Si Jehova, an Satong ‘Pailihan sa mga Panahon nin Kasakitan’

“An kaligtasan kan mga matanos gikan ki Jehova; sia an saindang pailihan sa panahon nin kasakitan.”​—SALMO 37:39.

1, 2. (a) Ano an ipinamibi ni Jesus sa kapakanan kan saiyang mga disipulo? (b) Ano an kabotan nin Dios mapadapit sa saiyang banwaan?

SI Jehova makakamhan sa gabos. May kapangyarihan siang protehiran an maimbod na mga nagsasamba sa saiya sa ano man na paagi na booton nia. Puede nia nganing isiblag sa kinaban an saiyang banwaan sa pisikal na paagi asin ibugtak sinda sa sarong ligtas asin toninong na kamugtakan. Minsan siring, mapadapit sa saiyang mga disipulo, si Jesus namibi sa saiyang langitnon na Ama: “Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot.”​—Juan 17:15.

² Dai binoot ni Jehova na “haleon [kita] sa kinaban.” Imbes, kabotan nia na kita mamuhay sa tahaw kan pankagabsan na mga tawo sa kinaban na ini tanganing ibalangibog sa iba an saiyang mensahe nin paglaom asin karangahan. (Roma 10:13-15) Alagad, siring kan ipinasentido ni Jesus sa saiyang pamibi, paagi sa pamumuhay sa kinaban na ini, kita nakalantad sa “maraot.” An suwayan na katawohan asin maraot na espiritung mga puersa nagtatao nin dakol na kolog asin labi-labing kamondoan, asin an mga Kristiano bakong libre sa kasakitan.​—1 Pedro 5:9.

3. Anong katunayan an dapat na atubangon dawa kan maimbod na mga nagsasamba ki Jehova, alagad anong karangahan an manonompongan niato sa Tataramon nin Dios?

³ Sa irarom nin siring na mga kasakitan, natural sanang makamate nin pagkadesganar sa panapanahon. (Talinhaga 24:10) An rekord kan Biblia igwa nin dakol na estorya nin mga maimbod na nag-agi nin kasakitan. “Dakol an kalamidad kan matanos,” an sabi kan salmista, “alagad sa gabos na iyan iliniligtas sia ni Jehova.” (Salmo 34:19) Iyo, may mga nangyayaring maraot dawa sa “matanos.” Arog kan salmistang si David, kun beses tibaad ngani kita ‘namamagol asin lupaypay nang biyo.’ (Salmo 38:8) Pero, nakakarangang maaraman na “si Jehova harani sa mga laglag an puso; asin an mga nasasakitan an espiritu saiyang iliniligtas.”​—Salmo 34:18; 94:19.

4, 5. (a) Kaoyon kan Talinhaga 18:​10, ano an dapat niatong gibohon tanganing makamtan niato an proteksion nin Dios? (b) Ano an nagkapirang espesipikong lakdang na puede niatong gibohon tanganing mag-ako kan tabang nin Dios?

⁴ Kaoyon kan pamibi ni Jesus, si Jehova talagang nagbabantay sa sato. Sia an satong “pailihan sa panahon nin kasakitan.” (Salmo 37:39) An libro nin Talinhaga naggagamit nin kaagid na pananaram  kan iyan magsabi: “An ngaran ni Jehova makosog na torre. Dian minadalagan an matanos asin tinatawan nin proteksion.” (Talinhaga 18:10) An tekstong ini naghahayag nin sarong pundamental na katotoohan manongod sa mamomoton na pagmakolog ni Jehova sa saiyang mga linalang. An Dios nagtatao nin proteksion nangorogna sa mga matanos na aktibong naghahanap sa saiya, na garo baga nagdadalagan kita pasiring sa sarong makosog na torre tanganing magpahipli.

⁵ Kun napapaatubang sa masakit na mga problema, paano kita makakadalagan ki Jehova para sa proteksion? Estudyaran niato an tolong mahalagang marhay na lakdang na puede niatong gibohon tanganing akoon an tabang ni Jehova. Enot, dapat kitang dumolok sa satong langitnon na Ama sa pamibi. Ikaduwa, maninigo kitang humiro kaoyon kan saiyang banal na espiritu. Asin ikatolo, dapat kitang magpasakop sa areglo ni Jehova paagi sa pakikiasosyar sa mga kapwa Kristiano na puedeng makapagian kan satong kasakitan.

