Pagal sa Pisikal Alagad Dai Napapagal sa Espirituwal

“Si Jehova, an Kaglalang kan mga kaporoporohi kan daga, . . . nagtatao nin puersa sa napapagal; asin sa saro na mayo nin dinamikong enerhiya saiyang pinapadakol an bilog na kosog.”​—ISAIAS 40:​28, 29.

1, 2. (a) Anong nakakaakit na pangagda an ipinaabot sa gabos na gustong isagibo an dalisay na pagsamba? (b) Ano an puedeng magtao nin seryosong peligro sa satong espirituwalidad?

BILANG mga disipulo ni Jesus, aram na aram niato an saiyang nakakaakit na pangagda: “Madia kamo sa sako, kamo gabos na nagpapagal asin nagagabatan, asin papaginhawahon ko kamo. . . . Huli ta an sakong sakal maboot asin an sakong pasan magian.” (Mateo 11:28-30) Iinaalok man sa mga Kristiano an “mga panahon nin kaginhawahan hale sa persona ni Jehova.” (Gibo 3:19) Siertong naeksperyensiahan na nindo mismo an nakakaginhawang mga epekto nin pakanood kan mga katotoohan sa Biblia, pagkaigwa nin maogmang paglaom sa ngapit, asin pag-aplikar kan mga prinsipyo ni Jehova sa saindong buhay.

² Pero, an nagkapira sa mga nagsasamba ki Jehova inaatake nin emosyonal na kapagalan. May mga panahon na dai naghahaloy an mga panahon na ini nin panluluya nin boot. Sa ibang kamugtakan an pakamate nin kapagalan puedeng magpadagos sa laog nin halawig na panahon. Sa pag-agi nin panahon, tibaad mamatean nin nagkapira na an saindang Kristianong mga paninimbagan nagin nang pagabat imbes na nakakaginhawang pasan siring sa ipinanuga ni Jesus. An siring na negatibong mga pagmate puedeng magtao nin seryosong peligro sa relasyon nin sarong Kristiano ki Jehova.

3. Taano ta itinao ni Jesus an konseho na manonompongan sa Juan 14:1?

³ Kan madali na siang arestaron asin gadanon, sinabihan ni Jesus an saiyang mga disipulo: “Dai mahadit an saindong puso. Tumubod kamo sa Dios, tumubod man kamo sa sako.” (Juan 14:1) Sinabi ni Jesus an mga tataramon na ini ta madali nang mapaatubang sa makaturotristeng mga pangyayari an mga apostol. Susundan ini nin biglang pag-abot nin paglamag. Aram ni Jesus na an saiyang mga apostol puedeng magkasiringkog huli sa biyong panluluya nin boot. (Juan 16:1) Kun dai makokontrol, an pakamate nin kamondoan puedeng makapaluya sa espirituwal asin magin dahelan na mawara an saindang tiwala ki Jehova. Totoo man ini sa mga Kristiano ngonyan. An halawig na panluluya nin boot puedeng magbunga nin labi-labing kamondoan, asin puedeng magabatan an satong puso. (Jeremias 8:18) An pagkatawo niato sa laog puedeng manluya. Sa irarom kan kasakitan na ini, kita puedeng maparalisado sa emosyonal asin espirituwal, mawara pa ngani an satong pagmawot na sambahon si Jehova.

4. Ano an makakatabang sa sato na dai mapagal an satong piguratibong puso?

⁴ Angay nanggad an sadol kan Biblia: “Orog sa gabos na maninigong ingatan, ingatan mo an saimong puso, huli ta gikan dian an mga burabod nin buhay.” (Talinhaga 4:23) An Biblia nagtatao nin praktikal na sadol na nagtatabang sa sato na maprotehiran an satong piguratibong puso na dai panluyahan nin boot asin mapagal sa espirituwal. Minsan siring, kaipuhan nguna niatong maheling kun ano an dahelan kan satong pagkapagal.

An Kristianismo Bakong Sobra Kanakakapagabat

5. Ano an garo baga kontradiksion mapadapit sa Kristianong pagkadisipulo?

⁵ Totoo, nangangaipo nin maigot na paghihingoa an pagigin sarong Kristiano. (Lucas 13:24) Nagsabi pa ngani si Jesus: “An siisay man na dai nagpapasan kan saiyang hariging pasakitan asin nagsusunod sa sako dai puedeng magin sakong disipulo.” (Lucas 14:27) Kun hehelingon, an mga tataramon na ini garo baga kontra sa sinabi ni Jesus manongod sa saiyang pasan na magian asin nakakaginhawa, alagad sa totoo mayo nin kontradiksion.

