Ano an Maninigo Nindong Ipamana sa Saindong mga Aki?

SI Pavlos, na sarong de pamilyang tawo na taga timog Europa, bihirang makaibahan sa harong an saiyang agom asin mga aki​—duwang aking babae, na 13 asin 11 anyos an edad, asin sarong 7 anyos na aking lalaki. Pitong aldaw kada semana na nagtatrabaho si Pavlos nin duwang halawig na relyibo, sa pagprobar na gumanar nin igong kuarta tanganing kamtan an saiyang pangarap. Gusto niang ibakal nin tigsarong apartment an saiyang mga aking babae, asin gusto niang magpundar nin sarong sadit na negosyo para sa saiyang aking lalaki. An saiyang agom, si Sofia, nagtatrabaho tanganing makatipon nin mga tamong asin kobrekama, kagamitan sa kusina, mga gamit sa pagkakan na porselana, asin kubyertos para sa magigin mga pamilya kaini sa ngapit. Kan hapoton kun taano ta sobrang higos ninda, saro an saindang simbag, “Para sa kapakanan kan samong mga aki!”

 Kapareho ni Pavlos asin Sofia, ginigibo kan dakol na magurang sa bilog na kinaban an pinakamakakaya ninda tanganing tawan nin marahay na kapinonan sa buhay an saindang mga aki. An nagkapira nagtatagama nin kuarta na magagamit kan mga aki sa ngapit. An iba sinesegurado na an saindang aki makakua nin igong edukasyon asin makanood nin mga abilidad na magigin kapakipakinabang sa maabot na panahon. Minsan ngani an siring na mga regalo ibinibilang kan kadaklan na magurang na pamana bilang kapahayagan nin pagkamoot, an paggibo nin siring na mga probisyon sa parate nagtatao nin dakulang sakit sa mga magurang na otobon an mga linalaoman kan mga paryente, katood, asin kan komunidad na ineerokan ninda. Kun siring, an nahahadit na mga magurang angay na naghahapot, ‘Gurano kadakol an maninigo niamong itao sa samong mga aki?’

Paggibo nin mga Probisyon Para sa Ngapit

Bako sanang naturalmente kundi sono man sa Kasuratan na an mga magurang gumibo nin mga probisyon para sa saindang mga aki. Sinabihan ni apostol Pablo an mga Kristiano kan kaaldawan nia: “An mga magurang maninigong maggibo nin probisyon para sa saindang mga aki, bakong an mga aki para sa saindang mga magurang.” (2 Corinto 12:​14, The New English Bible) Sinabi pa ni Pablo na sarong seryosong paninimbagan na mag-asikaso an magurang. Sia nagsurat: “Tunay na kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Kadakol kan pagkasaysay sa Biblia na nagpapaheling na an mga bagay may labot sa pamana mahalaga para sa mga lingkod nin Dios kan mga panahon kan Biblia.​—Rut 2:​19, 20; 3:9-13; 4:1-22; Job 42:15.

Minsan siring, kun beses nagigin sibot-sibot an mga magurang sa pagtao nin dakulang pamana para sa saindang mga aki. Taano? Sinasabi ni Manolis, sarong ama na nagbalyo sa Estados Unidos hale sa timog na Europa, an sarong dahelan: “An mga magurang na nagsapar nin grabeng  danyos kan Guerra Mundial II, makuring kakulangan nin kakanon asin kadukhaan, determinadong pakarhayon an buhay kan saindang mga aki.” Idinagdag pa nia: “Huli sa labi-labing pakamate ninda nin paninimbagan asin pagmawot na tawan nin pinakamarahay na posibleng pagpopoon sa buhay an saindang mga aki, kun beses nadadanyaran kan mga magurang an saindang sadiri.” Tunay nanggad, napag-iimotan nin nagkapirang magurang an saindang sadiri kan mga pangangaipo sa buhay o nagpaparatipid tanganing magtipon nin materyal na mga rogaring para sa saindang mga aki. Alagad madonong daw para sa mga magurang na gibohon iyan?

