Pakanompong sa Pinakakapakipakinabang na Hatol

AN MAPANGGANANG buhay talagang kawiliwili. An marahay na hatol asin an disposisyon na humiro kaoyon dian iyo an liabe tanganing magkaigwa kan siring na buhay sa komplikadong kinaban na ini. Minsan siring, an mga tawo dai pirmeng andam na magdangog sa kapakipakinabang na hatol. Dakol an nagsasabi na an tawo maninigong mamuhay segun sa sadiri niang gusto. Sa katunayan, ipinapaheling kan rekord sa Biblia na si Satanas, an orihinal na kaiwal kan soberaniya nin Dios, nag-alok nin independensia sa enot na mga tawo. Nakasurat sa Genesis 3:5 an saiyang iininsistir ki Eva: “Naaaraman nin Dios na sa mismong aldaw na kamo kumakan [hale sa kahoy nin pakamidbid kan marahay asin maraot] mabubuklat an saindong mga mata asin kamo magigin arog nin Dios, na nakakamidbid kan marahay asin maraot.”

Pakatapos kaiyan, mapanggana daw na nakapamuhay si Adan asin Eva, na daing makamomondong mga epekto, na ginigiyahan sana kan sadiri nindang opinyon? Dai nanggad. Tolos-tolos na nadesganar sinda sa mga resulta kan pagpamugtak na aram ninda an kalaenan kan marahay asin maraot. Napasairarom sinda sa makatanosan na dai pag-oyon nin Dios asin nagpoon na magkaigwa nin masakit na buhay sa pagkabakong sangkap, na kagadanan an nagin pangultimong resulta. (Genesis 3:16-19, 23) Gabos kita apektado nin kagadanan. An Biblia nagsasabi: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”​—Roma 5:12.

Dawa ngani nagkaigwa nin maraot na mga resulta an pagpili ni Adan asin Eva, dakol an dai pa man giraray kombensido sa kadonongan kan pag-aplikar kan hatol na hale sa Kaggibo kan tawo. Minsan siring, sinasabi kan Biblia na iyan “ipinasabong nin Dios asin kapakipakinabang,” asin iyan makakatabang sato na “magin lubos na may kakayahan, biyong nasangkapan para sa gabos na marahay na gibo.” (2 Timoteo 3:​16, 17) Tunay nanggad na kita magigin mas maogma kun susunodon niato an hatol sa Biblia. Sa pangenot aplikado ini sa buhay pampamilya.

Pagigin Maimbod sa Pag-agoman

Segun sa Biblia, katuyohan nin Dios na magin permanente an pag-agoman. (Genesis 2:22-24;  Mateo 19:6) Apuera kaini, sinasabi kan Kasuratan na “dai [maninigong] pagdigtaan an higdaan kan mag-agom,” na nangangahulogan na an pagsasarong ini maninigo na dai maatian nin seksuwal na relasyon sa bakong agom. (Hebreo 13:4) Minsan siring, posibleng marhay na aram nindo na dakol na pag-agoman ngonyan an dai nakakaabot sa pamantayan na ini. May mga tawo na nakikipaggitilan sa trabaho ninda sa mga indibiduwal na bako man nindang agom. An iba nagpuputik sa pamilya ninda tanganing makaibaiba an sarong karelasyon na bako man nindang agom. May mga inaabandonar pa ngani an saindang agom tanganing makisaro sa sarong mas hoben, na nangangatanosan na sa siring na paagi nakakamate sinda na mas hoben asin mas maogma, arog kan nangyari ki Veronica, na nasambitan sa naenot na artikulo.

