Kun Paano Mapapaglabanan an Pagkadesganar

NADEDESGANAR daw kamo? Sa panahon na ini nin kadaihan nin kasegurohan asin iriwal, dakol na tawo an nakakamate nin arog kaiyan. May mga nadedesganar huli ta mayo sinda nin trabaho. Inaatubang kan iba an resulta nin sarong aksidente. An iba pa nasasakitan sa mga problema sa pamilya, grabeng helang, o kapungawan.

Kun nadedesganar kamo, saen kamo puedeng dumolok para sa tabang? Minilyon sa bilog na kinaban an nakanompong nin karangahan sa pagbasa kan Tataramon nin Dios, an Biblia. Pinakosog liwat an boot ninda kan mga tataramon ni apostol Pablo, na nagsabi: “Omawon logod an Dios asin Ama kan satong Kagurangnan na si Jesu-Cristo, an Ama nin maboot na mga pagkaherak asin an Dios nin gabos na karangahan, na minaranga sa sato sa gabos niatong kahorasaan.” (2 Corinto 1:​3, 4) Taano ta dai basahon ini asin an iba pang teksto sa Biblia sa sadiri nindong Biblia? Sa paggibo kaiyan ‘mararanga an saindong puso asin mapaparigon kamo.’​—2 Tesalonica 2:17.

Makukua man an tabang tanganing mapaglabanan an pagkadesganar paagi sa pakikiasosyar sa mga naglilingkod ki Jehova. An Talinhaga 12:25 nagsasabi: “An kahaditan sa puso nin tawo iyo an mapaduko dian, alagad an marahay na tataramon iyo an nagpapagayagaya dian.” Kun minaatender kita sa Kristianong mga pagtiripon, nadadangog niato an “marahay na tataramon” na iyan, na “mahamis sa kalag asin bolong sa mga tolang.” (Talinhaga 16:24) Taano ta dai mag-atender sa sarong pagtiripon sa Kingdom Hall kan Mga Saksi ni Jehova tanganing maeksperyensiahan mismo nindo kun paano nanggad kamo mapapakosog kan siring na pagtiripon?

Puede man kamong makinabang sa kapangyarihan nin pamibi. Kun nagagabatan kamo sa mga kahaditan sa buhay, isabi nindo an kairairaroming mga saboot nindo sa “Paradangog nin pamibi.” (Salmo 65:2) Nasasabotan kita kan satong Kaglalang, si Jehova Dios, nin orog pa sa pakasabot niato sa satong sadiri. Makakaasa kita sa tabang nia. An saiyang Tataramon nanunuga sa sato: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Iyo, “an mga naglalaom ki Jehova magkakamit nin bagong puersa.”​—Isaias 40:31.

Tinawan kita ni Jehova Dios nin mapuersang mga probisyon na makakatabang sa sato na mapangganang mapaglabanan an pagkadesganar. Gagamiton daw nindo iyan?