Ikinaongis na Mayo nin Dahelan

“Ikinaongis ninda ako na mayo nin dahelan.”​—JUAN 15:25.

1, 2. (a) Taano ta dakulang iisipon para sa nagkapira kun pinapakaraot an mga Kristiano, alagad taano ta dai niato maninigong ikabigla an siring na mga pagtaram? (b) Arin na kahulogan kan terminong “ikaongis” an pag-oolayan niato sa artikulong ini? (Helingon an nota sa ibaba.)

AN Mga Saksi ni Jehova nagmamaigot na mamuhay sono sa mga prinsipyo na yaon sa Tataramon nin Dios. Bilang resulta, may marahay na reputasyon sinda sa dakol na kadagaan. Minsan siring, kun beses minimisrepresentar sinda. Halimbawa, nagirumdoman kan sarong opisyal nin gobyerno sa siudad nin St. Petersburg, Rusya: “An mga Saksi ni Jehova irineport sa samo bilang sarong klase nin patagong sekta na nagpupunsionar sa hilom asin ginagadan an mga aki asin an saindang sadiri.” Alagad pakatapos na magtrabaho kaiba kan mga Saksi ni Jehova may koneksion sa sarong internasyonal na kombension, an iyo man sanang opisyal nagsabi: “An naheheling ko ngonyan normal asin nakahuyom na mga tawo . . . Sinda matoninong asin kalmado, asin nagkakaminorootmootan sindang marhay.” Sinabi pa nia: “Dai ko talaga masabotan kun taano ta may mga tawong nagsasabi nin siring na mga kaputikan manongod sa sainda.”​—1 Pedro 3:16.

² Dai naoogma an mga lingkod nin Dios kun pinapakaraot sinda bilang mga paragibo nin maraot, pero dai sinda nabibigla kun may mga tawong nagtataram nin tumang sa sainda. Si Jesus nagpatanid bago pa sa saiyang mga parasunod: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. . . . Iyan tanganing an tataramon na nasusurat sa saindang Ley maotob, ‘Ikinaongis ninda ako na mayo nin dahelan.’” * (Juan 15:18-20, 25; Salmo 35:19; 69:4) Sinabi nia sa saiyang mga disipulo bago kaidto: “Kun inapod kan mga tawo an kagharong na Beelzebub, gurano pa daw na dai ninda apodon nin siring an nasa saiyang harong?” (Mateo 10:25) Nasasabotan kan mga Kristiano na an pagtagal sa siring na pagpakaraot kabtang kan “hariging pasakitan” na inako ninda kan sinda nagin mga parasunod ni Cristo.​—Mateo 16:24.

3. Sagkod saen na pinaglamag an tunay na mga parasamba?

³ An paglamag sa tunay na mga parasamba haloy nang nangyayari, na poon pa sa “matanos na si Abel.” (Mateo 23:​34, 35) Bako iyan na pipira sana asin bibihirang pangyayari. Sinabi ni Jesus na an saiyang mga parasunod ‘ikakaongis nin gabos na tawo’ huli sa saiyang ngaran. (Mateo 10:22) Dugang pa, isinurat ni apostol Pablo na an gabos na lingkod nin Dios​—kaiba an lambang saro sa sato—​maninigong umasa na lalamagon. (2 Timoteo 3:12) Ano an dahelan kaini?

An Promotor nin Daing Katanosan na Pagkaongis

4. Paano ihinahayag kan Biblia an promotor kan gabos na daing katanosan na pagkaongis?

⁴ Ihinahayag kan Tataramon nin Dios na poon pa sa kapinonan, igwa nin dai naheheling na parasutsut. Estudyare an mabangis na paggadan sa enot na tawong may pagtubod, si Abel. Sinasabi kan Biblia na an saiyang may intension na gumadan na tugang, si Cain, “naggikan sa maraot,” si Satanas na Diablo. (1 Juan 3:12) Nakua ni Cain an ugale ni Satanas, asin ginamit sia kan Diablo tanganing gibohon an maraot na mga intension kaini. Ihinahayag man kan Biblia an kabtang ni Satanas sa madahas na mga pagsalakay ki Job asin ki Jesu-Cristo. (Job 1:12; 2:​6, 7; Juan 8:37, 44; 13:27) Malinaw na sinasabi kan libro nin Kapahayagan an promotor kan paglamag sa mga parasunod ni Jesus, na sinasabi: “Ibibilanggo kan Diablo an nagkapira sa saindo tanganing kamo lubos na mabalo.” (Kapahayagan 2:10) Iyo, si Satanas an promotor kan gabos na daing katanosan na pagkaongis sa banwaan nin Dios.

