An Paghanap nin Kaogmahan

PIRA pa sanang taon an nakaagi, hinapot an mga tawo sa Alemania, Estados Unidos, Gran Britania, asin Pransia, “Ano an kaipuhan tanganing magin maogma?” Sa mga ininterbio, 89 porsiento an nagsabi na kaipuhan an pagkaigwa nin marahay na salud; 79 porsiento an sinambit an nakakakontentong pag-agoman o pag-ibanan; 62 porsiento an nagsabi na an mga balos sa pagigin magurang; asin 51 porsiento an nagsasaboot na sarong mapangganang karera an kaipuhan sa kaogmahan. Asin dawa ngani an kadonongan na komun sa kadaklan nagpapatanid na an kuarta dai naggagarantiya nin kaogmahan, 47 porsiento kan mga hinapot an kombensido na iyan naggagarantiya nin kaogmahan. Ano an ipinapaheling kan mga katunayan?

Enot, helingon an koneksion daa kan kuarta asin kaogmahan. An sarong surbey sa sanggatos na pinakamayaman na mga tawo sa Estados Unidos nagpapaheling na bako man sindang mas maogma kisa mga tawo sa pankagabsan. Apuera kaini, minsan ngani dakol sa Estados Unidos an haros nadoble an saindang materyal na mga rogaring sa nakaaging tolong dekada, bako man sindang mas maogma kisa kan dati, segun sa mga eksperto sa mental na salud. Sa katunayan, an sarong bareta nagkokomento: “Sa nakaaging peryodo man sanang iyan, luminangkaw an kabilangan nin mga may depresyon. Natriple an paghugot nin mga tinedyer. Nadoble an kabilangan nin mga nagdidiborsio.” Sa mga 50 laen-laen na nasyon, an mga parasiyasat na pinag-adalan an koneksion kan kuarta asin kaogmahan nakaabot sa konklusyon na dai puedeng bakalon kan kuarta an kaogmahan.

Sunod, gurano kaimportante sa kaogmahan an mga bagay na arog kan marahay na salud, nakakakontentong pag-agoman, asin sarong mapangganang karera? Bueno, kun an mga bagay na ini iyo nanggad an kaipuhan tanganing magin maogma, kumusta an minilyon na tawong mayo nin marahay na salud asin an gabos na mayo nin nakakakontentong pag-agoman? Kumusta an mga mag-agom na mayong mga aki asin an gabos na lalaki asin babae na mayo nin mapangganang karera? An gabos daw na indibiduwal na siring kaiyan nakatalaga na sa sarong mamondong buhay? Asin mawawara daw an ipinapamugtak na kaogmahan kan mga sa presente may marahay na salud asin nakakakontentong pag-agoman kun mabago an situwasyon ninda?

Naghahanap daw Kita sa Tamang mga Lugar?

An gabos na tawo gustong magin maogma. Bako ining makangangalas huling an Kaglalang nin tawo ilinaladawan bilang “maogmang Dios,” asin an tawo ginibo sa ladawan nin Dios. (1 Timoteo 1:11; Genesis 1:​26, 27) Huli kaini, normal sana sa mga tawo na maghanap nin kaogmahan. Minsan siring, nanompongan nin dakol na an pagkamit nin kaogmahan garo pagpogol nin baybay sa kamot​—pareho iyan madaling mawara.

 Pero posible daw na may mga sobra na an paghihingoa tanganing magkamit nin kaogmahan? An pilosopong pansosyedad na si Eric Hoffer naghohona nin siring. Sia nagkokomento: “An paghanap nin kaogmahan iyo an saro sa pangenot na mga gikanan nin kamondoan.” Totoo nanggad iyan kun hinahanap ta an kaogmahan sa salang mga lugar. Kun siring kaiyan, seguradong makakaeksperyensia kita nin pagkadesganar asin pagkasudya. An pagmamaigot na yumaman; pagmamaigot na magin bantog o rekonoseron; pag-aabot kan mga pasohan sa politika, sosyal, o pagbuhay; o pamumuhay na sadiri sana an iniisip asin an tolos na pagpanigo sa sadiri gabos nasudya sa pagtao nin kaogmahan. Bakong makangangalas may nagkapira na inako an pagmansay nin sarong autor na ipinahayag sa paaging kabaliktaran sa linalaoman na nagsabi: “Kun kita mapondo sana sa pagmamaigot na magin maogma kita puedeng magin maogma nin tama sana”!

Makahulogan nanggad, an surbey na nasambitan sa enotan kan artikulong ini nagpapaheling man na 4 sa 10 katawo an nagsasaboot na an kaogmahan resulta nin paggibo nin marahay asin pagtabang sa iba. Asin idinodoon kan 1 sa kada 4 na an pagtubod asin relihiosong kombiksion may dakulang kabtang sa pagigin maogma. Malinaw nanggad, kaipuhan na siyasaton na marhay niato kun ano an kaipuhan tanganing magin totoong maogma. An minasunod na artikulo makakatabang sa sato na gibohon iyan.

[Mga Ritrato sa pahina 3]

Dakol an naghohona na an kuarta, sarong nakakakontentong buhay pampamilya, o mapangganang karera iyo an pinakaliabe nin kaogmahan. Oyon daw kamo?