6, 7. Taano ta masasabing dai nakakapagal an satong paagi nin pagsamba?

⁶ An maigot na paghihingoa asin mahigos na pagtrabaho,  minsan ngani nakakapagal sa pisikal, puedeng magin nakakakontento asin nakakapaginhawa kun iyan ginigibo huli sa marahay na dahelan. (Eclesiastes 3:​13, 22) Asin may mas marahay pa daw na dahelan kisa paghiras kan makangangalas na mga katotoohan sa Biblia sa satong mga kataed? Siring man, an satong pagmamaigot na mamuhay sono sa halangkaw na mga pamantayan nin Dios sa moral nagigin saditon kun ikokomparar sa mga pakinabang na nakakamtan niato bilang resulta. (Talinhaga 2:10-20) Dawa kun linalamag, ibinibilang niato na sarong onra an magdusa huli sa Kahadean nin Dios.​—1 Pedro 4:14.

⁷ An pasan ni Jesus talagang nakakapaginhawa, nangorogna kun ikokomparar sa espirituwal na kadikloman kan mga nagdadanay sa irarom kan sakal kan falsong relihion. An Dios may mapagpadangat na pagkamoot sa sato asin daing hinahagad na bakong makatanosan sa sato. An “mga togon [ni Jehova] dai nakakapagabat.” (1 Juan 5:3) An tunay na Kristianismo, siring kan ipinapaheling kan Kasuratan, bakong sobra kanakakapagabat. Malinaw nanggad, an satong paagi nin pagsamba dai nagigin dahelan nin pagkapagal asin panluluya nin boot.

‘Pabayaan an Gabos na Kagabatan’

8. Ano sa parate an dahelan nin espirituwal na kapagalan?

⁸ An ano man na espirituwal na kapagalan na naeeksperyensiahan niato sa parate resulta kan dagdag na kagabatan na itinatao sa sato kan maraot na sistemang ini nin mga bagay. Huling “an bilog na kinaban namumugtak sa kapangyarihan kan maraot,” napapalibotan kita nin nakakaraot na mga puersa na puedeng makapagal sa sato asin makaraot sa satong Kristianong pagkatimbang. (1 Juan 5:19) An dai kaipuhan na mga bagay puedeng magpakomplikado asin makadisturbo sa satong Kristianong rutina. An dagdag na mga pasan na ini puedeng magpagabat sa sato asin biyong papanluyahon an satong espiritu. Angay nanggad, sinasadol kita kan Biblia na ‘pabayaan an gabos na kagabatan.’​—Hebreo 12:1-3.

9. Paano puedeng magpagabat sa sato an materyal na mga pinag-aaabot?

⁹ Halimbawa, an pagkabangkag kan kinaban sa pagkaprominente, kuarta, pag-aling-aling, pagbiahe para magpasiramsiram, asin iba pang materyal na pinag-aaabot puedeng makaimpluwensia sa satong kaisipan. (1 Juan 2:15-17) An nagkapirang Kristiano kan enot na siglo na nagmaigot na magkamit nin kayamanan ginibong komplikadong marhay an saindang buhay. Si apostol Pablo nagpapaliwanag: “Idtong mga determinadong yumaman nahuhulog sa sugot asin sa siod patin sa dakol na daing isip asin nakakaraot na mawot, na nagdadara sa mga tawo sa kalaglagan asin kapahamakan. Huli ta an pagkamoot sa kuarta gamot nin gabos na klase nin nakakadanyar na bagay, asin sa pag-aabot sa pagkamoot na ini an nagkapira nagkaralagalag parayo sa pagtubod asin sinaksak an bilog nindang sadiri nin dakol na kakologan.”​—1 Timoteo 6:​9, 10.

10. Ano an manonodan niato manongod sa mga kayamanan basado sa ilustrasyon ni Jesus kan parasabwag?

¹⁰ Kun kita nakakamate nin kapagalan asin pinapanluyahan nin boot sa satong paglilingkod sa Dios, iyan daw huli ta natatahoban na nin materyal na mga pinag-aaabot an satong espirituwalidad? An posibilidad na ini totoong marhay, siring kan ipinaparisa kan ilustrasyon ni Jesus kan parasabwag. “An mga kahaditan sa palakaw na ini nin mga bagay asin an mapandayang kapangyarihan nin kayamanan patin an mga pagmawot sa iba pang bagay” ikinomparar ni Jesus sa mga tonok na “minalaog asin linalamos” an banhi kan tataramon nin Dios sa satong puso. (Marcos 4:​18, 19) Huli kaini, nagkokonseho sa sato an Biblia: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay. Huli ta sia nagsabi: ‘Sa ano man na paagi dai  taka babayaan ni sa ano man na paagi papabayaan taka.’ ”​—Hebreo 13:5.