5. Ano an dahelan kan pagkaongis ni Satanas sa tunay na mga parasamba?

 ⁵ Ano an dahelan kan pagkaongis ni Satanas sa tunay na mga parasamba? Sa sarong pakana na nagpapaheling nin labi-labing kapalangkawan, inangat ni Satanas an “Hade sa panahon na daing sagkod,” si Jehova Dios. (1 Timoteo 1:17; 3:6) Iiniinsistir nia na an Dios labi-labi kamapamogol sa saiyang pamamahala sa saiyang mga linalang asin na mayo nin siisay man na naglilingkod ki Jehova na may dalisay na motibo, na ginigibo iyan nin mga tawo huli sana sa paslong pakinabang. Hinihingako ni Satanas na kun sia togotan na baloon an mga tawo, kaya niang patalikodon an gabos sa paglilingkod sa Dios. (Genesis 3:1-6; Job 1:6-12; 2:1-7) Sa pagpakaraot ki Jehova na saro daang nan-aapi, putikon, asin bakong mapanggana, hinihingoa ni Satanas na patunayan na sia sarong karibal na soberano. Sa siring, an saiyang kaanggotan tumang sa mga lingkod nin Dios motibado kan saiyang paghimuyawot na sambahon sia.​—Mateo 4:​8, 9.

6. (a) Paano kita personal na kalabot sa isyu kan soberaniya ni Jehova? (b) Paano nakakatabang sa sato an pakasabot sa isyung ini tanganing mapagdanay an satong integridad? (Helingon an kahon, pahina 16.)

⁶ Nasasabotan daw nindo kun paano naaapektaran kan isyung ini an saindong buhay? Bilang lingkod ni Jehova, posibleng marhay na nanompongan nindo na minsan ngani nangangaipo nin odok na paghihingoa an paggibo kan kabotan nin Dios, an mga pakinabang sa paggibo kaiyan nakakalabing marhay. Pero, kumusta kun huli sa kamugtakan kan saindong buhay nagin masakit, makolog pa ngani, para sa saindo an padagos na pagsunod sa mga ley asin prinsipyo ni Jehova? Asin kumusta kun garo baga mayo kamong inaakong pakinabang bilang balos? Ikokonklusyon daw nindo na bakong kapakipakinabang na padagos na paglingkodan si Jehova? O an pagkamoot daw ki Jehova asin hararom na pag-apresyar sa saiyang kahangahangang mga kualidad an mapahiro sa saindo na padagos na maglakaw sa gabos niang dalan? (Deuteronomio 10:​12, 13) Paagi sa pagtogot ki Satanas na tawan kita nin nagkapirang kasakitan, si Jehova nagtao sa lambang saro sa sato nin oportunidad na magtao kan satong personal na simbag sa angat ni Satanas.​—Talinhaga 27:11.

“Kun an mga Tawo Pinapakaraot Kamo”

7. Ano an sarong taktika na ginagamit kan Diablo sa paghihingoang patalikodon kita ki Jehova?

⁷ Estudyaran niato ngonyan nin mas maingat an saro sa mga katusohan na ginagamit ni Satanas sa paghihingoang paluwason na tama an saiyang lado sa isyu​—an paggamit nia nin pagpakaraot. Inapod ni Jesus si Satanas na “an ama kan kaputikan.” (Juan 8:44) An deskriptibong ngaran na Diablo, na nangangahulogan nin “Parabalobagi,” nagpapamidbid sa sarong iyan bilang an pangenot na parapakaraot sa Dios, sa saiyang marahay na tataramon, asin sa saiyang banal na ngaran. An Diablo naggagamit nin mapanraot na mga tataramon, falsong mga akusasyon, asin direktang kaputikan tanganing angaton an soberaniya ni Jehova, asin ginagamit nia an mga taktika man sanang ini tanganing pakaraoton an maimbod na mga lingkod nin Dios. Paagi sa pagtambak nin pakaraot sa mga Saksing ini, an grabeng pagbalo kaya niang gibohon na magin mas masakit pa nganing tioson ninda.

