Kaipuhan daw an Marahay na Hatol?

NGONYAN, dakol an naniniwala na may kakayahan sindang maaraman an kalaenan kan marahay asin maraot asin na sinda may deretso na gibohon an ano man na gusto ninda. An iba nagsasabi na puede an haros gabos na bagay basta napapaogma kaiyan an sarong tawo. An pag-agoman asin buhay pampamilya, na dati kinokonsiderar na pundamental na mga areglo sa sosyedad nin tawo, naaapektaran na marhay.​—Genesis 3:5.

Helinga si Veronica, * na nag-iistar sa Mejico. Sia nagbabareta: “Kan madali na an samong ika-15 anibersaryo sa kasal, sinabi sako kan sakong agom na sia may karelasyon na ibang babae. Sinabi nia na mantang an babaeng ini mas hoben asin mas nagpapaogma sa saiya, dai nia ini babayaan. Nabigla ako na isip-isipon na an sakong pinakadayupot na katood dai ko na makakaibaiba. Naghohona ako kaidto na an pagkagadan kan samong mga mahal sa buhay iyo an pinakagrabeng dahelan nin kakologan nin boot. Alagad para sa sako, mas makolog pa ngani an pagsambay huli ta bako sanang nawaran ako nin tawong namomotan kong marhay kundi padagos siang naggigibo nin mga bagay na nakakakolog sa boot ko.”

Dangan yaon an situwasyon nin sarong 22 anyos na lalaki na diborsiado na asin igwa nin sarong aking lalaki alagad habong akoon an saiyang mga paninimbagan bilang ama. Inaasahan nia an saiyang ina na iyong mag-ataman sa saiya asin sa aki nia. Kun dai minaoyon an ina sa gabos na kahagadan nia, minaputok an saiyang kaanggotan asin inaatake ini paagi sa mga tataramon, na arog nanggad sa daing modong aki. An saiyang ina daing maginibo sa atubangan kan siring na mandatang gawe-gawe.

Bako ining daing kaparehong mga kamugtakan. Naglalakop an legal na separasyon asin diborsio sa gabos na lugar. Dakol na aki an nakakaeksperyensia na an saro sa saindang magurang minahale sa harong tanganing magpoon nin iba naman na buhay. May mga hoben na biyo nang nawaran nin paggalang sa iba, kaiba na an saindang mga  magurang, asin minagawe na haros dai mo hohonaon kan nakaagi. An pag-eksperimento sa sekso, pagdodroga, pan-aatakeng ginigibo kan mga hoben, asin paggadan kan mga aki sa mga maestra o magurang nagigin medyo ordinaryo na sana sa dakol na nasyon. Asin tibaad naririsa nindo na bako sanang an pagpadakula sa aki asin pag-agoman an napapaatubang sa mga problema sa kinaban ngonyan.

Mantang naheheling niato mismo an mga pangyayaring ini, tibaad nag-iisip-isip kita kun ano na an nangyari sa sosyedad. Kun talagang aram kan mga tawo an kalaenan kan marahay asin maraot, taano ta kadakol na problema an dai pa nareresolberan? Kaipuhan daw an marahay na hatol? Igwa daw nin makukuanan kan siring na kapakipakinabang na hatol, saro na probado nang mapapagtiwalaan? Minsan ngani dakol an nagsasabi na naniniwala sinda sa Dios asin sa saiyang nasusurat na Tataramon, garo baga mayo man ini nin impluwensia sa saindang mga desisyon. Alagad anong mga pakinabang an makukua niato kun hinahanap asin kinukua niato an hatol hale sa Dios? Estudyaran niato iyan sa masunod na artikulo.

[Nota sa Ibaba]