11. Paano niato puedeng haleon an mga bagay na puedeng makapagabat sa sato?

¹¹ Kun beses an nagpapakomplikado kan satong buhay, bakong an pag-aaabot nin orog pang mga bagay, kundi kun ano an ginigibo niato sa mga bagay na yaon na sa sato. An nagkapira tibaad makaeksperyensia nin emosyonal na kapagalan na resulta nin masakit na mga problema sa salud, pagkagadan nin mga namomotan, o iba pang makamomondong mga problema. Naheling ninda na kaipuhan nindang gumibo nin mga pagliliwat sa panapanahon. An sarong mag-agom nagdesisyon na haleon an nagkapira sa saindang mga aling-alingan asin an dai man kaipuhan na personal na mga proyekto. Aktuwal na sinarosaro nindang siyasaton an saindang mga gamit asin talagang inempake an gabos na bagay na may koneksion sa siring na mga proyekto asin isinaray iyan. Sa panapanahon, kita gabos makikinabang sa pagsiyasat kan satong mga kinakahiligan asin rogaring, na hinahale an gabos na dai kinakaipuhan na mga kagabatan tanganing kita dai mapagal asin manluya an satong kalag.

Kaipuhan an Pagigin Rasonable Asin Kababaan nin Boot

12. Ano an maninigo niatong rekonoseron manongod sa satong sadiring mga sala?

¹² An satong sadiring mga sala, dawa sa saradit na bagay, puedeng luway-luway na magpakomplikado kan satong buhay. Totoo nanggad an mga tataramon ni David: “An sadiri kong mga sala nakasanop na sa sakong payo; siring sa magabat na pasan an mga iyan magabaton na para sa sako.” (Salmo 38:4) Sa parate, an nagkapirang praktikal na mga pagliwat an makakahale kan satong magabat na mga pasan.

13. Paano makakatabang sa sato an pagigin rasonable tanganing magkaigwa nin timbang na pagmansay sa satong ministeryo?

¹³ Ineenkaminar kita kan Biblia na pataluboon an “praktikal na kadonongan asin kakayahan sa pag-iisip.” (Talinhaga 3:​21, 22) “An kadonongan hale sa itaas . . . rasonable,” an sabi kan Biblia. (Santiago 3:17) An nagkapira nakakamate na kaipuhan man nindang gibohon kun ano an nagigibo nin iba sa Kristianong ministeryo. Minsan siring, sinasadol kita kan Biblia: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo. Huli ta an lambang saro magpapasan kan saiyang sadiring pasan.” (Galacia 6:​4, 5) Totoo, an marahay na halimbawa nin mga kapwa Kristiano puedeng makaenkaminar sa sato na paglingkodan si Jehova nin bilog na puso, alagad an praktikal na kadonongan asin pagigin rasonable tatabangan kitang magbugtak nin realistikong mga pasohan segun sa satong sadiring mga kamugtakan.

14, 15. Paano ta ikakapaheling an praktikal na kadonongan sa pag-asikaso kan satong pisikal asin emosyonal na mga pangangaipo?

¹⁴ An satong pagigin rasonable dawa sa garo baga bakong gayong importanteng mga bagay puedeng makatabang na malikayan an mga pakamate nin kapagalan. Halimbawa, igwa daw kita nin timbang na mga ugale na nakakatabang sa pagkaigwa nin marahay na pisikal na salud? Estudyare an halimbawa nin sarong mag-agom na naglilingkod sa saro sa mga sangang opisina kan Mga Saksi ni Jehova. Naheling ninda an halaga nin praktikal na kadonongan sa paglikay sa kapagalan. An agom na babae nagsasabi: “Gurano man kadakol an samong trabaho, hinihingoa niamong magtorog sa haros parehong oras kada banggi. Regular man kaming nag-eehersisyo. Nakatabang talaga ini sa samo. Nanodan  mi kun ano an samong mga limitasyon, asin ginigibo mi an mga bagay segun dian. Naghihingoa kami na dai ikomparar an samong sadiri sa mga garo baga dai nauubosan nin kosog.” Regular daw kitang nagkakakan nin masustansiang kakanon asin nagpapahingalo nin igo? An rasonableng pag-asikaso sa satong salud sa pankagabsan makakaina sa mga pakamate nin labi-labing kapagalan sa emosyonal asin espirituwal.