8. Paano pinakaraot ni Satanas si Job, asin may anong epekto?

⁸ Estudyare an nangyari ki Job, na an ngaran nangangahulogan nin “Kinakalaban.” Apuera sa pagigin dahelan kan pagkawara kan pagbuhay ni Job, kan saiyang mga aki, asin pagkahelang nia, pinaluwas pa ni Satanas na si Job sarong parakasala na pinapadusahan nin Dios. Minsan ngani sia iginagalang na marhay, si Job dinuhagi, dawa kan saiyang mga paryente asin dayupot na mga katood. (Job  19:13-19; 29:​1, 2, 7-11) Dugang pa, paagi sa falsong mga pararanga, naghingoa si Satanas na ‘pamondoon si Job paagi sa mga tataramon,’ na sa enot ipinasentido na sia siertong nakakomiter nin magabat na kasalan dangan direktang kinondenar sia bilang paragibo nin sala. (Job 4:6-9; 19:2; 22:5-10) Kanigoan kanakapanluluya nin boot iyan para ki Job!

9. Paano pinaluwas na parakasala si Jesus?

⁹ Bilang an pangenot na parasurog kan soberaniya ni Jehova, an Aki nin Dios nagin pinakapunteriya kan pakikilaban ni Satanas. Kan si Jesus nagdigdi sa daga, si Satanas naghingoa na paluwason na si Jesus maraot sa espirituwal, siring kan ginibo nia ki Job, na pinaluwas na si Jesus sarong parakasala. (Isaias 53:2-4; Juan 9:24) Inapod sia kan mga tawo na sarong paraburat asin onason asin sinabi ninda na sia ‘igwa nin demonyo.’ (Mateo 11:​18, 19; Juan 7:20; 8:48; 10:20) Sia putik na inakusaran nin paglanghad. (Mateo 9:​2, 3; 26:63-66; Juan 10:33-36) Ikinapurisaw ini ni Jesus, huli ta aram nia na iyan bakong makatanosan na nagdara nin katuyawan sa saiyang Ama. (Lucas 22:41-44) Sa katapustapusi, si Jesus ipinako bilang isinumpang kriminal. (Mateo 27:38-44) Sa pagpadanay nin sangkap na integridad, tinios ni Jesus an dakol na “panlilibak nin mga parakasala.”​—Hebreo 12:​2, 3.

10. Paano pinunteriya ni Satanas sa presenteng mga panahon an natatadang mga linahidan?

¹⁰ Sa presenteng mga panahon, an mga natatada sa linahidan na mga parasunod ni Cristo nagin punteriya man kan pakikilaban kan Diablo. Si Satanas ilinadawan bilang “an parasumbong sa . . . mga tugang [ni Cristo], na nagsusumbong sa sainda aldaw asin banggi sa atubangan kan satong Dios.” (Kapahayagan 12:​9, 10) Poon kan sia palayason sa langit asin laomon sa palibot kan daga, dinagdagan ni Satanas an saiyang mga paghihingoa tanganing palatawon na makababaldeng mga isinikwal an mga tugang ni Cristo. (1 Corinto 4:13) Sa nagkapirang nasyon, sinda mapagbalobaging inapod na peligrosong sekta, kun paanong nangyari man iyan sa mga Kristiano kan enot na siglo. (Gibo 24:​5, 14; 28:22) Siring kan nasambitan sa kapinonan, sinda pinakaraot paagi sa putik na propaganda. Pero, “paagi sa kamurawayan asin kadaihan nin onra, paagi sa maraot na bareta asin marahay na bareta,” an linahidan na mga tugang ni Cristo, na sinusuportaran kan saindang kairibang “ibang karnero,” mapakumbabang naghingoang ‘magkuyog sa mga togon nin Dios asin gibohon an pagpatotoo ki Jesus.’​—2 Corinto 6:8; Juan 10:16; Kapahayagan 12:17.

11, 12. (a) Ano an tibaad dahelan nin nagkapirang pagpakaraot sa mga Kristiano? (b) Sa anong mga paagi tibaad mag-agi nin bakong makatanosan na pagdusa an sarong Kristiano huli sa saiyang pagtubod?