An Kapangyarihan nin Pamibi

6. Paano minamansay kan tunay na mga Kristiano an pamibi?

⁶ Irinerekomendar nin nagkapirang eksperto sa salud an pamibi bilang bolong sa depresyon asin tension. Minsan ngani puedeng totoo na an toninong na oras nin garo mapagngayongayong paghorophorop tibaad makaginhawa sa tension, makakaginhawa man an pagdangog sa nagkapirang tanog nin naturalesa o dawa an masahe sa likod. Dai minemenos kan tunay na mga Kristiano an halaga nin pamibi na ibinibilang sana iyan na sarong pampaginhawang terapi. Minamansay niato an pamibi bilang reberensial na pakipagkomunikar sa Kaglalang. Kalabot sa pamibi an satong debosyon asin kompiansa sa Dios. Iyo, an pamibi kabtang kan satong pagsamba.

7. Ano an boot sabihon nin pagpamibi na may kompiansa, asin paano kita tinatabangan kan siring na mga pamibi na makayanan an kasakitan?

⁷ An satong mga pamibi dapat na may kaibang pakamate nin kompiansa, o pagtitiwala, ki Jehova. Si apostol Juan nagsurat: “Iyo ini an satong mapapanarigan mapadapit sa saiya, na, minsan ano an satong hagadon segun sa saiyang kabotan, dinadangog nia kita.” (1 Juan 5:14) Si Jehova, an Supremong Persona, an iyo sanang tunay asin makakamhan sa gabos na Dios, talagang nagtatao nin espesyal na atension sa odok na mga pamibi kan mga nagsasamba sa saiya. Nakakaranga dawa an pakaaram sana na dinadangog kita kan satong mamomoton na Dios kun sinasabi niato sa saiya an satong mga kahaditan asin problema.​—Filipos 4:6.

8. Taano an maimbod na mga Kristiano ta dai noarin man maninigong makamate na nasusupog o alangan kun minadolok ki Jehova sa pamibi?

⁸ An maimbod na mga Kristiano dai noarin man maninigong makamate na nasusupog, alangan, o daing kompiansa kun minadolok ki Jehova sa pamibi. Totoo, kun kita desganado sa satong sadiri o nagagabatan sa mga problema, tibaad mayo kita pirme nin tendensia na dumolok ki Jehova sa pamibi. Sa siring na mga pangyayari marahay na girumdomon niato na si Jehova ‘nagpapaheling nin pagkaherak sa saiyang mga nagsasakit nin makuri’ asin na sia “nagraranga sa mga napukan.” (Isaias 49:13; 2 Corinto 7:6) Kaipuhan niato lalo na sa panahon  nin labi-labing kamondoan asin kasakitan na dumolok na may kompiansa sa satong langitnon na Ama bilang satong pailihan.

9. Ano an kabtang kan pagtubod kun kita minadolok sa Dios sa pamibi?

⁹ Tanganing lubos na makinabang sa pribilehio nin pamibi, dapat na kita may tunay na pagtubod. An Biblia nagsasabi na “an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) An pagtubod bako sanang basta paniniwala na nag-eeksister an Dios, na “sia iyo nanggad.” Kalabot sa tunay na pagtubod an makosog na paniniwala sa kakayahan asin pagmawot nin Dios na balosan an satong pamumuhay nin makinuyog sa saiya. “An mga mata ni Jehova nasa mga matanos, asin an saiyang mga talinga nasa saindang pagngayongayo.” (1 Pedro 3:12) Paagi sa dayaday na pag-isip kan mamomoton na pagmakolog ni Jehova sa sato nagkakaigwa nin espesyal na kahulogan an satong mga pamibi.

10. Dapat na magin ano an satong mga pamibi tanganing akoon niato an espirituwal na pansustenir hale ki Jehova?

¹⁰ Si Jehova naghihinanyog sa satong mga pamibi kun iyan ginigibo nin bilog na puso. An salmista nagsurat: “Nag-apod ako sa bilog kong puso. Simbaga ako, O Jehova.” (Salmo 119:145) Bakong arog kan ritualistikong mga pamibi sa dakol na relihion, an satong mga pamibi bakong mekanikal o daing kaganagana. Kun kita namimibi ki Jehova sa satong “bilog na puso,” an satong mga tataramon pano nin kahulogan asin katuyohan. Pakatapos nin siring kaodok na mga pamibi, nagpopoon na maeksperyensiahan niato an kaginhawahan na bunga kan pagtao niato ‘ki Jehova kan pagabat sa sato.’ Siring kan ipinapanuga kan Biblia, “sia mismo matabang” sa sato.​—Salmo 55:22; 1 Pedro 5:​6, 7.