¹⁵ An nagkapira sa sato may daing kaagid na mga pangangaipo. Halimbawa, an sarong Kristiana naglingkod sa bilog na panahon na ministeryo sa nagkapirang masakit na mga asignasyon. Nagkaigwa sia nin grabeng mga problema sa salud, kaiba an kanser. Ano an nakatabang sa saiya na makayanan an nakakatension na mga situwasyon? An sabi nia: “Mahalaga para sa sako na magkaigwa nin panahon na solo ako asin toninong nanggad. Mientras na namamatean kong nagpopoon an tension asin an kapagalan, lalong kaipuhan kong marhay an panahon na trangkilong magsolosolo na puede akong magbasa asin magpahingalo.” An praktikal na kadonongan asin kakayahan sa pag-iisip nagtatabang sa sato na midbidon asin panigoan an satong indibiduwal na mga pangangaipo asin sa siring malikayan an espirituwal na pagkapagal.

Pinapakosog Kita ni Jehova Dios

16, 17. (a) Taano ta mahalagang marhay na atamanon an satong espirituwal na salud? (b) Ano an dapat na iiba niato sa satong aroaldaw na rutina?

¹⁶ Siempre, mahalagang marhay an pag-ataman sa satong espirituwal na salud. Kun igwa kita nin dayupot na relasyon ki Jehova Dios, puede kitang mapagal sa pisikal, alagad dai kita noarin man mapapagal na sambahon sia. Si Jehova an “nagtatao nin puersa sa napapagal; asin sa saro na mayo nin dinamikong enerhiya saiyang pinapadakol an bilog na kosog.” (Isaias 40:​28, 29) Si apostol Pablo, na personal na nakaeksperyensia kan pagigin totoo kan mga tataramon na ini, nagsurat: “Dai kami minasuko, kundi minsan ngani an samong pagkatawo sa luwas nalalapa, tunay na an samong pagkatawo sa laog nababago aroaldaw.”​—2 Corinto 4:16.

¹⁷ Mangnohon an pananaram na “aroaldaw.” Nangangahulogan ini nin pag-aprobetsar niato sa mga probisyon ni Jehova sa kada aldaw. An sarong misyonera na maimbod na naglingkod sa laog nin 43 na taon kinaipuhan na atubangon an mga panahon nin pagkapagal sa pisikal asin panluluya nin boot. Alagad dai sia napagal sa espirituwal. Sia nagsabi: “Ginibo kong ugale na bumangon nin amay tanganing bago ponan an ano man na gibohon, may panahon ako na magagamit sa pamimibi ki Jehova asin sa pagbasa kan saiyang Tataramon. An aroaldaw na rutinang ini nakatabang sa sako na makatagal sagkod ngonyan.” Makakaasa nanggad kita sa nagsusustenir na kapangyarihan ni Jehova kun kita regular, iyo “aroaldaw,” na mamimibi sa saiya asin maghohorophorop sa saiyang halangkawon na mga kualidad asin sa saiyang mga panuga.

18. Anong karangahan an itinatao kan Biblia para sa mga maimbod na may edad na o may helang?

¹⁸ Nangorognang nakakatabang ini sa mga pinapanluyahan nin boot huli sa pagkakaedad asin helang. An mga siring tibaad madesganar, bakong huli ta ikinokomparar ninda an saindang sadiri sa iba, kundi huli ta ikinokomparar ninda an nagigibo ninda ngonyan sa nagigibo ninda kaidto. Nakakaranga nanggad na maaraman na tinatawan nin onra ni Jehova an mga may edad na! An Biblia nagsasabi: “An pagkaigwa nin uban korona nin kagayonan kun iyan nakukua sa dalan nin katanosan.” (Talinhaga 16:31) Aram ni Jehova an satong mga limitasyon asin pinapahalagahan niang marhay an satong bilog na pusong pagsamba sa ibong kan mga kaluyahan kan satong hawak. Asin an marahay na mga nagibo na niato dai na mapapara sa memorya nin Dios. Inaasegurar kita kan Kasuratan: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.” (Hebreo 6:10) Kanigoan an kaogmahan niato gabos na kairiba niato an mga nagin maimbod ki Jehova sa laog nin dakol na dekada!