¹¹ Siempre, dai boot sabihon na an gabos na pagpakaraot sa indibiduwal na mga lingkod nin Dios huli “sa katanosan.” (Mateo 5:10) An nagkapirang problema tibaad resulta kan sato mismong mga pagkabakong sangkap. Mayo nin espesyal na karahayan kun kita “nagkakasala asin tinataplong, tinatagalan [niato] iyan.” Minsan siring, kun an sarong Kristiano “huli sa konsensia sa atubangan nin Dios, nagtatagal sa irarom nin mga bagay na makamomondo asin nagtitios na bakong makatanosan, ini maogmang bagay” sa pagheling ni Jehova. (1 Pedro 2:​19, 20) Sa anong mga kamugtakan ini puedeng mangyari?

¹² An nagkapira linibak huli ta nagsayuma sindang makikabtang sa mga kostumbre sa lobong na bakong sono sa Kasuratan. (Deuteronomio 14:1) An mga hoben na Saksi nagin punteriya nin daing ontok na panlalastar huli sa pagsusog sa moral na mga pamantayan ni Jehova. (1 Pedro 4:4) An nagkapirang Kristianong magurang salang inapod na mga “pabaya” o “nanmamaltrato” huli ta an gusto ninda pagbolong na dai naggagamit nin dugo para sa saindang mga aki. (Gibo 15:29) An mga Kristiano rinayoan kan mga paryente asin kataed huli sana ta sinda nagin mga lingkod ni Jehova. (Mateo 10:34-37) Sinda gabos nagsusunod sa arogan na itinao kan mga propeta asin ni Jesus mismo kan sinda nag-agi nin bakong makatanosan na pagdusa.​—Mateo 5:​11, 12; Santiago 5:10; 1 Pedro 2:21.

Tinitios an Pagpakaraot

13. Ano an makakatabang sa sato na mapagdanay an satong espirituwal na pagkatimbang kun kita pinapakaraot nin grabe?

¹³ Kun kita pinapakaraot nin grabe huli sa satong pagtubod, tibaad kita panluyahan nin boot, siring kan nangyari sa propetang si Jeremias, asin magsaboot na dai na niato kayang maglingkod pa sa Dios. (Jeremias 20:7-9) Ano an makakatabang sa sato tanganing mapagdanay  an satong espirituwal na pagkatimbang? Hingoahon na mansayon an bagay-bagay base sa pagheling ni Jehova. Ibinibilang niang mga ganador, bakong mga biktima, an mga nagdadanay na maimbod sa irarom nin pagbalo. (Roma 8:37) Probaran na iladawan sa saindong isip an mga nagsuportar sa soberaniya ni Jehova sa ibong kan gabos na pagmenos na puedeng gibohon sa sainda kan Diablo​—an mga babae asin lalaki na siring ki Abel, Job, an ina ni Jesus na si Maria, asin iba pang mga maimbod kan suanoy, siring man an satong mga kapwa lingkod sa presenteng mga panahon. (Hebreo 11:35-37; 12:1) Horophoropon an saindang pagpaheling nin integridad. An dakulang panganoron na iyan nin mga maimbod inaagda kita na umayon sa sainda bilang mga mag-aako kan premyong nakatagama para sa mga makakadaog sa kinaban paagi sa saindang pagtubod.​—1 Juan 5:4.

14. Paano puedeng magpakosog sa sato an odok na pamibi tanganing magdanay na maimbod?

¹⁴ Kun ‘an satong nakakaribok na mga kaisipan dumakol sa satong boot,’ puede kitang dumolok ki Jehova paagi sa odok na pamibi, asin rarangahon patin papakosogon nia kita. (Salmo 50:15; 94:19) Itatao nia sa sato an kadonongan na kaipuhan niato tanganing maatubang an pagbalo asin tatabangan nia kita na makakonsentrar sa dakulang isyu, an soberaniya ni Jehova, na iyong dahelan kan daing katanosan na pagkaongis sa saiyang mga lingkod. (Santiago 1:5) Puede man na itao sa sato ni Jehova “an katoninongan nin Dios na minalampas sa gabos na kaisipan.” (Filipos 4:​6, 7) An katrangkilohan na ini na itinatao nin Dios nagpapangyari sa sato na magdanay na kalmado asin marigon sa ibong nin grabeng kasakitan, na dai nagpapadaog sa pagduwaduwa o takot. Paagi sa saiyang espiritu, kaya kitang susteniran ni Jehova sa ano man na tinotogotan niang dumatong sa sato.​—1 Corinto 10:13.