An Espiritu nin Dios an Satong Paratabang

11. Ano an sarong paagi na sinisimbag kita ni Jehova kun kita ‘padagos na naghahagad’ kan saiyang tabang?

¹¹ Si Jehova bako sanang an Paradangog nin pamibi kundi siring man an Parasimbag kaiyan. (Salmo 65:2) Si David nagsurat: “Sa aldaw kan sakong kasakitan maapod ako sa saimo, huli ta sisimbagon mo ako.” (Salmo 86:7) Kaya, inenkaminar ni Jesus an saiyang mga disipulo na ‘padagos na maghagad’ kan tabang ni Jehova huli ta “an Ama sa langit” ‘matao nin banal na espiritu sa mga naghahagad sa saiya.’ (Lucas 11:9-13) Iyo, an puersa aktiba nin Dios nagseserbing katabang, o pararanga, sa saiyang banwaan.​—Juan 14:16.

12. Paano kita matatabangan kan espiritu nin Dios kun garo baga magabaton an mga problema?

¹² Dawa kun kita napapaatubang sa mga kasakitan, an espiritu nin Dios puedeng magtao sa sato nin “puersa na labi sa ordinaryo.” (2 Corinto 4:7) Si apostol Pablo, na nagtagal nin dakol na nakakatension na situwasyon, may kompiansang nagsabi: “Igwa ako kan kosog para sa gabos na bagay huli sa saiya na nagtatao nin puersa sa sako.” (Filipos 4:13) Siring man, dakol na Kristiano ngonyan an nakamate nin pagbalik kan saindang espirituwal asin emosyonal na kosog bilang kasimbagan sa saindang mga pagngayongayo. Sa parate, an masakit na mga problema bako man garo baga magabaton pakatapos na akoon niato an tabang kan espiritu nin Dios. Huli sa kosog na ini na tao nin Dios, makakasabi kita, siring kan apostol: “Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinapabayaan; kami ilinalampog, alagad dai nalalaglag.”​—2 Corinto 4:​8, 9.

13, 14. (a) Paano si Jehova nagin satong pailihan paagi sa saiyang nasusurat na Tataramon? (b) Paano personal na nakatabang sa saindo an pag-aplikar kan mga prinsipyo sa Biblia?

¹³ Ipinasabong asin iningatan man kan banal na espiritu an nasusurat na Tataramon nin Dios para sa kapakinabangan niato. Paano si Jehova nagigin satong pailihan sa mga panahon nin kasakitan paagi sa mga pahina kan saiyang Tataramon? An sarong paagi iyo an pagtao sa sato nin praktikal na kadonongan asin kakayahan sa pag-iisip. (Talinhaga 3:21-24) Sinasanay kan Biblia an satong kakayahan nin isip asin pinapaoswag an satong kakayahan na mangatanosan. (Roma 12:1) Paagi sa regular na pagbasa asin pag-adal kan Tataramon nin Dios, kasabay kan pag-aplikar kaiyan, an satong ‘kakayahan nin pagmansay mapapatuod na mamidbid kun ano an tama sagkod an sala.’ (Hebreo 5:14) Tibaad personal nang naeksperyensiahan nindo kun paano kamo natabangan kan mga prinsipyo sa Biblia na gumibo nin madonong na mga desisyon kun kamo napapaatubang sa mga problema. An Biblia nagtatao sa sato nin pagkaalisto nin isip na makakatabang sa sato na makanompong  nin praktikal na mga solusyon sa masakit na mga problema.​—Talinhaga 1:4.

