiskobre nin dakol na an tunay na kahulogan asin katuyohan sa buhay konektado sa pagkaigwa nin relasyon sa Dios. An mahalagang marhay na pagigin magkakonektado kan Dios asin kan katuyohan kan satong buhay itinatampok sa personal na ngaran nin Dios, an Jehova, na sa literal nangangahulogan, “Saiyang Pinapangyayaring Magin.” (Exodo 6:3; Salmo 83:18) An boot sabihon, progresibo niang inootob an ano man na  ipinapanuga nia asin pirme niang ginigibo an katuyohan niang gibohon. (Exodo 3:14; Isaias 55:​10, 11) Isip-isipa iyan. An ngaran na Jehova sarong garantiya sa sato gabos na sia an pinaka-Gikanan asin nagdadanay na Gikanan nin makahulogan na katuyohan.

An pagrekonoser sana sa pag-eksister kan Kaglalang igwa na nin dakulaon na epekto sa pananaw nin saro manongod sa buhay. Si Linet, sarong 19 anyos, nagsasabi: “An pakaheling sa gabos na marahayon na bagay na linalang ni Jehova asin sa katuyohan kaiyan nagpapaheling sa sako na may dahelan man kaya ako linalang.” Idinugang ni Amber: “Kun nagtataram an mga tawo manongod sa saro na ‘dai ninda midbid,’ pirmeng ipinapagirumdom kaiyan sa sako na talagang midbid ko an Dios. An prueba na nag-eeksister si Jehova malinaw na maheheling sa mga bagay na ginibo nia.” (Roma 1:20) Siempre, sarong bagay an pagrekonoser na nag-eeksister an Kaglalang, alagad iba nang orolay an magpatalubo nin makahulogan na relasyon sa saiya.

Pakikikatood sa Dios

Sa bagay man na ini, makakatabang an Biblia. An enot na mga kapitulo kaiyan nagtatao nin malinaw na prueba na si Jehova Dios sarong mamomoton na Ama. Halimbawa, dai nia linalang si Adan asin Eva dangan pinabayaan na sana sindang tuodan kun siisay sia. Imbes, nakikomunikar sia nin regular sa sainda. Dai nia sinda pinabayaan sa Eden tanganing sinda na sana an gumiya sa sadiri ninda mantang ipinapadagos nia an iba pang intereses. Imbes, tinawan nia sinda nin espesipikong instruksion kun paano an pinakamarahay na pamumuhay. Tinawan nia sinda nin nakakakontentong trabaho, asin iinareglo nia an pagkaigwa ninda nin nagpapadagos na edukasyon. (Genesis 1:26-30; 2:7-9) Bako daw na ini an aasahan nindo sa sarong may kakayahan asin mamomoton na magurang? Ngonyan isip-isipon nindo kun ano an kahulogan kaiyan. “An pakaaram na linalang ni Jehova an daga asin dinisenyo kita na may abilidad na ikaogma an saiyang mga linalang,” an sabi ni Denielle, “nagpapaheling sa sako na gusto niang magin maogma kita.”

Labi pa dian, arog nin siisay man na marahay na ama, gusto ni Jehova na an gabos niang aki magkaigwa nin personal na relasyon sa saiya. Mapadapit digdi, an Gibo 17:27 inaasegurar kita: “Sia bakong harayo sa lambang saro sa sato.” Ano an kalaenan kaiyan? Nagsabi si Amber: “An pakamidbid ki Jehova nagtao sako nin kompiansa na ako dai noarin man biyong nagsosolo. Sa ano man na kamugtakan, ako pirmeng may dodolokan.” Dugang pa, mantang namimidbid nindo si Jehova, maaaraman nindo na sia maboot, makatanosan, asin marahay. Puede kamong magsarig sa saiya. “Kan si Jehova magin dayupot na katood ko,” an sabi ni Jeff, “aram ko na mayo na nin siisay man na iba pang mas andam na tumabang sa sako.”

An makamomondo, dakol na negatibong bagay an sinasabi manongod ki Jehova. Sia an binabasol sa dakol na pagdusa nin tawo asin salang gawe-gawe sa relihion. An nagkapirang pinakamaraot na kabikoan sa kasaysayan nin tawo sinasabing sia an dahelan. Alagad an Deuteronomio 32:​4, 5 nagpapaliwanag: “An gabos niang dalan hustisya. . . . Sinda guminawe nin kapahapahamak sa sadiri ninda; sinda bako niang mga aki, an kakundian sadiri ninda.” Kun siring, obligado kita mismo na siyasaton an mga prueba.​—Deuteronomio 30:​19, 20.