15. Ano an makakatabang sa sato na dai magkaigwa nin kapaitan sa boot kun kita nagdudusa?

¹⁵ Ano an makakatabang sa sato na dai madaog nin kapaitan sa boot sa mga naoongis sa sato na mayo nin dahelan? Girumdomon na an pangenot niatong mga kaiwal iyo si Satanas asin an mga demonyo. (Efeso 6:12) Minsan ngani tuyong linalamag kita kan nagkapirang tawo, an dakol sa mga nagkokontra sa banwaan nin Dios ginigibo iyan huli sa ignoransia o pan-iimpluwensia kan iba. (Daniel 6:4-16; 1 Timoteo 1:​12, 13) Gusto ni Jehova na “an gabos na klase nin tawo” magkaigwa nin oportunidad na “makaligtas asin makaabot sa tamang kaaraman sa katotoohan.” (1 Timoteo 2:4) Sa katunayan, an nagkapirang dati nagkokontra Kristianong mga tugang na niato ngonyan huli sa pakaheling kan satong daing kanawayan na paggawe. (1 Pedro 2:12) Dugang pa, puede kitang makakua nin leksion sa halimbawa kan aki ni Jacob na si Jose. Minsan ngani nagdusang marhay si Jose huli sa saiyang mga tugang sa ama, dai sia nagtanom sa boot nin kaanggotan sa sainda. Taano ta dai? Huli ta namansayan nia na si Jehova an naggigiya sa mga bagay-bagay, na minamaniobra an mga pangyayari tanganing otobon an Saiyang katuyohan. (Genesis 45:4-8) Puede man na papangyarihon ni Jehova na an ano man na bakong makatanosan na pagdusa na tibaad inaagihan niato magresulta sa ikakamuraway kan saiyang ngaran.​—1 Pedro 4:16.

16, 17. Taano ta dai kita maninigong mahadit sa mga paghihingoa kan mga nagkokontra na olangon an paghuhulit?

¹⁶ Dai kita kaipuhan na mahadit nin labi-labi kun sa laog nin halipot na panahon garo baga mapanggana an mga nagkokontra na olangon an pagpalakop kan maogmang bareta. Yinuyugyog ngonyan ni Jehova an mga nasyon paagi sa lakop sa globong paghuhulit, asin nagraralaog an kawiliwiling mga bagay. (Haggeo 2:7) Si Cristo Jesus, an Marahay na Pastor, nagsabi: “An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako. Asin ako nagtatao sa sainda nin buhay na daing katapusan, . . . asin mayo nin siisay man na maagaw sa sainda sa sakuyang kamot.” (Juan 10:27-29) An banal na mga anghel kalabot man sa dakulang espirituwal na  pag-ani. (Mateo 13:​39, 41; Kapahayagan 14:​6, 7) Kun siring, dai maoolang kan ano man na sabihon o gibohon kan mga nagkokontra an katuyohan nin Dios.​—Isaias 54:17; Gibo 5:​38, 39.

¹⁷ Sa parate, an mga paghihingoa kan mga nagkokontra kabaliktaran an resulta. Sa sarong komunidad sa Aprika, dakol na teribleng kaputikan an pinalakop manongod sa Mga Saksi ni Jehova, na sinasabi pa na sinda nagsasamba sa Diablo. Huli kaini, kun minasongko an mga Saksi, si Grace nagdadalagan sa likod kan saiyang harong asin nagtatago sagkod na humale sinda. Sarong aldaw an pastor sa saiyang simbahan iinitaas an saiyang kapot na publikasyon niato asin sinabihan an gabos na presente na dai iyan pagbasahon huli ta iyan magigin dahelan na bayaan ninda an saindang pagtubod. Napukaw kaini an interes ni Grace. Kan sumongko liwat an mga Saksi, imbes na magtago nakipag-olay sia sa sainda asin nag-ako kan saiyang personal na kopya kan publikasyon. Naponan an pag-adal sa Biblia, asin kan 1996 sia nabautismohan. Ginagamit ngonyan ni Grace an saiyang panahon tanganing hanapon an iba pa na tibaad naimpormaran nin sala manongod sa Mga Saksi ni Jehova.