¹⁴ An Tataramon nin Dios nagtatao sa sato nin saro pang makukuanan nin kosog​—an paglaom sa kaligtasan. (Roma 15:4) Sinasabi sato kan Biblia na an maraot na mga bagay dai magpapadagos sa panahon na daing talaan. An ano man na kahorasaan na inaagihan niato temporaryo sana. (2 Corinto 4:16-18) Igwa kita kan “paglaom sa buhay na daing katapusan na ipinanuga nin Dios, na dai makakapagputik, bago an mga panahon na daing sagkod.” (Tito 1:2) Kun kita naggagayagaya sa paglaom na iyan, na dayaday na iniisip an maogmang ngapit na ipinapanuga ni Jehova, makakatagal kita sa irarom nin kahorasaan.​—Roma 12:12; 1 Tesalonica 1:3.

An Kongregasyon​—Sarong Kapahayagan kan Pagkamoot nin Dios

15. Paano an mga Kristiano puedeng magin bendisyon sa lambang saro?

¹⁵ An saro pang probisyon hale ki Jehova na makakatabang sa sato sa mga panahon nin kasakitan iyo an asosasyon niato sa Kristianong kongregasyon. An Biblia nagsasabi: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” (Talinhaga 17:17) An Tataramon nin Dios ineenkaminar an gabos sa kongregasyon na magtaong onra sa lambang saro asin magkaminorootmootan. (Roma 12:10) “An lambang saro maghanap, bakong kan saiyang karahayan, kundi kan sa iba,” an isinurat ni apostol Pablo. (1 Corinto 10:24) An pagkaigwa kan siring na kaisipan makakatabang sa sato na magturuhok sa mga pangangaipo nin iba imbes na sa satong sadiring mga kasakitan. Kun itinatao niato an satong panahon asin kosog para sa iba, bako sanang natatabangan niato sinda kundi nakakaeksperyensia man kita nin kaogmahan asin satispaksion na nagpapangyari sa mga pagabat sa sato na magin mas madaling kayanon.​—Gibo 20:35.

16. Paano puedeng magin nakakaparigon sa boot an lambang Kristiano?

¹⁶ Dakula an magigibo kan maygurang sa espirituwal na mga lalaki asin babae sa pagpapakosog sa iba. Tanganing magibo iyan, ginigibo ninda na sinda magin madaling dolokon asin libreng kaolayon. (2 Corinto 6:11-13) An kongregasyon tunay na nakikinabang kun an gabos nagtatao nin panahon na komendaran an mga hoben, pakosogon an bagohan na mga nagtutubod, asin parigonon an boot kan mga nagmomondo nin makuri. (Roma 15:7) An sa magturugang na pagkamoot makakatabang man sa sato na likayan an espiritu nin pagdeskompiar sa lambang saro. Maninigo na dai tolos kita magkonklusyon na an personal na mga problema tanda nin espirituwal na kaluyahan. Angay sanang sinasadol ni Pablo an mga Kristiano na “magtaram na may pagranga sa mga kalag na nagmomondo nin makuri.” (1 Tesalonica 5:14) Ipinapaheling kan Biblia na maski an maimbod na mga Kristiano nakakaeksperyensia nin kasakitan.​—Gibo 14:15.

17. Igwa kita nin anong mga oportunidad na pakosogon an bogkos nin Kristianong kasararoan nin magturugang?

¹⁷ An Kristianong mga pagtiripon nagtatao nin marahayon na oportunidad para sa sato na rangahon  asin parigonon an boot nin lambang saro. (Hebreo 10:​24, 25) An mamomoton na interaksion na ini bako sanang sa mga pagtiripon kan kongregasyon ginigibo. Imbes, an banwaan nin Dios naghahanap man nin mga oportunidad na magkaigwa nin kapakipakinabang na pakikiasosyar sa impormal na mga kamugtakan. Kun may dumatong na masakit na mga situwasyon, tatabangan tolos niato an lambang saro huli ta naestablisar na an makosog na bogkos nin pagkakatood. Si apostol Pablo nagsurat: “Dai magkaigwa nin pagkabaranga dian sa hawak, kundi magkaigwa nin . . . pangataman sa lambang saro an mga kabtang kaiyan. Asin kun an sarong kabtang nagdudusa, an gabos na ibang kabtang nagdudusa na kadamay kaiyan; o kun an sarong kabtang napapamuraway, an gabos na ibang kabtang naggagayagaya na kadamay kaiyan.”​—1 Corinto 12:​25, 26.

