Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Taano ta dai baloon kun masisimbag nindo an minasunod na mga hapot?

• Ano an Complutensian Polyglot, asin taano ta mahalaga iyan kaidto?

Iyan sarong imprentado asin dakol an lenguaheng Biblia na igwa nin magkaabay asin taraed na mga kolumna na may pinakamarahay na teksto kaidto na makukua sa Hebreo, Griego, asin Latin, kaiba an nagkapirang kabtang sa Aramaiko. An dakol an lenguaheng Bibliang ini sarong dakulang pag-oswag sa pagprodusir nin sarong pinakarhay na teksto kan orihinal na mga lenguahe.​—4/15, pahina 28-​31.

• Paano mapapagayagaya nin mga tawo an Dios?

Bilang sarong tunay na buhay na persona, si Jehova may kakayahan na mag-isip, humiro, asin makamate. Sia an “maogmang Dios” asin nawiwili sa paghaman kan saiyang katuyohan. (1 Timoteo 1:​11; Salmo 104:31) Mientras na orog kitang nagigin sensitibo sa mga saboot nin Dios, orog man kitang magigin mapagmansay sa kun ano an magigibo niato tangani na mapagayagaya an puso nia.​—5/15, pahina 4-7.

• Taano ta tinogotan ni David an saiyang agom na si Mical na magkaigwa nin imahen na terafim?

Kan magpakana si Hadeng Saul na gadanon si David, tinabangan ni Mical si David na makadulag, na ibinugtak sa higdaan an sarong imahen na tibaad kakorte nin tawo. Sia tibaad igwa nin terafim huli ta an saiyang puso bakong bilog para sa Dios. Magsalang dai iyan aram ni David o tinogotan nia iyan huli ta sia aki ni Hadeng Saul. (1 Cronica 16:​25, 26)​—6/1, pahina 29.

• Ano an pundamental na idinodoon kan mga dekreto nin Dios manongod sa dugo?

Paagi sa sinabi nin Dios pagkatapos kan Baha, sa Ley ni Moises, asin sa dekreto na yaon sa Gibo 15:​28, 29, itinokdo nia an atang may koneksion sa pinabolos na dugo ni Jesus. Paagi sana sa dugong iyan na kita magkakamit nin kapatawadan asin pakipagkatoninongan sa Dios. (Colosas 1:20)​—6/15, pahina 14-​19.

• Pirang milagro ni Jesus an nasasambitan sa Biblia?

An mga pagkasaysay sa Ebanghelyo may nasasambitan na 35 milagro ni Jesus. Alagad dai ihinayag an eksaktong kabilangan kan mga milagro ni Jesus, kaiba an mga dai ibinareta. (Mateo 14:14)​—7/15, pahina 5.