Pasarigon an Saindong Pagtubod Ngonyan

18. Taano ta kaipuhan na pakosogon an satong pagtubod bago dumatong an grabeng mga pagbalo, asin paano ta iyan magigibo?

¹⁸ Huling sa ano man na oras puedeng sumalakay si Satanas na may daing katanosan na pagkaongis, mahalagang marhay na pasarigon niato an satong pagtubod ngonyan. Paano niato ini magigibo? An sarong report hale sa sarong nasyon na pinaglalamag an banwaan ni Jehova nagsabi: “Sarong bagay an nagin risang-risa: An mga may marahay na ugale sa espirituwal asin hararom na pagpahalaga sa katotoohan sa Biblia mayo nin problema sa pagdadanay na marigon kun minadatong an mga pagbalo. Alagad an mga mantang nasa ‘marahay na panahon’ nagpapalta sa mga pagtiripon, iregular sa paglilingkod sa langtad, asin nakikikompromiso sa saradit na isyu iyo an parateng  napupukan sa irarom nin ‘malaad’ na pagbalo.” (2 Timoteo 4:2) Kun may naheheling kamong mga kabtang na kaipuhan nindong paoswagon, maghingoa kamong gibohon iyan na mayo nin pag-atraso.​—Salmo 119:60.

19. Ano an nagigibo kan integridad kan mga lingkod nin Dios na napapaatubang sa daing katanosan na pagkaongis?

¹⁹ An integridad kan tunay na mga parasamba sa irarom kan pasakit kan pagkaongis ni Satanas sarong buhay na patotoo kan pagigin makatanosan, maninigo, asin matanos kan soberaniya ni Jehova. An saindang kaimbodan nagpapagayagaya sa puso nin Dios. Minsan pa tambakan sinda nin mga pagpakaraot kan mga tawo, an saro na an dignidad labaw pa sa daga asin sa langit ‘dai sinda ikinakasupog, na apodon bilang saindang Dios.’ Tunay nanggad, mapadapit sa gabos na maimbod na iyan, angay sanang masasabi: “An kinaban bakong maninigo sa sainda.”​—Hebreo 11:​16, 38.

[Nota sa Ibaba]

Ikakapaliwanag daw Nindo?

• Ano an dahelan kan daing katanosan na pagkaongis sa tunay na mga parasamba?

• Paano ginamit ni Satanas an pagpakaraot sa paghihingoang raoton an integridad ni Job asin ni Jesus?

• Paano kita pinapakosog ni Jehova na manindogan nin marigon sa atubangan nin satanikong pagkaongis?

[Mga Hapot Para sa Pag-adal]

[Kahon/Ritrato sa pahina 16]

Namansayan Ninda an Tunay na Isyu

An saro sa mga Saksi ni Jehova sa Ucrania, na duman prohibido an paghuhulit kan Kahadean sa laog nin labing 50 taon, nagsabi: “An kamugtakan kan mga Saksi ni Jehova dai maninigong ebalwaron basado sana sa kun paano sinda tinatratar nin ibang tawo. . . . Ginigibo sana kan kadaklan na opisyal an saindang trabaho. Kan nagbago an gobyerno, nagbago an tinatawan ninda nin kaimbodan, alagad kami dai nagbago. Nasabotan mi na an tunay na gikanan kan samong mga problema ihinayag sa Biblia.

“Dai mi minansay an samong sadiri bilang daing kasalan na mga biktima sana nin mapan-aping mga tawo. An nakatabang sa samo na makatagal iyo an malinaw na pakasabot sa isyu na pinalataw sa tatamnan nin Eden​—an isyu dapit sa katanosan nin Dios na mamahala. . . . Nanindogan kami para sa isyu na konektado bako sana sa personal na intereses nin mga tawo kundi siring man sa intereses kan Soberano kan uniberso. Igwa kami nin mas halangkaw nanggad na pakasabot sa tunay na mga isyung kalabot. Pinakosog kami kaini asin nagpangyaring mapagdanay mi an samong integridad minsan sa irarom nin pinakamasakit na mga kamugtakan.”

[Ritrato]

Si Victor Popovych, inarestar kan 1970

[Ritrato sa pahina 13]

Siisay an nasa likod kan pagpakaraot ki Jesus?

[Mga Ritrato sa pahina 15]

Si Job, Maria, asin an mga lingkod nin Dios sa presenteng mga panahon, na siring ki Stanley Jones, nagsuportar sa soberaniya ni Jehova