“Daing Kamanungdanan Asin Dakulang Kalamidad”

Si Hadeng Salomon kan suanoy na Israel nagpatanid mapadapit sa mga pamana. Sia nagsurat: “Ako, ako mismo, naongis sa gabos kong hinigosan na sakong pinaghigosan sa irarom kan aldaw, na sakong iwawalat para sa tawo na masunod sa sako. Asin siisay baga an makakaaram kun baga sia magigin madonong o mangmang? Minsan siring sia mangangapot sa gabos kong hinigosan na sakuyang pinaghigosan asin sakong pinagpahelingan nin kadonongan sa irarom kan aldaw. Ini man dai nin kapakanan. . . . Huli ta igwa nin tawo na an kahigosan may kadonongan asin may kaaraman patin may kahusayan, alagad sa tawo na dai naghigos sa siring na bagay itatao an kabtang kan sarong iyan. Ini man daing kamanungdanan asin dakulang kalamidad.”​—Eclesiastes 2:18-21.

Siring kan ipinapaliwanag ni Salomon, tibaad dai apresyaron kan mga nagreresibi nin pamana an bilog na halaga kaiyan huli ta bako man sinda mismo an nagpagal para dian. Bilang resulta, tibaad gamiton na may kamangmangan kan mga pinamanahan an pinaghigosan na tiponon nin mga magurang para sa sainda. Tibaad sayangon pa ngani ninda an siring na mga rogaring na pinagpagalan na makua. (Lucas 15:11-16) Kanigoan ‘kadaing kamanungdanan asin kadakulang kalamidad’ kaiyan!

Pamana Asin Kahanaban

Igwa pa nin sarong bagay na dapat isipon nin mga magurang. Sa mga kultura na interesadong marhay sa mga rogaring na minana asin mga itinao sa kinasal, an mga aki tibaad magin mahanab, na naghahagad nin propiedad, o dote, na labi sa rasonableng ikakatao nin mga magurang. “Herak man sa ama na may duwa o tolong aking babae,” an subang totoo ni Loukas, sarong ama na taga Grecia. Sia nagsasabi: “Tibaad ikomparar nin mga aking babae an kayang itao kan saindang ama sa ‘abundang’ tinitipon nin ibang mga magurang para sa saindang mga aki. Tibaad sabihon ninda na maiinaan an posibilidad na maagom sinda kun mayo sinda nin darudakulang dote.”

Si Manolis, na nasambitan kasubago, nagsasabi: “Tibaad pahaloyon nin sarong soltero an pag-ilusyon sagkod na an ama kan magigin nobya manuga sa saiya na may itatao para sa nobya, na sa parate propiedad o darudakulang kuarta. Garo man sana iyan pangunguarta paagi sa patakot.”

An Biblia nagpapatanid tumang sa gabos na klase nin kahanaban. Si Salomon nagsurat: “An pamana nakukua paagi sa kahanaban sa primero, alagad  an ngapit kaiyan dai bebendisyonan.” (Talinhaga 20:21) Idinoon ni apostol Pablo: “An pagkamoot sa kuarta gamot nin gabos na klase nin nakakadanyar na bagay.”​—1 Timoteo 6:10; Efeso 5:5.

“An Kadonongan na May Kaibang Pamana”

Totoo, may halaga an pamana, alagad an kadonongan mas dakula an halaga kisa materyal na mga rogaring. Si Hadeng Salomon nagsurat: “An kadonongan na may kaibang pamana marahay asin kapakipakinabang . . . Huli ta an kadonongan para sa proteksion kun paanong an kuarta para sa proteksion; alagad an bentaha nin kaaraman iyo na an kadonongan mismo nagpapadanay na buhay sa mga nakakasadiri kaiyan.” (Eclesiastes 7:​11, 12; Talinhaga 2:7; 3:21) Minsan ngani nagtatao man nin proteksion an kuarta, na nagpapangyaring makua kan kagsadiri kaiyan an mga pangangaipo nia, iyan puede pa man giraray na mawara. Sa ibong na kampi, an kadonongan​—an kakayahan na gamiton an kaaraman sa pagresolber nin mga problema o sa pag-abot nin nagkapirang pasohan—puedeng magprotehir sa sarong tawo na dai gumibo nin kamangmangan na magsasapeligro kan sadiri. Kun nakabasar sa tamang diosnon na pagkatakot, puede iyan na makatabang sa saiya na magkamit nin buhay na daing sagkod sa bagong kinaban nin Dios na madali nang dumatong​—sarong mahal na marhay nanggad na pamana!​—2 Pedro 3:13.