Dai Sumuko

19. Paano kita nakikinabang sa pagdadanay na sibot sa paggibo nin marahay?

¹⁹ Dakol an naniniwala na an mapuersang aktibidad sa pisikal na ginigibo nin regular nakakaginhawa sa kapagalan. Kaagid kaiyan, an regular na espirituwal na mga aktibidad makakatabang na mahale an ano man na mga pakamate nin kapagalan sa emosyonal o sa espirituwal. An Biblia nagsasabi: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal. Tunay nanggad, kun siring, mantang igwa kita nin marahayrahay na panahon para kaiyan, gumibo kita kan marahay sa gabos,  alagad orog na sa mga may relasyon sa sato sa pagtubod.” (Galacia 6:​9, 10) Mangnohon an mga pananaram na “paggibo nin karahayan” asin “gumibo kita kan marahay.” Nagpaparisa ini nin paghiro niato. An paggibo nin marahay para sa iba makakatabang nanggad na dai kita mapagal sa satong paglilingkod ki Jehova.

20. Tanganing malabanan an panluluya nin boot, maninigo niatong likayan an pakikiiba kiisay?

²⁰ Sa kabaliktaran, an pakikiasosyar sa asin an mga aktibidad na kaiba an mga tawo na dai nag-iintindi sa mga ley nin Dios puedeng magin nakakapagal na pagabat. An Biblia nagpapatanid sa sato: “An gabat nin gapo asin sarong kargang baybay​—alagad an pagkaaburido huli sa sarong mangmang mas magabat kisa duwang iyan.” (Talinhaga 27:3) Tanganing malabanan an mga pakamate nin panluluya nin boot asin kapagalan, marahay na likayan niato an pakikiiba sa mga puro negatibo an pigpaparaisip asin mahilig magparahanap nin sala asin mankritika sa iba.

21. Paano kita magigin nakakaparigon sa boot nin iba sa Kristianong mga pagtiripon?

²¹ An Kristianong mga pagtiripon probisyon hale ki Jehova na puedeng magtao sato nin espirituwal na kosog. Dian igwa kita nin marahayon na oportunidad na magparinigonan nin boot paagi sa nakakaginhawang pagtotokdo asin pakikiasosyar. (Hebreo 10:25) An gabos sa kongregasyon maninigong magmaigot na magin nakakaparigon kun nagkokomento sa mga pagtiripon o kun may kabtang sa programa sa plataporma. An mga nangengenot bilang mga paratokdo nangorognang may paninimbagan na magin nakakaparigon nin boot sa iba. (Isaias 32:​1, 2) Dawa kun kaipuhan an pagsadol o pagsaway, an tono kan pagkonseho maninigong nakakaginhawa. (Galacia 6:​1, 2) An pagkamoot niato sa iba makakatabang nanggad sa sato na paglingkodan si Jehova na dai napapagal.​—Salmo 133:1; Juan 13:35.

22. Sa ibong kan satong bakong sangkap na naturalesa bilang tawo, taano ta puedeng magin makosog an boot niato?

²² An pagsamba ki Jehova sa panahon na ini nin katapusan may kalabot na trabaho. Asin an mga Kristiano bakong libre sa mga epekto nin kapagalan nin isip, emosyonal na kolog, asin nakakatension na mga kamugtakan. An satong bakong sangkap na naturalesa bilang tawo maluya, siring sa kasangkapan na gibo sa dalipay. Pero, an Biblia nagsasabi: “Igwa kami kan kayamanan na ini sa mga lalagan na gibo sa dalipay, tanganing an puersa na labi sa ordinaryo magin sa Dios asin bakong an gikan mismo sa samo.” (2 Corinto 4:7) Iyo, mapapagal kita sa pisikal, alagad logod na dai kita noarin man mapagal sa espirituwal o sumuko. Imbes, “magin makosog an boot niato asin magsabi: ‘Si Jehova an sakong paratabang.’”​—Hebreo 13:6.

Halipot na Repaso

• Ano an nagkapirang nakakapagabat na pasan na puede niatong haleon?

• Paano kita makakapakikabtang sa paggibo nin “marahay” sa satong mga kapwa Kristiano?

• Paano kita sinususteniran ni Jehova kun kita nakakamate nin kapagalan o pinapanluyahan nin boot?

[Mga Hapot Para sa Pag-adal]

[Ritrato sa pahina 23]

Aram ni Jesus na an halawig na panluluya nin boot puedeng makapurisaw sa mga apostol

[Ritrato sa pahina 24]

May mga hinale an nagkapirang aling-alingan asin dai man kaipuhan na personal na mga proyekto

[Ritrato sa pahina 26]

Sa ibong kan satong mga limitasyon, pinapahalagahan na marhay ni Jehova an satong bilog na pusong pagsamba