18. Anong tendensia an maninigo niatong likayan kun kita pinapanluyahan nin boot?

¹⁸ Kun beses, tibaad pinapanluyahan kitang marhay nin boot na makiasosyar sa mga kapwa Kristiano. Maninigo niatong labanan an siring na mga pagmate tanganing dai mawara sa sato an karangahan asin tabang na ikakatao kan mga kapagtubod. An Biblia nagpapatanid sa sato: “An isinusuway an sadiri mahanap kan maimot niang kamawotan; sasarongaton nia an gabos na praktikal na kadonongan.” (Talinhaga 18:1) An satong mga tugang na lalaki asin babae kapahayagan nin pagmakolog nin Dios sa sato. Kun rerekonoseron niato an mamomoton na probisyon na iyan, makakanompong kita nin kaginhawahan sa mga panahon nin kasakitan.

Papagdanayon an Positibong Aktitud

19, 20. Paano kita tinatabangan kan Kasuratan na haleon an negatibong mga kaisipan?

¹⁹ Kun nadedesganar asin namomondo, madaling magparaisip nin negatibong mga bagay. Halimbawa, kun nag-aagi nin problema, an nagkapira tibaad magpoon na pagdudahan an sainda mismong espirituwalidad, na nagkokonklusyon na an saindang kasakitan sarong tanda nin dai pag-oyon nin Dios. Pero girumdomon na dai binabalo ni Jehova an siisay man paagi sa “maraot na mga bagay.” (Santiago 1:13) “Bakong gikan sa puso na [an Dios] nagpasakit o nagpamondo sa mga aki nin mga tawo,” an sabi kan Biblia. (Lamentacion 3:33) Sa kabaliktaran, si Jehova namomondong marhay kun nagdudusa an saiyang mga lingkod.​—Isaias 63:​8, 9; Zacarias 2:8.

²⁰ Si Jehova “an Ama nin maboot na mga pagkaherak asin an Dios nin gabos na karangahan.” (2 Corinto 1:3) Nagmamakolog sia sa sato, asin ilalangkaw nia kita sa itinalaan na panahon. (1 Pedro 5:​6, 7) An dayaday na pag-isip kan kapadangatan nin Dios sa sato makakatabang sa sato na mapagdanay an positibong aktitud, na maggayagaya pa ngani. Si Santiago nagsurat: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo.” (Santiago 1:2) Taano? Sia nagsimbag: “Huli ta sa pagigin inooyonan aakoon nia an korona nin buhay, na ipinanuga ni Jehova sa mga padagos na namomoot saiya.”​—Santiago 1:12.

21. Ano man na kasakitan an inaatubang niato, anong garantiya an itinatao nin Dios sa mga maimbod sa saiya?

²¹ Siring kan patanid sato ni Jesus, sa kinaban magkakaigwa kita nin kahorasaan. (Juan 16:33) Alagad an Biblia nanunuga na daing ‘kahorasaan o kasakitan o paglamag o gutom o kahubaan o peligro’ na makakapasuhay sa sato sa pagkamoot ni Jehova asin sa pagkamoot kan saiyang Aki. (Roma 8:​35, 39) Kanigoan kanakakarangang maaraman na temporaryo sana an ano man na kasakitan na inaatubang niato! Mientras tanto, mantang hinahalat niato an katapusan kan pagdusa nin tawo, binabantayan kita kan satong mamomoton na Ama, si Jehova. Kun kita madolok sa saiya para sa proteksion, sia magigin “sarong ligtas na kalangkawan para sa siisay man na biyong pinapanluyahan nin boot, sarong ligtas na kalangkawan sa panahon nin kasakitan.”​—Salmo 9:9.

Ano an Nanodan Niato?

• Ano an maninigong asahan kan mga Kristiano mantang nabubuhay sa maraot na kinaban na ini?

• Paano magigin pampakosog an satong odok na mga pamibi kun kita napapaatubang sa mga kasakitan?

• Paanong sarong paratabang an espiritu nin Dios?

• Ano an magigibo niato tanganing tabangan an lambang saro?

[Mga Hapot Para sa Pag-adal]

[Ritrato sa pahina 18]

Dapat niatong hanapon si Jehova na garo baga kita nagdadalagan pasiring sa sarong makosog na torre

[Mga Ritrato sa pahina 20]

Ginagamit kan mga maygurang sa espirituwal an lambang oportunidad tanganing komendaran asin parigonon an boot nin iba