Ginagamit kan Kristianong mga magurang an siring na kadonongan paagi sa pagbugtak nin tamang mga prioridad para sa saindang sadiri asin sa saindang mga aki. (Filipos 1:10) An materyal na mga bagay na tinitipon para magamit kan mga aki dai maninigong ipaorog kisa espirituwal na mga bagay. Inenkaminar ni Jesus an saiyang mga parasunod: “Kun siring, padagos na hanapon nguna an kahadean [nin Dios] asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) An mga magurang na nagbubugtak nin espirituwal na mga pasohan para sa saindang Kristianong pamilya makakalaom na babalosan nin igo. Isinurat ni Hadeng Salomon: “An ama nin sarong matanos siertong magigin magayagaya; an saro na nagigin ama sa sarong madonong ipaggagayagaya man sia. An saimong ama asin an saimong ina maggagayagaya, asin sia na nangaki sa saimo magigin magayagaya.”​—Talinhaga 23:​24, 25.

Sarong Nagdadanay na Pamana

Para sa mga Israelita kan suanoy, mahalagang marhay an mga bagay mapadapit sa minanang rogaring. (1 Hade 21:2-6) Minsan siring, sinadol sinda ni Jehova: “An mga tataramon na ini na ipinagboboot ko sa saimo ngonyan dapat na mamugtak sa saimong puso; asin dapat na itadom mo an mga iyan sa saimong aki asin magtaram ka manongod dian kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deuteronomio 6:​6, 7) Sinabihan man an Kristianong mga magurang: “Padagos na padakulaon [an saindong mga aki] sa disiplina asin pagtatanos nin isip ni Jehova.”​—Efeso 6:4.

Aram kan mga magurang na may espirituwal na pananaw na kaiba sa pagsustento sa saindang pamilya an pagtao nin instruksion hale sa Biblia. Si Andreas, na ama nin tolong aki, nagkokomento: “Kun manodan nin mga aki na iaplikar sa saindang buhay an diosnon na mga prinsipyo, sinda magigin mas andam para sa ngapit.” An siring na pamana nakapokus man sa pagtabang sa sainda na magkaigwa nin asin kultibaron an personal na relasyon sa saindang Kaglalang.​—1 Timoteo 6:19.

Napag-isipan na daw nindo an pag-andam para sa espirituwal na ngapit kan saindong aki? Halimbawa, ano an magigibo kan mga magurang kun an saindang aki naglilingkod sa bilog na panahon na ministeryo? Minsan ngani dai maninigong maghagad o mag-asa nin pinansial na suporta an sarong bilog na panahon na ministro, an mamomoton na mga magurang puedeng magdesisyon na ‘hirasan sia sono sa saiyang mga pangangaipo’ tanganing tabangan sia na magdanay sa bilog na panahon na paglilingkod. (Roma 12:13; 1 Samuel 2:​18, 19; Filipos 4:14-18) An siring na pagigin mapagsuportar siertong makakapaogma ki Jehova.

Kaya, kun siring, ano an maninigong itao nin mga magurang sa saindang mga aki? Apuera sa pagtao kan saindang materyal na mga pangangaipo, seseguradohon kan Kristianong mga magurang na mag-aako nin mayaman na espirituwal na mana an saindang mga aki na pakikinabangan ninda sagkod lamang. Sa paaging iyan, an mga tataramon na manonompongan sa Awit 37:18 magkakatotoo: “Aram ni Jehova an mga aldaw kan mga daing sala, asin an sainda mismong mana magpapadagos minsan sagkod sa panahon na daing talaan.”

[Mga Ritrato sa pahina 26, 27]

Anong ngapit an nasa isip nindo para sa saindong mga aki?