Minsan siring, an pagdesidir na paogmahon an sadiri ano man an mangyari dai matao nin nagdadanay na kaogmahan. Si Ronald makakapagpatotoo kaiyan. Kombensido na mapaparahay an saiyang buhay, inabandonar nia an saiyang agom tanganing magkaigwa nin bagong pamilya sa babaeng sambay nia nin sekreto sa laog nin anom na taon asin na may duwang aki na sia digdi. Minsan siring, pakalihis nin halipot na panahon pagkatapos niang taposon an saiyang pag-agom, binayaan sia kan saiyang sambay! Sa katapustapusi si Ronald nakiistar sa saiyang mga magurang. Sinabi nia na “makasusupog” an saiyang situwasyon. Saro sana iyan na halimbawa. An siring na gawe-gawe na pinapahiro nin paslong mga pagmawot nagin dahelan nin dai pang kaagid na biglang pagdakol nin diborsio asin pagkabaranga nin pamilya, na nagreresulta sa pagdusa nin dai mabilang na indibiduwal​—mga nasa edad na sagkod mga aki.

Sa ibong na lado, an pagsunod sa hatol kan Biblia minaresulta sa tunay na kaogmahan. Iyan an nangyari ki Roberto, na nagsasabi: “Sa tabang kan hatol kan Biblia, dai nangyari na mawara sa sako an sakong agom. Dai niato makukua an tunay na kaogmahan paagi sa pagpadaog sa tentasyon kan bako man niatong agom, dawa tibaad garo baga nakakaakit an tawong iyan. An pagtotokdo sa Biblia nakatabang sa sako na pahalagahan an sakong agom, na kaibaiba ko sa laog na nin kadakol na taon.” An konseho sa Biblia na “mayo logod nin siisay man na magtraydor sa agom na babae kan saimong pagkahoben” nagkaigwa nin importanteng kabtang sa buhay ni Roberto. (Malaquias 2:15) Sa ano pang ibang bagay kita puedeng makinabang sa hatol nin Dios?

An Pagpadakula sa Satong mga Aki

Kaidtong dakol nang dekada an nakaagi nagin popular an ideya na sa pagpadakula kan saindang mga aki, an mga magurang maninigo na dai magtao nin kadakol na limite. Garo baga rasonable an pagtogot sa mga aki na gumibo kan sadiri nindang mga desisyon manongod sa kun paano mag-iisip asin magawe. An obheto iyo na dai pagpogolan an saindang pagtalubo. Sa nagkapirang lugar, nagkaigwa ngani nin bakong gayong pormal na mga sistema nin edukasyon na dian, kabilang sa iba pang bagay, an mga estudyante  puedeng magdesisyon kun baga sinda malaog sa klase o dai asin puedeng pumili kun gurano kadakol na pag-aling-aling o pagtotokdo an aakoon ninda. An reglamento kan sarong eskuelahan na arog kaini iyo na “togotan an mga aki na maeksperyensiahan an lubos na pakamate nin pagigin dai hinuhusgaran asin pinapakiaraman kan mga nasa edad na.” Ngonyan, may mga parakonseho sa gawe-gawe nin tawo na kinukuestion pa man giraray an mga pakinabang kan pagtao nin nagkapirang klase nin disiplina, dawa sa mga situwasyon na iniisip kan mga magurang na kaipuhan na magtao nin mamomoton na disiplina.

Ano an nagin resulta? Kadakol na tawo an naniniwala na an mapagkonsinteng mga paagi nin pagpadakula sa mga aki nagtatao sa mga aki nin sobrang katalingkasan. Sa paniwala ninda, ini an dahelan kan pag-orog nin krimen asin paggamit nin droga.” An sarong surbey sa Estados Unidos naghahayag na haros 70 porsiento kan mga hinapot an nagsasaboot na an mga aki asin mga hoben dai nag-aako nin igong paggiya nin magurang na kaipuhan ninda. Kan nagmamaigot na ipaliwanag an mga pambabadil sa eskuelahan asin iba pang grabeng krimen na nakokomiter kan mga tinedyer, binabasol kan dakol an “pagigin haluag kan mga magurang.” Asin dawa kun an mga resulta bako man na makaturotristeng marhay, inaani kan mga magurang asin aki an mapait na mga bunga kan napasalang pagpadakula sa mga aki.

