“Gusto Ming Sabihon na, ‘Iyo!’”

AN SANGANG opisina kan Mga Saksi ni Jehova sa Nigeria nakaresibi kasuarin pa sana nin sarong surat na, sa sarong kabtang, nagsasabi kan minasunod:

“An samong aki na si Anderson, nagadan kan sia 14 anyos. Bago sia magadan, nag-aataman sia nin duwang manok. Gusto niang ipabakal an mga iyan dangan ipadara an kuarta sa sangang opisina bilang kontribusyon sa pambilog na kinaban na paghuhulit. Alagad nagadan sia bago ikapabakal an mga iyan.

“Huli sa kamawotan nia, pinadakula mi, na saiyang mga magurang, an mga manok asin ipinabakal an mga iyan. Ipinapadara mi an kuarta sa saindo bilang kontribusyon ni Anderson. Huli sa panuga ni Jehova, kompiado kami na dai na mahahaloy​—haranihon na nanggad​—maheheling niamo liwat si Anderson. Gusto ming sabihon na, ‘Iyo!’ kun maghapot sia kun ginibo mi an minamawot kan saiyang puso. Tunay nanggad, inaantisipar mi na maheling bako sanang si Anderson kundi patin an sarong ‘dakulaon na panganoron nin mga saksi’ na bubuhayon liwat.”​—Hebreo 12:1; Juan 5:​28, 29.

Arog kan malinaw na ipinapahayag kan surat na nasa enotan, an pagtubod sa pagkabuhay liwat sarong paglaom na nagsusustenir sa tunay na mga Kristiano. Kanigoan na kagayagayahan an maeeksperyensiahan kan minilyon na pamilya kun sinda, arog kan pamilya ni Anderson, maogmang sasabaton an mga namomotan ninda na napasuway sa sainda huli sa kaiwal na kagadanan!​—1 Corinto 15:24-26.

Iinaalok kan Tataramon nin Dios an nakakarangang paglaom na ini na pagkabuhay liwat bilang saro sa dakol na makangangalas na bagay na madali nang maotob sa matanos na bagong kinaban sa irarom kan Kahadean nin Dios. (2 Pedro 3:13) Nagtataram dapit sa gigibohon nin Dios para sa mga tawo sa panahon na iyan, an Biblia nagsasabi: “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:4.