An Katuyohan nin Dios Naotob

Minsan siring, ano man an desisyon niato, mayo nin makakaolang sa Dios sa biyong paghaman kan saiyang katuyohan para sa dagang ini asin sa katawohan. Total, sia an Kaglalang. Ano, kun siring, an katuyohan na iyan? Sinambit iyan ni Jesu-Cristo sa saiyang Sermon sa Bukid kan sia magsabing: “Maogma an mga mahoyo, mantang mamanahon ninda an daga.” Sa huri, sa apostol niang si Juan, sinabi nia na desidido an Dios ‘na laglagon an mga naglalaglag kan daga.’ (Mateo 5:5; Kapahayagan 11:18) Huling kaiba si Jesus nin Dios sa paglalang, aram nia na poon sa kapinonan katuyohan nin Dios na magkaigwa nin sangkap na pamilya nin tawo na mag-eerok sa daga sagkod lamang sa sarong paraiso. (Genesis 1:​26, 27; Juan 1:1-3) Asin an Dios dai nagbabago. (Malaquias 3:6) “Sierto nanggad na kun ano an sakong inisip,” an panuga nin Dios sa sato, “iyan an dapat na mangyari; asin kun ano an nagin konseho ko, iyan an maootob.”​—Isaias 14:24.

Sa panahon niato, pinonan na ni Jehova na ibugtak an mga pundasyon para sa sarong nagkakasararong komunidad na nakabasar, bakong sa kahanaban asin sadiring interes na arog na marhay kan satong kinaban ngonyan, kundi sa pagkamoot sa Dios asin sa kapwa. (Juan 13:35; Efeso 4:​15, 16; Filipos 2:1-4) Iyan sarong boluntad na asosasyon nin progresibo asin motibadong marhay na mga indibiduwal  na may misyon​—an maghulit kan maogmang bareta kan madatong na Kahadean nin Dios bago an katapusan kan sistemang ini nin mga bagay. (Mateo 24:14; 28:​19, 20) Sa labing 230 kadagaan, labi nang anom na milyon na Kristiano an nagsasambang magkairiba sa sarong mamomoton, nagkakasararong internasyonal na kasararoan nin magturugang.

Tawan nin Kahulogan an Saindong Buhay

Kun naghahanap kamo nin orog na kahulogan sa buhay nindo, maninigong maaraman nindo na inaagda kamo ni Jehova Dios na makiasosyar sa saiyang banwaan​—an saiyang “matanos na nasyon”​—ngonyan. (Isaias 26:2) Pero, tibaad nag-iisip-isip kamo, ‘Paano daw an buhay sa Kristianong komunidad na ini? Talaga daw na gusto kong magin kabtang kaini?’ Hinanyoga an sinasabi kan nagkapirang hoben:

Si Quentin: “An kongregasyon an sakong proteksion sa kinaban. An pakaaram na si Jehova kabtang kan sakong buhay nakakatabang sa sako na masabotan na sia nag-eeksister asin gusto niang magin maogma ako.”

Si Jeff: “An kongregasyon an pinakamarahay na lugar na puede kong dumanan tanganing maparigon an sakong boot. Yaon dian an sakong mga tugang na lalaki asin babae, na nagtatao kan saindang pagsuportar asin pag-omaw. Sinda talaga an sakong pamilyang ekstendido.”

Si Linet: “An kagayagayahan na maheling an sarong tawo na maogmang inaako an katotoohan sa Biblia asin nagdedesisyon na maglingkod ki Jehova dai ikakakomparar sa ano pa man na ibang bagay. Ini nagtatao nin dakulang satispaksion sa sakong buhay.”

Si Cody: “An sakong buhay magigin daing kamanungdanan kun mayo si Jehova. Magpapabarobalyo ako na daing direksion arog nin dakol na iba pa, na naghihingoang manompongan an kaogmahan alagad ta dai iyan nakukua. Imbes, tinawan ako ni Jehova nin dai mapaniwalaan na pribilehio na pagkaigwa nin relasyon sa saiya, asin iyan nagtatao nin kahulogan sa sakong buhay.”

Taano ta dai kamo magsiyasat mismo? Madidiskobre nindo na paagi sa pagrani sa saindong Kaglalang, si Jehova Dios, manonompongan nindo an tunay na kahulogan sa buhay.

[Mga Ritrato sa pahina 31]

An pagkaigwa nin relasyon sa Dios nagtatao nin kahulogan sa satong buhay

[Picture Credit Line sa pahina 29]

Retrato kan NASA