“Iyan Po an Pinakamarahay na Bagay na Puedeng Mangyari Saindo”

SI Alexis sarong singko anyos na aking lalaki sa siudad nin Morelia, Mejico, na an mga magurang nag-aadal nin Biblia asin nag-aatender sa mga pagtiripon kan Mga Saksi ni Jehova. Mantang nag-aatender sa sarong pansirkitong asamblea kaiba kan saiyang pamilya, naobserbaran nia an sarong demonstrasyon manongod sa paghuhulit sa harong-harong. Basta na sana niang hinapot an saiyang ama, “Tatay, Tatay, taano po ta dai ka nagluluwas asin naghuhulit?” Nagsimbag an saiyang ama, “Nag-aadal pa ako tanganing magibo ko iyan.” Entusiastikong nagsimbag si Alexis, “Tatay, iyan po an pinakamarahay na bagay na puedeng mangyari saindo.”

Nasabotan kan aking ini an pangangaipo na humiro kaoyon kan saiyang kaaraman manongod ki Jehova. Mantang an nagkapira sa saradit pa niang pinsan nakaistar man sa harong na iniistaran nia, sia namibi nguna ki Jehova dangan nakipag-olay sa sainda manongod sa nanodan nia sa My Book of Bible Stories sa tabang kan saiyang mga magurang. Minsan ngani dai pa tataong magbasa si Alexis, aram niang marhay an laog kan libro paagi sa mga retrato na naglaladawan sa mga estorya. Sinabi pa ngani nia na gusto niang dalawon an mga tawo sa harong ninda tanganing isabi sainda an nanonodan nia manongod sa mga katuyohan nin Dios.

Tunay nanggad na puedeng ioyon kan mga hoben sagkod gurang an saindang buhay sa inaasahan sa sainda ni Jehova, “an Banal,” asin sa siring magkaigwa nin daing kabaing na pribilehio na magpatotoo manongod sa saiya sa mga nasyon. (Isaias 43:3; Mateo 21:16) Daing duda na iyan an saro sa pinakamarahay na bagay na puedeng mangyari sa sarong tawo.