Ano an sinasabi kan Biblia mapadapit digdi? An hatol kan Kasuratan iyo na an autoridad kan mga magurang maninigong gamiton na may pagkamoot saka may karigonan. An Biblia nagsasabi: “An kakablasan nagagakot sa puso nin aki; an pamakol sa pagdisiplina iyo an mapaharayo kaiyan sa saiya.” (Talinhaga 22:15) Siempre, an gabos na disiplina nin magurang maninigong magin angay sa mga kamugtakan. Maninigong ginigiyahan nin kahoyoan, pagpopogol sa sadiri, asin konsiderasyon an ano man na itinataong disiplina. Sa siring iyan sarong tanda nin pagkamoot. An paggamit kan autoridad nin magurang sa mamomoton na paagi, bakong sa daing herak na kabangisan, an pinakaposibleng magin mapanggana.

May naheheling na marahay na mga resulta sa pag-aplikar kan sadol na ini. Si Arturo, sarong 30 anyos na lalaki sa Mejico na nag-agom kasuarin pa sana, nagsasabi: “Lininaw sa sakong mga tugang na lalaki asin sa sako kan samong ama na sia asin an sakong ina an may autoridad sa pamilya. Dai sinda noarin man nagduwaduwa na disiplinahon kami. Pero, pirme sindang may panahon na makipag-olay sa samo. Ngonyan na nasa edad na, pinapahalagahan ko an marigon na buhay na nakakamtan ko, asin aram ko na sa pankagabsan iyan resulta kan marahay na paggiya na naako ko.”

 Aprobetsaran an Pinakakapakipakinabang na Hatol

Nasa Tataramon nin Dios, an Biblia, an pinakakapakipakinabang na hatol na makukua nin katawohan. An paggiya kaiyan bako sanang sa areglo nin pamilya. Nakakatabang iyan na masangkapan kita sa dakol na paagi huli ta tinotokdoan kita kaiyan kun paano gumawe sa sarong kinaban na an kadaklan habong akoon na an sarong mas halangkaw na Gikanan nin kadonongan an maninigong gumiya sa saindang buhay para sa ikakarahay mismo ninda.

Si Jehova Dios, an Kaglalang sa katawohan, nagtao kan garantiyang ini paagi sa salmistang si David: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.” (Salmo 32:8) Naiimahinar daw nindo kun ano an boot sabihon kan pagbantay sa sato kan Kaglalang tanganing maprotehiran kita sa mga peligro? Pero iyo ini an hapot sa lambang saro sa sato: ‘Mapakumbaba ko daw na aakoon an nagpoprotehir na paggiya ni Jehova?’ Mamomoton na sinasabihan kita kan saiyang Tataramon: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”​—Talinhaga 3:​5, 6.

An pakamidbid ki Jehova nangangaipo nin paghihingoa asin dedikasyon, pero kayang gibohon iyan kan katawohan paagi sa Biblia. An pamumuhay na irinerekomendar nia “may panuga sa buhay ngonyan asin sa madatong.” Iyan totoong may dakulang pakinabang kun iisipon an mga pakinabang na iinaalok kaiyan.​—1 Timoteo 4:8; 6:6.

Kun nagugustohan nindo an pakarorop na iinaalok kan Biblia asin an mga bendisyon na resulta kan pamumuhay kaoyon kaiyan, gibohon na prioridad sa saindong buhay an pagbasa asin paghorophorop sa Tataramon nin Dios. An paggibo kaiyan matabang saindo na mapangganang maatubang an mga angat ngonyan asin an ano man na maabot sa ngapit. Dugang pa, mapapasaindo an paglaom na mabuhay sa bagong kinaban nin Dios, kun saen an gabos totokdoan ni Jehova asin an saindang katoninongan magigin abunda.​—Isaias 54:13.

[Ritrato sa pahina 5]

An hatol kan Biblia puedeng makapasarig sa bogkos nin pag-agoman

[Mga Ritrato sa pahina 6]

An hatol kan Biblia iyo an basehan para sa marahay na paggiya, pero tinotogotan man kaiyan an paglilibang

[Mga Ritrato sa pahina 7]

An mga nag-aaplikar kan hatol kan Biblia puedeng magkaigwa nin balanseng buhay